आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री नरेन्द्र मोदी आज भारत के सबले जादा बेरा तक सेवा देवइया निर्वाचित प्रधानमंत्री बन गेहे। श्री मोदी ह छब्बीस मई दू हजार चौदह के प्रधानमंत्री पद के सपथ ले रिहीन। ओमन पंडित जवाहर लाल नेहरू के रिकॉर्ड ल तोड़ीन हे। जउन पहिली घांव तेरह मई उन्नीस सौ बावन के निर्वाचित प्रधानमंत्री के रूप म सपथ ले रिहीन अउ सत्ताईस मई उन्नीस सौ चौसठ तक पद म बने रिहीन। पंडित नेहरू के निर्वाचित प्रधानमंत्री के रूप म कार्यकाल चार हजार तीन सौ अंठानवे दिन के रिहीस। छब्बीस मई दू हजार चौदह ले आज दस जून दू हजार छब्बीस तक प्रधानमंत्री श्री मोदी के सरलग कार्यकाल अब चार हजार तीन सौ निन्यानवे दिन के होगे हे।
राष्ट्रपति द्रौपदी मुर्मु, उपराष्ट्रपति सीपी राधाकृष्णन, केन्द्रीय गृहमंत्री अमित शाह, विदेश मंत्री डॉक्टर एस जयशंकर, केन्द्रीय वित्तमंत्री निर्मला सीतारमण अउ कृषि मंत्री शिवराज सिंह चौहान समेत आने केन्द्रीय मंत्री मन ह नरेन्द्र मोदी ह देस के सबले जादा बेरा तक सरलग निर्वाचित प्रधानमंत्री बने रेहे म बधाई दीन हे।
इही बीच, केन्द्रीय मंत्रिमंडल ह आज एक प्रस्ताव पारित करके प्रधानमंत्री नरेन्द्र मोदी ल सरलग दू कार्यकाल तक सबले जादा बेरा तक निर्वाचित प्रधानमंत्री बने रेहे म बधाई दीन हे। नई दिल्ली म मंत्रिमंडल के बइठका के दउरान सदस्य मन ह प्रधानमंत्री श्री मोदी बर सम्मान जतईन।

नीति आयोग-शासी परिषद बैठक

प्रधानमंत्री नरेन्द्र मोदी काली नई दिल्ली के राष्ट्रपति भवन म नीति आयोग के ग्यारहवां शासी परिषद के बइठका के अगुवई करही। प्रधानमंत्री के ‘‘टीम इंडिया‘‘ के दृष्टिकोण के मुताबिक एसो के विषय हरय – ‘‘दो हजार सैंतालीस तक विकसित भारत के लिए समावेशी मानव विकास‘‘। शासी परिषद के बइठका म ए सोच ल साकार करे गोठबात करे जाही।
परिषद के बइठका म मुख्यमंत्री अउ उप राज्यपाल, समावेशी मानव विकास के ढांचा म गोठबात करही, जउन चार मुख्य स्तंभ म आधारित हवय।
बइठका म पाछु बछर छब्बीस ले अट्ठाईस दिसंबर के दउरान राखे गे मुख्य सचिव के पांचवां राष्ट्रीय सम्मेलन के सिफारिश म घलो गोठबात होही।

विकसित भारत-जी राम जी

केन्द्र सरकार के नवा विकसित भारत रोजगार अउ आजीविका गारंटी मिशन योजना एक जुलाई ले लागू होही। एमा छत्तीसगढ़ ल करीबन तीन हजार तीन सौ चौव्वन करोड़ रूपिया के अंतरिम आवंटन जारी करे गेहे। केन्द्रीय ग्रामीण विकास मंत्री शिवराज सिंह चौहान ह राज्य के ग्रामीण विकास मंत्री मन संग होय वर्चुअल बइठका म ए जानकारी दीन। ए रकम ले ग्राम पंचायत ल सोझे फायदा मिलही अउ ग्रामीण क्षेत्र म रोजगार अउ विकास काम ल गति मिलही। बइठका म श्रमिक मन ल बेरा म मजदूरी भुगतान ई-केवाईसी अउ डिजिटल व्यवस्था ल मजबूत करे म जोर दे गीस।

विकसित भारत संकल्प सम्मेलन

बिलासपुर म काली राखे गे विकसित भारत संकल्प सम्मेलन म केन्द्रीय महिला अउ बाल विकास राज्यमंत्री सावित्री ठाकुर ह किहीन कि विकसित भारत के आधार सामाजिक न्याय, महिला सशक्तिकरण अउ जनभागीदारी हे। ओमन किहीन कि बछर दू हजार सैंतालीस तक विकसित राष्ट्र के निर्माण म हरेक नागरिक के महत्ता के भूमिका हवय। सम्मेलन म केन्द्रीय आवासन अउ सहरी कार्य राज्यमंत्री तोखन साहू ह केन्द्र सरकार के आने-आने जनकल्याणकारी योजना अउ उपलब्धि ल बतात राष्ट्र निर्माण बर सामूहिक प्रयास के आह्वान करीन। ओमन किहीन कि प्रधानमंत्री के अगुवई म देस आने-आने क्षेत्र म तेजी ले बढ़वार करत हे।

राज्यपाल-विशेष पिछड़ी जनजाति

राज्यपाल रमेन डेका ह राज्य के विशेष पिछड़ी जनजाति मनके लइका मन ल बने सिक्षा देवाय खातिर जरूरी परयास करे बर किहीन हे। राज्यपाल ले आज लोकभवन म स्कूल सिक्षा विभाग के सचिव डॉक्टर कमलप्रीत सिंह ह भेंट करीन। ए दउरान राज्यपाल ल डॉक्टर सिंह ले विशेष पिछड़ी जनजाति बहुल क्षेत्र म सिक्षा के स्थिति अउ जरूरी सैक्षणिक सुभीता के संबंध म गोठबात करीन।
राज्यपाल ले प्रधान मुख्य वन संरक्षक अरूण कुमार पांडे, रईपुर कलेक्टर डॉक्टर गौरव कुमार सिंह, रईपुर नगर निगम के आयुक्त संबित मिश्रा समेत आने-आने अधिकारी मन ह घलो भेंट करीन। ए दउरान राज्यपाल ह सहर अउ नवा रईपुर म लगाय गे पौधा के रखरखाव म बिसेस ध्यान दे बर किहीन।

पल्स पोलियो अभियान

प्रदेस म अट्ठाईस जून के राष्ट्रीय पल्स पोलियो अभियान चलाय जाही। एमा जनम ले पांच बछर तक तीन लाख पैंतालीस हजार ले जादा लइका मन ल पोलियो के खुराक पियाय के लक्ष्य राखे गेहे। रईपुर जिला म एक हजार तीन सौ इकतीस पोलियो बूथ बनाय जाही। अभियान के दिन जउन लइका मन पोलियो के खुराक नइ पी पाही, ओमन ल अवइया दू दिन तक घर-घर जाके खुराक दे जाही।

सड़क सुरक्षा परिषद-बैठक

छत्तीसगढ़ म रद्दा दुर्घटना म कमी लाय बर तकनीक आधारित निगरानी, बने चालक प्रसिक्षण अउ यातायात नियम के पालन म जोर दे जावत हे। नवा रईपुर म राखे गे राज्य सड़क सुरक्षा परिषद के बइठका म उपमुख्यमंत्री अरूण साव अउ विजय शर्मा के संगेसंग मंत्री केदार कश्यप ह तियारी के समीक्षा करीन। बइठका म बताय गेहे कि जनवरी ले मई दू हजार छब्बीस तक इकतीस हजार ले जादा गाड़ी के फिटनेस जांच करे गेहे। उहें, ए.एन.पी.आर. कैमरा अउ आने तकनीकी माध्यम ले इकसठ हजार ले जादा चालान जारी करे गेहे।

ओपी चौधरी-बैठक

आवास अउ पर्यावरण मंत्री ओ.पी. चौधरी ह काली रईपुर क्षेत्र के आने-आने आवासीय कॉलोनी अउ हाउसिंग सोसायटी के अगुवई करइया मन संग बइठका  करके उंखर समस्या अउ सुझाव उपर गोठबात करीन। बइठका म रद्दा, जल निकासी, सार्वजनिक सुभीता ले जुड़े मुद्दा उठाय गीस। श्री चौधरी ह संबंधित अधिकारी मन ल समस्या के समाधान करे बर कार्रवाई करे के निरदेस दीन।

बीज वितरण कार्यक्रम

रईपुर के राष्ट्रीय जैविक स्ट्रैस प्रबंधन संस्थान-आईसीएआर ह अनुसूचित जाति उपयोजना म धान बीज वितरण कार्यक्रम राखीन। ए दउरान पचेड़ा, बेलटुकरी अउ बिठिया गांव के एक सौ सत्तर ले जादा किसान मन ल उन्नत धान बीज बांटे गीस। संस्थान के निदेशक डॉक्टर पी.क.े रॉय ह किसान मन ल संतुलित खातू बउरे अउ वैज्ञानिक फसल प्रबंधन के जानकारी दीन। कार्यक्रम के उद्देश्य उत्पादन ल बढ़ाना अउ किसान मनके आमदनी म बढ़वार करना हे।

जीपीएम हत्या/लूट खुलासा

गौरेला-पेण्ड्रा-मरवाही जिला के कोटमीकला साप्ताहिक हाट बाजार म पाछु छब्बीस मई के होय एक ज्वेलरी व्यवसायी के हत्या अउ लूट के वारदात के खुलासा करत पुलिस ह सात झिन आरोपी ल गिरफ्तार करे हे। आरोपी मनके तीर ले करीबन चालीस ग्राम सोना अउ चार किलो ले जादा चांदी, हथियार, जिंदा कारतूस अउ घटना म बउरे गाड़ी जब्त करे गेहे।
जिला के अतिरिक्त पुलिस अधीक्षक अविनाश मिश्रा ह बतईन कि मुख्य आरोपी खुशीराम साहू ह बिहार अउ झारखंड के अपन संगी मन संग मिलके व्यापारी प्रदीप सोनी ले सोना-चांदी ले भरे बैग लूटे के परयास करीन। व्यापारी ह जब एखर विरोध करीस, तभे एक आरोपी ह ओखर उपर गोली चला दीस, जेमा ओखर मउत होगे। एखर बाद आरोपी मन लूटे आभूषण ल लेके फरार होगे। ओमन बतईन कि बिलासपुर रेंज अउ गौरेला-पेण्ड्रा-मरवाही के पुलिस ह कार्रवाई करत छत्तीसगढ़, बिहार अउ झारखंड म दबिस देके सातांे आरोपी ल गिरफ्तार करे हे।

धान घोटाला-आरोपी गिरफ्तार

सारंगढ़-बिलाईगढ़ जिला के सरिया पुलिस ह साल्हेओना धान खरीदी केन्द्र म निन्यानवे लाख रूपिया ले जादा के घोटाला के मामला म चार झिन आरोपी ल गिरफ्तार करे हे। ए आरोपी मन ह बछर दू हजार पच्चीस-छब्बीस म तीन हजार एक सौ चालीस कुंटल ले जादा धान बिसाय के फर्जी ऑनलाइन एंट्री देखाके घोटाला करीन। उहें, बारदाना म घलो हेराफेरी करीन। पुलिस ए मामला म पहिलीच समिति प्रबंधक अउ कम्प्यूटर ऑपरेटर ल गिरफ्तार कर लेहे।

गांजा-बरामद

बालोद जिला के डौंडीलोहारा पुलिस अउ साइबर सेल के टीम ह गांजा तस्करी के आरोप म पांच झन ल गिरफ्तार करके उंखर तीर ले बहत्तर किलो गांजा बरामद करे हे। जब्त करे गे गांजा के कीमत करीबन छब्बीस लाख रूपिया बताय जात हे। मुखबिर ले मिले सूचना म पुलिस ह भेंड़ी तिराहा तीर नाकाबंदी करके गाड़ी के जांच करीन। इही बेरा चार आने-आने फटफटी ले ओड़िशा ले मध्यप्रदेश ले जावत गांजा पकड़े गीस। पुलिस ह चारो फटफटी ल जब्त कर लेहे।

अउ अब थोरकुन समाचार सार म –

– राज्य शासन ह गृह विभाग के सचिव रमेश कुमार शर्मा ल अस्थायी रूप ले सहकारिता अउ रजिस्ट्रार अउ सहकारी समिति के आयुक्त नियुक्त करे हे।

अउ

– कबीरधाम जिला म साइबर सेल अउ पुलिस के टीम ह आईपीएल क्रिकेट मैच के दउरान ऑनलाइन सट्टा चलइया दू झिन आरोपी ल गिरफ्तार करे हे।