राज्यपाल-मुलाकात
राज्यपाल रमेन डेका ले आज लोकभवन म छत्तीसगढ़ी भाषाविद मन ह मुलाकात करीन। ए दउरान छत्तीसगढ़ी भासा ल संविधान के आठवां अनुसूची म सामिल करे अउ एंखर संरक्षण, संवर्धन अउ विकास के बारे म गोठबात करे गीस। भाषाविद मन ह राज्यपाल ल छत्तीसगढ़ी भासा के प्राचीन, समृद्ध साहित्यिक परंपरा, व्याकरण, शब्दकोश अउ मानकीकरण के प्रक्रिया के बारे म जानकारी दीन। ओमन बतईन कि छत्तीसगढ़ी प्रदेस के राजभाषा अउ प्रमुख संपर्क भाषा हे अउ करीबन डेढ़ करोड़ लोगन मन ह एखर प्रयोग करथे।
राज्यपाल ह ए दिसा म पहल करत किहीन कि एखर बर एक समिति बनाय जाही। समिति डहार ले छत्तीसगढ़ी भासा के इतिहास, साहित्य, व्याकरण, शब्दकोश अउ आने-आने सामग्री ल इकट्ठा करे जाही। एखर बर बिसय के विद्धान अउ बिसेसज्ञ मन ले सुझाव घलो ले जाही।
राष्ट्रीय पोषण माह
केन्द्रीय महिला अउ बाल विकास मंत्रालय डहार ले नौवां राष्ट्रीय पोषण माह के सुरूआत काली नौ सितंबर के वाराणसी ले करे जाही। ए बछर मिशन सक्षम आंगनबाड़ी अउ पोषण टू प्वॉइंट जीरो के अंतर्गत राखे गे ए अभियान के थीम ‘‘हमारी आंगनबाड़ी हमारी जिम्मेदारी‘‘ राखे गेहे। पोषण माह पांच प्रमुख बिसय म केन्द्रित रइही।
उहें, छत्तीसगढ़ म राष्ट्रीय माह के दउरान प्रधानमंत्री मातृ वंदना योजना के तहत हरेक पात्र गर्भवती अउ धात्री माईलोगिन मन ल योजना ले जोड़े बर बिसेस अभियान चलाय जाही। उहें, पोषण मेला के माध्यम ले मिलेट्स, मौसमी फल, सब्जी-दाल, दूध ले जुड़े उत्पाद, मेवा अउ आने-आने प्रकार के पौष्टिक खाय-पीये के समान के उपयोगिता बताय जाही। संगेसंग आंगनबाड़ी केन्द्र मन म तीन ले छह बछर के लइका मन ल देवइया गरम खाना के गुणवत्ता अउ स्वच्छता उपर बिसेस निगरानी करे जाही।
राज्यपाल-वेब पोर्टल
राज्यपाल रमेन डेका ह काली रायपुर म निजी विश्वविद्यालय के जानकारी बर नवा वेब पोर्टल के शुभारंभ करीन। पोर्टल म प्राईवेट विश्वविद्यालय के पाठ्यक्रम, अकादमिक कैलेंडर, प्रवेश ले विद्यार्थी मनके जानकारी, अंकसूची अउ परीक्षा पाठ्यक्रम परिणाम रइही। एखर संगेसंग फीस, पीएचडी, शोध-निर्देसक, स्वीकृति अउ खाली पद के जानकारी घलो मिलही। एखर ले निजी विश्वविद्यालय मनके गतिविधि के संग पारदर्सिता अउ देखरेख ल बढ़ावा मिलही।
मुख्यमंत्री-आवासीय विद्यालय
मुख्यमंत्री विष्णुदेव साय ह सरगुजा जिला के शिवपुर एकलव्य आवासी विद्यालय के छात्रा मन डहार ले अपन परेशानी ल लेके कलेक्ट्रेट तक पैदल मार्च करे के घटना ल गंभीरता ले ले हवय। ओमन सरगुजा कलेक्टर अजीत वसंत ल फोन म चर्चा करके पूरा मामला के जानकारी लीन। मुख्यमंत्री ह कलेक्टर ल पूरा मामला के जांच करके जिम्मेदारी तय करे अउ संबंधित अधिकारी-कर्मचारी मनके खिलाफ कार्रवाई करे के निरदेस दीन हे। ओमन आवासीय विद्यालय अउ छात्रावास मनके व्यवस्था ल अधिकारी मन डहार ले हरेक दिन समीक्षा करे बर कहिन।
केन्द्रीय राज्यमंत्री-दौरा
केन्द्रीय सामाजिक न्याय अउ अधिकारिता राज्यमंत्री रामदास अठावले काली नौ सितंबर के छत्तीसगढ़ दउरा म आही। ओमन रायपुर अउ बिलासपुर म आने-आने कार्यक्रम म सामिल होही। ए दउरान विभागीय समीक्षा के संगेसंग अनुसूचित जाति अउ अनुसूचित जनजाति वर्ग ले जुड़े नियुक्ति के बारे म घलो गोठबात होही।
नीलू शर्मा-प्रेसवार्ता
विश्व पर्यटन दिवस म सत्ताईस सितंबर के छत्तीसगढ़ म आने-आने कार्यक्रम आयोजित करे जाही। छत्तीसगढ़ पर्यटन बोर्ड के अध्यक्ष नीलू शर्मा ह आज रायपुर म पत्रकार मन ले गोठबात करत बतईन कि राज्य सरकार ह प्रदेस के ऐतिहासिक, सांस्कृतिक अउ प्राकृतिक विरासत ल देस-दुनिया के पर्यटन मानचित्र म नवा चिन्हारी देवाय के कोसिस करत हे। उहें, भोरमदेव अउ मयाली कॉरिडोर समेत आने-आने जघा म पर्यटन ल बढ़ावा दे बर आने-आने योजना चलाय जावत हे।
छत्तीसगढ़ पर्यटन बोर्ड के अध्यक्ष ह बस्तर के प्राकृतिक सुंदरता के जिकर करत कहिन कि बस्तर म पर्यटन के अपार संभावना हे। श्री शर्मा ह कहिन कि पर्यटन क्षेत्र म सुघ्घर काम बर ए बार दस आने-आने श्रेणी म पुरस्कार दे जाही।
सक्ती शिवराज चौहान दौरा
सक्ती जिला के जेठा गांव म ग्यारह सितंबर के बड़का कार्यक्रम राखे जाही। केन्द्रीय ग्रामीण विकास मंत्री शिवराज सिंह चौहान ह कार्यक्रम के माईपहुना होही। उहें, मुख्यमंत्री विष्णुदेव साय एखर पगरइति करही। कार्यक्रम म प्रधानमंत्री आवास योजना-ग्रामीण के हितग्राही मनके गृह प्रवेश, पंचायत पदाधिकारी अउ लखपति दीदी सम्मेलन होही। ए दउरान आने-आने विकास काम के लोकार्पण अउ भूमिपूजन-सिलान्यास घलो करे जाही। उपमुख्यमंत्री विजय शर्मा अउ प्रभारी मंत्री गुरू खुशवंत साहेब ह काली कार्यक्रम स्थल के निरीक्षण करीन अउ तैयारी के समीक्षा करीन अउ अधिकारी मन ल जरूरी निरदेस दीन।
एलपीजी बुकिंग
केन्द्र सरकार ह तेल विपणन कंपनी ल घरेलू रसोई गैस-एलपीजी रिफिल बुकिंग के नियम म थोरकिन बदलाव करे के निरदेस देहे। अब देस के जम्मों घरेलू एलपीजी उपभोक्ता, चाहे ओमन सहरी क्षेत्र के होवय या गंवई क्षेत्र के पच्चीस दिन के भीतर अपन सिलेंडर बुक करा सकही।
खबर के मुताबिक पश्चिम एशिया संकट के चलत एलपीजी आपूर्ति म दबाव बढ़ाय के सेती, पहिली रिफिल बुकिंग के अंतराल सहरी क्षेत्र बर पच्चीस दिन अउ ग्रामीण क्षेत्र बर पैंतालीस दिन तय करे गे रिहीस, जेला अब थोरकिन बदल दे गेहे।
माशिमं-निर्देश
छत्तीसगढ़ माध्यमिक शिक्षा मंडल ह चालू शैक्षणिक सत्र बर प्राईवेट स्कूल के मान्यता के नवीनीकरण बर निरदेस जारी करे हे। अब स्कूल खोले अउ मान्यता ले बर अनापत्ति प्रमाण पत्र के जरूरत नइ होही। स्कूल मन ल सुरक्षा अउ कानूनी मापदंड पूरा करे बर शपथ-पत्र देना होही। स्कूल अपन नाम म नेशनल, इंटरनेशनल, नवोदय, एकलव्य, प्रयास, केन्द्रीय, राष्ट्रीय, पीएमश्री, स्वामी आत्मानंद उत्कृष्ट विद्यालय अउ स्वामी विवेकानंद उत्कृष्ट विद्यालय जइसन शब्द के इस्तेमाल नइ कर सकही।
एडीजे कोर्ट-फैसला
बछर दू हजार पन्द्रह म कांकेर जिला के कोरर थाना क्षेत्र के भैसगांव-नागरेमारी पहाड़ी क्षेत्र म माओवादी मुठभेड़ ले जुड़े मामला म एडीजे कोर्ट ह आज फैसला सुनाय हे। कोर्ट ह ए मुठभेड़ म सामिल माओवादी प्रभाकर अउ उंखर पत्नी राजे कांगे ल सात-सात बछर के सजा सुनाय हे। उहें, ए मामला म तीन झिन आने माओवादी मन ल पांच-पांच बछर के कारावास के सजा सुनाय गेहे।
जिला के पुलिस अधीक्षक निखिल राखेचा ह बतईन कि ए हमला के मास्टरमाइंट प्रभाकर अउ ओखर गोसईन ल पुलिस ह बछर दू हजार चौबीस म गिरफ्तार करे रिहीस। प्रभाकर उपर पच्चीस लाख अउ गोसईन राजे कांगे उपर आठ लाख रूपिया इनाम घोसित रिहीस। ओमन बतईन कि ए दंपत्ति के खिलाफ हत्या, लूट, अपहरण समेत आने-आने थाना म करीबन साठ अपराध दरज हवय।
यूसीसी-प्रक्रिया
प्रदेस म समान नागरिक संहिता के प्रारूप ल तैयार करे के काम म तेजी आ गेहे। इही कड़ी म उच्च स्तरीय बइठका म आने-आने विश्वविद्यालय के कुलपति मन ह बिहाव, तलाक, उत्तराधिकार अउ भरण-पोषण जइसन बिसय म सुझाव दीन। कुलपति मन ह कानून ल सोध आधारित बनाय अउ जम्मों जिला म जमीनी सर्वे कराय उपर जोर दीन। हिदायतुल्लाह राष्ट्रीय विधि विश्वविद्यालय ह तकनीकी अउ कानूनी सहयोग के भरोसा देवाय। समिति ह सुझाव मन ल आखिरी प्रारूप म प्राथमिकता देके आश्वासन दीन हे।
अउ अब पेस हे मौसम के हाल….
मौसम विभाग ह प्रदेस के कई ठिन जघा म काली ले बरसा के गतिविधि म बढ़ोतरी होय के संभावना जताय हे। उहें, उत्तर छत्तीसगढ़ म एक-दू जघा म भारी बरसा होय के चेतावनी दे गेहे। मौसम विज्ञानी डॉक्टर गायत्री वाणी ह बतईन कि दस अउ ग्यारह सितंबर के बाद दक्षिण छत्तीसगढ़ म घलो बरसा के गतिविधि बढ़ सकत हे।