वीबी जीरामजी-ग्रामसभा
विकसित भारत-रोजगार अउ आजीविका गारंटी मिसन-ग्रामीण-वीबी- जीारामजी ल प्रभावी तरीका ले लागू करे बर प्रदेस के आने-आने जघा मन म आज ग्राम सभा के आयोजन करे गीस। ए दउरान गांव वाले मन ल योजना के प्रावधान के जानकारी दे गीस। संगेसंग चालू वित्त बछर म योजना के तहत होवइया काम के अनुमोदन घलो करे गीस। ग्रामसभा म गांव वाले मन ले गांव के जरूरत, प्राथमिकता अउ संभावित विकास काम के बारे म सुझाव ले गीस।
सिविल जज-नियुक्ति
छत्तीसगढ़ उच्च न्यायालय ह पीएससी के माध्यम ले चुने गे छप्पन नवा सिविल जज मनके नियुक्ति के संगेसंग पंद्रह न्यायिक अधिकारी मनके तबादला अउ पोस्टिंग आदेस जारी करे हे। हाईकोर्ट के रजिस्ट्रार जनरल रजनीश श्रीवास्तव डहार ले जारी आने-आने आदेस अउ अधिसूचना मनके तहत हायर ज्यूडिशियल सर्विस अउ लोअर ज्यूडिशियल सर्विस के कतकोन जज मनके तबादला करे गेहे। नव-नियुक्त अधिकारी मन ल उनतीस अगस्त तक अपन पदस्थापना जघा म कार्यभार ग्रहण करे के निरदेस दे गेहे।
मॉकड्रिल
बाढ़ जइसे प्राकृतिक आपदा के दउरान राहत अउ बचाव काम के तियारी ल परखे बर आज प्रदेस के आने-आने जिला मन म मॉकड्रिल करे गीस। ए दउरान एसडीआरएफ, पुलिस, होमगार्ड, राजस्व, स्वास्थ्य अउ विद्युत विभाग समेत आने-आने टीम ह वास्तविक परिस्थिति के अनुरूप रेस्क्यू ऑपरेशन के अभ्यास करीस। अभ्यास के दउरान भारी बरसा ले डूबे क्षेत्र म फंसे लोगन मन ल एक टापू म फंसे गांव वाले मन ल सुरक्षित निकाले गीस। एखर बाद मेडिकल टीम डहार ले रेस्क्यू करे गे मनखे मन के स्वास्थ्य के जांच करे गीस।
इही कड़ी म गौरेला-पेण्ड्रा-मरवाही जिला क मरवाही स्थित गंगनई जलाशय म जिला स्तरीय मॉकड्रिल करे गीस।
खेल अलंकरण पुरस्कार
खेल अउ युवा कल्याण विभाग ह राज्य खेल पुरस्कार अलंकरण बर चुने गे खिलाड़ी मन के आखिरी सूची जारी कर देहे। एखरे संग सूची म खिलाड़ी मन ले दावा-आपत्ति मंगाय गेहे। इच्छुक खिलाड़ी तेईस अगस्त के कार्यालय के बेरा तक विभाग के वेबसाइट स्पेार्ट्स डॉट सीजी डॉट जीओवी डॉट इन म ऑनलाइन दावा-आपत्ति कर सकत हे।
ईडी-छापा
सराब घोटाला मामला म प्रवर्तन निदेशालय-ईडी के टीम ह आज धमतरी म कांग्रेस नेता रामगोपाल अग्रवाल के सिहावा रोड स्थित घर म छापा मारिन। आठ सदस्यीय टीम रामगोपाल अग्रवाल के घर म दस्तावेज अउ आने-आने जरूरी रिकॉर्ड के जांच करत हे।
उहें, दुरूग म घलो आज ईडी ह रियल एस्टेट कारोबारी सजल जैन अउ विश्वास गुप्ता के ठिकाना म छापा मारे हे। मिले खबर के मुताबिक ईडी के टीम आज बिहनिया दुरूग के गांधी चौक स्थित कारोबारी सजल जैन के घर अउ कुछेक ठिकाना म पहुंचिस अउ छापा मार के कारवाई सुरू करीन। एखर अलावा टीम ह शनिचरी बाजार स्थित श्रीराम हार्डवेयर म रियल एस्टेट कारोबारी विश्वास गुप्ता ले जुड़े ठिकाना म घलो छापा मारिस। दूनों कारोबारी मन के दस्तावेज अउ लेन-देन ले जुड़े रिकॉर्ड के जांच घलो करे जावत हे।
युवा संगम-पंजीकरण
शिक्षा मंत्रालय ह सूचित करे हे कि युवा संगम के सातवां चरण बर ऑनलाइन पंजीकरण के आखिरी तारीख ए महीना के इकतीस तारीख तक बढ़ा दे गेहे। मंत्रालय ह किहीन हे कि ए विस्तार ले देसभर के पात्र युवा मन ल ए अनूठा युवा आदान-प्रदान कारीकरम म पंजीकरण करे अउ भाग लेके एक मउका अउ मिलही।
इंटर्न डॉक्टर-हड़ताल स्थगित
इंटर्न डॉक्टर मन ह स्वास्थ्य मंत्री श्याम बिहारी जायसवाल के आश्वासन के बाद हड़ताल खतम कर देहे। इंटर्न डॉक्टर मन स्टाइपेंड म बढ़ोत्तरी समेत आने-आने मांग ल लेके हड़ताल म रिहीस हे। स्वास्थ्य मंत्री ह सोशल मीडिया म जानकारी देहे कि इंटर्न डॉक्टर मन ह सरकार उपर भरोसा जतावत अपन आंदोलन खतम करे के फैसला लेहे।
साइबर क्राइम को-आर्डिनेशन सेंटर
गृह विभाग ह प्रदेस म बाढ़त साइबर अपराध ल धियान म राखत स्टेट साइबर क्राइम को-आर्डिनेशन सेंटर के गठन करे हे। ए सेंटर राज्य स्तर म साइबर क्राइम ले जुड़े जम्मों गतिविधि मन बर सिंगल पॉइंट ऑफ कॉन्टैक्ट- एस.पी.ओ.सी. के रूप म काम करही। ए संबंध म राज्य शासन कोति ले जारी आदेस के मुताबिक, वर्तमान म पुलिस मुख्यालय म पुलिस महानिरीक्षक के पद म पदस्थ आई.पी.एस. प्रशांत कुमार अग्रवाल अउ उप पुलिस महानिरीक्षक के पद म पदस्थ आई.पी.एस. गिरिजा शंकर जायसवाल के स्टेट साइबर क्राइम को-आर्डिनेशन सेंटर म नवा पदस्थापना करे गेहे।
रेडियो श्रोता सम्मेलन
ओल्ड लिसर्नस ग्रुप ऑफ छत्तीसगढ़ जोन डहार ले आज रेडियो श्रोता दिवस मनाय गीस। रायपुर के वृंदावन हॉल म राखे गे कार्यक्रम म छत्तीसगढ़ के संगेसंग आने-आने राज्य मन ले श्रोता मन सामिल होइन। ओल्ड लिसर्नस ग्रुप ऑफ छत्तीसगढ़ जोन के प्रदेस अध्यक्ष मोहनलाल देवांगन ह बतईन कि कार्यक्रम म ओल्ड लिसनर्स ग्रुप ऑफ इंडिया के राष्ट्रीय अध्यक्ष महेन्द्र मोदी ह माई पहुना के रूप म सामिल होइन। ए दउरान सांस्कृतिक कारीकरम मनके प्रस्तुति दे गीस।
उहें, छत्तीसगढ़ श्रोता मंच कोति ले भिलाई म राखे गे दू दिवसीय अखिल भारतीय रेडियो श्रोता सम्मेलन के दूसर दिन आज भिलाई के सिविक सेंटर स्थित महात्मा गांधी कला मंदिर म कारीकरम के आयोजन करे गीस।
गांजा-बरामद
सूरजपुर जिला के प्रेमनगर पुलिस ह एक ठिन गाड़ी ले अठासी किलो ले जादा के गांजा बरामद करीन हे। ए मामला म पुलिस ह एक आरोपी ल गिरफ्तार करे हे। जब्त गांजा क कीमत करीबन चवालीस लाख रूपिया बताय गेहे। पुछताछ म आरोपी ह बतइन कि गांजा रायगढ़ ले होवत बचरापोड़ी ले जाय जावत रिहीस हे। आरोपी ल न्यायिक रिमांड म भेज दे गेहे।
उहें, गरियाबंद जिला के देवभोग ले पुलिस ह तलासी के दउरान मेटाडोर के टायर म लुकाय गे एक सौ इंक्यावन किलो ले जादा के गांजा जब्त करे हे। जब्त गांजा के कीमत पचहत्तर लाख रूपिया ले जादा के बताय गेहे। पुलिस ह ए मामला म दू आरोपी मन ल गिरफ्तार करे हे।
ठगी मामला-पुलिसकर्मी निलंबित
कटघोरा म पचास करोड़ रूपिया के एक ठगी के मामला म मुख्य आरोपी ल पकड़े बर ट्रेन के बजाय फ्लाइट ले दिल्ली जाय के आरोप म टीआई समेत आठ झिन पुलिसकर्मी मन ल निलंबित कर दे गेहे। बिलासपुर रेंज के पुलिस महानिरीक्षक ह एला अनुशासनहीनता माने हे।
खबर के मुताबिक कटघोरा थाना के अंतर्गत एक वाहन एजेंसी संचालक ले करीबन पचास करोड़ रूपिया के ठगी होय रिहीस। ए मामला के आरोपी के दिल्ली म होय के खबर मिलतेच कटघोरा थाना प्रभारी के अगुवई म पुलिस के टीम फ्लाइट ले दिल्ली बर रवाना होय रिहीस।
इही बीच, आबकारी आयुक्त ह मनेन्द्रगढ़-चिरमिरी-भरतपुर जिला के आबकारी उप निरीक्षक संतोष कुमार नारंग ल एंटी करप्शन ब्यूरो-एसीबी म मामला दर्ज होय के बाद निलंबित कर दे हे। उहें, दू झिन आने आबकारी उप निरीक्षक ल सराब के जादा कीमत म बिक्री अउ तय सीमा ले जादा सराब बेचे के मामला म शो-कॉज नोटिस जारी करे गेहे।
कृृषि विवि-दस्तावेज परीक्षण
इंदिरा गांधी कृषि विश्वविद्यालय के अंतर्गत संचालित प्रदेस के शासकीय अउ निजी महाविद्यालय मन म चालू सैक्षणिक सत्र के बी.एस.सी. कृषि ऑनर्स स्नातक पाठ्यक्रम म प्रवेस बर चलत ऑनलाइन काउंसलिंग प्रक्रिया के तहत आज ले कृषि महाविद्यालय रईपुर म दस्तावेज मनके परीक्षण करे जावत हे। दस्तावेज मनके परीक्षण बाईस अगस्त तक बिहनिया आठ बजे ले संझा साढ़े पांच बजे तक करे जाही। चुने गे अभ्यर्थी मन ल उंहा आबंटित प्रोविजनल सीट सुरक्षित करे बर तेईस अगस्त तक ऑनलाइन फीस जमा करना होही।
अउ अब मौसम के हाल…
मौसम विभाग ह अवइया तीन-चार दिन तक प्रदेस म भारी बरसा के गतिविधि म कमी आय के संभावना जतइन हे। एखर ले अधिकतम तापमान म बढ़ोत्तरी होही। फेर ए दउरान प्रदेस के ज्यादातर जघा मन म हल्का ले मध्यम बरसा हो सकत हे। मौसम विज्ञानी डॉक्टर गायत्री वाणी ह आकाशवाणी समाचार ल बतइन कि उत्तर छत्तीसगढ़ के कुछेक इलाका म अवइया चार दिन के दउरान कोनांे-कोनांे जघा म भारी बरसा होय के आसार हे।