नीति आयोग शासी परिषद बैठक
प्रधानमंत्री नरेन्द्र मोदी ह किहीन हे कि दुनिया ए बखत अस्थिरता के दउर ले गुजरत हे। फेर, भारत आत्मविश्वास दृढ़ संकल्प के संग विकास के रद्दा म आगू बाढ़त हे। नई दिल्ली म राष्ट्रपति भवन म नीति आयोग के ग्यारहवां शासी परिषद के बइठका के अगुवई करत श्री मोदी ह कहिन कि जइसे-जइसे भारत, विकसित भारत के लक्ष्य कोति बाढ़त हे। अइसन बेरा म केन्द्र अउ राज्य सरकार के सामूहिक जिम्मेवारी बाढ़ जथे। ओमन कहिन कि राज्य के बीच सहयोग, गोठबात अउ विचार साझा होना चाही। संगेसंग नीति आयोग एमा मदद खातिर सबले बने भूमिका निभा सकत हे। प्रधानमंत्री ह किहीन कि गुणवत्तापूर्ण सिक्षा, कौशल विकास अउ युवा मन बर रोजगार देवाना ए प्राथमिकता बने रहना चाही। कृषि अउ स्टार्टअप ल लेके विज्ञान अउ नवाचार तक नारी शक्ति सबो क्षेत्र म अपन योगदान देवत हे। एखर सेती राज्य मन ल माईलोगिन के सिक्षा, कौशल विकास, सुरक्षा अउ सशक्तिकरण ल प्राथमिकता देना चाही।
एसो के बइठका के विषय हरय – दो हजार सैंतालीस तक विकसित भारत के लिए समावेशी मानव विकास‘‘। बइठका म सबो राज्य अउ केन्द्रसासित प्रदेस के मुख्यमंत्री, राज्यपाल अउ उप राज्यपाल भाग लेवत हे।
केन्द्रीय वस्त्र मंत्री-छत्तीसगढ़
केन्द्रीय वस्त्र मंत्री गिरिराज सिंह काली बाहर जून के दू दिवसीय दउरा म छत्तीसगढ़ पहुंचत हे। ओमन प्रदेस म जनसंपर्क कार्यक्रम के संगेसंग विकसित भारत संकल्प सम्मेलन म संघरही। संगेसंग राज्य अउ क्षेत्रीय टेक्सटाईल्स अधिकारी मन संग बइठका करही।
केन्द्रीय मंत्री श्री सिंह ह काली मंझनिया रईपुर के सड्डू क्षेत्र के अस्पताल म विशेष जनंसपर्क कार्यक्रम म सामिल होही। एखर बाद संझा कुन राजधानी म विकसित भारत संकल्प सम्मेलन म सामिल होही। संझा के ही श्री सिंह राजधानी म हैण्डलूम, हस्तशिप, सिल्क अउ राज्य क्षेत्रीय टेक्सटाईल्स अधिकारी मन संग बइठका करही।
केन्द्रीय मंत्री अइवया दिन तेरह जून के कलेक्टोरेट परिसर के बाबा साहेब अंबेडकर चउक म सफाई अभियान कार्यक्रम म सामिल होही अउ खालसा स्कूल के आगू ऑक्सीजोन म पौधा रोपण करके बूढ़ातरिया तीर विशेष जनंसपर्क कार्यक्रम म भाग लीहीं।
प्रधानमंत्री-किसान
प्रधानमंत्री नरेन्द्र मोदी ह कहिन हे कि किसान मनके विकास सरकार के सबले पहिली प्राथमिकता हरय। सरकार उंखर जीवन ल सरल बनाय के हरसंभव प्रयास करत हे। सोशल मीडिया पोस्ट म श्री मोदी ह किहीन कि किसान देस के खाद्य सुरक्षा पोषण अउ समृद्धि के रीढ़ हरय। ओमन किहीन कि प्रधानमंत्री किसान सम्मान निधि अउ फसल बीमा योजना किसान मनके आमदनी के रक्षा करत हे। उहें, किसानी ल अउ मजबूत बनावत हे।
अश्विनी-वैष्णव एफ.एम. ट्रांसमीटर
सूचना अउ प्रसारण मंत्री अश्विनी वैष्णव ह आज जयपुर म आकाशवाणी परिसर म राखे गे कार्यक्रम म राजस्थान के रामगढ़ म बीस किलो वाट के एफ.एम. ट्रांसमीटर के उद्घाटन वर्चुअल रूप ले करीन। ए कार्यक्रम म जयपुर के सांसद मंजू शर्मा, प्रसार भारती के अध्यक्ष प्रसून जोशी अउ आकाशवाणी के महानिदेशक राजीव कुमार जैन समेत आने बड़का अधिकारी मौजूद रिहीन। ए मउका म श्री वैष्णव ह सामरिक अउ संरचना म ध्यान देवत आकाशवाणी अउ दूरदर्शन ले सीमावर्ती क्षेत्र म संचार व्यवस्था ल मजबूत करे बर आकाशवाणी अउ दूरदर्शन ले सरकार के प्रतिबद्धता म प्रकाश डालीन। उहें, ओमन समय के संग परिवर्तन म बल दीन।
प्रधानमंत्री-एनडीए गठबंधन
प्रधानमंत्री नरेन्द्र मोदी ह किहीन हे कि देस के एक सौ चालीस करोड़ लोगन के आकांक्षा जरूरी पूरा होही। ओमन किहीन कि राष्ट्रीय जनतांत्रिक गठबंधन-एनडीए ह देस के भरोसा ल मजबूत करे हे। नई दिल्ली म एनडीए के बइठका म बोलत ओमन किहीन कि बछर दू हजार चौदह म आसा के जउन किरण जागे रिहीस, ओ आज नवा आत्मविश्वास के किरण म बदल गेहे। ओमन यहू कहिन कि पहिली घांव देस के जनता ह देखे हे कि जब कोई सरकार सही सोच ले चलाय जाथे, त विकास घलो तेजी ले होथे।
प्रधानमंत्री-मुख्यमंत्री बधाई
प्रधानमंत्री नरेन्द्र मोदी के अगुवई म केन्द्र सरकार के बारह बछर पूरा होय म नई दिल्ली के भारत मंडपम म राखे गे कार्यक्रम म मुख्यमंत्री विष्णुदेव साय ह श्री मोदी ल बधाई दीन। ओमन किहीन कि पाछु बारह बछर जनजातीय समाज के सम्मान, सशक्तिकरण अउ विकास बर स्वर्णकाल रेहे हे। मुख्यमंत्री ह कहिन कि केन्द्र अउ राज्य सरकार के प्रयास ले छत्तीसगढ़ म नक्सल समस्या कमती होय हे। ओमन कहिन कि जनजातीय क्षेत्र म बुनियादी सुविधा, कनेक्विविटी अउ आजीविका के मउका म तेजी ले बढ़वार होवत हे।
सावित्री ठाकुर-स्वच्छता कार्यक्रम
केन्द्रीय महिला अउ बाल विकास राज्यमंत्री सावित्री ठाकुर ह कहिन हे कि स्वच्छता सिरिफ एक सरकारी कार्यक्रम नो हे, भलूक राष्ट्र निर्माण के आधार हरय। स्वच्छ, स्वस्थ अउ विकसित भारत बनाख खातिर हरेक नागरिक के भागीदारी जरूरी हे। ओमन कहिन कि जब तक स्वच्छता जन-आंदोलन के स्वरूप नइ लीहीं, तब तक विकसित भारत के लक्ष्य पूरा रूप ले साकार नइ हो सकय। श्रीमती ठाकुर ह काली बिलासपुर के पुराना बाजार, सकरी क्षेत्र म राखे गे स्वच्छता कार्यक्रम म सहभागिता करीन। ए मउका म केन्द्रीय आवास अउ सहरी कार्य राज्यमंत्री तोखन साहू समेत आने जनप्रतिनिधि घलो मौजूद रिहीन।
नीति आयोग उपाध्यक्ष-कौशल विकास
छत्तीसगढ़ राज्य नीति आयोग के उपाध्यक्ष गणेश शंकर मिश्रा ह किहीन हे कि गांव के युवा मनके बेरोजगारी, मोबाइल अउ नसीला जिनीस के लत जइसन चुनौती ले निपटे खातिर राज्य सरकार कौशल विकास म बिसेस जोर देवत हे। नवा रईपुर म एक कार्यक्रम म बोलत श्री मिश्रा ह किहीन कि सरकार पन्द्रह ले उनतीस बछर के युवा मन ल रोजगार अउ स्व-रोजगार ले जोड़े बर अवइया छह महीना म बिसेस कार्ययोजना तियार करही।
प्राचार्य बैठक
रईपुर जिला म बोर्ड परीक्षा परिणाम अउ सिक्षा के गुणवत्ता म सुधार लाय बर मिशन उत्कर्ष म काली राजधानी म सबो प्राईवेट स्कूल के प्राचार्य मनके बइठका होइस। बइठका म कलेक्टर डॉक्टर गौरव सिंह सरलग कमजोर नतीजा देवइया स्कूल के समीक्षा करे के संगेसंग बिसेस निरीक्षण दल के गठन अउ अभिभावक मन ले फीडबैक लेके निरदेस दीन। ओमन किहीन कि कमजोर परीक्षा के नतीजा, फर्जी पंजीयन, नियमित कक्षा के अभाव अउ आने गड़बड़ी म कड़ा कार्रवाई करे जाही।
स्कूल शिक्षा विभाग-तबादला
छत्तीसगढ़ के स्कूल सिक्षा विभाग ह अट्ठाईस झिन अधिकारी मनके तबादला कर देहे। विभाग कोति ले जारी आदेस के मुताबिक जिला सिक्षा अधिकारी, विकासखंड सिक्षा अधिकारी, सहायक संचालक अउ प्राचार्य मन ल आने-आने जिला अउ कार्यालय म नवा जिम्मेवारी सौंपे गेहे। महासमुंद, रईपुर, बिलासपुर समेत कई जिला म नवा प्रभारी जिला सिक्षा अधिकारी के नियुक्ति करे गेहे।
महक नरवासे-भारतीय टीम चयन
छत्तीसगढ़ के राजनांदगांव जिला के क्रिकेट खिलाड़ी महक नरवासे के चयन भारतीय महिला अंडर-नाइंटीन टीम म होय हे। ओमन श्रीलंका म होवइया टी-ट्वेंटी अउ वन-डे सीरीज के दउरान उप कप्तान के रूप म टीम म भाग लीहीं।
वित्त मंत्री ओपी चौधरी ह महक नरवासे के भारतीय टीम चयन होय म बधाई अउ सुभकामना देवत किहीन कि ए उपलब्धि उंखर सरलग मेहनत, अनुशासन अउ खेल बर समर्पण के परिणाम हवय। ओमन यहू किहीन कि एखर ले प्रदेस के आने युवा खिलाड़ी बिसेस रूप ले नोनी मन खेल म आगू बाढ़े अउ बड़े सपना देखे बर प्रेरित होही।
विधायक-कर्मचारी सेवाएं
राज्य सरकार ह विधायक मन बर अपने विधानसभा क्षेत्र म पदस्थ करमचारी मन ले सेवा ले के अनिवार्यता के आदेस म फेरबदल करे हे। अब कोनो भी विधायक अपन विधानसभा क्षेत्र ले बाहिर दीगर जिला म पदस्थ करमचारी मनके सेवा ले सकही। ए संबंध म सामान्य प्रशासन विभाग ह सबो जिला कलेक्टर मन ल चिट्ठी जारी कर देहे।
चोर गिरोह-पर्दाफाश
गौरेला-पेण्ड्रा-मरवाही जिला के पुलिस ह अंतर्राज्यीय चोर गिरोह के छह झिन सदस्य मन ल गिरफ्तार करे हे। इंखर तीर ले करीबन अड़तीस तोला सोना, डेढ़ किलो चांदी, चोरी के रकम ले बिसाय गे चौपहिया गाड़ी, दू फटफटी, मोबाइल फोन समेत चोरी म बउरे गे आने उपकरण जब्त करे गेहे। पुलिस के मुताबिक आरोपी गजब दिन ले चोरी के घटना ल अंजाम देवत रिहीन।