मुख्यमंत्री-हाइवे पेट्रोलिंग
मुख्यमंत्री भूपेश बघेल ह हाइवे पेट्रोलिंग बर 15 वाहन मन ल हरा झंडी देखाके रवाना करीन। ए मउका म ओमन किहीन कि लोगन मन ल एखर ले सुगम अउ सुरक्षित आय-जाय के सुविधा मिलही। संगेसंग सड़क दुर्घटना होय म पीड़ित ल तुरते राहत अउ सहायता मिल सकही। मुख्यमंत्री ह आज अपन निवास कार्यालय ले दस जिला – बलौदाबाजार, धमतरी, बालोद, बेमेतरा, कोरिया, जशपुर, सूरजपुर, बलरामपुर, कांकेर अउ कोंडागांव बर 15 हाइवे पेट्रोलिंग वाहन मन ल रवाना करीन।
संसद-मानसून सत्र
संसद के मानसून सत्र आज ले सुरू होईस। कोरोना संक्रमण ल देखत सत्र के आयोजन दू पाली म करे गीस। पहिली पाली बिहनिया 09 बजे ले मंझनिया 01 बजे तक अउ दूसर पाली मंझनिया 03 बजे ले संझा 07 बजे तक करे जात हे। फेर आज ल छोड़ के राज्यसभा के कार्यवाही बिहनिया के पाली म अउ लोकसभा के कार्यवाही संझा के पाली म होही। सत्र के बेरा 01 अक्टूबर तक 18 बइठका म 45 विधेयक अउ 02 वित्तीय प्रस्ताव सदन के पटल म राखे जाही। उहें, अध्यादेश के स्थान म 11 विधेयक लाय जाही।
लोकसभा म आज होम्योपैथी बर राष्ट्रीय आयोग 2019 अउ भारतीय चिकित्सा पद्धति ले जुड़े विधेयक ल पारित कर दे गीस।
साइबर-थाना
प्रदेस म आॅनलाईन होवइया अपराध मन ल रोके बर साइबर थाना खोले जाही। ए संबंध म पुलिस महानिदेशक डी.एम. अवस्थी ह सबो जिला के पुलिस अधीक्षक मन ल निर्देश जारी करे हे। एखर अंतर्गत सबो पुलिस रेंज स्तर म पांच थाना म खोले के अनुमति दे गेहे। एखर अलावा डीजीपी ह पुलिसकर्मी मन ल कोरोना संक्रमण ले बचाव बर पुलिस अधीक्षक मन ल निर्देश जारी करे हे। ओमन किहीन कि पुलिस अधिकारी अउ कर्मचारी मानक स्तर म मास्क लगा के ही ड्यूटी करे। ओमन किहीन कि कार्यालय, थाना अउ आने जगह मन ल रोजे सैनिटाईज करे जाय। श्री अवस्थी ह ड्यूटी म आय-जाय बर खुद के वाहन उपयोग करे बर किहीन। संगेसंग यातायात कर्मचारी मन ल ड्यूटी के बेरा या चलानी कार्रवाई करत बेरा सामाजिक दूरी के पालन करे के निर्देश देहे।
कोरोना-समाचार
प्रदेस म कोरोना संक्रमण के बाढ़त मामला ल देखत एखर रोकथाम अउ बचाव बर प्रयास करे जात हे। इही कड़ी म बिलासपुर के जिला कार्यालय म सहायता अउ नियंत्रण कक्ष स्थापित करे गेहे। जेखर फोन नंबर 0775-2251000 हे। ए नियंत्रण कक्ष चैबीसों घंटा काम करही। जेखर बर 16 ले 30 सितंबर तक अधिकारी अउ कर्मचारी मनके ड्यूटी लगाय गेहे।
ऐति, जाजंगीर-चांपा जिला के कलेक्टर यशवंत कुमार ह बतईन कि सबो कोविड केयर केन्द्र मन म गंभीर मरीज मनके उपचार बर आॅक्सीजन के सुविधा उपलब्ध कराय जाही। ओमन बतईन कि जिला म 06 नवा एम्बुलेंस अउ सीटी स्कैन मसीन जल्दी ही उपलब्ध हो जही। संगेसंग एक्स-रे मसीन अउ वेंटिलेटर के संख्या घलो बढ़ाय जात हे। उहें, जिला के कोविड अस्पताल अउ कोविड केयर सेंटर म भोजन सहित आने व्यवस्था मन म सहयोग बर व्यापारी संगठन अउ समाजसेवी संस्था मन घलो आगू आवत हे।
इही बीच, राजनांदगांव जिला के कलेक्टर टोपेश्वर वर्मा ह महाविद्यालयीन परीक्षा मन ल देखत 18 सितंबर तक स्टेशनरी, फोटोकाॅपी अउ कम्प्यूटर ले जुड़े दुकान मन ल बिहनिया 07 बजे ले मंझनिया 01 बजे तक खोले के अनुमति देहे। कोरोना संक्रमण ले बचाव बर नगर निगम क्षेत्र ल कंटेनमेंट जोन घोषित करे गेहे।
चनेश राम राठिया-निधन
राज्यपाल अनुसुईया उइके, मुख्यमंत्री भूपेश बघेल अउ विधानसभा अध्यक्ष चरणदास महंत ह प्रदेस के पूर्व मंत्री चनेश राम राठिया के निधन म दुख व्यक्त करीन। राज्यपाल ह मृतक के परिवार बर संवेदना जताईन।
उहें, मुख्यमंत्री ह पूर्व मंत्री के निधन ल राज्य बर अपूर्णीय क्षति बतईन। श्री बघेल ह अपन सोक संदेस म किहीन कि श्री राठिया ह अपन राजनीतिक जीवन म प्रदेस के उन्नति अउ आदिवासी समाज सहित हर वर्ग के हित म अपन योगदान दीन।
विधानसभा अध्यक्ष ह सोक संदेस म किहीन कि दिवंगत राठिया, अविभाजित मध्यप्रदेश अउ छत्तीसगढ़ के आदिवासी मनके नेता रिहीन। ओमन जनता के समस्या के निवारण बर हमेसा आगू रिहीन।
ठोस अपशिष्ट प्रबंधन
पंचायत अउ ग्रामीण विकास मंत्री टी.एस. सिंहदेव ह काली रेडियो म स्वच्छ भारत मिशन-ग्रामीण के आने-आने विषय के जानकारी दीन। काली संझा आकाशवाणी रायपुर ले प्रसारित विशेष कार्यक्रम ‘‘हमर ग्राम सभा‘‘ म ओमन प्रदेस ल स्वच्छ अउ सुंदर बनाय बर करे गे काम अउ कार्ययोजना के जानकारी दीन। श्री सिंहदेव ह बतईन कि स्वच्छ भारत मिशन के दूसर चरण म खुल्ला म सौचमुक्त गांव के स्थिति बनाय राखे बर ठोस अउ तरल अपशिष्ट प्रबंधन बर जोर दे जात हे। एखर बर गांव अउ राष्ट्रीय राजमार्ग मन म पर्याप्त संख्या म सामुदायिक सौचालय के निर्माण के योजना हे। ओमन बतईन कि राष्ट्रीय राजमार्ग मन म बनइया सार्वजनिक सौचालय मन म यात्री मन ल सुविधा उपलब्ध कराय बर दुकान घलो खोले जाही, जेखर संचालन स्व-सहायता समूह के माध्यम ले करे जाही। जेखर ले रोजगार के अवसर घलो मिलही। ओमन बतईन कि गांव मन म ठोस अपशिष्ट के प्रबंधन बर हर एक जनपद पंचायत क्षेत्र म 16 लाख रूपिया के लागत ले शेड बनाय जाही। श्री सिंहदेव ह बतईन कि जउन घर म अभी तक सौचालय के निर्माण नइ होय हे, उंखर मन बर सरकार डहार ले 12 हजार रूपिया तक के सहायता दे जाही।
मन की बात
प्रधानमंत्री ए महीना के 27 तारीख के आकाशवाणी म मन की बात कार्यक्रम म देस-विदेस म रहवइया लोगन मन ले गोठबात करही। ए मन की बात कार्यक्रम के 69वां कड़ी होही। एक ट्वीट म श्री मोदी ह किहीन कि लोगन मन अपन विचार अउ सुझाव नमो ऐप या माईजीओवी ओपन फोरम म भेज सकथे। टोल फ्री नंबर 1 8 0 0 1 1 7 8 0 0 म काॅल करके संदेस रिकार्ड कराय जा सकथे। प्रधानमंत्री ल सोझे सुझाव दे बर 1 9 2 2 म मिस्ड काॅल करके एसएमएस ले लिंक पाय जा सकथे।
हाईकोर्ट-ज्वेलरी पार्क
छत्तीसगढ़ उच्च न्यायालय ह जेम्स एंड ज्वेलरी पार्क के निर्माण उपर अवइया आदेस तक रोक लगा देहे। याचिकाकर्ता देवजी भाई पटेल डहार ले दाखिल करे गे जनहित याचिका म ज्वेलरी पार्क के स्थापना बर जारी भूमि के आदेस ल नियम के विरूद्ध बताय गेहे।
याचिका म केहे गेहे कि एक दिन म राज्य सरकार के 05 एजेंसी मन ल निर्देशित करके जेम्स एंड ज्वेलरी पार्क बर भूमि के आवंटन करे गेहे। उहें, राज्य सरकार डहार ले भूमि आदेस ल नियम के विरूद्ध बताय गेहे। महाधिवक्ता कार्यालय डहार ले जारी प्रेस विज्ञप्ति म केहे गेहे कि हाईकोर्ट ह न्यायालय के सामान्य काजकाज सुरू होय तक निर्माण कार्य उपर रोक लगा दे गेहे।
हिन्दी दिवस
आज देशभर म हिन्दी दिवस मनाय जात हे। ए अवसर म कतकोन आयोजन करे जात हे। इही कड़ी म एक आॅनलाईन समारोह म संबोधित करत उप राष्ट्रपति एम. वेंकैया नायडू ह किहीन कि सबो भारतीय भाषा मनके गौरवशाली इतिहास हे अउ हमन ल भाषा के विविधता अउ संस्कृति उपर गर्व होना चाही।
प्रधानमंत्री नरेन्द्र मोदी ह घलो हिन्दी दिवस के सुभकामना दीन हे। श्री मोदी ह अपन ट्वीट संदेस म हिन्दी के विकास म योगदान करइया सबो भाषाविद् मन बधाई दीन।
राज्यपाल अनुसुईया उइके अउ मुख्यमंत्री भूपेश बघेल ह घलो प्रदेशवासी मन ल हिन्दी दिवस म बधाई अउ सुभकामना दीन हे।
राज्यपाल-आदिवासी अधिकार दिवस
राज्यपाल अनुसुईया उइके ह आदिवासी समाज के युवा मन ले आग्रह करे हे कि ओमन आगू आय अउ सरकार के स्व-रोजगार योजना के लाभ ले। काली आदिवासी अधिकार दिवस उपर आयोजित वेबीनार ल संबोधित करत राज्यपाल ह किहीन कि मेक इन इंडिया अउ वोकल फाॅर लोकल के मर्म समझत स्थानीय संसाधन मनके उपयोग करत ओमन बेहतर रूप म प्रस्तुत करे, जेखर ले अच्छा नतीजा मिलही। संगेसंग आय म घलो वृद्धि होही अउ आत्मनिर्भरता डहार बाढ़बो। राज्यपाल ह किहीन कि अनुसूचित जनजाति के कल्याण बर संविधान म विशेष प्रावधान करे गेहे। जरूरत केवल अपन अधिकार के बारे म जाने अउ जागरूक होय के हे।
अभियंता दिवस
मुख्यमंत्री भूपेश बघेल ह अभियंता दिवस के पहिली संझा म प्रदेस के इंजीनियर मन ल बधाई अउ सुभकामना दीन हे। ओमन अपन संदेस म किहीन कि राष्ट्र अउ राज्य के निर्माण म इंजीनियर मनके भूमिका महत्वपूर्ण होथे। मुख्यमंत्री ह अभियंता मन ले सर विश्वैश्वरैया के आदर्श अउ उंखर काम ले प्रेरणा लेके प्रदेस के निर्माण म योगदान दे बर किहीन।
सुनइया मन बतादन कि भारत रत्न सर मोक्षगुण्डम विश्वैश्वरैया के सुरता म उंखर जनम दिन 15 सितंबर ल अभियंता दिवस के रूप म मनाय जाथे।