प्रदेश म गौरेला-पेण्ड्रा-मरवाही जिला के मरवाही विधानसभा क्षेत्र म होवइया उप चुनाव म नामंाकन पत्र भरे के काम आज ले शुरू होगे हे। नामंाकन पत्र जमा करे बर लेगे जमानत राशि पांच हजार रूपिया तय करे गेहे। उम्मीदवार सोला अक्टूबर तक नामंाकन पत्र दाखिल कर सकत हे। उंहें सतरा अक्टूूबर के नामंाकन पत्र के जांच करे जाही। फेर उन्नीस अक्टूबर तक नाम वापिस ले जाही। तीन नवंबर तक मतदान होही। उंहें दस नवंबर के वोट के गिनती करे जाही।
इही बीच कोरोना संक्रमण ल धियान म राखत नामंाकन दाखिल करत ेरा उम्मीदवार के संग सिरिफ दू झिन मनखे ह रिटर्निंग अधिकारी के कक्ष म जा सकही। उंहें रिटर्निंग अधिकारी के कार्यालय ले सौ मीटर के दायरा म सिरिफ दू ठिन गाड़ी ल प्रवेश मिल सकही।
कोरोना सर्वे/जागरूकता अभियान
छत्तीसगढ़ म कोरोना संक्रमण के कड़ी ल तोड़े खातिर पाछू चलाए जावत कोरोना सघन सामुदायिक सर्वे अभियान के तहत स्वास्थ्य विभाग के टीम ह पाछू चार दिन म सैंतीस लाख ले जादा घर तक पहुंच गेहे। सर्वे के दउरान दल ह घर घर जाके कोरोना वायरस के संभावित लक्षण वाले मरीज मनके सैंपल लेहे। ए अभियान के तहत रायपुर जिला म करीबन ढाई लाख लोगन मनके घर तक टीम ह पहुंचे हे। अभियान म संबंधित क्षेत्र के मितानिन, आंगनबाड़ी कार्यकर्ता, सहायिका, सीएचओ के अलावा नगरीय प्रशासन विभाग के मैदानी अमला ड्यूटी करत हे।, जउन ह गांव अउ शहर म जाके सर्वे करत हे।
एति कोंडागंाव जिला के केशकाल म ग्रामीण क्षेत्र मन म पंचायत स्तर म स्वास्थ्य विभाग के टीम डहार ले सर्वे करे जात हे। ए बेरा जउन लेागन मन म सर्दी,खांसी, बुखार के संग कोरोना वायरस के आने लक्षण हे उंखर शिविर लगाके स्वास्थ्य परीक्षण करे जात हे।
ओति राजनंादगंाव जिला के डोंगरगढ़ म अवइया बारा अक्टूबर के कोरोना संक्रमित मनके जांच बर मेगा जांच शिविर के आयोजन करे जाही। इही बीच प्रदेश के स्वास्थ्य विभाग ह सर्वे दल ल सही जानकारी दे अउ समय म जांच कराये बर लोगन मनले अपील करीन।
रामविलास पासवान
केंद्रीय मंत्री रामविलास पासवान के काली नई दिल्ली म निधन होगे हे। ओमन चैहत्तर बछर के रीहिन। लोक जनशक्ति पार्टी के संस्थानक अउ उपभोक्ता कार्य, खाद्य अउ सार्वजनिक वितरण मंत्री श्री पासवान के ह्दये के एक ठिन प्रायवेट अस्पताल म आपरेशन होए रीहिस।
गृह मंत्रालय ह कीहिन कि दिवंगत नेता के सम्मान म आज राज्य अउ केंद्रशासित प्रदेश मनके राजधानी म राष्ट्रीय ध्वज झुके रीही। अंतिम संस्कार के दिन संस्कार के जगा म घलो राष्ट्रीय ध्वज आधा झुके रीही।
छत्तीसगढ़ के राज्यपाल अनुसूइया उइके अउ मुख्यमंत्री भूपेश बघेल हे केंद्रीय मंत्री रामविलास पासवान के निधन म दुख जताय हे। राज्यपाल अपन शो संदेश म कीहिन हे कि श्री पासवान ह निचला तबका के कल्याण बर बिसेस काम करीन हे। उंहें मुख्यमंत्री ह कीहिन हे कि राष्ट्रीय राजनीति खासकर के बिहार के राजनीति म उंखर बिसेस जगा रीहिस हे।
धरसा विकास योजना
राज्य म धरसा विकास योजना ल लागू करे के तियारी शुरू होगे हे। एखर बर आने आने विभाग मनके योजना अउ मनरेगा के अभिसरण बर सरकार डहार ले बनाये गे विभागीय सचिव के तीन सदस्यीय समिति के आज मंत्रालय म बइठका होइस। ए बइठका म धरसा विकास बर जम्मों जिला ले जानकारी मांगे के प्रारूप उपर गोठबात करे गीस। ये समिति एक हप्ता के भीतर शासन ल प्रतिवेदन दीही।
अमिताभ बच्चन-अपील
सुप्रसिद्ध अभिनेता अमिताभ बच्चन ह लोगन मनले कोरोना संक्रमण ले बचाव खातिर सरकार के दिशा – निर्देश के पालन करे के अपील करे हे।
बाईट – अमिताभ बच्चन (35 सेकण्ड)
लोकवाणी
मुख्यमंत्री भूपेश बघेल ह मासिक रेडियोवार्ता लोकवाणी के ग्यारहवां कड़ी के प्रसारण अवइया ग्यारा अक्टूबर के इतवार के होही। मुख्यमंत्री ह लोकवाणी म ए घांव नवा छत्तीसगढ़, हमर विकास, मोर कहानी विसय उपर प्रदेशवासी मनले गोठबात करही। लोकवाणी के प्रसारण छत्तीसगढ़ स्थित आकाशवाणी के जम्मों केंद्र, एफ.एम. रेडियो अउ क्षेत्रीय समाचार चैनल ले बीहनिया साढ़े दस बजे ले ग्यारा बजे तक होही।
दुष्कर्म मामला – आरोपी गिरप्तार
कोंडगांव जिला म एक झिन युवती के संग होय सामूहिक दुष्कर्म के मामला म पुलिस ह पांच झिन आरोपी ल गिरप्तार करे हे। फेर दू झिन आरोपी ह फरार बताए जात हे। उंहें थाना प्रभारी ल लापरवाही बरते के आरोप म निलंबित कर दे गेहे। ए मामला म युवती के शरीर के फारेंसिक जांच बर उंखर शव ल काली कबर ले निकाले गीस।
बताये जात हे कि जिला के धनोरा थाना क्षेत्र के उड़ागांव म पाछू उन्न्ीस जुलाई के एक झिन युवती के संग सात झिन लोगन मन डहार ले सामूहिक दुष्कर्म करे के मामला आगू आय रीहिस। ए घटना के बाद युवती ह आत्महत्या कर ले रीहिस हे। उंहें मामला के रिपोर्ट नइ लिखे अउ जानकारी होय के बाद कार्रवाई नइ करे के आरोप म टीआई रमेश सोरी ल निलंबित कर दे गेहे।
इही बीच भारतीय जनता पार्टी के अनुसूचित जनजाति मोर्चा अउ महिला मोर्चा के संग काली दस अक्टूबर के राजधानी रायपुर म दुष्कर्म के विरोध म धरना प्रदर्शन करे जाही।
आईईडी विस्फोट ग्रामीण मौत
दंतेवाड़ा जिला म माओवादी मन डहार ले सुरक्षा बल मन ल नुकसान पहुंचाय बर लगाए गे प्रेशर बम के चपेट म आय ले एक झिन दंपत्ति ह गंभीर रूप ले घायल हो गेहे।
मिले खबर के मुताबिक गुड़से गांव के रहइया पति-पत्नी अपन परिवार ले मिले बर सुनार जात रीहिन हे। इही दउरान रद्दा म माओवादी मन डहार ले लगाए गे आईईडी बम के चपेट म आय ले ये दूनो झन गंभीर रूप ले घायल हो गीन।
एसीबी छापा
महासमुंद जिला म एंटी करप्शन ब्यूरो – एसीबी के टीम ह बैंक के शाखा प्रबंधक अउ चैकीदार ल रिश्वत लेके आरोप म गिरप्तार करे हे।
मिले खबर के मुताबिक एक झिन किसान ह जिला के सिंघोड़ा ग्रामीण बैंक के शाखा प्रबंधक मनीष प्रभाकर उपरदस हजार रूपिया के रिश्वत मांगे के शिकायत एसीबी ले करे रीहिस। जेखर बाद एसीबी के दल ह आज आफिस के बेरा म छापा मारके आरोपी शाखा प्रबंधक अउ चैकीदार ल कथित दस हजार रूपिया के रिश्वत लेत गिरप्तार करे हे।
छपरा-दुर्ग छपरा
यात्री मनके सुविधा अउ मंाग ल धियान म राखत दक्षिण पूर्व मध्य रेलवे ले चलइया छपरा-दुर्ग-छपरा एक्सपे्रस अवइया तेरा अक्टूबर ले रोज चलाए जाही। छपरा ले ये ट्रेन तेरा अक्टूबर के अउ दुर्ग ले चैदा अक्टूबर के छूटही। रेलगाड़ी के टाइम टेबल म कोनो प्रकार के बदलाव नइ करे जाही। ए ट्रेन म यात्री ई-टिकट के संग काउंटर ले घलो टिकट बुक करा सकही। सिरिफ आरक्षित सीट वाले यात्री मन ल ट्रेन म सफर करे के मंजूरी होही।
मनोरंजन पार्क-एसओपी
केंद्र सरकार ह कोरोना महामारी ल देखत मनोरंजन पार्क अउ अइसन आने जगा मन म संक्रमण ले बचाव बर मानक संचालन प्रक्रिया जारी करे हे।
स्वास्थ्य मंत्रालय के निर्देश म केहे गेहे कि मास्क पहिनना अउ छै फीट के दूरी बनाए रखना जारी रही। मनोरंजन पार्क म जम्मों प्रकार के झूला मन ल सैनिटाइज करना होही अउ आय जाय के बेरा अलग राखे जाही। थियेटर अउ फूड कोर्ट म पचास प्रतिशत लोगन मन ल आय के मंजूरी दे जाही।