केंद्र रबी फसल समर्थन मूल्य
केंद्र सरकार ह रबी के छै फसल के न्यूनतम समर्थन मूल्य अब बढ़ा देहे। केंद्रीय कृषि मंत्री नरेंद्र सिंह तोमर ह लोकसभा म जानकारी दीन कि मंत्रिमंडल के आर्थिक कार्यसमिति ह गंहू, चना, मसूर, सरसों, ज्वार, अउ कुसुम फसल के न्यूनतम समर्थन मूल्य ल बढ़ा दीन हे।
जेखर अनुसार गेंहू म पचास रूपिया कुंटल, उंहें सरसो अउ चना म दू सौ पच्चीस रूपिया हर कुंटल, मसूर म तीन सौ रूपिया प्रति कुंटल के संगेसंग जौ म पचहत्तर रूपिया अउ कुसुम म एक सौ बारा रूपिया के बढ़ोत्तरी करे गीस हे।
इही बीच छत्तीसगढ़ विधानसभा म नेता प्रतिपक्ष धरमलाल कौशिक ह केंद्र सरकार डहार ले रबी फसल के न्यूनतम समर्थन मूल्य बढ़ाय के स्वागत करीन हे। ओमन कीहिन हे कि केंद्र सरकार के ए फैसला ले किसान मन ल लाभ होही।
लाॅकडाउन-01
कोरोना संक्रमण के रोकथाम बर रायपुर सहित प्रदेशभर के कई ठिन जिला म लाॅकडाउन शुरू होगे हे। रायपुर म पाछु रतिहा नौ बजे ले सात दिन तक लाॅकडाउन रीही। ए बेरा म शहर भर के कई आने आने रद्दा म पुलिस प्रशासन ह बैरिकेड लगाय हे। उंहें पुलिस ह मुख्य मार्ग म स्टापर लगाके अवइया जवइया मनखे मनले पूछताछ घलो करत हे। लाॅकडाउन के सेती शहर म सन्नाटा पसरे हे।
बतादन कि पाछू रतिहा रायपुर कलेक्टर डॅाक्टर एस. भारतीदासन ह लाॅकडाउन के संबंध म पहिली ले जारी करे गे आदेश म सुधार करीन हे। जेखर बाद अब बहुत जरूरी सेवा ले जु़ड़े मनखे मनके संगेसंग पे्रस, मीडिया, परीक्षार्थी दूसर राज्य ले अवइया गाड़ी, ये सबो मन ल पेट्रोल-डीजल दे जाही।
उंहें ई-पास धारक अउ अनुमति प्राप्त लोगन मन ल घलो पेट्रोल डीजल मिलही। अइसने दूध बांटे बर घलो संशोधित आदेश जारी करे गेहे। जेखर मुताबिक दुकान, या पार्लर खोले के अनुमति नइ होही, बल्कि निर्धारित बेरा म नियम के पालन करत दूध बांटे जा सकत हे।
एति बिलासपुर जिला म घलो आज बीहनिया छै बजे ले लाॅकडाउन लागू होगे हे। ए बेरा म पुलिस ह शहर भर के आने आने रद्दा म फ्लैग मार्च करके लोगन मन ल अपन घर म रेहे के अपील करीन। बिलासपुर के संगेंसग रतनपुर, बिल्हा, तखतपुर, बोदरी अउ मल्हार नगरी क्षेत्र म घलो आज ले सात दिन के लाॅकडाउन रीही। उंहें मस्तूरी विकासखंड के जयराम नगर, सीपत अउ मजदूरी ग्राम पंचायत म घलो आज बीहनिया ले लाॅकडाउन लागू होगे हे।
लाॅकडाउन 02
इही बीच बेमेतरा, बालोद, अउ अंबिकापुर जिला म घलो लाॅकडाउन लागू होगे हे। उंहें कोरबा म काली तेईस सितंबर ले बीहनिया पांच बजे ले दू अक्टूबर तक लाॅकडाउन रीही। एखर अलावा महासमुंद जिला म घलो काली ले तीस सितंबर तक लाॅकडाउन प्रभावी रीही।
अइसने कोरिया जिला म काली तेईस सितंबर ले सत्ताईस सितंबर तक लाॅकडाउन रीही, जबकि रायगढ़ जिला के सबो नगरी निकाय क्षेत्र म चैबीस सितंबर के बीहनिया पांच बजे ले तीस सितंबर तक लाॅकडाउन रीही । ए बेरा म बहुत जरूरी सेवा ल छोड़के बाकी सबो व्यावसायिक गतिविधि म रोक रीही।
इही बीच बलौदा-बाजार, भाटापारा जिला म आज रतिहा बारा बजे ले लगे लाॅकडाउन के तियारी ल लेके कलेकटर ह वीडियो काॅन्फे्रंिसग के माध्यम ले जिला के अधिकारी मन संग एक ठिन बइठका लीन।
स्वास्थ्य विभाग मान्यता
स्वास्थ्य विभाग ह प्रदेश के आने आने जिला मन म संचालित होवइया निजी अस्पताल अउ पैथालाजी केंद्र ल एन.ए.बी.एच. अउ एन.ए.बी.एल. ले मान्यता दिलवाय म सबो जिला प्रशासन ल सहयोग करे के निर्देश दीन हे।
स्वास्थ्य विभाग ह ए संबंध म सबो जिला के मुख्य चिकित्सा अउ स्वास्थ्य अधिकारी मन ल चिट्ठी घलो जारी करीन हे। जेमा केहे गेहे कि कोरोना संक्रमित मरीज मनके संख्या सरलग बाढ़त जात हे, जेला देखत अस्पताल अउ जांच केंद्र ल संबंधित बोर्ड ले मान्यता मिले म इलाज बर अवइया मरीज मनके स्वास्थ्य सुविधा म बढ़ोत्तरी होही।
स्वास्थ्य विभाग निर्देश
प्रदेश के स्वास्थ्य विभाग ह कोरोना वायरस जांच बर सैंपल देवइया मनके जांच रिपोर्ट आय तक खुदला आइसोलेट राखे बर कीहिन हे । संगेसंग कोरोना मरीज मनके जइसे आने आने सावधानी बरते के घलो अपीन करीन हे।
स्वास्थ्य विभाग ह मनखे मनले कोरोना संक्रमण के कोनो भी प्रकार के लक्षण दिखे म तुरते तीर तखार के जांच केंद्र म जाके सैंपल देके अपील करीन हे।
इही कड़ी म विभाग ह लोगन मनले शरीर के रोग प्रतिरोधक क्षमता बढ़ाय बर हररोज व्यायाम, योग करे के संगेसंग काढ़ा पीये के सलाह दीन हे।
सिम्स-कार्रवाई
राज्य सरकार ह बिलासपुर स्थित सिम्स के डीन अउ जिला चिकित्सालय के सिविल सर्जन ल उंखर पद ले हटाय जाय के निर्देश दीन हे। उंहें मुख्यमंत्री भूपेश बघेल ह बिलासपुर के संभाग आयुक्त ल सिम्स के व्यवस्था के बारे म मिले रिपोर्ट उपर कार्रवाई करे अउ अवइया पंद्रा दिन म सबो व्यवस्था ल ठीक करे बर केहे हे।
बतादन कि सिम्स के व्यवस्था के बारे म शिकायत मिले के बाद राज्य सरकार ह पांच झिन वरिष्ठ अधिकारी मनके एक जांच समिति गठित करे हे। इही बीच संभागायुक्त डॅाक्टर संजय अलंग ह आज सिम्स अउ जिला के कोविड अस्पताल के व्यवस्था म सुधार बर प्रशासन अउ स्वास्थ्य विभाग के अधिकारी मनके बइठका लीन। जेमा डॅाक्टर अलंग ह कोरोना संदिग्ध मरीज मनके सैंपल के जांच बर लैब म दू पाली म भेजे के निर्देश दीन हे। उंहे सैंपल जादा होय म तीन पाली म भेजे बर कीहिन हे।
मुख्यमंत्री पत्र
मुख्यमंत्री भूपेश बघेल ह केंद्रीय नागरिक उड्डयन राज्यमंत्री हरदीप ंिसहं पुरी ल चिट्ठी लिखके बिलासपुर ल देश के प्रमुख नगर के हवाइ सेवा ले जोड़े के आग्रह करीन हे। ओमन ह कीहिन हे कि बिलासपुर ल यदि दिल्ली, मुंबई अउ कोलकाता के हवाई सेवा ले जोड़े जाथे त एखर ले क्षेत्रीय विमान संपर्क बाढ़ही। संगेसंग देश के अर्थ व्यवस्था, व्यापार अउ पर्यटन के अलावा सामाजिक अउ आर्थिक गतिविधि ल घलो बढ़ावा मिलही।
श्री बघेल ह केंद्रीय राज्यमंत्री ल हैदराबाद, जगदलपुर, रायपुर विमान सेवा शुरू करे जाय बर धन्यवाद घलो दीन
लोकवाणी
मुख्यमंत्री भूपेश बघेल ह लोकवाणी म ए घांव – नवा छत्तीसगढ़ हमर विकास मोर कहानी – विसय उपर प्रदेश के मनखे मनले गोठबात करही।
एखर संबंध म कोनो भी मनखे ह आकाशवाणी रायपुर के फोन नंबर शून्य सात सात एक-दू चार तीन शून्य पांच शून्य एक, पांच शून्य दू अउ पांच शून्य तीन म काली ले तेईस, चैबीस, अउ पच्चीस सितंबर के मंझनियंा तीन ले चार बजे के बीच फोन करके अपन सवाल ल रिकार्ड करा सकत हे।
मुख्यमंत्री के हर महीना के रेडियोवार्ता लोकवाणी के ग्यारहवंा कड़ी के प्रसारण अवइया ग्यारा अक्टूबर के होही । एखर प्रसारण छत्तीसगढ़ के आकाशवाणी के सबो केंद्र एफ. एम. रेडियो अउ क्षेत्रीय समाचार चैनल ले बीहनिया साढ़े दस बजे ले ग्यारा बजे तक करे जाही।
कन्हैया लाल अग्रवाल-निधन
प्रदेश के स्वतंत्रता संग्राम सेनानी कन्हैया लाल अग्रवाल के पाछू रतिहा रायपुर के एम्स अस्प्ताल म निधन होगे। ओमन सौ बछर के रीहिन अउ पाछू लंबा बेरा ले बीमार चलत रीहिन। राज्यपाल अनुसूइया उइके अउ मुख्यमंत्री भूपेश बघेल ह कन्हैया लाल अग्रवाल के निधन उपर दुख जताइन हे अउ अपन शोक संदेश म दिवंगत आत्मा बर प्रार्थना करीन।
कन्हैया लाल अग्रवाल के अंतिम संस्कार आज राजनंादगंाव म राजकीय सम्मान के संग करे जाही।
बतादन कि कन्हैया लाल अग्रवाल राजनंादगंाव म जन आंदोलन के पुरोधा रीहिन ।
अउ अब थोरकुन समाचार सार म-
– बीजापुर जिला के बासागुड़ा थाना क्षेत्र के फुतकेल गांव म पाछू रतिहा माओवादी मन डहार ले मुखबिरी के शक म एक झिन ग्रामीण के हत्या करे के मामला आगू आय हे।
– जांजगीर-चंापा जिला के स्वास्थ्य विभाग ह आने आने पद म भर्ती बर साक्षात्कार ल स्थगित कर देहे।
अउ
– महासमुंद जिला म काम म नही लहुटे नेशनल हेल्थ मिशन के तीन झिन अधिकारी मन ल बर्खास्त कर दे गेहे।