प्रदेस म अब कोनो सिफारिश अउ दबाव म आय बिना तय करे गे प्रोटोकाॅल अनुसार मरीज मन ल कोविड अस्पताल म भर्ती करे जाही। मुख्यमंत्री भूपेश बघेल ह रईपुर म आयोजित उच्च स्तरीय बइठका म स्वास्थ्य विभाग के वरिष्ठ अधिकारी अउ कलेक्टर मन ल एखर बारे म कड़ा निरदेस दीन।
श्री बघेल ह किहीन कि मरीज के कोविड केयर सेंटर म पहुंचे के बादे डाॅक्टर मन तय करही कि ओला कोन अस्पताल म भर्ती कराना हे। डाॅक्टर मनके सलाह अउ मरीज के स्थिति के अनुसार ओमन ल बने इलाज के सुविधा देवाय जाही। मुख्यमंत्री ह कोरोना संक्रमण के रोकथाम बर सामाजिक संगठन, गैर सरकारी अउ स्वयंसेवी संस्था मनके मदद ले बर किहीन। एखर अलावा कतकोन समाज मन डहार ले चलत धर्मसाला अउ आश्रम अउ उंखर संचालन ले जुड़े लोगन मन ल घलो कोरोना नियंत्रण ले जोड़े बर किहीन।
बइठका म मुख्यमंत्री ह कोविड अस्पताल अउ कोरोना केयर सेंटर मन म आॅक्सीजन सुविधा वाले बिस्तर के संख्या बढ़ाय के संगेसंग कोरोना के संदिग्ध मरीज मनके जांच म तेजी लाय बर अउ जांच के दायरा बढ़ाय के घलो बात किहीन। ओमन कोविड अस्पताल अउ आइसोलेशन सेंटर मन म जादा ले जादा डाॅक्टर अउ नर्स मनके मौजूदगी रेहे उपर जोर दीन। मुख्यमंत्री ह लोगन मन ल प्रतिरोधक क्षमता बढ़ाय खातिर स्थानीय प्रसासन के मदद ले सार्वजनिक स्थल अउ चउक-चउराहा मन म काढ़ा वितरण के व्यवस्था करे के घलो निरदेस दीन हे। ओमन किहीन कि सैंपल देके बाद मनखे मन रिपोर्ट आय के बेरा तक खुदे आइसोलेशन म रहय। एखर ले कोरोना के प्रसार ले बांचे जा सकथे।
मुख्यमंत्री-केन्द्रीय मंत्री पत्र
मुख्यमंत्री भूपेश बघेल ह केन्द्रीय स्वास्थ्य मंत्री डाॅक्टर हर्षवर्धन ल चिट्ठी लिखके छत्तीसगढ़ म कोविड अस्पताल अउ कोविड सेंटर के संचालन बर सात सौ छत्तीस करोड़ रूपिया के रासि देवाय के आग्रह करे हे। एखरे संग चिट्ठी म कोरोना संक्रमण के रोकथाम बर जरूरी सामान के आपूर्ति अउ एम्स रईपुर म मौजूद चैव्वन आई.सी.यू. बिस्तर ल बढ़ाके दू सौ बिस्तर करे के अनुरोध करे हे।
होम आइसोलेशन-ऐप
कोरोना संक्रमण के रोकथाम बर होम आइसोलेसन के बारे म राज्य सरकार ह विस्तृत दिसा-निरदेस जारी करे हे। एखर ले होम आइसोलेसन बर कोविड मरीज अब ऐप के माध्यम ले आवेदन करे सकही। ऐप ले होम अइसोलेट मरीज मन बर जरूरी सावधानी के घलो जानकारी दे जाही। कोविड संक्रमण के बिना लक्षण अउ कम लक्षण वाले मरीज मनके होम आइसोलेशन बर जरूरी व्यवस्था अउ एखर संचालन खातिर रईपुर जिला पंचायत परिसर म होम अइसोलेशन सेंटर के स्थापना करे गेहे।
कलेक्टर डाॅक्टर एस. भारतीदासन ह काली ए सेंटर के निरीक्षण करीन। ए दउरान कलेक्टर ह बतईन कि मरीज मन ल ए सेंटर ले जादा ले जादा लाभ पहुंचाय खातिर चैबीसों घंटा सक्रिय आपात नंबर सुरू करे गेहे। मरीज मनके हालचाल जाने बर अउ ओमन के समस्या के निदान बर काउंसलर के बेवस्था घलो करे गेहे।
नीट परीक्षा-वाहन व्यवस्था
छत्तीसगढ़ म राष्ट्रीय स्तर के नीट परीक्षा म सामिल होवइया विद्यार्थी मन ल परीक्षा केन्द्र मन म लाय-लेजाय बर निःसुल्क वाहन के व्यवस्था करे गेहे। एखर तहत रईपुर जिला कलेक्टर परिसर म काली बिहनिया ग्यारह बजे कतकोन परीक्षा केन्द्र मन बर वाहन मन ल रवाना करे जाही।
एखरे जइसे, जनपद पंचायत धरसीवां, आरंग, तिल्दा, खरोरा अउ अभनपुर तहसील कार्यालय के संगेसंग बस स्टैंड पंडरी अउ रेलवे स्टेसन रईपुर ले बिहनिया साढ़े नौ बजे वाहन रवाना करे जाही। एखर अलावा प्रयास गुढ़ियारी ले संबंधित केन्द्र, प्रयास गुढ़ियारी अउ छात्रावास डीडी नगर ले संबंधित केन्द्र मन बर वाहन बिहनिया साढ़े दस बजे कलेक्टोरेट रईपुर ले रवाना करे जाही।
उहें, नीट परीक्षा ल देखत दक्षिण पूर्व मध्य रेलवे डहार ले स्पेशल ट्रेन सुविधा दे जात हे। अनूपपुर-भोपाल-अनूपपुर स्पेशल ट्रेन के परिचालन आज ले करे जात हे। अइसने, भोपाल-अनुपपुर स्पेशल ट्रेन के परिचालन काली तेरह सितंबर ले भोपाल ले करे जाही।
जेईई मेन्स-परिणाम
राष्ट्रीय परीक्षा एजेंसी-एन.टी.ए. ह इंजीनियरिंग म दाखिल बर संयुक्त प्रवेस परीक्षा जे.ई.ई मेन्स के परिणाम घोसित कर देहे। परीक्षा ए महीना के दू अउ छह तारीख के राखे गे रिहीस। एमा चैबीस उम्मीदवार मन सत-प्रतिसत अंक पाय हे।
प्रधानमंत्री-आवास योजना ग्रामीण
प्रधानमंत्री नरेन्द्र मोदी ह प्रधानमंत्री आवास योजना ग्रामीण के तहत मध्यप्रदेश म बारह हजार गांव मन म एक लाख पचहत्तर हजार आवास मनके लोकार्पण करीन। प्रधानमंत्री ह वीडियो कान्फे्रंसिंग के माध्यम ले गृह प्रवेशम पट्टिका जारी करीन अउ एके संग सबो घर मनके लोकार्पण करीन। ए मउका म ओमन किहीन कि ए योजना ले देस के करोड़ों मनखे मन म अपन घर होय के सपना साकार होय के आस पूरा होईस हे।
प्रधानमंत्री ह किहीन कि सरकार गरीब मनके समस्या दूर करे बर हरसंभव काम करत हे।
पेंशनभोगी-जीवन प्रमाण पत्र
पेंशन भोगी मन बर जीवन प्रमाण पत्र जमा करे के तारीख एक अक्टूबर ले बढ़ा के इकतीस दिसंबर कर दे गेहे। केन्द्रीय कार्मिक राज्यमंत्री डाॅक्टर जितेन्द्र सिंह ह अपन ट्वीट म किहीन कि कोरोना वायरस ले सियान मन ल सुरक्षित राखे खातिर ए तारीख बढ़ाय के फइसला ले गेहे। ओमन किहीन कि बढ़ाय गे तारीख के दउरान पेंशनभोगी मन ल पेंसन मिलत रइही।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के दसवां कड़ी के प्रसारण काली तेरह सितंबर इतवार के होही। मुख्यमंत्री ह ए बार लोकवाणी म ‘‘समावेशी विकास-आपकी आस‘‘ – विषय म प्रदेशवासी मनले गोठबात करहीं। एखर प्रसारण छत्तीसगढ़ स्थित आकाशवाणी के जम्मों केंद्र, एफ.एम. रेडियो अउ क्षेत्रीय समाचार चैनल म बीहनिया साढ़े दस बजे ले ग्यारह बजे तक करे जाही।
स्पेशल ट्रेन
अस्सी ठन नवा स्पेशल यात्री रेलगाड़ी आज ले सुरू होवत हे। ए रेलगाड़ी पूरा आरक्षित होही। एखर बर बुकिंग ए महीना के दस तारीख ले पहिली के सुरू होगे हे। रेल मंत्रालय ह बतईन कि ए रेलगाड़ी वर्तमान म मौजूद तीस स्पेशल राजधानी के जइसे अउ दू सौ स्पेशल मेल एक्सप्रेस रेलगाड़ी के अतिरिक्त होही।
मोहल्ला क्लास
कोरोना काल म लइका मनके पढ़ाई प्रभावित न हो, एखर बर राज्य सरकार डहार ले कतकोन प्रयास करे जात हे। उहें, बलरामपुर जिला के राजपुर विकासखंड के ग्राम सिधमा म घलो जवान लइका मन मोहल्ला क्लास सुरू करके स्कूली लइका मनके सिक्षा के जिम्मेदारी उठाईन हे। ए मन मोहल्ला क्लास के माध्यम ले लगभग डेढ़ हजार लइका मन ल पढ़ावत हे। ए क्लास म कोरोना संक्रमण ले बचाव खातिर मास्क लगाय अउ सारीरिक दूरी के घलो ध्यान राखे जात हे।
मौसम
प्रदेस म अवइया चैबीस घंटा के दउरान कई ठिन जघा मन म हल्का ले मध्यम बरसा होय के संभावना हे। संगेसंग एक-दू ठन जघा मन म बिजली गिरे अउ भारी बरसा होय के चेतावनी दे गेहे। ए दउरान दक्षिण छत्तीसगढ़ के अधिकतम तापमान म गिरावट हो सकत हे।
संक्षिप्त समाचार
अउ अब थोरकुन समाचार सार म-
– सुकमा जिला म कोंटा क्षेत्र के डोंडरा म अवैध रेत भंडारण के मामला म जिला प्रसासन ह ठेकेदार उपर सवा दू लाख रूपिया के जुर्माना लगाय हे।
– व्यायाम सिक्षक संघ ह स्कूल सिक्षा विभाग के प्रमुख सचिव डाॅक्टर आलोक शुक्ला ल उंखर सरगुजा प्रवास के दउरान ज्ञापन देके सारीरिक सिक्षा ल अनिवार्य बिसय बनाय के मांग करे हे।
– कोरिया जिला के बैकुंठपुर थाना क्षेत्र के ग्राम खांडा के तीर होय सड़क दुर्घटना म एक मनखे के मउत होगे।
– महासमुंद जिला म कोमाखान क्षेत्र के ग्राम भिलाईदादर म भालू के हमला ले एक झिन ग्रामीण गंभीर रूप ले घायल होगे।
अउ
– जांजगीर-चांपा जिला म एक जनपद सदस्य ले लूटपाट करइया दू आरोपी मन ल नवागढ़ पुलिस ह गिरफ्तार कर लेहे।