छत्तीसगढ़ म काली ले ‘‘कोरोना सघन सामुदायिक सर्वे अभियान‘‘ सुरू होेही। एमा बारह अक्टूबर तक राज्य के गांव अउ सहर म घर-घर जाके कोरोना संक्रमण के लक्षण वाले मनखे मनके पहिचान करे जाही। ए बेरा संक्रमित मरीज ल जरूरत पड़े म आइसोलेट करे जाही या कोविड केयर सेंटर म इलाज के बेवस्था करे जाही। ए अभियान म संबंधित क्षेत्र के मितानिन, आंगनबाड़ी कार्यकर्ता, सहायिका, बहुउद्देशीय स्वास्थ्य कार्यकर्ता, सीएचओ के अलावा पंचायत अउ ग्रामीण विकास विभाग सहित नगरीय प्रशासन विभाग के मैदानी अमला डहार ले गांव-सहर के जम्मों वार्ड के परिवार के सर्वे करे जाही।
इही बीच, जम्मों जिला कलेक्टर ह नागरिक मन ले सर्वे टीम ल सही जानकारी दे अउ ओमन ल सहयोग करे के अपील करे हे। ओमन किहीन कि अइसे मनखे जेला कोरोना के लक्षण जइसे, सर्दी, खांसी, बुखार, सांस ले म तकलीफ, सरीर म दर्द, दस्त या उल्टी होना, सुंघे या स्वाद ले म कमी अउ कोनों गंभीर बीमारी ले ग्रसित मनखे के संघरा साठ बछर ले जादा उमर के अउ गर्भवती महिला अउ जम्मों झन सर्वे टीम ल अपन जानकारी देके जांच जरूर करवायं।
राजकीय शोक
केन्द्र सरकार के निरदेस म छत्तीसगढ़ सरकार ह घलो कुवैत के अमीर शेख सबा-अल-अहमद, अल-जाबेर-अल-सबा के निधन म प्रदेस म आज एक दिन के राजकीय सोक के घोषणा करे हे। ए बेरा जम्मों सरकारी भवन म राष्ट्रीय ध्वज आधा झुके रइही। सासकीय स्तर म कोन्हों भी मनोरंजक अउ सांस्कृतिक कारीकरम के आयोजन नइ करे जाही।
जानबा के मुताबिक कुवैत के अमीर के निधन पाछु उनतीस सितंबर के होय रिहीस।
मछली पालन-ठगी
प्रदेस के मछली पालन विभाग के संचालक ह राज्य के लोगन ले मछली पालन के नाम म होवइया ठगी ले सावधान रेहे के अपील करे हे। ओमन केहे हे कि राज्य म कुछ अशासकीय संस्था अउ फर्म डहार ले मछली पालन करइया किसान के जमीन म तालाब बनवा के मछली पालन व्यवसाय बर लालच दे जाय के सिकायत मिले हे। ओमन बतईन कि ठगी करइया मन किसान मन ल निश्चित मासिक आय के लालच घलो देवत हे। संगेसंग कान्ट्रैक्ट फार्मिंग या पइसा दुगुना करे के प्रस्ताव दे जावत हे। संचालक ह बतईन कि राज्य सरकार या मछली पालन विभाग ह अइसन कोन्हों भी योजना ल प्रमाणित नइ करे हे। ओमन मछली पालन करइया किसान मन ल अइसन कोन्हों भी ठगी ले बचे अउ सावधान रेहे के सलाह देहे।
मुख्यमंत्री-वन उद्योग
मुख्यमंत्री भूपेश बघेल ह केहे हे कि राज्य सरकार ह उद्यमी मन ल वन आधारित उद्योग लगाय बर हरसंभव मदद करही। ओमन एखर बर राज्य के उद्यमी मन ले आगू आय के आह्वान करे हे। श्री बघेल ह आज अपन निवास कार्यालय म उद्योगपति अउ कतकोन औद्योगिक संगठन के पदाधिकारी मन ले चरचा करत किहीन कि वन आधारित उद्योग के स्थापना बर भूईंया के उपलब्धता सुनिश्चित करे जाही।
यूनिफाॅर्म-वितरण
प्रदेस म सुपोषण अभियान के वर्षगांठ म काली पांच अक्टूबर के आंगनबाड़ी कार्यकर्ता मन ल साड़ी बांटे के कारीकरम के सुरूवात करही। कारीकरम के सुभारंभ मुख्यमंत्री भूपेश बघेल ह अपन निवास कार्यालय ले वीडियो कान्फ्रेंसिंग के माध्यम ले करही। ए बेरा म ओमन सुपोषण अभियान ले संबंधित काॅफी टेबल बुक अउ महिला एवं बाल विकास विभाग के पत्रिका के विमोचन घलो करही।
उहें, मुख्यमंत्री ह काली ‘‘मोर बिजली‘‘ ऐप के नवा वर्जन के सुभारंभ घलो करही। ए ऐप के माध्यम ले बिजली उपभोक्ता मन सोलह ले जादा बिजली ले संबंधित सेवा के घर बइठे लाभ उठा पाही। ए सुविधा ह पूरा तरीका ले निःशुल्क होही।
सहायक प्राध्यापक-परीक्षा
छत्तीसगढ़ लोक सेवा आयोग ह सहायक प्राध्यापक के खाली पद म भर्ती बर लिखित परीक्षा के तिथि घोषित करे हे। ए परीक्षा ल पांच नवंबर ले आठ नवंबर तक आयोजित करे जाही।
खबर हे कि प्रदेस के उच्च सिक्षा विभाग के तेरा सौ चैरासी पद म सहायक प्राध्यापक के भर्ती करे जाही।
कृषि सुधार कानून-बयान
केन्द्रीय सूचना अउ प्रसारण प्रकाश जावड़ेकर ह केहे हे कि कृषि सुधार बर हाल ही म पारित तीनों विधेयक ले किसान मन ल लाभ होही। आज गोवा के राजधानी पणजी म ओमन ह कहिन कि देस ‘‘एक राष्ट्र-एक बाजार‘‘ कोति बाढ़त हे। ओमन यहू घलो किहीन कि न्यूनतम समर्थन मूल्य जारी रइही। ओमन किसान मन ल नवा कृषि कानून म होवत राजनीति के झांसा म नइ आय के अपील करे हे।
केन्द्रीय श्रम अउ रोजगार मंत्री संतोष गंगवार ह केहे हे कि नवा कृषि अउ श्रम सुधार कानून ले किसान अउ श्रमिक मन ल कतकोन लाभ होही। पीएचडी चेम्बर आॅफ काॅमर्स एंड इंडस्ट्रीज डहार ले आयोजित राष्ट्रीय सम्मेलन ल संबोधित करत ओमन किहीन कि नवा कृषि कानून के उद्देश्य किसान मन ल देस म कहू भी अपन उत्पाद ल बेचे के आजादी दीही। एखर ले किसान मन बने मूल्य म अपन उत्पाद ल दूसर राज्य म घलो बेच सकही।
उहें, केन्द्रीय उपभोक्ता मामला खाद्य अउ सार्वजनिक वितरण राज्यमंत्री राव साहेब दानवे ह केहे हे कि कृषि सुधार कानून बछर दू हजार बाईस तक किसान मनके आमदनी दुगुना करे के दिसा म एक महत्वपूर्ण कदम हरय। औरंगाबाद म संवाददाता सम्मेलन ल संबोधित करत श्री दानवे ह कहिन कि एखर पहिली सिरिफ लाइसेंस धारक व्यापारी मंडी समिति म व्यापार कर सकत रिहीन। फेर ए कानून के बने के बाद किसान खुले बाजार म अपन उपज बेच सकही। एखर ले बाजार म बिचैलिया मनके आधिपत्य समाप्त होही।
ठग-गिरफ्तार
बालोद जिला पुलिस ह सोशल मीडिया के माध्यम ले ठगी करइया अंतर्राज्यीय गिरोह के दू सदस्य ल गिरफ्तार करे हे। पुलिस अधीक्षक जितेन्द्र सिंह मीणा ह मीडिया ले चरचा करत बतईन कि ए गिरोह के सदस्य डहार ले मोबाइल, कार या दूसर घरेलू सामान ल सोशल मीडिया म बेचे बर विज्ञापन दे जाथे। ओमन अपन परिचय सेना के जवान के रूप देथे। ओमन बतईन कि ए गिरोह के बैंक खाता ले करीबन पचास लाख रूपिया के ट्रांजेक्सन के जानकारी मिले हे।
जानबा के मुताबिक जिला के देवरी थाना म एक झिन युवक डहार ले सोशल मीडिया के माध्यम ले करीबन सैंतीस हजार रूपिया के ठगी के मामला दर्ज कराय गे रिहीस, जेखर बाद पुलिस ह राजस्थान के अलवर जिला ले दू झिन आरोपी ल गिरफ्तार करे हे।
दुर्घटना
पाछु चैबीस घंटा के दउरान प्रदेस के अलग-अलग जिला म होय सड़क हादसा म छह लोगन के मउत होगे। उहें, पांच झन दूसर लोगन घायल होगे।
बलौदाबाजार-भाटापारा जिला के गिधौरी थाना क्षेत्र म आज होय सड़क हादसा म मां-बेटी के मउत होगे।
उहें, दुरूग जिला के बालोद सड़क मार्ग म कुथरेल गांव के तीर पाछु रतिहा दू मोटर साइकिल के आपस म टकराय ले दू झिन युवक के संघरा एक झिन अधेड के मउकाच म मउत होगे। उहें, एक झिन मनखे घलो घायल होगे।
ऐति, रायगढ़ जिला म जिंदल विमानतल के तीर एक ठिन एम्बुलेंस ह अनियंत्रित होके पेड़ ले टकरा गे। ए हादसा म एक झिन बुजुर्ग के मउत होगे। उहें, चार झिन लोगन घायल होगे।
मौसम
अवइया चैबीस घंटा के दउरान प्रदेस के कई जगह म हल्का ले मध्यम बारिस होय के संभावना हे। मौसम विभाग केन्द्र रईपुर के मौसम विज्ञानी आर.के. वैश्य ह आकाशवाणी समाचार ल बतईन कि बंगाल के खाड़ी के उपर बने कम दबाव के क्षेत्र के सेती प्रदेस के कई हिस्सा म हल्का ले मध्यम बारिस होय के आसार हे।
इही बीच, महासमुंद जिला के तेंदूकोना अउ पिथौरा क्षेत्र म आज जोरदार बारिस होय के समाचार मिले हे। उहें, महासमुंद अउ सहर के आसपास क्षेत्र म हल्का बूंदाबांदी होय के खबर हे।
गुण्डाधूर सम्मान-आवेदन
प्रदेस म खेल के क्षेत्र म उत्कृष्ट प्रदर्शन करइया खिलाड़ी मन ल दे जाने वाला गुण्डाधूर अउ महाराजा प्रवीरचंद भंजदेव पुरस्कार बर पन्द्रह अक्टूबर तक आवेदन आमंत्रित करे गेहे। राज्य सासन डहार ले चयनित खिलाड़ी मन ल पुरस्कार के रूप म एक लाख रूपिया नगद के संघरा अलंकरण फलक अउ प्रसस्ति पत्र ले सम्मानित करे जाही। इच्छुक खिलाड़ी अपन आवेदन संचालनालय खेल अउ युवा कल्याण अउ जिला कार्यालय म जमा कर सकत हे।
संक्षिप्त समाचार
अउ अब थोरकुन समाचार सार म-
– महासमुंद जिला म अल्पसंख्यक छात्रवृत्ति बर आॅनलाइन आवेदन इकतीस अक्टूबर तक आमंत्रित करे गेहे।
– कोंडगांव जिला के गोलावंड स्थित एकलव्य आदर्श आवासीय विद्यालय म खाली सीट म पढ़ईया मनके दाखिला बर आठ अक्टूबर तक आवेदन मंगाय गेहे।
– महासमुंद जिला के कृषि विभाग म पदस्थ तत्कालीन उप संचालक बी.पी. चैबे ल आर्थिक अनियमितता बरते के आरोप म निलंबित कर दे गेहे।
– राजनांदगांव नगर निगम ह समाजसेवी निमा राजवत ल स्वच्छता अभियान के संघरा शासकीय योजना के प्रचार-प्रसार बर अपन ब्रांड एम्बेस्डर बनाय हे।
अउ
– कोरिया जिला म खनिज के अवैध परिवहन करे के मामला म तेईस ठिन गाड़ी ल जब्त करे हे।