भाजपा-पदाधिकारी घोषणा
भारतीय जनता पार्टी के नवा राष्ट्रीय टीम के घोसना कर दे गेहे। राष्ट्रीय अध्यक्ष नितिन नबीन ह आज पार्टी के नवा राष्ट्रीय पदाधिकारी मनके नांव के सूची जारी करीन। नवा सूची के मुताबिक महासमुंद सांसद रूप कुमारी चौधरी ल महिला मोर्चा के राष्ट्रीय अध्यक्ष, नियुक्त करे गेहे। उहें, छत्तीसगढ़ मेडिकल सर्विस कार्पोरेसन लिमीटेड के अध्यक्ष दीपक महस्के ल सोसल मीडिया के राष्ट्रीय संयोजक बनाय गेहे। राष्ट्रीय टीम म तेरह राष्ट्रीय उपाध्यक्ष अउ आठ महासचिव के पद म पार्टी के बड़का नेता मन ल नियुक्त करे गेहे।
उहें, केंद्रीय मंत्री पीयूष गोयल ल पार्टी के कोषाध्यक्ष अउ बी. एल. संतोष ल संगठनात्मक महासचिव बनाय गेहे। इही बीच, भाजपा के प्रदेस अध्यक्ष किरण सिंह देव ह राष्ट्रीय कार्यकारिणी म छत्तीसगढ़ ल दू महत्ता के जिम्मेवारी मिले म केंद्रीय नेतृत्व के आभार जतइन हे। ओमन रूप कुमारी चौधरी अउ दीपक महस्के ल सुभकामना दीन हे।
ग्रामसभा
विकसित भारत रोजगार अउ आजीविका गारंटी मिसन ग्रामीण वीबी जीरामजी ल प्रभावी ढंग ले लागू करे खातिर प्रदेस म बीस अगस्त के होवइया ग्रामसभा म महत्वपूर्ण बिसय म गोठबात करे जाही। ए दउरान गांव के लोगन ल योजना के संबंध म जानकारी देके संगेसंग चालू वित्तीय बछर म योजना म होवइया काम के अनुमोदन घलो करे जाही। ग्रामसभा म गांव के लोगन ले गांव के जरूरत, प्राथमिकता अउ संभावित बिकास काम के संबंध म सुझाव ले जाही। एखर बर अवइया दू अक्टूबर ले सुरू होवइया विकसित ग्राम पंचायत योजना म ए सुझाव म प्रभावी ढंग ले गोठबात करे जाही।
मुख्यमंत्री-जशपुर योजना
मुख्यमंत्री विष्णुदेव साय ह जशपुर जिला के बगिया म ‘‘रेसम से रोसन जशपुर योजना‘‘ के सुभारंभ करीन। ए योजना म जिला म टसर अउ मलबरी रेसम कीट पालन ल बढ़ावा देके परयास करे जाही। खबर के मुताबिक बछर दू हजार पच्चीस-छब्बीस म जशपुर जिला टसर कोसा उत्पादन म छत्तीसगढ़ म अव्वल स्थान म रेहे हे।
मुख्यमंत्री-खेती-किसानी
मुख्यमंत्री विष्णुदेव साय जशपुर जिला के दउरा के बेरा आज अपन गृहग्राम बगिया म खेल पहुंचिन अउ पारंपरिक रूप ले बइला के जोड़ी संग हल चलाके बियासी करीन। मुख्यमंत्री ह किहीन कि ओमन खुद किसान परिवार ले आथे अउ ननपन ले ही खेती-किसानी ल देखे हे जाने हे। श्री साय ह किहीन कि आधुनिकता के ए दउर म घलो अपन परंपरा अउ जड़ ले जुड़ाव बनाय रखना महत्वपूर्ण हरय। किसान खेत म सिरिफ फसल नइ उगावय, भलुक अपन मेहनत ले समाज के जीवन अउ प्रदेस के अर्थव्यवस्था ल मजबूती देथे।
हर्बल गार्डन योजना
कोण्डागांव म हीलर हर्बल गार्डन योजना के सुभारंभ करे गेहे। छत्तीसगढ़ आदिवासी, स्थानीय स्वास्थ्य परंपरा अउ औषधि पादप बोर्ड के अध्यक्ष विकास मरकाम ह योजना के सुरूआत करीन। ए मउका म अड़तालीस वैद्य मन ल अपन बाड़ी म औषधीय पउधा लगाय बर पहिली किस्त के मंजूरी पत्र दे गीस। योजना म वैद्य मन ल आर्थिक अउ तकनीकी मदद मिलही। सम्मेलन म पारंपरिक चिकित्सा पध्दति अउ वनौषधी के संरक्षण उपर गोठबात होइस।
राजभाषा आयोग कार्यक्रम
रईपुर म राजभाषा आयोग के कार्यालय स्थापना दिवस म राखे गे कारीकरम म वरिष्ठ साहित्यकार अउ भाषा सेवी मनके सम्मान करे गीस। ए मउका म राजभाषा आयोग कोति ले प्रकासित छब्बीस ठिन पुस्तक के विमोचन होइस। प्रदेसभर ले आय साहित्यकार अउ विद्वान मन ह छत्तीसगढ़ी भाषा के संरक्षण संवर्धन अउ विकास उपर अपन बिचार राखिन। मुख्य वक्ता प्रोफेसर राजन यादव ह भाषा साहित्य अउ संस्कृति के संबंध म बतात छत्तीसगढ़ी भाखा ल समृध्द करे के जरूरत बतइन।
एनटीए-नेट-परीक्षा
राष्ट्रीय परीक्षा एजेंसी-एनटीए ह यूजीसी-नेट परीक्षा के तीन बिसय अंग्रेजी, वाणिज्य अउ समाज शास्त्र बर फेर ले परीक्षा कराय के घोसना करीन हे। ए तीनों बिसय म पेपर म कई ठिन गलती के सिकइत मिले के बाद ए फइसला ले गेहे। एनटीए के मुताबिक फेर ले होवइया अंग्रेजी अउ वाणिज्य बिसय के परीक्षा अवइया नौ सितंबर के समाज शास्त्र बिसय के परीक्षा दस सितंबर के होही।
नागपंचमी/सावन सोमवार
सावन महिना के सुक्ल पक्ष के पंचमी तिथि म आज नागपंचमी के परब प्रदेस म भक्ति अउ उछाह के संग मनाय जाथे। ए परब नाग देवता के पूजा अउ प्रकृति के बीच सम्मान के प्रतीक होथे। मुख्यमंत्री विष्णुदेव साय ह आज जशपुर जिला के अपन गृहग्राम बगिया म श्री फलेश्वर नाथ महादेव मंदिर पहुंचके पूजा-पाठ करीन। मुख्यमंत्री ह भगवान भोलेनाथ के अभिषेक करके प्रदेसवासी मन बर सुख-सांति, समृध्दि अउ खुसहाली के संग प्रदेस के सरलग आगू बाढ़े के मानता मानिन। मैनी नदिया के तट तीर के महादेव मंदिर म एक लाख ग्यारा हजार एक सौ एक पार्थिव शिवलिंग बनाके पूजा के तीन दिवसीय बिसेस धार्मिक अनुष्ठान आज ले सुरू होइस। उन्नीस अगस्त के पार्थिव शिवलिंग पूजन अउ पूर्णाहूति के संग सिराही।
उहें, सक्ति जिला के जैजैपुर विकासखंड म कैथा गांव के बिरितिया बाबाधाम म नागपंचमी के मउका म श्रध्दालु मनके भीड़ देखे गीस। इंहा मेला घलो भराथे।
अइसने, जांजगीर-चांपा जिला म अकलतरा क्षेत्र के दलहा पहाड़ म नागपंचमी के मेला लगे हे। ए पहाड़ के नीचे मुणि आश्रम अउ सूर्यकुंड म भिनसरहा ले लोगन पूजापाठ करत हे। आज सावन महिना के तीसर सम्मार म जम्मों सिवालय मंदिर मन म सुग्घर सजावट करे गेहे। उहें, श्रध्दालु मन के भीड़ देखे जा सकत हे। ऐति, बिहनिया बड़ संख्या म मंदिर पहुंचे कांवड़िया मन भगवान भोलेनाथ के जलाभिषेक करके मानता मानिन।
अर्चना एक्का-चयनित
रायगढ़ जिला के पीएमश्री सेजेस धरमजयगढ़ के कक्षा ग्यारहवीं के छात्रा अर्चना एक्का ल नवाचार इको ब्रिक बैंक के राष्ट्रीय स्तर बर चुने गेहे। अर्चना ह प्लास्टिक कचरा ल संसाधन के रूप म बउर के ओखर ले फर्नीचर समेत कतकोन जिनिस बनाय के उदिम करे हे। अर्चना के ए उदिम पढ़इया लइका मन ल पर्यावरण सहेजे अउ नवाचार बर प्रेरित करत हे।
छायाचित्र-प्रदर्शनी
रईपुर के टाउन हाल म स्वतंत्रता संग्राम सेनानी अउ वंदे मातरम के गौरवसाली यात्रा म आधारित छायाचित्र प्रदर्सनी पढ़इया लइका अउ लोगन मन ल आकर्षित करत हे। लइका मन ह प्रदर्सनी म स्वतंत्रता सेनानी मनके संघर्ष अउ बलिदान ले जुड़े छायाचित्र अउ दस्तावेज देखिन। पढ़इया लइका मन ल छत्तीसगढ़ के विकास यात्रा अउ जन कल्याणकारी योजना के जानकारी दे गीस। ए प्रदर्सनी इक्कीस अगस्त तक बिहनिया साढ़े दस बजे ले रतिहा आठ बजे तक लोगन बर खुला रइही।
शालेय क्रीडा प्रतियोगिता
गौरेला-पेंड्रा-मरवाही जिला म काली ले छब्बीसवां राज्य स्तरीय शालेय क्रीडा प्रतियोगिता सुरू होही। चार दिवसीय ए प्रतियोगिता के सुभारंभ केंद्रीय राज्य मंत्रि तोखन साहू करही। कारीकरम के अगुवई मध्य क्षेत्र आदिवासी विकास प्राधिकरण के उपाध्यक्ष प्रणव कुमार मरपच्ची करही। उहें, सांसद ज्योत्सना चरणदास महंत अउ विधायक अटल श्रीवास्तव माईपहुना के रूप म मौजूद रिहीन। इक्कीस अगस्त तक चलइया ए प्रतियोगिता म प्रदेस के पांचो संभाग ले चौदह ले उन्नीस बछर आयु वरग के करीबन पांच सौ चालीस खिलाड़ी भाग लिही। एमा जेमनास्टिक के मुकाबला गौरेला म खेले जाही। उहें, क्रिकेट ताईक्वांडो अउ कबड्डी के मुकाबल पेंड्रा म होही।
फैम टूर
देस के आने-आने राज्य ले आय तीस पर्यटन प्रतिनिधि मन ह बस्तर के प्राकृतिक अउ सांस्कृतिक विरासत ल जानिन। पाछू दस ले चौदह अगस्त तक राखे गे फैम टूर के दउरान प्रतिनिधि मन ह केसकाल घाटी, चित्रकोट जलप्रपात अउ घुड़मारास के दउरा करीन। चित्रकोट के सुघरई अउ घुड़मारास म जनजातीय जीवन अउ प्रकृति के मेल ह सबो झन ल प्रभावित करीस। प्रतिनिधि मन ह छत्तीसगढ़ ल पर्यटन के अपार संभावना वाला प्रदेस बतइन।
अउ अब जानन मौसम के हाल…
मौसम विभाग ह अवइया दू दिन के दउरान उत्तरी अउ मध्य छत्तीसगढ़ के कुछेक जघा म भारी बरसा के चेतावनी देहे। मौसम विज्ञानी डॉ. गायत्रीवाणी ह बतइन कि एक अवदाब के क्षेत्र बने हे, जेखर सेति राज्य म मानसून के गतिविधि बाढ़ही, फेर परनदीन ले उन्नीस तारीख के बाद बरसा म कमी आय के संभावना हे।