श्री धर्मेंद्र प्रधान ह बतइन कि विद्यार्थी मन ल परीक्षा बर अपन पसंद के सहर चुने के मउका मिलही।
पेट्रोल-डीजल कीमत
दुनियाभर म कच्चा तेल के कीमत म आय उछाल के बाद तेल कंपनी मन ह पेट्रोल अउ डीजल के कीमत म तीन रूपिया प्रति लीटर के बढ़ोत्तरी करे हे। दिल्ली म अब पेट्रोल के कीमत संतानवे रूपिया सतहत्तर पइसा प्रति लीटर जबकि डीजल के कीमत नब्बे रूपिया सड़सठ पइसा प्रति लीटर हो गेहे। उहें, राजधानी रईपुर म पेट्रोल के दाम एक सौ तीन रूपिया अंठावन पइसा अउ डीजल के दाम छियानवे रूपिया संतावन पइसा हो गेहे।
मुख्यमंत्री-पेट्रोल/डीजल
मुख्यमंत्री विष्णुदेव साय ह प्रदेसवासी मनले पेट्रोल अउ डीजल के उपलब्धता ल लेके चिंता नइ करे के अपील करीन हे। ओमन किहीन कि छत्तीसगढ़ म पेट्रोल अउ डीजल के पर्याप्त भंडारण मौजूद हे अउ प्रदेस के जम्मो ऑयल डिपो म नियमित रूप ले ईंधन के आपूर्ति करे जात हे। मुख्यमंत्री ह बतइन कि राज्य सरकार अउ ऑयल कंपनी आपसी समन्वय के संग स्थिति म सरलग नजर बनाय हुए हे। ओमन किहीन कि केंद्र सरकार घलो ईंधन आपूर्ति ल लेके जरूरी तियारी करे हे अउ कोनो तरह के समस्या नइ हे। श्री साय ह लोगन मन ले अफवाह उपर धियान नइ दे अउ जरूरत के अनुसार ही ईंधन लेके आग्रह करीन।
इही बीच, राज्य के खाद्य सचिव रीना बाबा साहेब कंगाले ह किहीन कि आम लोगन डहार ले पाछू दू दिन म घबराहट के सेति पेट्रोल-डीजल के खरीदी करे गेहे, जेखर ले एखर खपत म अप्रत्यासित बढ़ोत्तरी दरज होय हे। एखर सेति कुछेक जघा म कृत्रिम अभाव के स्थिति बन गेहे। ओमन लोगन मनले कोनो भी तरह के अफवाह या घबराहट के स्थिति म पेट्रोल-डीजल के खरीदी नइ करे के अपील करीन हे।
केंद्रीय सचिव-दौरा
केंद्रीय भूमि संसाधन विभाग के सचिव नरेंद्र भूषण के अगुवई म उच्च स्तरीय प्रतिनिधि मंडल ह धमतरी जिला के मगरलोड विकासखंड के दउरा करके प्रधानमंत्री कृषि सिंचाई योजना के अंतर्गत वाटरशेड विकास परियोजना के निरीक्षण करीन। ए दउरान ओमन सुरक्षात्मक सिंचाई, आजीविका संवर्धन अउ मृदा के संघरा जल संरक्षण उपर केंद्रित आने-आने पहलू के समीक्षा करीन। उहें, केंद्रीय सचिव ह सांकरा गांव म वाटरशेड विकास घटक अउ मनरेगा के अंतर्गत निर्मित स्टॉप डैम के घलो अवलोकन करीन। प्रतिनिधि मंडल ह सौंगा गांव म पांच एकड़ के वृक्षारोपण स्थल के घलो दउरा करीन, ंिजंहा एक हजार ले जादा अमरूद अउ लिमऊ के रूख लगाय गे हे।
अइसने, केंद्रीय सचिव ह धमतरी म नक्सा प्रोजेक्ट के प्रगति के निरीक्षण करीन। ए दउरान ओमन प्रोजेक्ट के क्रियान्वयन समय-सीमा म पूरा करे अउ सर्वे टीम के संख्या बढ़ाय के निरदेस कलेक्टर ल दीन।
बातों-बातों-में
कृषि विश्वविद्यालय-दीक्षांत समारोह
रईपुर स्थित इंदिरा गांधी कृषि विश्वविद्यालय के ग्यारहवां दीक्षांत समारोह आज आयोजित करे गीस। समारोह म राज्यपाल रमेन डेका अउ मुख्यमंत्री विष्णुदेव साय ह आने-आने संकाय म प्रावीण्य सूची म जघा पाय मेधावी विद्यार्थी मन ल तेरह ठिन स्वर्ण, सात रजत अउ दू ठिन कांस्य पदक दीन। संघरा एक सौ अट्ठाईस सोधार्थी मन ल पीएचडी, पांच सौ अट्ठारा विद्यार्थी मन ल स्नात्कोत्तर अउ बारह सौ चौतीस विद्यार्थी मन ल स्नातक के उपाधि दे गीस।
समारोह ल संबोधित करत राज्यपाल ह विद्यार्थी मन ल बधई देत किहीन कि दीक्षांत समारोह छात्र जीवन के एक बहुत बड़ा मउका होथे। ए केवल डिग्री पाय के दीन नइये बल्कि भविष्य के सुरूआत के प्रतीक हरय। श्री डेका ह किहीन कि आज कृषि परिवर्तन के दउर ले गुजरत हे। किसान अउ युवा मन ल घलो आधुनिक अउ उन्नत खेती कोति बढ़ना चाही।
उहें, मुख्यमंत्री ह विद्यार्थी मन ले ड्रोन, एआई अउ डिजीटल तकनीक ले खेती ले जोड़के किसान अउ वैज्ञानिक मनके बीच सेतू बने के आह्वान करीन। ओमन किहीन कि कृषि विश्वविद्यालय ह कृषि शिक्षा अउ अनुसंधान के क्षेत्र म उल्लेखनीय काम करे हे अउ वैज्ञानिक डहार ले विकसित नवा फसल कीसम अउ आधुनिक तकनीक ले किसान मन ल बड़का फायदा मिलत हे।
समारोह म कृषि मंत्री रामविचार नेताम, नई दिल्ली स्थित भारतीय कृषि अनुसंधान संस्थान के पूर्व निदेशक डॉक्टर अशोक कुमार सिंह अउ कृषि विश्वविद्यालय के कुलपति डॉक्टर गिरिश चंदेल मौजूद रिहीन।
वॉकथन
आकाशवाणी कें नब्बे बछर पूरा होय के उपलक्ष्य म आज छत्तीसगढ़ के राजधानी रईपुर म आकाशवाणी के डहार ले वॉकथन के आयोजन करे गीस। एमा आकाशवाणी के कर्मचारी, सेवा निवृत्त अधिकारी, समाचार वाचक, श्रोता अउ सहर के प्रमुख नागरिक सामिल हे। कारीकरम के मुख्य अतिथि दूरदर्शन रईपुर के उप महानिदेशक संजय कुमार मिश्रा रिहीन। बिसेस अतिथि के रूप म पत्र सूचना कार्यालय रईपुर के उप निदेशक रमेश जयभाय अउ माय भारत के क्षेत्रीय प्रमुख अर्पित तिवारी सामिल होइन।
वॉकथन आज बिहनिया लगभग सात बजे सिविल लाइंस स्थित आकाशवाणी भवन ले सुरू होइस। ए सहर के आने-आने रद्दा ले होत आकाशवाणी परिसर म ही सिराइस। आकाशवाणी केंद्र रईपुर के उपमहानिदेशक वी.राजेशवर ह बतइन कि ए आयोजन आकाशवाणी के गौरवसाली नब्बे बछर के सफर ल यादगार बनाय बर करे गेहे। ‘‘बहुजन हिताय बहुजन सुखाय‘‘ के आदर्स वाक्य के संग आकाशवाणी के स्थापना आठ जून उन्नीस सौ छत्तीस म होय रिहीस। ए देस के सर्वाधिक विश्वनीय प्रसारण माध्यम हे, जउन आने-आने भाषा म समाचार बुलेटिन के अलावा संगीत, मनोरंजन, प्रेरक अउ जनउपयोगी कारीकरम के प्रसारण करथे।
दिव्यांशु देवांगन-स्वर्ण
रायगढ़ जिला के अंतरराष्ट्रीय निशानेबाज दिव्यांशु देवांगन ह मिस्र म आयोजित जूनियर वर्ल्ड कप के दस मीटर एयर राइफल मिक्स्ड डबल्स स्पर्धा म स्वर्ण पदक जीते हे। ए उपलब्धि बर वित्त मंत्री ओ.पी.चौधरी ह दिव्यांशु ल फोन करके बधई दीन हे। ओमन विस्वास जतइन कि दिव्यांशु भविष्य म घलो अंतरराष्ट्रीय स्तर म देस अउ प्रदेस के नाम रोशन करत रिहीन। उहें, स्वर्ण पदक विजेता दिव्यांशु ह किहीन कि प्रदेसवासी मनके स्नेह अउ निरंतर प्रोत्साहन ही ओमन ल ए शिखर तक पहुंचाय के ऊर्जा देहे।
मौसम
मौसम विभाग ह दक्षिण-पश्चिम मानसून के छब्बीस मई के केरल तट म पहुंचे के संभावना जताय हे। इही बीच, छत्तीसगढ़ म अवइया चौबीस घंटा के दउरान कई जघा म हल्का बरसा होय के संभावना हे। उहें, एक-दू जघा म गरज-चमक के संग अंधड़ चले अउ गाज गिरे के चेतावनी घलो दे गेहे। मौसम विभाग के मुताबिक अधिकतम तापमान म कोनो बिसेस बदलाव होय के संभावना नइ हे, जब्कि सत्रह मई ले अधिकतम तापमान म बढ़ोत्तरी दरज करे जा सकत हे।
आज बिहनिया मौसम के मिजाज बदले के सेति राजधानी रईपुर समेत प्रदेस के कुछेक जिला म तेज हवा के संग तेज बरसा होइस। एखर ले लोगन मन ल गर्मी ले कुछ राहत मिलिस।