सुप्रीम कोर्ट सिविल सेवा परीक्षा
उच्चतम न्यायालय ह देश म कोरोना महामारी अउ देश के आने आने जगा म बाढ़ ल देखत सिविल सेवा प्रारंभिक परीक्षा ल स्थगित करे ले मना कर देहे। संघ लोक सेवा आयोग डहार ले सिविल सेवा प्रारंभिक परीक्षा चार अक्टूबर के होवइया हे। न्यायालय ह संघ लोक सेवा आयोग सिविल सेवा परीक्षा दू हजार बीस अउ इक्कीस के परीक्षा ल एके संघरा करे के याचिका ल घलो खारिज कर देहे।
अनलाॅक
प्रदेश के आने आने जिला मन म पाछू हप्ता भर ले लागू लाॅकडाउन ह अब धीरे धीरे सिरावत हे।
दुर्ग जिला म पाछू ग्यारा दिन ले लागू लाॅकडाउन आज रतिहा ले सिरा जाही। जिला कलेक्टर के आदेश के मुताबिक रतिहा आठ बजे तक जम्मों दुकान मन ल खोले के मंजूरी दे गेहे। फेर जिला के जम्मों स्कूल, कॅालेज अउ कोचिंग संस्थान बंद रीही। रेस्टाॅरेंट अउ होटल चलाय के संगेसंग होम डिलवरी के मंजूरी रतिहा दस बजे तक दे गेहे।
उंहें बलौदाबाजार जिला म लाकडाउन सिराय के बाद आजले जम्मों दुकान खुल गेहे। अनलाक के दउरान सोशल डिस्टेसिंग, मास्क, अउ सेनिटाइजर के परयोग करना जरूरी होही।
स्वास्थ्य मंत्री समीक्षा
स्वास्थ्य मंत्री टी.एस. सिंहदेव ह आज विभाग के बड़का अधिकारी मनके बइठका लेके प्रदेश म कोरोना संक्रमण के स्थिति के समीक्षा करीन। लाॅकडाउन के बाद कोरोना संक्रमण के विसय उपर स्वास्थ्य मंत्री ह कीहिन कि प्रदेश म आॅक्सीजन आपूर्ति, जांच, मास्क अउ सेनिटाइजर पूरा हवय।
ओमन कीहिन कि राज्य सरकार ह कोरोना संक्रमण के डटके सामना करत हे। प्रदेश म हर रोज करीबन पंद्रह हजार टेस्ट होवत हे। स्वास्थ्य मंत्री ह होम आइसोलेशन के बारे म कीहिन कि सरकार ह मेडिसिन किट देबर बढ़ावा देवत हे। इही बीच स्वास्थ्य विभाग डहार ले होम आइसोलेशन म राहत कोरोना संक्रमित मरीज मन ल मेडिसिन किट दे जात हे। अब तक अड़तीस हजार ले जादा मेडिसिन किट दे जा चुके हे। ए बेरा पूरा प्रदेश म बारा हजार चार सौ तिरालिस मरीज मन होम आइसोलेशन म हवय।
अधिकारी मन ह बताइन कि मेडिसिन किट म हाइड्राॅक्सी क्लोरोक्वीन के संगेसंग बुखार के दवई जिंक टैबलेट, विटामिन-सी, ओमेप्रोजाल अउ एजीथारेमाइसीन के दवई दे जात हे।
आईसीएमआर-सीरो सर्वे नतीजे
भारतीय आयुर्विज्ञान अनुसंधान परिषद कोति ले करे गे दूसर सीरो सर्वे के नतीजा जारी कर देहे। सर्वे म दस साल या ओखर ले जादा उमर के हर पंद्रा मनखे म एक झिन ल अगस्त तक कोरोना संक्रमित होय के अनुमान हे। एखर मुताबिक कुल आबादी म बड़ संख्या म लोगन मन ह कोरोना वायरस के संक्रमण ले प्रभावित हो सकथे।
आईसीएमआर के महानिदेशक ह बताइन कि सतरा अगस्त ले बाईस सितंबर तक दस साल अउ ओखर ले उपर उनतीस हजार ले जादा लोगन मनके बीच सर्वे करे गीस।
नवरात्र दिशा निर्देश
प्रदेश म कोरोना के बाढ़त संक्रमण के सेती राज्य शासन ह अवइया नवरात्रि परब ल देखत दिशा निर्देश जारी करे हे। जारी निर्देश के मुताबिक मूर्ति के उंचाइ छै फीट अउ चैड़ाई पांच फीट ले जादा नइ होना चाही। पंडाल के आगू कम ले कम तीन हजार वर्गफीट के खुल्ला जगा म कोनो भी रद्दा या गली प्रभावित नइ होना चाही। एखर अलावा मंडप पंडाल के आगू देखइया मनके बइठे बर अलग ले पंडाल नइ लगाय के बात केहे गेहे। संगेसंग पंडाल म एक बेरा म बीस ले जादा मनखे मन दर्शन नइ कर सकय ।
मूर्ति स्थापित करइया मनखे या समिति डहार ले चार ठिन जगा म सीसीटीवी कैमरा लगाना जरूरी हे। मूर्ति दर्शन करइया श्रद्धालु मन ल मास्क लगाके ही दर्शन करे के मउका मिलही। उंहें समिति मन डहार ले सेनेटाइजर, थर्मल स्क्रीनिंग, आॅक्सीमीटर, हैण्डवाश अउ श्रद्धालु मन बर लाइन ले दर्शन करे के बेवस्था होना चाही।
एति महासमुंद अउ कोंडागांव जिला प्रशासन ह घलो नवरात्रि परब के गाइडलाइन जारी कर देहे।
बाबरी मस्जिद-सीबीआई
केंद्रीय अन्वेषण ब्यूरो – सीबीआई के लखनउ स्थित विशेष अदालत ह बाबरी मस्जिद ढहाये के मामला म आज जम्मों बत्तीस आरोपी मन ल बरी कर दीन। अपन फैसला सुनावत विशेष न्यायाधीश ह कहिन कि बाबरी मस्जिद गिराये के काम असामाजिक तत्व मन डहार ले करे गे रीहिस। आरोपी मनके एखर ले कोनो संबंध नइ रीहिस।
एति भारतीय जनता पार्टी के प्रदेश अध्यक्ष विष्णुदेव साय ह बाबरी मस्जिद गिराये जाय के मामला म विशेष सीबीआई अदालत के फैसला के स्वागत करे हे।
शिक्षा विभाग निर्देश
शिक्षा विभाग ह अपन जारी आदेश म स्पष्ट केहे हे कि फीस जमा नइ करइया छात्र मनके खिलाफ प्रायवेट स्कूल मन डहार ले पढ़ईया लईका मन ल आॅनलाइन कक्षा ले अलग नइ करे जाय।
राजनांदगंाव जिला शिक्षा अधिकारी ह फीस बर पालक अउ पढ़ईया लईका मन उपर कोनो प्रकार के दबाव झन डारय। कोनो भी लइका मन ल आॅनलाइन कक्षा ले रोके जाय के शिकायत मिलही त स्कूल मन ल देगे विभागीय अनुमति अउ बोर्ड कक्षा संचालन के अनुशंसा ल निरस्त करे के कार्रवाई करे जाही।
गांधी जयंती वेबिनार
गांधीजी और स्वच्छता ही सेवा – विसय उपर रीजनल आॅउटरीच ब्यूरो रायपुर, फील्ड आॅउटरीच जगदलपुर, अउ पत्र सूचना कार्यालय डहार ले आज वेबिनार के आयोजन करे गीस। बस्तर विश्वविद्यालय जगदलपुर, राष्ट्रीय सेवा योजना के कार्यक्रम समन्वयक डॅाक्टर डी.एल. पटेल ह वेबिनार ल संबोधित करत कीहिन कि आज स्वच्छ भारत अभियान ह एक ठिन आंदोलन बन गेहे। जेखर शुरूआत राष्ट्रपिता महात्मा गांधी ह स्वाधीनता आंदोलन के संग करीन।
वेबिनार के दउरान स्वच्छ भारत मिशन जिला पंचायत जगदलपुर के सलाहकार नंदिता मरकाम ह बताइन कि बस्तर के स्कूल अउ ग्राम पंचायत मन म साफ सफई के बारे म लोगन मन ल जागरूक करे जात हे। ए मउका म पीआईबी के अपर महानिदेशक सुदर्शन पनतोड़े घलो आय रीहिन।
स्पेशल ट्रेन स्वच्छता पखवाड़ा
यात्री मनके सहुलियत बर दक्षिण पूर्व मध्य रेलवे रायपुर रेलमंडल ले चलइया दुर्ग-अंबिकापुर-दुर्ग स्पेशल रेलगाड़ी ल अक्टूबर माह के आखरी तक चलाय जाही। दुर्ग-अंबिकापुर स्पेशल ट्रेन तीस सितंबर ले तीस अक्टूबर तक अउ अंबिकापुर-दुर्ग स्पेशल रेलगाड़ी ल एक अक्टूबर ले तीस अक्टूबर तक चलाय के फैसला ले गेहे।
दक्षिण पूर्व मध्य रेलवे डहार ले दुर्ग-भोपाल-दुर्ग सुपर फास्ट स्पेशल रेलगाड़ी ल काली ले चलाय जाही।
एति भारतीय रेलवे डहार ले चलाय जात स्वच्छ रेल स्वच्छ भारत के तहत स्वच्छता पखवाड़ा के आज आखरी दिन हरय । एमा सोला ले तीस सितंबर के बीच राखे गे स्वच्छता पखवाड़ा के दउरान दक्षिण पूर्व मध्य रेलवे डहार ले आने आने विषय उपर कतकोन कार्यक्रम होइस।
कृमि मुक्ति दिवस
कोरोना संक्रमण ल देखत राष्ट्रीय कृमि मुक्ति कार्यक्रम के तहत ए बार घरोघर जाके लइका मन ल कृमिनाशक दवा खवाय जाही।
महासमुंद जिला के नोडल अधिकारी ह बताइन कि जिला के कतकोन क्षेत्र म कंटेनमेंट जोन घोषित करे जाय के सेती कृमि मुक्ति कार्यक्रम ल दू चरण म चलाये जात हे। पहिली चरण म तेइस सितंबर ले गांव गवतरी मन म लईका मन ल एल्बेंडाजोल के दवई खवाय जात हे। त उंहें दूसर चरण म काली ले शहरी क्षेत्र मन म रहइया लईका मन ल घरोघर जाके कृमि ल हटाय के दवई खवाय जाही।