वीबी – जीरामजी योजना
विकसित भारत गारंटी रोजगार अउ आजीविका मिशन-ग्रामीण योजना देशभर म एक जुलाई ले लागू हो जही। छत्तीसगढ़ म योजना के प्रचार-प्रसार खातिर ग्राम सभा, चौपाल, पोस्टर-बैनर, मुनादी, रथ प्रचार अउ डिजिटल माध्यम के उपयोग करे जात हे। उहें, सरपंच, सचिव, रोजगार सहायक, स्व-सहायता समूह के माईलोगिन, जनप्रतिनिधि अउ सामाजिक संगठन घलो लोगन ल योजना के जानकारी दे म जुट गेहे। उहें, ग्राम अउ जनपद पंचायत के संगेसंग जिला स्तर म प्रसिक्षण बइठका अउ ग्राम सभा लगाय जात हे, जेखर ले गांव के लोगन मन ल योजना के जानकारी अउ फायदा के संबंध म बताय जावत हे।
इही कड़ी म बेमेतरा जिला के सांकरा अउ देवरी ग्राम पंचायत म गांव के लोगन मन ल मानव श्रृंखला बनाके अउ स्लोगन ले लोगन मन ल ए योजना ले जुड़े खातिर प्रेरित करीन। ए दउरान गांव के मनखे मन ह पात्र परिवार ल योजना के फायदा देवाय अउ जादा ले जादा लोगन तक एखर जानकारी अमराय के संकल्प लीन।
मुख्यमंत्री विष्णुदेव साय ह किहीन हे कि एक जुलाई ले लागू होवइया वीबी जी राम जी योजना ग्रामीण आजीविका, रोजगार अउ आत्मनिर्भर गांव के दिसा म एक ऐतिहासिक पहल सिद्ध होही। ओमन बतईन कि राज्य मंत्रिपरिषद ह ए योजना के छत्तीसगढ़ के प्रारूप ल मंजूरी दे देहे।
अल नीनो-कृषि विभाग
एसो अल नीनो के प्रभाव के सेती सामान्य ले कमती बरसा के संभावना ल देखत कृषि विभाग ह प्रदेस के किसान मन ल मौसम के मुताबिक फसल लेके सलाह देहे। विभाग ह धान के जघा म दलहन-तिलहन फसल के खेती ल बढ़ावा दे बर केहे हे। कृषि विभाग के मुताबिक कमती बरसा के संभावित स्थिति म अरहर, मूंग, उरीद, कुल्थी, मूंगफली, तिल, राम तिल, कोदो, कुटकी अउ रागी जइसन फसल ले जा सकत हे। कृषि बिसेसज्ञ के मुताबिक दलहन अउ तिलहन फसल कमती लागत म बने उत्पादन देय के संग भूईंया के उर्वरा शक्ति ल सुधारे म महत्ता के भूमिका निभाथे।
स्कूल शिक्षा मंत्री-शैक्षणिक सत्र
प्रदेस के सरकारी स्कूल मन म अवइया सैक्षणिक सत्र एक अप्रैल ले सुरू होही। स्कूल शिक्षा मंत्री गजेन्द्र यादव ह बतईन कि एक अप्रैल ले सत्र सुरू होय ले लइका मन पहिलीच ले मानसिक रूप ले तियार होही। ओमन बतईन कि लइका मन ल एक अप्रैल ले ही किताब, स्कूल ड्रेस अउ साइकिल बांटे जाही। ओमन यहू किहीन कि सत्र ल जल्दी सुरू करे के उद्देश्य पाठ्यक्रम ल बेरा राहत पूरा करना अउ पढ़ईया लइका मनके परीक्षा के नतीजा म सुधार लाना हे।
स्कूल सिक्षा मंत्री ह बतईन कि एक जुलाई ले सबो सिक्षक अउ कर्मचारी मन बर वी एस के ऐप म पंजीयन अउ उपस्थिति जरूरी होही। जुलाई महीना के वेतन ऐप म दरज उपस्थिति के आधार म दे जाही।
वंदे मातरम कैंप
युवा कार्यक्रम अउ खेल मंत्रालय ‘मेरा भारत‘ पहल ले देसभर म वंदे मातरम कैंप लगाही। एखर उद्देश्य युवा मन ल भारत के संवैधानिक अउ लोकतांत्रिक परंपरा के संबंध म समझ बढ़ाय के मउका देना हे। एमा चुने गे जिला म बीस सिविर लगाय जाही। हरेक सिविर म पन्द्रह ले उनतीस बछर आयु वरग के एक सौ पचास युवा भाग लीहीं। हरेक सिविर म पूर्वोत्तर समेत छह राज्य के युवा संघरही। मंत्रालय ह यहू बताय हे कि कम से कम पचास प्रतिसत प्रतिभागी म महिला अउ सामाजिक रूप ले पिछड़े वर्ग के लोगन होही। पहिली सिविर पश्चिम बंगाल के कोलकाता म काली ले होही।
भाजपा-बैठक
भारतीय जनता पार्टी के रईपुर स्थित प्रदेस कार्यालय कुशाभाऊ ठाकरे परिसर म पार्टी पदाधिकारी मनके बइठका होइस। बइठका म संगठन अउ सरकार ले जुड़े आने-आने मुद्दा म गोठबात होइस। ए दउरान जिला म चलत संगठनात्मक काम अउ अभियान ल लेके पदाधिकारी मन ल दिसा-निरदेस दे गीस। ए बइठका म मुख्यमंत्री विष्णुदेव साय, प्रदेस भाजपा अध्यक्ष किरण सिंह देव, उपमुख्यमंत्री अरूण साव अउ प्रदेस संगठन महामंत्री पवन साय समेत भाजपा के प्रदेस पदाधिकारी मौजूद रिहीन।
उहें, आज भाजपा प्रदेस कार्यालय म पंडित दीनदयाल उपाध्याय प्रसिक्षण महाभियान डिजिटल लर्निंग प्लेटफॉर्म के बइठका घलो होइस।
आंगनबाड़ी कार्यकर्ता-साड़ी खरीदी
महिला अउ बाल विकास विभाग ह आंगनबाड़ी कार्यकर्ता अउ सहायिका मन बर लुगरा के केन्द्रीयकृत खरीदी व्यवस्था ल खतम कर देहे। अब लुगरा बिसाय बर तय राशि सोझे कर्मचारी मनके बैंक खाता म भेजे जाही। महिला अउ बाल विकास मंत्री लक्ष्मी राजवाड़े ह विभाग ल निरदेस दीन हे कि लुगरा के डिजाइन पहिली जइसन राखे जाय, जेखर ले प्रदेसभर म एकरूपता बने रइही। उहंें, लुगरा ल पसंद खुद कार्यकर्ता अउ सहायिका कर सकही।
सहकारिता सप्ताह
सकारिता मंत्रालय के स्थापना के पांच बछर पूरा होय के मउका म छत्तीसगढ़ म उनतीस जून ले छह जुलाई तक सहकारिता सप्ताह मनाय जाही। ए आयोजन के तियारी ल लेके सहकारिता मंत्री केदार कश्यप ह मंत्रालय म विभागीय अधिकारी अउ आने सहकारी संस्था महासंघ के प्रतिनिधि मनके बइठका लेके जरूरी निरदेस दीन। श्री कश्यप ह बतईन कि हफ्ताभर तक चलइया ए कार्यक्रम म जागरूकता, सहभागिता अउ नवाचार ल प्राथमिकता दे जाही। संगेसंग लोगन ल सहकारी योजना अउ उपलब्धि के संबंध म बताय जाही। ओमन अधिकारी मन ले किहीन कि सहकारिता सप्ताह के बेरा किसान, महिला स्व-सहायता समूह, दुग्ध उत्पादक, मत्स्य पालक, वनोपज संग्राहक अउ हस्तशिल्पी मनके भागीदारी तय करे जाय।
रानी दुर्गावती-बलिदान दिवस
आज वीरांगना रानी दुर्गावती के बलिदान दिवस म प्रदेसभर म कतकोन कार्यक्रम होवत हे। मुख्यमंत्री विष्णुदेव साय ह रईपुर म उंखर फोटो म फूल माला चढ़ाके सुरता करीन। ए बेरा म मुख्यमंत्री ह किहीन कि रानी दुर्गावती के वीरता अउ बलिदान भारतीय इतिहास के अमूल्य धरोहर हरय। श्री साय ह किहीन कि रानी दुर्गावती के आदर्श ले प्रेरणा लेके हमन ल विकसित भारत अउ विकसित छत्तीसगढ़ के निर्माण के संकलप ल अउ जादा दृढ़ता के संग आगू बढ़ाना चाही।
राष्ट्रीय युवा संसद प्रतियोगिता
केन्द्रीय विद्यालय बर छत्तीसवां राष्ट्रीय युवा संसद प्रतियोगिता के पुरस्कार वितरण समारोह काली नई दिल्ली म राखे जाही। संसदीय कार्य राज्यमंत्री अर्जुन राम मेघवाल ए समारोह के अगुवई करही। श्री मेघवाल जीतइया विद्यार्थी अउ स्कूल ल इनाम दीही। क्षेत्रीय स्तर म प्रतियोगिता म अव्वल अवइया बीस केन्द्रीय विद्यालय मन म छत्तीसगढ़ के कोरबा जिला के पीएमश्री केन्द्रीय विद्यालय घलो सामिल हे।
महिमा राजपूत-मिशन शक्तिसैट
रईपुर के तिलक नगर सासकीय आदर्श उत्कृष्ट अंग्रेजी माध्यम विद्यालय के छात्रा महिमा राजपूत के चयन स्पेस किड्ज इंडिया के प्रतिष्ठित मिशन शक्तिसैट के राष्ट्रीय फाइनलिस्ट के रूप म होय हे। महिमा तेईस अगस्त ले नई दिल्ली म होवइया आठ दिवसीय शक्तिसैट कार्यशाला म भाग लीहीं। ए मिशन म आने-आने देस के एक सौ आठ चुने गे छात्रा मन भाग लेवत हे। एमा सबो छात्रा मनके मिलके शक्तिसैट उपग्रह बनाही। एमा ले एक सेटेलाइट ल चन्द्रमा के कक्षा म स्थापित करे जाही, उहें दूसर चन्द्रमा के सतह म उतरे के उद्देश्य ले बनाय जाही। ए सेटेलाइट के प्रक्षेपण इसरो कोति ले अक्टूबर म श्री हरिकोटा ले करे जाही।महिमा के ए उपलब्धि म रायपुर कलेक्टर डॉक्टर गौरव सिंह ओमन ल सुभकामना दीन हे।
अपचारी बालक-फरार
अंबिकापुर जिला के बिशुनपुर रोड स्थित बाल संप्रेक्षण गृह ले पाछु संझा ग्यारह झिन अपचारी बालक फरार होगे। इंखर उमर चौदह ले सत्रह बछर के बीच बताय जात हे। घटना के जानकारी मिलतेच गांधी नगर थाना पुलिस अउ संक्षेपण गृह के कर्मचारी उंखर तलाश म जुट गेहे। बताय जात हे कि फरार अपचारी बालक सरगुजा, सूरजपुर अउ कोरिया जिला के रहवइया हरय। एमा ले कुछेक के खिलाफ हत्या, चोरी अउ दुष्कर्म जइसन मामला दरज हे।
अपहरण खुलासा
गौरेला-पेंड्रा-मरवाही जिला के मरवाही थाना क्षेत्र म पाछु बीस जून के होय किराना व्यवसायी के अपहरण के मामला म पुलिस ह अंतर्राज्यीय गिरोह के तीन झिन आरोपी ल गिरफ्तार करे हे। आरोपी मन ह व्यवसायी ल छोड़े के बदला बीस लाख रूपिया के फिरौती मांगे रिहीन। आरोपी मन तीर ले पुलिस ह हथियार मोबाइल फोन अउ एक चौपहिया गाड़ी बरामद करे हे। पुलिस ह आने फरार आरोपी मनके तलाश करत हे।