गृह मंत्रालय-दिशा/निर्देश
केन्द्रीय गृह मंत्रालय ह कोरोना कंटेनमेंट क्षेत्र ले बाहिर, कुछेक अउ गतिविधि मन ल खोले के बारे म नवा दिसा-निरदेस जारी करे हे। आज ले लागू ए दिसा-निरदेस म कतकोन जघा मन ल खोले के मंजूरी दे गेहे। नवा दिसा-निरदेस के मुताबिक, कन्टेनमेंट क्षेत्र मन म इकतीस अक्टूबर तक लाॅकडाउन कड़ाई ले लागू रइही।
गृह मंत्रालय डहार ले जारी दिसा-निरदेस के मुताबिक कंटेनमेंट जोन ले बाहिर सिनेमाहाल, थिएटर अउ मल्टीप्लेक्स मन ल पचास प्रतिसत सीट क्षमता के संग फेर ले खोले के मंजूरी दे देहे। उहें, खिलाड़ी मन ल प्रसिक्षण दे बर स्वीमिंग पूल खोले के मंजूरी पन्द्रह अक्टूबर से दे गेहे। उहें, कंटेनमेंट जोन के बाहिर क्षेत्र मन म कोनों भी सामाजिक, सांस्कृतिक मनोरंजन या राजनीतिक गतिविध के आयोजन बर ए महीना के पन्द्रह तारीख ले राज्य अउ केन्द्र सासित प्रदेस के सरकार मन ल छूट दे गेहे कि, ओमन सौ ले जादा मनखे मन ल सामिल होय के मंजूरी दे सकथे। उहें, स्कूल अउ कालेज मन ल पन्द्रह अक्टूबर ले खोले बर राज्य मन ल अधिकार दे गेहे।
मरवाही-उपचुनाव
तीन नवंबर के होवइया मरवाही विधानसभा उपचुनाव के प्रसासनिक तैयारी सुरू कर दे गेहे। इही सिलसिला म बिलासपुर रेंज के आईजी दीपांशु काबर ह मध्यप्रदेश अउ छत्तीसगढ़ के सीमावर्ती इलाका म सुरक्षा बेवस्था के जायजा लीन। श्री काबरा ह गौरेला स्थित पुलिस अधीक्षक कार्यालय म अधिकारी मनके एक ठिन बइठका लीन अउ सुरक्षा बेवस्था ल लेके जरूरी दिसा-निरदेस दीन। आईजी ह अधिकारी मन ले किहीन कि अंतर्राज्यीय सीमा के संग गौरेला-पेण्ड्रा-मरवाही जिला के सीमा म गाड़ी मनके जांच करे जाय।
धान खरीदी-बारदाना
राज्य म समर्थन मूल्य म धान खरीदी के तैयारी सुरू होगे हे। एखर बर बारदाना के बेवस्था के काम चालू कर दे गेहे। खाद्य नागरिक, आपूर्ति अउ उपभोक्ता संरक्षण विभाग ह ए संबंध म दिसा-निरदेस जारी करके सार्वजनिक वितरण प्रणाली के बारदाना ल बउरे बर सरकारी उचित मूल्य के दुकान के अलावाा दूसर काम म रोक लगा देहे। अनाज बांटे के बाद बाचे बारदाना ल धान खरीदी बर सुरक्षित राखे जाही।
खाद्य विभाग के सचिव डाॅक्टर कमलप्रीत सिंह ह प्रदेस के जम्मों जिला कलेक्टर के पीडीएस के बारदाना मन ल इकट्ठा करे अउ समय-समय म एखर निगरानी करे के निरदेस दीन हे।
कोरोना समाचार
प्रदेस म कोरोना संक्रमित मरीज मनके सुघ्घर इलाज बर कतकोन कदम उठाय जावत हे। इही कड़ी म राजधानी रईपुर स्थित डाॅक्टर भीमराव अंबेडकर स्मृति अस्पताल ल राज्य टेली मेडिसीन हब बनाय गेहे। एखर माध्यम ले चिकित्सा महाविद्यालय के बिसेसज्ञ डाॅक्टर प्रदेस के जम्मों कोविड केयर सेंटर मनके डाॅक्टर मन ले कोरोना संक्रमण के इलाज ल लेके सलाह दीहीं। ए सुविधा चैबीस घंटा चालू रइही।
उहें, राज्य महिला आयोग के अध्यक्ष डाॅक्टर किरणमयी नायक ह राजधानी रईपुर म कोरोना जागरूकता अभियान बर चार ठिन गाड़ी ल हरियर झंडा देखा के रवाना करीन।
ऐति, महासमुंद जिला म लाॅकडाउन सिराय के बाद आज ले सामान्य दिन असन कामकाज चालू होगे हे। महासमुंद म आज ले रतिहा आठ बजे तक जम्मों दुकान खुले रइही। पेट्रोल पम्प अउ मेडिकल दुकान अपन बेरा म बंद होही।
उहें, राजनांदगांव जिला म कोरोना संक्रमण ले बचाव बर जन-जागरूकता बर समाजसेवी अउ सामाजिक संगठन जिला प्रशासन के मदद करत हे। ‘‘कोरोना की करो पहचान, जांच से होगा जीवन आसान‘‘ जइसे संदेस वाले पाम्पलेट बांटे जात हे। संगेसंग जिला प्रसासन डहार ले पांच अक्टूबर तक कोरोना जांच बर करीबन पांच हजार लोगन मनके नमूना लेके लक्ष्य राखे गेहे।
राज्यपाल-संशोधन विधेयक
राज्यपाल अनुसुईया उइके ह राज्य अनुसूचित जाति आयोग संशोधन विधेयक म दस्तखत कर देहे। एखर मुताबिक छह अशासकीय सदस्य, जउन अनसूचित जाति ले जुड़े मामला म बिसेस जानकारी राखथे, राज्य सरकार डहार एमा ले एक ल अध्यक्ष अउ एक ल उपाध्यक्ष नियुक्त करे जाही। फेर, ए अशासकीय सदस्य मन ले अध्यक्ष अउ उपाध्यक्ष समेत कम ले कम चार सदस्य अनुसूचित जाति ले होही।
एखर संगेसंग राज्यपाल ह राज्य अल्पसंख्यक आयोग संशोधन विधेयक म घलो दस्तखत करीन। एखर मुताबिक आयोग के गठन ल एक अध्यक्ष, एक उपाध्यक्ष अउ चार सदस्य मन ले मिलके करे जाही, जेला राज्य सरकार डहार ले चुने जाही।
गांधी जयंती-प्रतिमा अनावरण
मुख्यमंत्री भूपेश बघेल ह राष्ट्रपिता महात्मा गांधी के एक सौ इंक्यानवां जयंती म ओमन ल सुरता करत कहिन हे कि गांधी जी के देखाय रद्दा म चलत ग्राम स्वराज के लक्ष्य ल पूरा करे बर राज्य म सुराजी गांव योजना चालू करे गेहे।
अपन संदेस म मुख्यमंत्री ह पूर्व प्रधानमंत्री स्वर्गीय लालबहादुर शास्त्री ल घलो श्रद्धांजलि दीन।
इही बीच, मुख्यमंत्री ह काली गांधी जयंती के मउका म नवा रईपुर स्थित मंत्रालय परिसर म महात्मा गांधी के मूर्ति के वीडियो कान्फ्रेंसिंग के माध्यम ले उद्घाटन करही। एखर पहिली, संस्कृति मंत्री अमरजीत भगत ह आज मूर्ति स्थल के जायजा लीन।
उहें, मुख्यमंत्री ह काली दुरूग म बनइया महात्मा गांधी उद्यानिकी अउ वानिकी विश्वविद्यालय के घलो वीडियो कान्फ्रेंसिंग के माध्यम ले भूमिपूजन करही। ए मउका म श्री बघेल ह दुरूग जिला बर करीबन ढाई सौ करोड़ रूपिया के लागत ले बनइया आने-आने विकास अउ निरमान काम के भूमिपूजन अउ लोकार्पण घलो करही।
विशेष-कार्यक्रम
महात्मा गांधी की एक सौ पचासवां जंयती के मउका म काली आकशवाणी नई दिल्ली के समाचार सेवा प्रभाग डहार ले विशेष कारीकरम प्रसारित करे जाही। ‘‘महत्मा गांधी की कहानी-आकाशवाणी की जुबानी‘‘ कारीकरम के प्रसारण काली बिहनिया साढ़े दस बजे ले होही। ए कारीकरम ल छत्तीसगढ़ स्थित आकाशवाणी के जम्मों केन्द्र रिले करही।
अंग्रेजी मीडियम स्कूल-नामकरण
राज्य सरकार ह अंग्रेजी माध्यम के जम्मों चालीस सरकारी स्कूल के नाव स्वामी आत्मानंद के नाव म राखे के फइसला लेहे। स्कूल सिक्षा विभाग ह जम्मों जिला कलेक्टर मन ल चिट्टी लिखके ए संबंध म निरदेस जारी कर देहे। चिट्ठी म केहे गेहे कि जउन स्कूल के नाव पहिली ले उंखर नाव म हवय, ओला नइ बदले जाय। फेर, पहिली ले राखे गे नाव ल स्वामी आत्मानंद उत्कृष्ट विद्यालय योजना म चलत स्कूल के संग जोड़े जाही। सरकार ह कहिन कि स्कूल के नाव मुख्य गेट अउ दूसर जघा म लगाके ओला प्रचारित घलो करे जाही।
स्कूल-असाइनमेंट
कोरोना संक्रमण ले बचाव खातिर राज्य म स्कूल मन बंद हे, फेर आॅनलाइन पढ़ई चालू हे। एला देखत छत्तीसगढ़ माध्यमिक सिक्षा मंडल डहार ले दसवीं अउ बारहवीं कक्षा के लइका मनके पढ़ाई के मूल्यांकन असाइनमेंट के माध्यम ले करे जावत हे। मंडल के पोर्टल म लइका मन ल आॅनलाइन असाइनमेंट भेजे गेहे। अइसाइनमेंट म प्रश्न के उत्तर घरे म लिखके लइका मन ल एला दस दिन के भीतर अपन-अपन स्कूल म जमा करना होही। एखर बाद स्कूल के सिक्षक असाइनमेंट ल जांच के रिजल्ट बेवसाइट म अपलोड करही। विद्यार्थी मन ल हर महीना असाइनमेंट भेजे जाही। ए असाइनमेंट बीस नंबर के होही।