खेलो इंडिया संवाद-प्रधानमंत्री
प्रधानमंत्री नरेन्द्र मोदी ह केहे हे कि सरकार, इक्कीसवीं सदी के भारत बर आधुनिक खेल व्यवस्था तियार करे बर संकल्पित हे। श्री मोदी ह वीडियो कॉन्फ्रेंस ले आज राष्ट्रीय खेल दिवस के मउका म राखे गे ‘‘खेलो इंडिया संवाद कार्यक्रम‘‘ ल संबोधित करीन। ओमन किहीन कि खेल विश्वविद्यालय ले लेके आधुनिक प्रसिक्षण केन्द्र तक देसभर म अइसन खेल ढांचा बनाय जात हे, जेमा खिलाड़ी मनके प्रतिभा ल हर स्तर म निखारे जा सकही।
प्रधानमंत्री ह किहीन कि खेल ले जीवन बदलते अउ देस के गौरव बाढ़थे। प्रधानमंत्री ह किहीन कि ओमन लालकिला के प्राचीर ले पांच ले पन्द्रह बछर तक के आयु वरग के लइका म खेल प्रतिभा खोजे खातिर ‘‘बड़े प्रतिभा खोज अभियान‘‘ के घोषणा करे रिहीन।
ए बेरा म केन्द्रीय खेल मंत्री मनसुख मांडविया ह किहीन कि केन्द्र सरकार ह देस म मजबूत खेल व्यवस्था, बुनियादी ढांचा विकसित करे बर करीबन छत्तीस हजार करोड़ रूपिया मंजूर करे हे।
खेलो इंडिया संवाद-छत्तीसगढ़
खेलो इंडिया संवाद कार्यक्रम म छत्तीसगढ़ के आने-आने सिक्षण संस्थान मन म युवा मन ह प्रधानमंत्री के भाषण ल वीडियो कॉन्फ्रेंसिंग ले सुनीन। प्रधानमंत्री के भाषण सुने बर रईपुर के एम्स, एनआईटी, एमिटी विश्वविद्यालय के संगेसंगे भिलाई आईआईटी अउ बीआईटी दुरूग म विशेष रूप ले व्यवस्था करे गे रिहीस।
रईपुर एम्स म स्थानीय सांसद बृजमोहन अग्रवाल अउ एनआईटी रायपुर म उपमुख्यमंत्री अउ खेल मंत्री अरूण साव ह युवा मन संग प्रधानमंत्री के भाषण सुनीन। ए बेरा म श्री साव ह युवा मन ले किहीन कि तुहंर सामर्थ्य अउ दम म ही ए देस विकसित भारत बनही। एनआईटी म राखे गे कार्यक्रम म अंतर्राष्ट्रीय क्रिकेट खिलाड़ी तिलक वर्मा अउ डॉक्टर प्रियंका बिस्सा मौजूद रिहीन। कार्यक्रम के दउरान श्री साव ह युवा मन ल नशा मुक्ति के शपथ देवईन।
उहें, प्रदेस के आने जिला के सिक्षण संस्थान मन म उहां के पढ़ईया लइका प्रधानमंत्री के भाषण सुने खातिर मौजूद रिहीन। कतकोन विद्यार्थी मन ह किहीन कि देस म खेल बर अनुकूल वातावरण बनाय बर प्रधानमंत्री के संवाद कार्यक्रम एक सार्थक पहल हवय।
यूसीसी-बैठक
छत्तीसगढ़ म समान नागरिक संहिता लागू करे बर सासन कोति ले गठित उच्च स्तरीय समिति के मौजूदगी म आज रईपुर म राज्य स्तरीय बइठका होइस। बइठका म समिति के सदस्य आई.ए.एस. शत्रुहन सिंह अउ एम.के. राउत, वरिष्ठ अधिवक्ता मोहन पवार के संगेसंग धार्मिक अउ सामाजिक संगठन अउ आयोग, निगम, मंडल के पदाधिकारी संघरीन। ए दउरान छत्तीसगढ़ म सबो नागरिक मनके बिहाव, तलाक, भरण-पोषण, उत्तराधिकार अउ लिव इन संबंध जइसन व्यक्तिगत मामला म एक असन अउ न्यायसंगत अधिकार देके दिसा म बड़े कदम उठाय जाय के सुझाव दे गीस।
नेपाल-बाढ़
नेपाल म काली आय भीषण बाढ़ म करीबन एक सौ साठ लोगन मनके मउत होगे हे अउ एक सौ तैंतीस भारतीय नागरिक समेत साढ़े सात सौ ले जादा लोगन लापता हवय। तिब्बत ले आय ए बाढ़ म कतकोन कस्बा अउ गांव ल तबाह कर देहे। पुल बोहा गेहे अउ दर्जनों जल विद्युत परियोजना ठप्प होगे हे।
इही बीच, भारत ह बाढ़ ले जूझत नेपाल के मदद बर दस टन आपदा राहत सामग्री अउ जरूरी दवई भेजे हे। राष्ट्रपति द्रौपदी मुर्मु ह नेपाल म बाढ़ ले होय तबाही म उहां के लोगन बर अपन संवेदना जतईन हे।
उहें, प्रधानमंत्री नरेन्द्र मोदी ह नेपाल के प्रधानमंत्री बालेन्द्र शाह ले गोठबात करत हरंसभव मदद देके भरोसा देवईन हे।
इही बीच, नेपाल म बाढ़ अउ भूस्खलन के सेती फंसे छत्तीसगढ़ के नागरिक मनके मदद बर राज्य सरकार ह हेल्पलाइन नंबर जारी करे हे। प्रदेस के नागरिक उंखर परिजन, सहायता अउ जरूरी जानकारी खातिर हेल्पलाइन नंबर एक शून्य सात शून्य अउ दूरभाष नंबर – नौ एक सात सात एक दू-दू-दू तीन चार सात एक (91-771-2223471) म संपर्क कर सकत हे।
मुख्यमंत्री विष्णुदेव साय ह किहीन कि संकट के ए घड़ी म राज्य सरकार अपन हरेक नागरिक संग खड़े हे। ओमन किहीन कि नेपाल म फंसे नागरिक मनके सुरक्षित वापसी अउ जरूरी मदद खातिर सरकार मुस्तैदी ले काम करत हे।
मुख्यमंत्री-जशपुर
मुख्यमंत्री विष्णुदेव साय ह आज जशपुर जिला के बगिया म अंतरिक्ष संगवारी अंतरिक्ष यात्री प्रसिक्षण पहल के सुभारंभ करीन। ए कार्यक्रम भारतीय वायुसेना के ग्रुप कैप्टन अउ अंतरिक्ष यात्री शुभांशु शुक्ला कोति ले समर्थित हे। ए बेरा म मुख्यमंत्री ह किहीन कि ए कार्यक्रम ले जशपुर के विद्यार्थी मन ल विज्ञान के क्षेत्र म प्रेरित करे खातिर नवाचार करे जात हे।
उहें, मुख्यमंत्री ह बगिया म राखे गे एक आने कार्यक्रम म ‘साइंस ऑन व्हील्स‘‘ गाड़ी ल झंडी दिखाके रवाना करीन। ए गाड़ी ल एक चलित प्रयोगशाला के रूप म तियार करे गेहे।
कृषि विवि-पेपर लीक
रईपुर के इंदिरा गांधी कृषि विश्वविद्यालय म तीसर घांव पेपर लीक के मामला आगू आय हे। बीएससी पहिली बछर के दूसर सेमेस्टर के तहत फंडामेंटल्स ऑफ जेनेटिक्स के परीक्षा उन्नीस अगस्त के बिहनिया दस बजे होवइया रिहीस, फेर परीक्षा ले पांच घंटा पहिलीच पेपर के पीडीएफ फाईल पढ़ईया लइका मनके बीच वायरल होगे। विश्वविद्यालय ह तेलीबांधा पुलिस ल मामला के जांच बर चिट्ठी लिखे हे।
खेल अलंकरण-सूची
राज्य सासन ह खेल अलंकरण बर चुने गे खिलाड़ी, प्रसिक्षक अउ निर्णायक मनके सूची जारी कर देहे। पाछु तीन बछर बर कुल बयासी उम्मीदवार मन ल पुरस्कार अउ सम्मान दे जाही। मुख्यमंत्री ट्रॉफी बर पांच दल के तिरालीस खिलाड़ी अउ प्रसिक्षक मन ल चुने गेहे।
मुख्यमंत्री विष्णुदेव साय राष्ट्रीय खेल दिवस के मउका म उनतीस अगस्त के खिलाड़ी, प्रसिक्षक अउ निर्णायक मन ल राज्य अलंकरण दीहीं। राजधानी रायपुर के पंडित दीनदयाल उपाध्याय ऑडिटोरिम म होवइया समारोह म आने-आने खेल पुरस्कार के संग मुख्यमंत्री ट्रॉफी बर चुने गे प्रतिभागी ल सम्मानित करे जाही।
विद्या समीक्षा केन्द्र ऐप
प्रदेस के सरकारी स्कूल मन म ऑनलाइन उपस्थिति दरज करे म आवत तकनीकी दिक्कत के बीच स्कूल सिक्षा विभाग ह विद्या समीक्षा केन्द्र ऐप म सुधार करे हे। एमा ऑफलाइन मोड अउ उपस्थिति के बायोमेट्रिक पुष्टि के सुभीता घलो जोड़े गेहे। अब सिक्षक बिना इंटरनेट के घलो स्कूल परिसर म अपन मौजूदगी दरज करा सकही। एखर ले प्रदेस के प्राथमिक ले हायर सेकेंडरी स्कूल अउ कार्यालय म पदस्थ करीबन पौने दू लाख सिक्षक अउ कर्मचारी मन ल राहत मिलही।
रक्षाबंधन
भाई-बहिनी के मया-परेम के तिहार रक्षाबंधन काली मनाय जाही। राजधानी रायपुर समेत प्रदेस के सबो जिला के हाट बाजार सुघ्घर राखी ले सजे हे। पाछु बछर असन एसो घलो स्व-सहायता समूह के माईलोगिन मन कोति ले बनाय गे रिकम-रिकम के राखी लोगन के मन भावत हे।
राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह प्रदेसवासी मन ल रक्षाबंधन परब के बधाई अउ सुभकामना दीन हे।
ए मउका म रईपुर के केन्द्रीय जेल म कैदी मन ल राखी बांधे बर बिसेस व्यवस्था करे गेहे। जेल प्रशासन कोति ले जारी निरदेस के मुताबिक बिहनिया आठ बजे ले मंझनिया तीन बजे तक सिरिफ बहिनी मन ल ही कैदी मन ले मिले अउ राखी बांधे बर जेल भीतरी जाय के मंजूरी होही।
इही बीच, राखी परब के दउरान यात्री मनके सुभीता खातिर दक्षिण पूर्व मध्य रेलवे के रईपुर मंडल कोति ले दुरूग-रायगढ़-दुरूग के बीच आज ले उनतीस अगस्त तक रक्षाबंधन पैसेंजर स्पेशल ट्रेन चलाय जात हे। एखर ठहराव दुरूग अउ रायगढ़ के बीच सबो स्टेसन म दे गेहे।
भाजपा-प्रभारी नियुक्ति
भारतीय जनता पार्टी के प्रदेस इकाई ह अवइया महीना म पन्द्रह नगरीय निकाय बर चुनाव प्रभारी अउ सह-प्रभारी मनके नियुक्ति कर देहे। एमा संगठन ले जुड़े नेता, विधायक, पूर्व विधायक, महापौर अउ पार्षद सामिल हे। हरेक निकाय म एक प्रभारी अउ दू सह-प्रभारी मिलाके कुल पैंतालीस पदाधिकारी मन ल जिम्मेवारी दे गेहे। ए पन्द्रह निकाय मन म चार नगर निगम, पांच नगर पालिका अउ छह नगर पंचायत सामिल हे।
गांजा-बरामद
कांकेर जिला के भुरसा तरहुल गांव म पुलिस ह दबिस देके एक एकड़ खेती म अरहर अउ चेंचभाजी के बीच उगाय जात गांजा के आठ सौ चवालीस पौधा जब्त करे हे। ए पौधा के बाजार कीमत करीबन सवा चार लाख रूपिया आंके गेहे। ए मामला आरोपी किसान सुभाष कोरेटी ल नशा उन्मूलन कानून के तहत गिरफ्तार करे गेहे।