लोकसभा-परीक्षा विधेयक पारित
लोकसभा ह आज लोक परीक्षा अनुचित साधन रोकथाम संशोधन विधेयक पारित कर दीस। ए विधेयक ले लोक परीक्षा अनुचित साधन रोकथाम अधिनियम दू हजार चौबीस म संसोधन करे गेहे। ए विधेयक म दस बछर तक के कारावास, दस करोड़ रूपिया तक के जुर्माना अउ दोसी-अपराधी मनके संपत्ति जब्त करे जइसन दंड के प्रावधान हे। मामला ल जल्दी निपटारा करे खातिर विधेयक म हरेक राज्य सरकार अउ केन्द्रसासित प्रदेस ल रोज के सुनवाई बर बिसेस त्वरित न्यायालय स्थापित करे के आदेस दे गेहे। एमा यहू प्रावधान हे कि अपराध के जांच म पुलिस थाना म सूचना दरज होय के तारीख ले दू महीना के भीतर पूरा होना चाही। मुकदमा के सुनवाई आरोप पत्र दाखिल होय के तारीख ले तीन महीना के भीतरी पूरा होना चाही।
विधेयक म गोठबात के जुवाब देवत कार्मिक, लोक शिकायत अउ राज्यमंत्री जितेन्द्र सिंह ह किहीन कि विधेयक म संसोधन कानून ल अउ जादा कड़ा बनाय अउ तुरते न्याय देवाय बर करे गेहे। ओमन यहू किहीन कि नवा विधेयक विद्यार्थी अउ युवा मनके कल्याण के रक्षा खातिर सरकार के प्रतिबद्धता ल देखाथे।
बारिश
प्रदेश के आने-आने जिला म पाछु दू दिन ले होवत बरसा के सेती सामान्य जनजीवन प्रभावित होय हे। उहें, कतकोन नदिया-नरवा उफान म हवय।
बीजापुर जिला म होवत सरलग बरसा के सेती बारेगुड़ा-गंगालूर समेत कतकोन रद्दा बंद होय ले सैकड़ांें गांव के जिला मुख्यालय ले संपर्क टूट गेहे। उहें, कतकोन जघा पानी रद्दा उपर ले बोहात हे, जेखर ले अवई-जवई प्रभावित होय हे। जिला प्रसासन ह लोगन ले जरूरत होय म ही घर ले बाहिर निकले अउ उफनत नंदिया-नरवा, पुल-पुलिया के दूरिहा रेहे अउ कोनों किसम के आपात स्थिति म तुरते एनडीआरएफ अउ तहसील कंट्रोल रूम ल सूचना देके अपील करीन हे।
ऐति, महासमुंद जिला म घलो सरलग होवत बरसा ले कतकोन क्षेत्र म बाढ़ जइसन स्थिति बन गेहे। जिला के बागबाहरा ब्लॉक के गांव सेवाती म भारी बरसा के सेती मुख्य रद्दा के एक हिस्सा बोहा गे, जेखर ले गांव के सड़क संपर्क टूट गेहे। उहें, कलमीदादर बांध म पानी के आवक बाढ़े ले बांध लबालब भर गेहे अउ पानी बोहा के तीर-तखार के क्षेत्र अउ पहुंच रद्दा म बोहावत हे, जेखर ले रद्दा म गाड़ी के लाइन लग गेहे अउ यातायात बाधित होगे हे। जिला प्रशासन ह स्थिति के गंभीरता ल देखत प्रभावित क्षेत्र म अलर्ट जारी करे हे।
गरियाबंद जिला म भारी बरसा के सेती गरियाबंद के नगरी, धमतरी अउ छुरा ले सड़क संपर्क टूट गेहे। उहें, पन्टोरा कन्या आश्रम म जल भराव के सेती उहां के पचास ले जादा लइका मन ल बारूका म भेजे गेहे। सिकासेर बांध के सोलह गेट खोले गेहे। ए बांध ले चवालीस हजार क्यूसेक पानी छोड़े जाय ले पैरी अउ सोंढूर नंदिया उफान म हवय। जिला मुख्यालय म घलो कतकोन जघा पानी भरे के समाचार मिले हे। उहें, सूखा नाला म बोहाय एक सियान के सव छह किलोमीटर दूरिहा बरामद करे गेहे।
ओति, धमतरी जिला म घलो मूसलाधार बरसा ले नगरीय ब्लॉक म कई ठिन गांव के संपर्क जिला मुख्यालय ले टूट गेहे। स्कूल परिसर म पानी भरे के सेती जिला सिक्षा अधिकारी मधुलिका तिवारी ह नगरी के स्कूल मन म छुट्टी घोषित कर देहे। जिला के गंगरेल, सोंढूर, दुधावा अउ मुरूमसिल्ली बांध म पानी के आवक सरलग चलत हे।
सक्ती जिला के दमाऊ धारा झरना म नहाय के दउरान काली एक मनखे बोहा गे, जेखर सव डीडीआरएफ के टीम ह आज बरामद करे हे।
इही बीच, मौसम विभाग ह अवइया चौबीस घंटा के दौरान बालोद अउ कांकेर जिला बर भारी बारिश के रेड अलर्ट जारी करे हे। मौसम विज्ञानी डॉक्टर गायत्री वाणी ह बतईन कि रईपुर, दुरूग अउ दक्षिण छत्तीसगढ़ के कुछेक जिला बर आरेंज अलर्ट जारी हे।
नगरीय निकाय-पौधारोपण
प्रदेस म होवत सरलग बरसा के बीच नगरीय प्रशासन विभाग ह जम्मों चौदह नगर निगम, उनसठ ठिन नगर पालिका अउ एक सौ इक्कीस नगर पंचायत ल लक्ष्य के मुताबिक पौधारोपण के तियारी के निरदेस दीन हे। अवइया महीना ले सुरू होवइया ए बिसेस पौधारोपण अभियान म कुल चार लाख पंचानवे हजार पांच सौ पौधा लगाय के लक्ष्य राखे गेहे।
महतारी वंदन वृक्षारोपण अभियान
प्रदेस म काली तीस जुलाई के महतारी वंदन वृक्षारोपण अभियान राखे जाही, जेमा माईलोगिन मन ल मुफत म पौधा बांटे जाही। ए अभियान म ग्राम पंचायत के मदद ले आंगनबाड़ी कार्यकर्ता घर-घर पहुंच के पौधा दीहीं। हरेक महिला काली के दिन अपन घर, आंगनबाड़ी या सही जगह देखके पौधा लगा सकत हे।
राज्यसभा-राष्ट्रीय सम्मान
राज्यसभा ह राष्ट्रीय सम्मान के रक्षा बर राष्ट्रीय गौरव अपमान निवारण संशोधन विधेयक पारित कर देहे। ए विधेयक राष्ट्रीय गौरव अपमान निवारण अधिनियम उन्नीस सौ इकहत्तर म अउ संसोधन करही। प्रस्तावित विधेयक वंदे मातरम ल राष्ट्रीय गान असन वैधानिक संरक्षण दीहीं।
विधेयक म होय गोठबात के उत्तर देवत केन्द्रीय गृह राज्यमंत्री नित्यानंद राय ह किहीन कि वंदे मातरम के जानतबूझत अपमान करना मौजूद कानून के तहत दंडनीय होही। एमा तीन बछर के कैद, जुर्माना या दूनों हो सकत हे।
माओवादी-आत्मसमर्पण
झारखंड म सुरक्षा बल ह नक्सल विरोधी अभियान म बड़े सफलता पाय हे। प्रमुख माओवादी नेता अउ पोलित ब्यूरो सदस्य मिसिर बेसरा ल धनबाद-गिरिडीह सीमा ले गिरफ्तार करे गेहे। ओखर उपर एक करोड़ रूपिया के इनाम रिहीस।
इही बीच, छत्तीसगढ़ के बीजापुर जिला म पांच झिन महिला समेत आठ झिन माओवादी मन आत्मसमर्पण करीन हे। जिला के पुलिस अधीक्षक उमेश गुप्ता ह बतईन कि इंखर मन उपर कुल उनचास लाख रूपिया के इनाम घोसित रिहीस।
कबीरधाम-मलेरिया
कांकेर के बाद कबीरधाम जिला के बोड़ला विकासखंड के मुड़वाही गांव म मलेरिया के मरीज मिले हे। स्वास्थ्य विभाग के टीम ह गांव म सिविर लगाके एक हजार दू सौ सत्तर ले जादा मनखे मनके जांच करीन, जेमा पैंतीस झिन म मलेरिया के पुष्टि होय हे। मरीज म छह झिन लइका घलो सामिल हे। बताय जात हे कि झलमला स्वास्थ्य केन्द्र म बीस झिन संक्रमित मनके इलाज चलत हे।
एसएसबी-अधिसूचना
गृह मंत्रालय ह सशस्त्र सीमा बल-एसएसबी के लड़ाकू सामान्य ड्यूटी समूह ‘सी‘ पद के भर्ती बर नियम -दू हजार छब्बीस के अधिसूचना जारी कर देहे। एमा हरेक भर्ती बछर म कांस्टेबल के पद बर भर्ती म पूर्व अग्निवीर मन बर पचास प्रतिशत पद आरक्षित होही। ए अधिसूचना सहायक उप निरीक्षक हेड कांस्टेबल अउ कांस्टेबल पद बर बछर दू हजार ग्यारह म जारी भर्ती नियम के जगह लीहीं नवा नियम ए महीना के सत्ताईस तारीख ले लागू होगे हे।
गुरू-पूर्णिमा
देसभर म आज गुरू पूर्णिमा उछाह के संग मनाय जात हे, जउन ल व्यास पूर्णिमा घलो केहे जाथे।
प्रधानमंत्री नरेन्द्र मोदी ह सोशल मीडिया म पोस्ट करत किहीन कि गुरू सिरिफ ज्ञान ही नइ देवय भलूक अपन शीष्य मन म बने सोच अउ सद्गुण देथे।
गुरू पूर्णिमा के मउका म मुख्यमंत्री विष्णुदेव साय ह रायगढ़ जिला के ग्राम बनोरा के अघोर गुरू पीठ म भगवान के दर्सन करके प्रदेसवासी मन बर सुख-समृद्धि के मानता मानीन।
कैट अधिसूचना
एमबीए म भर्ती खातिर होवइया कॉमन एडमिशन टेस्ट कैट के अधिसूचना जारी होगे हे। परीक्षा के आयोजन आईआईएम इंदौर करही। ऑनलाइन अरजी तीन अगस्त ले सुरू होही। उम्मीदवार पन्द्रह सितंबर तक अरजी दे सकही। परीक्षा उनतीस नवंबर के देस के एक सौ सत्तर ले जादा केन्द्र म राखे जाही।
प्रधानमंत्री राष्ट्रीय बाल पुरस्कार
प्रधानमंत्री राष्ट्रीय बाल पुरस्कार बर इकतीस जुलाई तक नामांकन मंगाय गेहे। महिला अउ बाल विकास विभाग ह लइका, पालक, शिक्षण संस्थान अउ सामाजिक संगठन ले जादा ले जादा योग्य लइका मनके नामांकन कराय के अपील करीन हे। ए इनाम बर पांच ले अट्ठारह बछर आयु वरग के लइका अरजी कर सकत हे।
उहें, राष्ट्रीय दिव्यांगजन पुरस्कार बर घलो इकतीस जुलाई तक अरजी मंगाय गेहे। ए पुरस्कार दिव्यांगजन ससक्तिकरण के क्षेत्र म बने काम करइया मनखे अउ संस्था ल दे जाथे।
किरण सिंह देव-घायल
भारतीय जनता पार्टी के प्रदेस अध्यक्ष किरण सिंह देव आज रद्दा दुर्घटना म घायल होगे हे। ए हादसा छतरपुर ले लहुटत बेरा होइस। श्री सिंह देव ल इलाज बर झांसी मेडिकल कॉलेज म भर्ती कराय गेहे।