उहें, एक आने फइसला म राज्य मंत्रि परिषद ह किसान मन ल खरीफ अउ रबी मौसम म खातू के बेरा रहत देवाय बर मंत्रिमंडलीय उपसमिति के गठन ल मंजूरी देहे। उपमुख्यमंत्री ए समिति के अध्यक्ष रइही। उहें कृषि सहकारिता अउ वित्त मंत्री एखर सदस्य रइही।
आरटीई-आवेदन
शिक्षा के अधिकार अधिनियम आरटीई के तहत प्रदेस के प्राइवेट स्कूल मन म दाखिला बर तीसरा अउ आखिरी चरण आज ले सुरू हो गेहे। पात्र अभिभावक आज ले पांच अगस्त तक आरटीई पोर्टल ले ऑनलाइन अर्जी अउ जरूरी सुधार कर सकही। दस अगस्त ले चैदह तारीख तक ऑनलाइन लॉटरी काउंसलिंग ले चुने गे लइका मनके सूची जारी करे जाही अउ सत्रह अगस्त ले पच्चीस अगस्त तक लॉटरी म चुने गे लइका मन ल प्राइवेट स्कूल मन म भर्ती करे जाही।
नीट परीक्षा-चर्चा
केंद्रीय संसदीय कार्यमंत्री किरेन रिजिजू ह किहीन हे कि सरकार मानसून सत्र के पहिलीच दिन नीट परीक्षा पेपर लीक मामला म गोठबात बर तियार हे। संसद परिसर म पत्रकार मनले गोठबात म ओमन किहीन कि ए गोठबात बर नियम बनाय जाना चाही। ओमन यहू किहीन कि सरकार नीट परीक्षा प्रश्नपत्र म चर्चा चाहत हे। श्री रिजिजू ह किहीन कि सरकार ह विपक्षी दल ल ए मुद्दा म गोठबात खातिर बलाय रिहीस। फेर ओमन अइसन कीसम के मुसकल खड़ा करीन, जेखर ले अइसे लागत हे कि ओमन गोठबात म सामिल नइ होना चाहत हे।
भाजपा कांग्रेस-प्रदर्सन
दिल्ली म नेता प्रतिपक्ष राहुल गांधी कोति ले प्रधानमंत्री आवास घेराव के विरोध म आज रईपुर के शंकरनगर क्षेत्र म भारतीय जनता पार्टी ह प्रदर्सन करीन। ए दउरान भाजपा नेता, कांग्रेस कार्यालय राजीव भवन के घेराव करे बर निकलीन। प्रदर्सन के दउरान दूनांे पार्टी के नेता आमने-सामने आगे, स्थिति ल देखत पुलिस ह वाटर कैनन अउ आंसू गैस छोड़िन। पुलिस कोति ले लगाय गे बैरीकेट ल प्रदर्सन करइया मन ह तोड़े के परयास करीन।
इंडिया इंडस्ट्रियल फेयर
राजधानी रईपुर म अट्ठारह ले बीस सितंबर तक चैदहवां इंडिया इंडिस्ट्रियल फेयर राखे जाही। ए जानकारी आज मुख्यमंत्री विष्णुदेव साय ल रईपुर लघु उद्योग भारती के प्रतिनिधि मंडल ह भेंट के दउरान दीन। ए मउका म मुख्यमंत्री ह किहीन कि अइसन राष्ट्रीय स्तर के आयोजन ले उद्योग ल बढ़ावा मिलही अउ रोजगार के नवा मउका मिलही।
राज्यपाल-शबरी वाचनालय
राज्यपाल रमेन डेका ह वनवासी विकास समिति कोति ले जनजातीय बालिका मनके पढ़ई-लिखई अउ संस्कृति ल बढ़ावा दे खातिर बनाय शबरी वाचनालय के उद्घाटन करीन। ए मउका म राज्यपाल ह किहीन हे कि शबरी वाचनालय एक दूरदर्सी पहल आय जउन जनजातीय नोनी मन बर पढ़ई-लिखई अउ व्यक्तित्व निर्माण के केंद्र बनही।
मुख्यमंत्री-यूनिसेफ प्रतिनिधी मुलाकात
मुख्यमंत्री विष्णुदेव साय ले आज यूनिसेफ भारत के प्रतिनिधि सिंथिया मैक कैफ्रे ह भेंट करीन। ए दउरान राज्य म महतारी अउ लइका के स्वास्थ्य, कुपोषण अउ बिकास उपर गोठबात होइस। मुख्यमंत्री ह स्वास्थ्य महिला अउ बाल विकास पंचायत अउ आदिमजाति विभाग समेत सबो संबंधित विभाग ल यूनिसेफ के तकनीकी मदद ले कार्ययोजना तियार करे के निरदेस दीन।
जीएसटी-कार्रवाई
छत्तीसगढ़ राज्य जीएसटी विभाग ह तिरपन करोड़ रूपिया के फर्जी बिलिंग अउ बोगस इनपुट टैक्स क्रेडिट के मामला म मुख्य आरोपी विजय कुमार यादव ल गिरफ्तार करे हे। अदालत ह आरोपी ल तीन अगस्त तक न्यायिक रिमांड म भेज देहे। विभाग के मुताबिक आरोपी ह दू ठिन फर्म ले करीबन तिरपन करोड़ रूपिया के बोगस बिलिंग करके नौ करोड़ चौव्वन लाख रूपिया के फर्जी इनपुट टैक्स क्रेडिट आने-आने फर्म ल भेज दीस। राज्य जीएसटी विभाग ह मामला के जांच करत हे।
बारिस
राजधानी रईपुर समेत प्रदेस के आने-आने जिला म आज भिनसरहा ले रूक-रूकके बरसा होवत हे। बरसा के सेति कतकोन नदिया-नरवा उफान म हवय। जांजगीर-चांपा जिला के रिंगनी-कुकदा अउ बिलारी-कचंदा नाला के पूल उपर ले पानी बोहात हे, जेखर सेति ए रद्दा म चैबीस घंटा ले अवई-जवई बंद हे। सुरक्षा ल देखत पूल के दूनों कोति डीडीआरएफ के टीम ल तैनात करे गेहे।
इही जिला म बरसा के सेति जमड़ी नाला उफान म हवय, जेमा सिवनी- बहेराडीह रद्दा म अवई-जवई बंद होगे। ओति, कबीरधाम जिला के कुकदुर थाना क्षेत्र के ग्राम लोखान म नरवा के तेज बहाव म बोहाय ले एक बाबू के मउत होगे, जेखर शव आज आगर नंदिया के पेड़ म फंसे मिलिस। पुलिस के मुताबिक मृतक अपन संगी संग नाला पार करत रिहीस, तभे तेज पानी के बहाव म बोहागे।
ऐति, कोरबा जिला के लेमरू थाना क्षेत्र म उफनत सांचर नरवा ल पार करे के परयास म एक मनखे दुपहिया गाड़ी संग बोहागे। मंगलवार बिहनिया पुलिस अउ गांव के लोगन मन उंखर शव ल घटना के जघा ले करीबन तीन किलोमीटर दूरिहा बरामद करीन हे। सरलग बरसा के सेति सक्ति जिला के जैजैपुर सामुदायिक स्वास्थ्य केंद्र म नाली के गंदा पानी अस्पताल म खुसर गेहे।
इही बीच, मौसम विभाग ह अवइया चैबीस घंटा म बिलासपुर अउ रईपुर-दुरूग संभाग म ऑरेंज अलर्ट जारी करत कुछेक जघा म भारी ले अतिभारी बरसा होय के चेतावनी देहे। मौसम विज्ञानी डॉक्टर गायत्रीवाणी ह बतइन हे कि प्रदेस म ए स्थिति अवइया तीन दिन तक बने रइही।
मुख्यमंत्री लोक-कलाकार
मुख्यमंत्री विष्णुदेव साय ह अंतरराष्ट्रीय ख्याति मिले लोक कलाकार अउ परसिध्द बांस वादक विक्रम यादव के परिवार वाले मन ले फोन म गोठबात करके उंखर स्वास्थ्य के जानकारी लीन। ओमन भरोसा देवाइन कि राज्य सरकार उंखर बने इलाज खातिर मदद करही। मुख्यमंत्री ह राजनांदगांव कलेक्टर ल निरदेस दीन हे कि वरिष्ठ विशेषज्ञ चिकित्सक मनके देखरेख म श्री यादव के बने इलाज करे जाय। श्री साय ह किहीन हे कि विक्रम यादव ह अपन बांस वादन कला ले छत्तीसगढ़ के लोक संस्कृति ल देस अउ विदेस म चिन्हारी देवाय हे। ओमन उंखर जल्दी ठीक होय के कामना करीन। उहें, संस्कृति मंत्री राजेश अग्रवाल ह घलो विक्रम यादव के परिवार वाले मन ले फोन म गोठबात करत बने इलाज अउ मदद दे के भरोसा देवाइन हे।
प्रश्नोत्तरी-प्रतियोगिता
युवा कार्य विभाग ह माय भारत पोर्टल म राष्ट्रीय ध्वज प्रश्नोत्तरी के सुभारंभ करीन हे। ए प्रश्नोत्तरी प्रतियोगिता पंद्रह अगस्त तक चलही। एखर ले देसभर के युवा मन ल भारत के राष्ट्रीय ध्वज अउ ओखर महत्ता के संबंध म अपन समझ ल बढ़ाय के मउका मिलही।
एचपीवी-टीकाकरण अभियान
बलरामपुर-रामानुजगंज जिला ह निसुल्क एचपीवी टीकाकरण अभियान म छत्तीसगढ़ अव्वल जघा पाय हे। यू वीन प्रगतिशील रिपोर्ट के मुताबिक जिला ह सतप्रतिसत उपलब्धि दरज करे हे। जिला म आठ हजार सात सौ ले जादा नोनी मनके टीकाकरण कराय गीस। कलेक्टर चंदन संजय त्रिपाठी ह बतइन कि घर-घर जाके स्कूल अउ आंगनबाड़ी केंद्र ले पात्र नोनी मनके चिन्हारी करके लक्ष्य ल पूरा करे गीस।
वैद्य सम्मेलन
महासमुंद जिला म जिला स्तरीय वैद्य सम्मेलन राखे गीस। सम्मेलन के उद्देस्य पारंपरिक स्वास्थ्य परंपरा अउ औषधि पउधा ल बढ़ावा देना रिहीस। कारीकरम म बताय गीस कि एसो राज्य के छै सौ साठ पारंपरिक वैद्य मनके काउंसिल ऑफ इंडिया ले प्रमाणन कराय जाही। एखर बर सबो तैंतीस जिला म वैद्य सम्मेलन राखे जाही।
कृषक रत्न-पुरस्कार
कृषि विभाग ह बछर दू हजार छब्बीस बर प्रतिष्ठित कृषक रत्न पुरस्कार खातिर पात्र किसान मन ले अर्जी मंगाय हे, जउन किसान मन एमा भाग लेना चाहत हे ओमन तय अर्जी ल भर के अपन विकास खंड के बड़का कृषि विकास अधिकारी कार्यालय म इकतीस जुलाई तक जमा करा सकत हे।
ट्रेन-परिचालन
दक्षिण पूर्व मध्य रेलवे के रईपुर मंडल के भाटापारा हथबंद स्टेसन के बीच तीसर लाइन सेक्सन म एनआई के काम करे जाहीा, जेखर सेति काली अउ परनदीन तेईस अउ चैबीस जुलाई के कुछेक गाड़ी रद्द रइही। एमा रईपुर-बिलासपुर-रईपुर मेमू, बिलासपुर-गेवरारोड-बिलासपुर मेमू, कोरबा-रईपुर-कोरबा-पैसेंजर अउ रईपुर-गेवरा रोड मेमू पैसेंजर ट्रेन सामिल हे।