गांधी/शास्त्री-जयंती
देस आज राष्ट्रपिता महात्मा गांधी के जयंती म ओमन ल श्रद्धांजलि अर्पित करत हे। ए मउका म छत्तीसगढ़ सहित देसभर म कतकोन कारीकरम आयोजित करे जावत हे। कोरोना महामारी ल ध्यान म राखत कई ठिन वर्चुअल कारीकरम घलो आयोजित करे जावत हे।
राष्ट्रीय राजधानी दिल्ली म राजघाट म महात्मा गांधी के समाधि म आज बिहनिया सर्वधर्म प्रार्थना सभा के आयोजन करे गीस। राष्ट्रपति रामनाथ कोविंद अउ प्रधानमंत्री नरेन्द्र मोदी ह बापू के समाधि म फूलमाला चढ़ाईन। महात्मा गांधी के जयंती अंतर्राष्ट्रीय अहिंसा दिवस के रूप म घलो मनाय जावत हे।
राष्ट्रपिता ल श्रद्धांजलि अर्पित करत प्रधानमंत्री नरेन्द्र मोदी ह किहीन कि गांधी जयंती म हमन अपन प्रिय बापू ल नमन करत हन। ओमन किहीन कि हमन ल उंखर जीवन अउ महान विचार ले बहुत कुछ सीखना हे।
उहें, देस ह आज पूर्व प्रधानमंत्री लालबहादुर शास्त्री ल उंखर जयंती म सुरता करत हे। राष्ट्रपति रामनाथ कोविंद अउ प्रधानमंत्री नरेन्द्र मोदी ह आज बिहनिया विजयघाट म उंखर समाधि म फूल-माला चढ़ाईन।
गांधी जयंती-छत्तीसगढ़
मुख्यमंत्री भूपेश बघेल ह आज नवा रईपुर स्थित मंत्रालय परिसर म बापू के मूर्ति के वीडियो कान्फ्रेंसिंग के माध्यम ले उद्घाटन करीन। अपन संबोधन म श्री बघेल ह किहीन कि राष्ट्रपिता महात्मा गांधी ह देस के स्वतंत्रता संग्राम के दउरान आजादी बर संघर्ष करत आने-आने विचार धारा मन ल एकजुट करीन अउ एला अहिंसा अउ सत्याग्रह के रद्दा म आगू बढ़ाईन। मुख्यमंत्री ह किहीन कि आजादी के लड़ाई के दउरान महात्मा गांधी के छत्तीसगढ़ आना होईस अउ स्थानीय लोगन उंखर विचार ले प्रेरित रिहीस। ए मउका म मुख्यमंत्री ह अपन निवास कार्यालय म राष्ट्रपिता महात्मा गांधी अउ पूर्व प्रधानमंत्री स्वर्गीय लालबहादुर शास्त्री के जयंती म ओमन ल नमन करत श्रद्धांजलि दीन।
गांधी जयंती के मउका म मुख्यमंत्री ह एक ठिन चिट्ठी लिखके पंचायत अउ नगरीय निकाय के पदाधिकारी मन ल अपन सुभकामना दीन। चिट्ठी म ओमन लिखीन कि दुनिया म कोनों भी तरह के दमन अउ सोषण ले बाहिर निकलना हे त बापू के देखाय रद्दा म चलना होही। मुख्यमंत्री ह पंचायत अउ नगरीय निकाय के पदाधिकारी मन ले गांधीजी के सपना ल नवा छत्तीसगढ़ गढ़े म मदद करे के अपील करीन।
उहें, राजनांदगांव सहर के हलदी वार्ड म महिला स्व-सहायता समूह डहार ले राखे गे स्वच्छता अभियान म सामिल होके महापौर हेमा देखमुख ह खुदे झाडू लगा के स्वच्छता के संदेस दीन।
स्वच्छ भारत पुरस्कार
केन्द्रीय जल शक्ति मंत्रालय के गंदगी मुक्त भारत अभियान के तहत छत्तीसगढ़ ल सर्वाधिक ओडीएफ प्लस गांव बर दूसरा पुरस्कार मिले हे। केन्द्रीय जल शक्ति मंत्री गजेन्द्र सिंह शेखावत ह गांधी जयंती के मकउा म राखे गे स्वच्छ भारत दिवस म आॅनलाइन समारोह के माध्यम ले छत्तीसगढ़ ल ए इनाम दे गीस।
ए कारीकरम म श्री शोखावत ह राज्य, जिला ब्लाॅक अउ ग्राम पंचायत मन ल बछर दू हजार बीस के स्वच्छ भारत पुरस्कार दीन।
छत्तीसगढ़ ल दे गे सबले जादा ओडीएफ प्लस गांव के पुरस्कार पंचायत अउ ग्रामीण विकास मंत्री टी.एस. सिंहदेव के अलावा विभाग के आने अधिकारी मन ल ग्रहण करीन। श्री सिंहदेव ह ए उपलब्धि बर स्वच्छ भारत मिशन-ग्रामीण के राज्य, जिला, विकासखंड अउ ग्राम पंचायत के पूरा टीम ल बधाई दीन हे।
खबर के मुताबिक स्वच्छ भारत मिशन-ग्रामीण अभियान के दूसर चरण म ए बछर प्रदेस के बैसठ गांव मन ल ओडीएफ प्लस घोषित करे गेहे।
प्रधानमंत्री-जल जीवन मिशन
प्रधानमंत्री नरेन्द्र मोदी ह जम्मों गांव के सपरंच अउ ग्राम प्रधान मन ले अपील करे हे कि जल जीवन मिशन ल गांव मन म बने ढंग ले लागू करे के कोसिस जारी राखय, जेखर ले जम्मों लोगन मनके संग बिसेस कर गरीब परिवार मनके घर म नल ले पीये के पानी देवाय जा सकें। जल शक्ति मंत्रालय ह किहीन कि ए अभियान के तहत शुद्ध पीये के पानी के आपूर्ति करे जाही, जेखर ले पानी ले फैलइया बीमारी के रोकथाम म घलो मदद मिलही।
सघन सामुदायिक अभियान
छत्तीसगढ़ म आज ले कोरोना सघन सामुदायिक सर्वे अभियान शुरू होगे हे। एखर तहत बारह अक्टूबर तक राज्य के गांव अउ सहर इलाका म घर-घर जाके कोविड-नाइंटीन के लक्षण वाले मरीज मनके पहिचान करे जाही। स्वास्थ्य विभाग के अपर मुख्य सचिव रेणु जी. पिल्ले ह पूरा दिसा-निरदेस जारी करत ए अभियान ल चलाय बर जम्मों कलेक्टर मन ल चिट्ठी लिखे हे। श्रीमती पिल्ले ह कलेक्टर मन ले कहिन हे कि ए जांच अभियान म कोनों गांव अउ सहर के परिवार नइ छूटना चाही।
स्कूल शिक्षा-गणवेश/साइकिल
राज्य के स्कूल मन म जउन भी पात्र लइका मन ल निःसुल्क पाठ्य पुस्तक, स्कूल डरेस या साइकिल नइ मिले हे, ओमन ह सीधा बड़का अधिकारी तक इस बात के सूचना दे सकत हे। एखर बर स्कूल शिक्षा विभाग ह संभागवार अधिकारी मनके मोबाइल नंबर जारी करे हे। लइका मन ल स्कूल शिक्षा विभाग कोति ले जारी नंबर म अपन नाव, कक्षा अउ स्कूल के बारे म पूरा जानकारी देना होही।
उहें, राज्य माध्यमिक शिक्षा मंडल डहार ले नौवीं ले बारहवीं कक्षा तक के लइका मन बर आॅनलाइन कक्षा सुरू कर दे गेहे।
उद्यानिकी विवि-भूमिपूजन
राज्य के पहिली उद्यानिकी अउ वानिकी विश्वविद्यालय दुरूग जिला के पाटन स्थित सांकरा गांव म खोले जाही। ए विश्वविद्यालय के नाव राष्ट्रपिता महात्मा गांाधी के नाव म राखे जाही।
गांधी जयंती के मउका म आज वीडियो कान्फ्रेंसिंग के माध्यम ले मुख्यमंत्री भूपेश बघेल ह ए विश्वविद्यालय के भूमिपूजन करीन। मुख्यमंत्री ह उम्मीद जताईन कि ए विश्वविद्यालय के स्थापना ले राज्य म रोजगार के मउका मिलही। ए मउका मुख्यमंत्री ह दुरूग जिला बर करीबन ढाई सौ करोड़ रूपिया के लागत के आने-आने विकास अउ निरमान काम के भूमिपूजन अउ लोकार्पण करीन।
कृषि विधेयक-कांग्रेस प्रदर्शन
केन्द्र सरकार डहार ले पारित कृषि संशोधन विधेयक मनके विरोध म आज राजधानी रईपुर समेत प्रदेस के जम्मों जिला मुख्यालय मन म कांग्रेस पार्टी के पदाधिकारी मन ह धरना-प्रदर्शन करीन। रईपुर के ओसीएम चैक अउ आजाद चैक के तीर पार्टी कार्यकर्ता मन ह ए विधेयक मनके खिलाफ प्रदर्सन करीन।
कांग्रेस डहार ले कृषि कानून विधेयक के विरोध म आज ले हस्ताक्षर अभियान सुरू करे गेहे।
सुप्रीम कोर्ट-प्रकरण समीक्षा
राज्य म आठ जिला के अनुसूचित जनजाति वर्ग के रहवासी मनके खिलाफ दर्ज प्रकरण के आज समीक्षा करे गीस। उच्चतम न्यायालय के रिटायर न्यायधीश ए.क.े पटनायक के अगुवई म वीडियो कान्फ्रेंसिंग के माध्यम ले अनुसूचित जनजाति वर्ग के लोगन मनके खिलाफ दर्ज पांच सौ अट्ठाईस प्रकरण मन उपर बिचार करे गीस। ए मामला म बस्तर संभाग के जम्मों सात जिला अउ राजनांदगांव जिला के आय। समीक्षा के दउरान समिति डहार ले दू सौ सोलह मामला अभियोजन ले वापिस ले जाय के अनुसंसा करे गीस। उहें, एक सौ उनहत्तर प्रकरण मन ल अभिवाक सौदाबाजी के माध्यम ले न्यायालय के माध्यम ले निपटारा करे के अनुसंसा करे गीस।
कांकेर घटना-जांच आदेश
कांकेर म एक वरिष्ठ पत्रकार के संग होय मारपीट के जांच पत्रकार मनके उच्च स्तरीय समिति डहार ले करे जाही। ए आसय के निरदेस मुख्यमंत्री भूपेश बघेल ह प्रेस क्लब रईपुर के प्रतिनिधिमंडल के संग ए बारे म चरचा करीन। बातचीत के दउरान मुख्यमंत्री ह प्रेस क्लब के प्रतिनिधिमंडल ल बतईन कि पत्रकार सुरक्षा कानून के प्रारूप म सुझाव मंगाय गेहे अउ जल्दीच एला लागू कर दे जाही।