प्रधानमंत्री राष्ट्रीय शिक्षा नीति
प्रधानमंत्री नरेंद्र मोदी ह केहे हे कि राष्ट्रीय शिक्षा नीति ह इक्कीसवीं सदी के भारत ल नवा दिशा देही। इक्कीसवीं सदी म स्कूली शिक्षा उपर राष्ट्रीय सम्मेलन ल संबोधित करत श्री मोदी ह कीहिन कि राष्ट्रीय शिक्षा नीति नवा भारत के आकांक्षा, अपेक्षा अउ आवश्यकता ल पूरा करे के माध्यम बनही। जबर मेहनत के बाद अब हम सबला मिलके राष्ट्रीय शिक्षा नीति ल आगू बढ़ाना हे।
ओमन यहू कीहिन कि लइका मन म गणितीय अउ वैज्ञानिक सोच के विकास करना सबले महत्वपूर्ण हे। ओमन सीखे के व्यावहारिक, आसान, खेल-खेल म अउ अभिनव तरीका के खोज करे उपर घलो जोर दीन। संगेसंग यहू बताइन कि समग्र मूल्यांकन प्रणाली म सुधार बर एक राष्ट्रीय मूल्यांकन केंद्र – परख बनाय जाही। जेहा पढ़इया मनके पूरा विकास, कार्य निष्पादन, ज्ञान के आकलन, समीक्षा, अउ विश्लेषण करही।
कोरोना जांच निर्देश
राज्य सरकार ह कोरोना संक्रमण के जांच बर नवा दिशा निर्देश जारी करे हे। स्टेट कोविड कंट्रोल एंड कमांड सेंटर के तकनीकी समिति के अनुशंसा म प्रदेश म कोरोना संक्रमण के जांच के रणनीती ल संशोधित करे गेहे। एखर अनुसार कोरोना संक्रमित मनखे के प्राथमिक संपर्क म आये अइसे लोगन जेमा संक्रमण के लक्षण दिखत हे उंखर घलो जांच करे जाही।
पैंसठ बछर ले जादा आयु के अइसे लोग जउन ल मधुमेह, उच्च रक्तचाप, कैंसर, किडनी, अउ सिकलसेल जइसे बीमारी हे। संगेसंग गर्भवती महिला जे प्राथमिक संपर्क म आय हे ए सबके जांच करे जाही। एखर अलावा स्वास्थ्य विभाग ह बुखार सर्दी खांसी अउ सांस ले म तकलीफ जइसे सांस सबंधी गंभीर बीमारी ले पीड़ित अउ निमोनिया के भर्ती मरीज मनके घलो जांच के निर्देश दे गेहे।
अइसने कोरोना संक्रमण के लक्षण म सामिल मुंह म स्वाद नइ आना, सुंगध नइ आना उल्टी या पतला दस्त होना अउ मांसपेशाी म दर्द ले पीड़ित व्यक्ति मनके जांच करे जाही। जारी निर्देश म केहे गेहे कि कोरोना संक्रमण के लक्षण दिखे के बाद यदि रैपिड एंटीजन किट ले अइसे लोगन के रिपोर्ट निगेटिव आही त जम्मों झनके आरटीपीसीआर या ट्रू नाॅट विधि ले जांच करे जाही।
एति राजधानी रायपुर म कोरोना संक्रमण के बाढ़त मामला ल देखत मंत्रालय अउ संचालनालय के अधिकारी अउ कर्मचारी मन ल यथासंभव निजी वाहन ले कार्यालय आय के सुझाव दे गेहे। काबर कि मंत्रालय अउ संचालनालय म कोरोना संक्रमित मनके संख्या बाढ़े के सेती अधिकारी अउ कर्मचारी के उपस्थिति साप्ताहिक रोस्टर के हिसाब ले एक तिहाई कर दे गेहे।
कोरोना समाचार
प्रदेश म कोरोना संक्रमण के सरलग बाढ़त मामला के सेती कतकोन शासकीय कार्यालय ल कुछ दिन बर बंद करे जात हे। इही कड़ी म आज ले तेरा सितंबर तक माध्यमिक शिक्षा मंडल अउ ओपन स्कूल ल बंद करे के आदेश दे गेहे। खबर हे कि माध्यमिक शिक्षा मंडल के सचिव व्ही.के. गोयल अउ संभागीय शिक्षा कार्यालय के संयुक्त संचालक एस.के. भारद्धाज ह कोरोना पाॅजीटिव मिले हे, जेखर बाद दूनो कार्यालय ल बंद करे के आदेश जारी करे गेहे ं
अइसने राजनंादगंाव के पर्रीनाला विद्युत कंपनी के मुख्य कार्यालय म पांच अधिकारी कर्मचारी कोरोना संक्रमित पाय गेहे। अइसने जिला के कतकोन प्रशासनिक कार्यालय म संक्रमण के सेती कामकाज बाधित होय हे।
उंहे दुर्ग जिला के मुख्य चिकित्सा अउ स्वास्थ्य अधिकारी ह कीहिन हे कि कंट्रोल रूम या आइसोलेशन प्रभारी ल सूचना दे बिना होम आइसोलेशन मे मरीज मनके देखरेख अउ इलाज बर सुविधा उपलब्ध करइया डॅाक्टर मनके खिलाफ कार्रवाई करे जाही। जिला के दुर्ग, पाटन, अउ धमधा ब्लाॅक म अब चैंतीस जगा म फीवर क्लीनिक के माध्यम ले कोरोना संक्रमण के जांच करे जाही।
एति बेमेतरा जिला म कलेक्टर शिवअनंत तायल ह तेरा ले बीस सितंबर तक लाॅकडाउन के आदेश जारी करे हे। अइसने राजनांदगंाव जिला के डोंगरगांव अउ डोंगरगढ़ म घलो काली बारा सितंबर ले लाॅकडाउन लागू होही।
माशिमं आॅनलाइन क्लास
छत्तीसगढ़ माध्यमिक शिक्षा मंडल डहार ले कक्षा बारहवीं के पढ़ई लिखई बर आॅनलाईन कक्षा शुरू करे गेहे। ए कड़ी म आज चार बिसय हिंदी, रसायन शास्त्र, राजनीति विज्ञान अउ लेखा शास्त्र के कक्षा संचालित करे गीस।
जानबा के मुताबिक पाछू सात सितंबर ले बारहवीं के पढ़ईया मन बर आॅनलाईन कक्षा शुरू करे गेहे। जेमा तेरा हजार ले जादा पढ़ईया शामिल होय हे। एखरे संग ए हफ्ता होवइया आॅनलाईन कक्षा के समय सारिणी घलो मंडल के वेबसाईट म देखे जा सकत हे।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के दसवंा कड़ी के प्रसारण अवइया तेरा सितंबर रविवार के होही। मुख्यमंत्री ह ए बार लोकवाणी म समावेशी विकास आपकी आस – विषय म प्रदेशवासी मनले बात करहीं। एखर प्रसारण छत्तीसगढ़ स्थित आकाशवाणी के जम्मों केंद्र एफ.एम. रेडियो अउ क्षेत्रीय समाचार चैनल म बीहनिया साढ़े दस बजे ले ग्यारा बजे तक करे जाही।
परिवहन मंत्री बयान
प्रदेश के परिवहन मंत्री मोहम्मद अकबर ह सड़क दुर्घटना उपर अंकुश लगाय अउ यातायात जागरूकता ल बढ़ावा देके संगरा परिवहन व्यवस्था ल बने बनाय के दिशा म प्रभावी कदम उठाय के निर्देश देहे। राज्य सड़क सुरक्षा परिषद के काली होय वर्चुअल बइठका म ओमन सड़क निर्माण के बेरा मार्ग म बिना मतलब के मोड़ नइ राखे के निर्देश देहे। संगेसंग गाड़ी के गति ल नियंत्रित करे, स्पीड गर्वनर लगाये अउ नशा म गाड़ी चलाने वाला के संगेसंग स्टंट करइया वाहन चालक मनके विरूद्ध कार्रवाई करे बर केहे हे।
उंहें श्री अकबर ह वीडियो कॅान्फे्रसिंग के माध्यम ले परिवहन विभाग के कामकाज के समीक्षा करीन अउ चेकपोस्ट उपर लगातार कार्रवाई करे के निर्देश घलो दीन।
माओवादी हत्या
बीजापुर जिला म माओवादी डहार ले वनपरिक्षेत्र अधिकारी के हत्या करे के मामला सामने आय हे। वन परिक्षेत्र अधिकारी रथराम पटेल इंद्रावती टाईगर रिजर्व के भैरमगढ़ परिक्षेत्र म पदस्थ रीहिन। बताय जात हे कि ओमन आज माटवाड़ा क्षेत्र म कुछु काम बर गे रीहिस जिहंा माओवादी मन उंखर हत्या कर दीन।
महासमुंद हत्या
महासमुंद जिला म पाछू चैबीस घंटा म होय अलग अलग घटना म छै लोगन के मउत होगे हे। उंहें सात दूसर लोगन गंभीर रूप ले घायल होगे हे। घायल मनके बने उपचार बर रायपुर के डॅाक्टर भीमराव अंबेडकर अस्पताल म भर्ती कराय गेहे।
खबर मिले हे कि जिला के तुमगंाव थाना क्षेत्र मे जोबा गांव म आज बीहनिया एकेच परिवार के तीन लोगन के हत्या कर दे गीस। मृतक म चालीस बछर के एक महिला अउ उंखर दू नाबालिक लईका सामिल हे। उंहें महिला के पति, सास अउ दू संतान गंभीर रूप ले घायल हे। ए मामला म पुलिस ह दू आरोपी ल हिरासत म लेहे।
एति काली संझा राष्ट्रीय राजमार्ग म एक ठिन कार अनियंत्रित होके पेड़ ले टकरा गे । ए हादसा म दू झिन युवक के घटनास्थल म मउत होगे। फेर तीन झिन दूसर युवक मन गंभीर रूप ले घायल होगे हे।
उंहे सरायपाली क्षेत्र के घोड़ाधार जलप्रपात के तीर खाई म गिरे ले एक झिन युवक के मउत होगे। पुलिस ह युवक के शव बरामद करे हे।
स्कूल शिक्षा
स्कूल शिक्षा विभाग के प्रमुख सचिव डॅाक्टर आलोक शुक्ला ह काली सरगुजा जिला म पढ़ई तुंहर दुआर अउ पढ़ई तुंहर पारा के कतकोन शैक्षणिक गतिविधि के जायजा लीन। ए बेरा डॅाक्टर शुक्ला ह बतौली विकासखंड के केनापारा म चलाय जावत मोहल्ला क्लास के घलो निरीक्षण करीन।
एखर अलावा ओमन सीतापुर अउ मैनपाट विकासखंड के मोहल्ला क्लास के घलो निरीक्षण करीन। ए बेरा ओमन कीहिन कि शिक्षक लईका मन ल पढ़ाय के बाद ओखर चर्चा करे अउ पाठ्य सामग्री ल फिर ले दोहराय बर कीहिन।