कोरोना समाचार
स्वास्थ्य विभाग ह सिरिफ गंभीर रूप ले बीमार कोरोना संक्रमित मरीज ल ही अस्पताल पहुंचाय बर एक सौ आठ संजीवनी एक्सपे्रस या एंबुलेंस के सुविधा देके निर्देश दीन हे।
स्वास्थ्य विभाग ह कोरोना संक्रमण के कम लक्षण या बिना लक्षण वाले मरीज मनले अपील करीन हे कि ओमन ह खुद के गाड़ी ले या फिर जिला म उपलब्ध दूसर आने आने गाड़ी ले अस्पताल पहुंचे। स्वास्थ्य सेवा संचालक नीरज बंसोड़ ह कीहिन कि संजीवनी एक्सपे्रस या आने आने एंबुलेंस जेमा चिकित्सक, पैरा मेडिकल स्टाफ अउ आॅक्सीजन के सुविधा वाले गाड़ी ले गंभीर मरीज मन ल अस्पताल पहुंचाय जाय ताकि बेरा म ओमन ल सही उपचार मिल सकय। रायपुर के जिला कलेक्टर ह कोरोना संक्रमण के रोकथाम अउ नियंत्रण बर रायपुर शहर म करे जात काम के समीक्षा बर एक ठिन बइठका लीन। ओमन ह सर्विलांस दल डहार ले मनखे मनके आॅक्सीजन लेवल अउ पल्स रेट परीक्षण म जरूरी सावधानी बरते के निर्देश दीन। संगेसंग जिला कलेक्टर ह सबो घर म सियान, गर्भवती माइलोगिन अउ गंभीर बीमारी ले पीड़ित मनखे मनके बारे म पूरा जानकारी राखे बर कीहिन।
इही बीच रायपुर जिला अस्पताल म पदस्थ विशेषज्ञ, चिकित्सक डॅाक्टर आर.के. पांडा ह मनखे मनले अपील करीन हे कि ओमन सर्दी, ख्ंाासी या फेर बुखार आय म डॅाक्टर करा जाय या फेर कोरोना के जांच कराय ले झन डरय। ओमन बताइन कि कोरोना जांच रिपोर्ट पूरा तरीका ले विश्वसनीय हवय अउ यदि लक्षण आय के तीन दिन के अंदर जांच के बाद दवाई ले जाथे त मरीज ह पूरा तरीका ले ठीक हो सकत हे। उंहे रायपुर जिला म केारोना संक्रमित मरीज मन ल आपातकालीन सेवा उपलब्ध कराय बर एक ठिन विशेष व्यवस्था करे गेहे। जिला प्रशासन ह मरीज मन ल होम आइसोलेशन, एंबुलेंस व्यवस्था अउ तत्काल सहायता देबर टेलिफोन नंबर जारी करे हे।
कोरोना समाचार
कोरोना संक्रमण के बाढ़त मामला ल देखत मुंगेली जिला म परनदीन ले एक सप्ताह बर लाॅकडाउन के आदेश जारी कर दे गेहे। जिला कलेक्टर पी.सी. एल्मा ह बताइन कि लाॅकडाउन के बेरा आपातकाल सेवा ल छोड़के आने सबो गतिविधि उपर रोक रीही। ए लाॅकडाउन के बेरा तेईस सितंबर के रतिहा बारा बजे तक नगरी क्षेत्र पूरा तरीका ले बंद रीही।
जिला के सबो सरकारी कार्यालय, अर्धशासकीय, शासकीय अउ अशासकीय कार्यालय ल तुरते बंद कर दे जाही। फेर उंहें कर्मचारी मन ल मुख्यालय छोड़े के अनुमति नइ होही। नगरीय क्षेत्र म बस, टैक्सी, आॅटो, ई-रिक्शा, बाजार अउ धार्मिक स्थल बंद रीही।
उंहें दुर्ग जिला म मुख्य चिकित्सा अउ स्वास्थ्य अधिकारी ह सरलग चैदा दिन तक काम करे वाले स्वास्थ्य कर्मी मन ल एक हप्ता तक होम क्वारंटीन के सुविधा देहे। स्वास्थ्यकर्मी संघ ह ए फैसला ल लेके खुशी जताइन हे।
ओति महासमुंद जिला म घलो कोरोना संक्रमित मरीज मनके पहिचान बर सर्वे के काम शुरू होगे हे। जिला कलेक्टर कार्तिकेय गोयल अउ मुख्य चिकित्सा अउ स्वास्थ्य अधिकारी डॅाक्टर एस.पी. वारे ह लोगन मनले अपील करीन हे कि ओमन ह कोरोना के लक्षण दिखे म मितानिन मन ल जानकारी देवय।
उंहें वनमंत्री अउ राजनांदगांव जिला के प्रभारी मंत्री मोहम्मद अकबर ह राजनांदगांव म आॅक्सीजन के जरूरत वाले कोरोना संक्रमित मरीज मनके अनिवार्य रूप ले सीटी स्केन कराय के निर्देश दीन हे। ओमन ह वीडियो कॅान्फे्रंिसग ले राजनंादगंाव जिला म स्वास्थ्य व्यवस्था के समीक्षा करीन। ए बेरा म ओमन ह राजनंादगंाव, खैरागढ़ अउ डोंगरगांव कोविड केयर सेंटर म इलाज चलत मरीज मनके संग स्वास्थ्य सुविधा ल लेके गोठबात करीन।
कोरोना मरीज
केंद्रीय राज्य मंत्री अउ सरगुजा सांसद रेणुका सिंह घलो कोरोना पाॅजीटिव पाय गेहे। ओमन ह सोशल मीडिया म खुदके कोरोना संक्रमित होय के जानकारी दीन। राज्य म काली रतिहा तक कोरोना संक्रमण के तीन हजार छै सौ छत्तीस नवा मामला आगू आय हे। एमा ले सात सौ छप्पन नवा मरीज रायपुर जिला ले मिले हे। प्रदेश म कोरोना संक्रमण ले तैंतीस हजार छै सौ ले जादा सक्रिय मामला हे। उंहें होम इसोलेशन म रहइया करीबन चार हजार कोरोना संक्रमित मरीज मन ठीक हो चुके हे। काली कोरोना संक्रमण ले अठारा मनखे मनके मउत होय रीहिस। ओति अंबिकापुर मेडिकल कालेज के दू चिकित्सक मन घलो कोरोना पाॅजीटिव पाय गेहे।
केन्द्र-प्याज निर्यात
केंद्र सरकार ह प्याज के निर्यात म तत्काल प्रभाव ले प्रतिबंध लगा देहे। एखर उद्देश्य घरेलु बाजार म प्याज के उपलब्धता बढ़ाना अउ एखर कीमत म नियंत्रण राखना हे। विदेश व्यापार महानिदेशालय ह कीहिन कि हर प्रकार के प्याज के निर्यात म रोक लगाय गेहे। उंहें संक्रमण काल के व्यवस्था के प्रावधान ए अधिसूचना के तहत लागू नइ होही।
हथकरघा जांच कमिटी
स्कूल ड्रेस के सिलाई काम म गड़बड़ी ले जुड़े आरोप के जांच बर एक ठिन कमिटी गठित करे गेहे। राज्य हथकरघा विकास अउ विपणन सहकारी संघ मर्यादित डहार ले ए चार सदस्यीय कमिटी बनाय गेहे। ए कमिटी पूरा मामला के जांच करके पंद्रा दिन के भीतर अपन रिपोर्ट पेश करही।
उंहें ए शिकायत उपर हथकरघा संघ के प्रबंध संचालक राजेश सिंह राणा ह गणवेश प्रभारी ल तुरते हटा देहे। एति ग्रामोद्योग मंत्री गुरू रूद्रकुमार ह गणवेश सिलाई के काम राज्य के कारीगर मनके बजाय दूसर राज्य के कारीगर मन ल देके शिकायत उपर ए मामला के जांच कराय के निर्देश दे रीहिन। एखर उपर प्रबंध संचालक श्री राणा ह स्पष्ट करीन कि राज्य म स्कूल ड्रेस के सिलाई के काम सिरिफ छत्तीसगढ़ के मनखे मन ल ही प्राथमिकता ले दे जात हे। एखर जरिया ले पांच हजार आठ सौ ले जादा माइलोगिन मन ल रोजगार मिले हे।
माओवादी गिरप्तार
सुकमा जिला म सुरक्षा बल मन ह चार झिन माओवादी अउ इंखर दू सहयोगी मन ल गिरप्तार करे म सफलता पाइन हे। जिला के पुलिस अधीक्षक शलभ सिन्हा ह बताइन कि जिला पुलिस बल, केंद्रीय रिजर्व पुलिस बल अउ कोबरा बटालियन के संयुक्त दल ह ए गिरप्तारी करीन हे। पकड़े गे माओवादी मन उपर कई ठिन आने आने वारदात म सामिल रेहे के आरोप हे।
बस्तर पुलिस अभियान
बस्तर पुलिस डहार ले माओवादी मनके विकास विरोधी काम ल लोगन तक पहुंचाय बर एक ठिन प्रचार अभियान के शुरूआत करे गेहे। बस्तर रेंज के पुलिस महानिरीक्षक सुंदरराज पी. ह बताइन कि क्षेत्र ले माओवाद के समस्या ल खतम करे बर उंखर मनके विकास विरोधी अउ जनविरोधी नीति के जानकारी ले आम मनखे मन ल अवगत कराना बड़ जरूरी हे।
एखर बर बस्तर त माटा और बस्तर चो आवाज – नाव ले जागरूकता अभियान चलाय जात हे । एमा गोंडी, हल्बी, अउ स्थानीय बोली मनले लोगन मन ल माओवादी नीति के समर्थन नइ करय के प्रति जागरूक करे जात हे।
ट्रेन सुविधा
यात्री मनके सुविधा ल धियान म राखत रेल प्रशासन ह तीन ठिन स्पेशल ट्रेन के परिचालन अब हप्ता म तीन दिन करे के निर्णय लेहे। मुंबई-हावड़ा अउ हावड़ा-अहमदाबाद के बीच चले वाले स्पेशल ट्रेन अब हप्ता म तीन दिन चलही।
ए ट्रेन मनके समय सारिणी अउ रूके म कोनो बदलाव नइ करे गेहे।
उंहें दक्षिण पूर्व मध्य रेलवे डहार ले काली ले स्वच्छता पखवाड़ा मनाय जाही। ए बेरा म जोन अउ मंडल स्तर म स्वच्छता उपर आधारित आने आने गतिविधि आयोजित करे जाही। संगेसंग रेलवे कर्मचारी मन स्वच्छता के घलो शपथ लेवइया हे। भारतीय रेलवे डहार ले आयोजित स्वच्छ रेल स्वच्छ भारत के तहत ए पखवाड़ा तीस सितंबर तक चलही।
मौसम
अवइया चैबीस घंटा के बेरा म प्रदेश म एक दू जगा म हल्का ले मध्यम बारिश या फेर गरज चमक के संभावना हे। रायपुर स्थित मौसम विज्ञान केंद्र ले मिले जानकारी के अनुसार पश्चिम मध्य बंगाल के खाड़ी अउ उत्तर तटीय आंध्रप्रदेश के उपर एक ठिन निम्न दाब के क्षेत्र बने हे एखर संगेसंग उपरी हवा के चक्रवाती घेरा घलो सक्रिय हवय। जेखर सेती राज्य म मौसम म बदलाव आय हे।