विस सत्र
छत्तीसगढ़ विधानसभा के मानसून सत्र आज ले सुरू हो गेहे। सत्रह जुलाई तक चलइया ए सत्र के दउरान कुल पांच ठन बइठका होही।
सत्र के पहिली दिन आज सदन म सबले पहिली छत्तीसगढ़ के जाने-माने पंडवानी गायिका पद्म विभूषण डॉक्टर तीजन बाई ल श्रध्दांजलि दे गीस। विधानसभा अध्यक्ष डॉक्टर रमन सिंह, मुख्यमंत्री विष्णुदेव साय, नेता प्रतिपक्ष डॉक्टर चरणदास महंत संघरा सत्ता पक्ष अउ विपक्ष के सदस्य मन ह स्वर्गीय तीजन बाई के योगदान ल सुरता करीन।
मुख्यमंत्री ह किहीन कि डॉक्टर तीजन बाई के निधन ले छत्तीसगढ़ ह अपन लोक संस्कृति के एक ठन अनमोल रतन ल गंवा दे हवय, उंखर जाय ले कला अउ सांस्कृतिक जगत ल अपूर्णीय क्षति होय हे।
विस-प्रश्नकाल
छत्तीसगढ़ विधानसभा म आज राम मंदिर के दान के चोरी के मामला जोर सोर ले उठिस। मुख्य विपक्षी दल कांग्रेस ह ए मुद्दा म स्थगन प्रस्ताव के माध्यम ले चर्चा कराय के मांग करीस, जेला विधानसभा अध्यक्ष डॉक्टर रमन सिंह ह अग्राह्य कर दीन। एखर बाद विपक्षी सदस्य मन ह सोर-सराबा सुरू कर दीन। हंगामा के बीच थोरकुन देर बाद सदन के कार्यवाही स्थगित कर दे गीस। दुबारा सदन के कार्यवाही सुरू होते साठ सत्ता पक्ष अउ विपक्ष के बीच नोकझोंक होय बर लगिस। एखर बाद अध्यक्ष ह सदन के कार्यवाही ल काली तक बर स्थगित कर दीन।
उहें, प्रश्नकाल म आज भाजपा विधायक लता उसेंडी ह कोंडागांव के शहीद महेन्द्र कर्मा विश्वविद्यालय म बीएड अउ डीएड पाठ्यक्रम नइ चलाय के, खाली पद म भर्ती अउ राष्ट्रीय शिक्षा नीति म काम के मामला उठाइन। जवाब म उच्च शिक्षा मंत्री टंकराम वर्मा ह बतइन कि विश्वविद्यालय म भर्ती प्रक्रिया सुरू कर दे गे हवय अउ भर्ती ले जुड़े कोनो भी प्रकार के सिकायत नइ मिले हे।
प्रश्नकाल के दउरान भाजपा विधायक अजय चंद्राकर ह घलो प्रदेस म चार बछर के बीएड अउ डीएड पाठ्यक्रम सुरू करे के दिसा म सरकार के तियारी के बारे म पूछिन। एमा उच्च शिक्षा मंत्री ह स्वीकार करीन कि प्रदेस के कतकोन महाविद्यालय जरूरी मानक के अनुसार नइ हे। राज्य म नवा शिक्षा नीति के अनुसार चार बछर के पाठ्यक्रम लागू करे के प्रक्रिया बनाय बर एक ठन टास्क फोर्स के गठन करे गेहे।
अइसने, प्रश्नकाल म छत्तीसगढ़ भू-राजस्व संहिता के प्रावधान म गांव के बंदोबस्त के मामला उठिस। राजस्व मंत्री टंकराम वर्मा ह कांग्रेस विधायक जनक धु्रव के सवाल के जुवाब म बतइन कि प्रदेस म सात सौ छियालिस गांव के सर्वेक्षण नइ होय हे, जेमा ले तीन सौ इकहत्तर गांव म सर्वेक्षण चलत हे। उहें, तीन सौ पचहत्तर गांव म सर्वेक्षण नइ होय हे।
एमबीबीएस सीट-स्वीकृत
राष्ट्रीय चिकित्सा आयोग-एनएमसी डहार ले प्रदेस के गीदम, कुनकुरी, मनेन्द्रगढ़, जांजगीर-चांपा अउ कबीरधाम म पचास-पचास एमबीबीएस सीट वाले पंाच ठन नवा शासकीय मेडिकल कालेज के स्थापना बर चालू सैक्षणिक सत्र ले मंजूरी दे गे हवय। एखरे संग प्रदेस म कुल दू सौ पचास नवा एमबीबीएस सीट के विस्तार होही।
मुख्यमंत्री विष्णुदेव साय ह ए उपलब्धि ल प्रदेस म चिकित्सा शिक्षा अउ स्वास्थ्य अधोसंरचना विकास के ऐतिहासिक पड़ाव किहीन। ओमन किहीन कि प्रदेस के दूरस्थ, आदिवासी अउ आकांक्षी क्षेत्र म मेडिकल कालेज के स्थापना ले स्थानीय युवा मन ल अपनेच राज्य म गुणवत्तापूर्ण चिकित्सा शिक्षा के जादा मउका मिलही। संगेसंग बिसेसज्ञ डॉक्टर मनके संख्या बाढ़ही अउ क्षेत्रीय स्तर म स्वास्थ्य सेवा के गुणवत्ता म घलो सुधार आही।
एचपीवी-टीकाकरण
प्रदेस म किसोरी मन ल सर्वाइकल कैंसर ले बचाय बर आज ले विसेस एचपीवी टीकाकरण सप्ताह सुरू हो गेहे। एमा चौदह बछर के उमर के सबो पात्र नोनी मन ल स्वास्थ्य विभाग डहार ले निसुल्क जीवन रक्षक एचपीवी टीका लगाय जावत हे। इही कड़ी म धमतरी जिला म घलो नोनी मन ल टीका लगाय बर स्वास्थ्य विभाग डहार ले स्कूल ले स्वास्थ्य केंद्र तक तियारी करे गे हवय।
प्रधानमंत्री-‘ट्री ऑफ लाइफ‘
प्रधानमंत्री नरेंद्र मोदी ह न्यूजीलैंड के प्रधानमंत्री क्रिस्टोफर लक्सन ल छत्तीसगढ़ के बस्तर के प्रसिध्द ढोकरा ‘‘ट्री ऑफ लाइफ‘‘ धातु सिल्पकृति भेंट करीन। एखर ले बस्तर के पारंपरिक जनजातीय कला ल अंतरराष्ट्रीय स्तर म नवा पहिचान मिले हे।
मुख्यमंत्री विष्णुदेव साय ह एला राज्य के समृध्द जनजातीय संस्कृति अउ पारंपरिक सिल्प बर सम्मान बतइन हे। ढोकरा कला ह विश्व के सबले जुन्ना धातु सिल्प परंपरा के माने जाथे। एला मोम के सांचा ले ढलाई करके विसेस तकनीक ले बनाय जाथे।
राष्ट्रीय शोक
भारत ह कतर के पूर्व अमीर शेख हमद बिन खलीफा अल-थानी के निधन म श्रध्दांजलि देवत आज एक दिन के राष्ट्रीय शोक घोसित करे हे। शोक दिवस के दउरान देसभर म ओ सबो भवन म राष्ट्रीयध्वज ह आधा झूके रइही, जिंहा नियमित रूप ले राष्ट्रीयध्वज ल फहराय जाथे। आज कोनो भी आधिकारिक मनोरंजन के कारीकरम नइ होही।
राजस्व ग्राम सर्वेक्षण अभियान
प्रदेस के ग्रामीण क्षेत्र म भू-संपत्ति के सटीक डिजीटल रिकॉर्ड तियार करे के संगेसंग भूमि स्वामी मन ल उंखर भूमि अउ मकान के मालिकाना हक प्रदान करे बर राजस्व ग्राम सर्वेक्षण अभियान चलाय जावत हे। एमा राजस्व विभाग ह प्रदेस म कुल बीस हजार पांच सौ इंक्यावन राजस्व ग्राम म उन्नीस हजार आठ सौ पांच गांव के विस्तृत सर्वेक्षण के काम ले पूरा कर ले हवय। डिजीटल रिकॉर्ड तियार होय ले भूमि ले जुड़े आपसी विवाद अउ मुकदमा म कमी आही। उहें, किसान मन ल बैंक ले ऋण लेबर, फसल बीमा अउ शासकीय योजना के फायदा लेमा घलो आसानी होही।
नगरीय निकाय-राशि
नगरीय प्रशासन विभाग ह प्रदेस के सबो एक सौ चौरानवे नगरीय निकाय ल आने-आने मद म करीबन अंठावन करोड़ तिरालिस लाख रूपिया दे हवय। उहें, प्रदेस के चौदह नगर-निगम ल कुल सत्ताईस करोड़ बयासी लाख रूपिया के रासि जारी करे गेहे अउ छप्पन नगर पालिका ल कुल अट्ठारा करोड़ इकहत्तर लाख रूपिया अउ एक सौ चौबीस नगर पंचायत ल ग्यारा करोड़ नवासी लाख रूपिया दे गे हवय।
अमान शुक्ला-रजत पदक
दक्षिण अफ्रीका म होय विश्व स्तरीय एशिया-पैसिफिक-अफ्रीकन अंतरराष्ट्रीय पावर लिफ्टिंग चैंपियनशिप म भिलाई के खिलाड़ी अमान शुक्ला ह क्लासिक स्पर्धा के एक सौ बीस किलो ग्राम भार वर्ग म रजत पदक जीते हवय। अमान शुक्ला ह एखर पहिली प्रतियोगिता के इक्विप्ड श्रेणी म स्वर्ण पदक जीते रिहीन।
गांजा-आरोपी गिरफ्तार
बिलासपुर रेलवे स्टेसन म जीआरपी ह करीबन पचपन किलो गांजा के संग दू झन महिला के संघरा चार आरोपी ल गिरफ्तार करे हे। आरोपी मन ह ए गांजा ल मध्यप्रदेस के रीवा लेगत रिहीस। आरोपी मन तीर ले जब्त गांजा के कीमत सत्ताईस लाख रूपिया बताय जावत हे।
उहें, रईपुर के कमिश्नरेट पुलिस ह टिकरापारा थाना क्षेत्र ले छियालिस किलो गांजा जब्त करे हे, जेखर कीमत उनतीस लाख रूपिया बताय गे हवय। ए मामला म एक झन दंपत्ति संघरा पांच झन आरोपी मन ल गिरफ्तार करे गे हवय।
अउ अब थोरकुन समाचार सार म –
– राज्य सरकार ह जांजगीर-चांपा जिला के पामगढ़-लाहौद मार्ग के डोंगा कोहरौद बस्ती म करीबन चार किलोमीटर सड़क बनाय के काम बर छै करोड़ पांच लाख रूपिया मंजूर करे हे।
– प्रधानमंत्री फसल बीमा योजना म चालू खरीफ बछर बर फसल बीमा कराय के आखिरी तारीख इकतीस जुलाई तय करे गेहे। किसान मन ह जन सेवा केंद्र के माध्यम ले फसल बीमा करा सकत हे।
अउ
– कोरबा वन मंडल के करतला रेंज के चोरभट्ठी जंगल म नौ ठन हाथी के दल घूमत हे। सूचना मिले म वन विभाग के टीम ह मउका म पहुंचके सरलग निगरानी करत हे। उहें, तीर-तखार के क्षेत्र म मुनादी कराके लोगन ल सतर्क करे जावत हे।