मुख्यमंत्री- गौरेला पेण्ड्रा मरवाही
मुख्यमंत्री भूपेश बघेल ह गौरेला पेण्ड्रा मरवाही जिला म ही अरपा महोत्सव आयोजन करे के घोषणा करे हे। मुख्यमंत्री ह आज अपन निवास कार्यालय ले वीडियो कॅान्फे्रसिंग के माध्यम ले नवा बने जिला गौरेला, पेण्ड्रा, मरवाही ल करीबन तीन सौ तैंतीस करोड़ रूपिया के दू सौ आठ आने आने विकास काम के घोषणा करीन।
एमा चैरासी करोड़ रूपिया के उनतीस काम के लोकार्पण अउ करीबन दू सौ उनचास करोड़ रूपिया के एक सौ उन्यासी भूमि पूजन के काम शामिल हे।
रेलवे स्पष्टीकरण
केंद्र सरकार ह स्पष्ट करे हे कि रेलवे के निजीकरण के कोनो प्रस्ताव नइ हे। रेलमंत्री ह राज्यसभा म एक ठन लिखित उत्तर म ये जानबा दीन। ओमन बताइन कि बछर दू हजार तीस तक रेलवे नेटवर्क के विस्तार अउ आधुनिकीकरण बर पचास लाख करोड़ रूपिया निवेश करे के जरूरत पड़ही। ओमन कीहिन कि सार्वजनिक निजी भागीदारी माॅडल ले रेलवे ह थोरकुन पहल करे हे।
रेलमंत्री ह कीहिन कि अइसन जम्मों मामला म रेल संचालन अउ सुरक्षा प्रमाणन ह भारतीय रेल के तीर रीही। ओमन कीहिन कि रेल के डिब्बा, इंजन अ गोदाम के रखरखाव बर निजी निवेश के जरूरत हे। ओमन यहू कहिन कि भारत म कोनो भी रोजे चलइया रेलगाड़ी ल प्रायवेट आॅपरेटर डहार ले नइ चलाय जात हे।
प्रधानमंत्री आभार
प्रधानमंत्री नरेंद्र मोदी ह काली सत्तर बछर पूरा होय के मउका म अपन जनमदिन के शुभकामना देवइया लोगन मनके प्रति आभार जताइन हे अउ लोगन मन ल कोरोना संक्रमण ल रोके बर मास्क पहिने अउ बने ढंग ले दूरी बनाके राखे के नियम के पालन के अनुरोध करीन हे।
निर्वाचक नामावली
राज्य निर्वाचन आयोग ह प्रदेश के दस नगरीय निकाय मन म होवइया आम चुनाव अउ मगरलोड नगर पंचायत म उप चुनई बर मतदाता सूची तियार करे जाय के कार्यक्रम उपर आगामी आदेश तक रोक लगा दे हे। ए बारे म राज्य निर्वाचन आयुक्त ठाकुर रामसिंह ह बताइन कि प्रदेश म कोरोना के बाढ़त संक्रमण अउ एखर ले जुड़े निकाय के अमला मन ल कोरोना पाॅजीटिव होय के सेती चुनाव ल टाल दे गेहे।
जानबा के मुताबिक राज्य निर्वाचन आयोग डहार ले मतदाता सूची तियार करे जाय के कार्यक्रम पाछू इक्कीस जुलाई ले जारी करे गे रीहिस। एखर तहत नौ जून के मतदाता सूची के प्रारंभिक प्रकाशन करे जाना रीहिस अउ अठारा सितंबर तक दावा आपत्ति मंगाय गे रीहिस।
वि.वि.-मार्गदर्शन
प्रदेश के उच्चशिक्षा संचालनालय ह जम्मों राजकीय विश्वविद्यालय मन ल शैक्षणिक सत्र दू हजार उन्नीस-बीस के वार्षिक परीक्षा अउ अंकसूची के बारे म दिशा निर्देश जारी करे हे। एखर मुताबिक जम्मों विश्वविद्यालय मन ल प्रथम अउ द्धितीय बछर के छात्र मनके अंकसूची के संगेसंग अंतिम वर्ष के नियमित अउ जम्मों स्वाध्यायी छात्र मनके परीक्षा के बारे म पहिली ले जारी निर्देश के पालन करे बर केहे गेहे।
संचालनालय ह महाविद्यालय मन ल उत्तर पुस्तिका बांटे बर छात्र मन ल परीक्षा केंद्र तक बलाय ले मना करे हे। इही बीच रायपुर के पंडित रविशंकर शुक्ल विश्वविद्यालय ह शैक्षणिक सत्र दू हजार उन्नीस बीस के वार्षिक परीक्षा के बांचे प्रश्न पत्र अउ सेमेस्टर परीक्षा बर उत्तर पुस्तिका बांटे के काम बर रोक लगा देहे।
जवान-हत्या
बीजापुर जिला म माओवादी मन ह छत्तीसगढ़ सशस्त्र बल – सीएएफ के एक झिन जवान के हत्या कर दीन। मृतक जवान पाछू पांच दिन ले लापता रीहिन । जवान के शव आज बीहनिया बीजापुर, गंगालुर रद्दा के पदेड़ा गांव के तीर सड़क के तीर म पाय गीस। माओवादी मन ह शव के तीर पर्चा घलो फेंके रीहिन। जानबा के मुताबिक मृतक जवान मल्लूराम सूर्यवंशी ह बिलासपुर के रहइया हरय अउ ओमन सीएएफ के पाइनियर प्लाटून म पदस्थ रीहिन।
सीरो सर्विलेंस/जांच मान्यता
प्रदेश म कोरोना संक्रमण के बाढ़त मामला के बीच काली ले सीरो सर्विलेंस के शुरूआत करे गेहे । एखर बर भारतीय चिकित्सा अनुसंधान परिषद के टीम ह रायपुर, दुर्ग अउ राजनांदगांव जिला के लोगन मनके शरीर म एंटीबाॅडी के जांच बर सैंपल सकेले हे। रायपुर जिला म सेरीखेड़ी, सिलियारीखुर्द, बिलाड़ी अउ खौना म चालीस-चालीस लोगन मनके सैंपल ले गीस।
त उंहें दुर्ग जिला के मोहलई, समोदा अउ कोकड़ी, राजनंादगंाव जिला के सुरगी, रेंगाकठेरा, अउ नवागांव म सेंपल ले गीस। आईसीएमआर के तीन ठिन अलग-अलग टीम ह ए काम म लगे हे। एखर मन डहार ले आम लोगन अउ जादा खतरा वाले समूह के संगेसंग अस्पताल स्टाफ, पुलिस, प्रवासी श्रमिक, औद्योगिक अउ मीडियाकर्मी के संगेसंग भीड़ के बीच काम करइया लोगन मनके सेंपल ले जात हे।
जानबा के मुताबिक सीरो सर्विलेंस के माध्यम ले खून के जांच करके संक्रामक बीमारी के खिलाफ शरीर म पैदा होय एंटीबाॅडी के पता लगाये जाथे। एला एंटीबाॅडी सर्वे घलो केहे जाथे। इही बीच राज्य सरकार ह प्रायवेट अस्पताल अउ निजी लैब मन ल एंटीजन ट्रू नाॅट अउ आरटीपीसीआर जांच के पात्रता के बारे म आइसीएमआर के गाइडलाइन के मुताबिक निर्देश जारी करे गेहे।
एंटीजन जांच बर जम्मों प्रायवेट अस्पताल जउन ह नेशनल एक्रेडिटेशन बोर्ड आॅफ हाॅस्पिटल एंड हेल्थे केयर प्रोवाइडर ले मान्यता मिले हे अउ जेमन छत्तीसगढ़ नर्सिंग होम एक्ट के तहत अपन पंजीयन कराय हे। उंहें ट्रू नाॅट जांच बर प्रायवेट अस्पताल के लैब या फैर निजी लैब ल एनएबीएल ले मान्यता अउ छत्तीसगढ़ नर्सिंग होम म पंजीकृत होना चाही। अइसने प्रायवेट अस्पताल या निजी लैब ल आरटीपीसीआर जांच बर आइसीएमआर अउ एनएबीएल ले मान्यता के संगेसंग छत्तीसगढ़ नर्सिंग होम एक्ट म पंजीयन होना जरूरी हे।
कोरोना समाचार
प्रदेश के स्वास्थ्य विभाग ह होम आइसोलेशन म राहत इक्कीस हजार ले जादा कोरोना संक्रमित मरीज मन ल मेडिसिन किट देहे । संगेसंग स्वास्थ्य विभाग ह होम आइसोलेशन के मरीज अउ उंखर परिवार वाले मन ल उंखर मन डहार ले बरते जाय सावधानी अउ दिशा निर्देश के जानबा देवत हे।
जानबा के मुताबिक प्रदेश म कोरोना संक्रमित बाईस हजार चार सौ पैंतीस मरीज मन ह होम आइसोलेशन चुन हे। जेमा ले करीबन साढ़े आठ हजार मरीज मन ह आइसोलेशन के बेरा पूरा करके ठीक होगे हे।
एति रायपुर कलेक्टर ह कोरोना पाॅजीटिव मरीज के देखरेख अउ इलाज बर बनाय गे कोविड केयर सेंटर म डॅाक्टर मनके नियुक्ति करे हे। अइसने कोविड केयर सेंटर म जरूरी सुविधा के देखरेख बर नोडल अधिकारी के नियुक्ति घलो करे गेहे।
उंहें महासमुंद कलेक्टर ह कोरोना संक्रमण के बने ढंग ले निगरानी बर डिप्टी कलेक्टर स्तर के तीन झिन जिला स्तरीय नोडल अधिकारी मनके नियुक्ति करे हे। ए अधिकारी मन कोविड केयर सेंटर अउ कोविड अस्पताल मन म सेंपलिंग के संगेसंग टेस्टिंग के समीक्षा करहीं।
ओति रायगढ़ जिला म कोरोना संक्रमण के बाढ़त मामला ल देखत वर्चुअल विधिक साक्षरता शिविर के आयोजन करे गीस। ए शिविर म शिक्षक शिक्षीका के संगेसंग नौ ब्लाॅक के करीबन चार सौ पचास छात्र मन ह आॅनलाइन सामिल होइन।
हादसा
कोंडागांव जिला म पाछू रतिहा होय एक ठिन सड़क दुर्घटना म चार झिन लोगन के मउत होगे त उंहें तीन झिन मन घायल होगे हे।
हमर सवांददाता ले मिले जानबा के मुताबिक राष्ट्रीय राजमार्ग क्रमांक तीस म बनिया गांव के तीर दू ठिन फटफटी म बइठे लोगन मन ह चार पहिया गाड़ी ले टकरा गे। घटना के बाद चारपहिया गाड़ी ह अंते तंते होके पलट गे। गाड़ी के पलटे ले चार झिन लोगन के मउकाच म परान छूट गे।
उंहें इही जिला के केशकाल थाना छेत्र के छिंदुली गांव म दू झिन नोनी मन ह फंासी लगाके आत्महत्या कर लीन। पुलिस ह मामला दर्ज करके जांच शुरू कर देेहे।
मौसम
अवइया चैबीस घंटा के दउरान प्रदेश के कतकोन जगा म गरज-चमक के संग हल्का ले मध्यम बरसा होय के संभावना हे। मौसम विभाग के मुताबिक प्रदेश के सीमावर्ती राज्य के उपर एक ठिन चक्रीय चक्रवाती घेरा बने हे जेखर सेती प्रदेश के बस्तर अउ ओखर ले लगे कुछएक जिला म गरज चमक के संग भारी बरसा होय के संभावना हे।