प्रधानमंत्री नरेन्द्र मोदी ह आज डिजिटल माध्यम ले प्रधानमंत्री मत्स्य संपदा योजना के उद्घाटन करीन। ओमन ई-गोपाला ऐप के सुरूवात करीन, जेखर ले मछली पालन, बीज, बाजार अउ सूचना के बने बेवस्था हो सकही। ए मउका म प्रधानमंत्री ह किहीन कि ए योजना के सुरू होय ले भारत के जम्मों गांव आत्मनिर्भर अउ मजबूत होही।
श्री मोदी ह किहीन कि ई-गोपाला ऐप एक डिजिटल माध्यम होही, जेमा मवेशी मालिक आधुनिक मवेसी के चुनाव कर सकही। संगेसंग चारा अउ मवेसी मनके स्वास्थ्य ले जुड़े जम्मों सूचना एमा मिलही।
कोरोना समाचार-01
केन्द्रीय स्वास्थ्य मंत्रालय ह राज्य अउ केन्द्रसासित प्रदेस ले केहे हे कि ओमन रैपिड एंटीजन टेस्ट म निगेटिव पाय जाय वाले कोरोना लक्षण के सबो मामला म आरटीपीसीआर ले फेर से जांच करय। कुछेक बड़े राज्य म रैपिड एंटीजन टेस्ट म निगेटिव लक्षण वाले मामला के आरटीपीसीआर जांच नइ करे जात हे। स्वास्थ्य मंत्रालय के बयान म केहे हे कि ए निश्चित करना जरूरी हे कि कोरोना लक्षण म निगेटिव मामला के जरूरी रूप ले जांच होवय, जेखर ले उंखर संपर्क म अवइया लोगन म संक्रमण झन हो सकय।
ऐति, छत्तीसगढ़ म कोरोना संक्रमण ले बचाव बर मंत्रालय अउ विभागाध्यक्ष कार्यालय म सैनिटाईजेशन, स्वास्थ्य परीक्षण अउ उपस्थिति बर रोस्टर तैयार करे जाही। काली ले अवइया इतवार तक मंत्रालय अउ विभागाध्यक्ष कार्यालय ल बने असन सैनिटाईज करे जाही। उहें, साप्ताहिक रोस्टर म अधिकतम एक तिहाई कमरचारी अउ अधिकारी के डयूटी लगही। एखर संगेसंग हर हफ्ता, सम्मार, मंगलवार अउ बुधवार के स्वास्थ्य परीक्षण सिविर लगाय जाही। मंत्रालय आय-जाय बर बस के संख्या म बढ़ोतरी होही।
ओति, बिलासपुर जिला के रतनपुर म कोरोना संक्रमण ले बचाव खातिर व्यापारिक संगठन ह आज ले सात दिन बर तालाबंदी राखे हे।
अइसने, केशकाल के बाद अब जिला मुख्यालय कोंडागांव म आज रतिहा ले पांच दिन बर तालाबंदी के घोसना करे गेहे। आदेस के मुताबिक दवई दुकान, पेट्रोल पंप, बस स्टैंड के होटल अउ राष्ट्रीय राजमार्ग के तीर-तखार के भाग ल तालाबंदी ले अलग राखे गेहे। उहें, दूध दुकान बिहनिया छह ले सात बजे तक अउ साग-भाजी के दुकान मंझनिया दू बजे तक खुल्ला रइही।
कोरोना समाचार-02
महासमुंद जिला चिकित्सालय म कोविड अस्पताल सुरू होगे हे। ए सेंटर म गंभीर मरीज मन बर अट्ठाईस बिस्तर म आॅक्सीजन के बेवस्था करे गेहे। उहें, आईसीयू के छह ठिन बिस्तर अउ सांस ले म परेसानी होवइया मरीज मन बर बाईस बिस्तर सुरक्षित राखे गेहे। जिला के मुख्य चिकित्सा अउ स्वास्थ्य अधिकारी एस.पी. वारे ह बतईन कि कोविड लक्षण वाले मरीज मनके इलाज बर अनुभवी डाॅक्टर अउ प्रसिक्षित स्वास्थ्य करमचारी मनके सेवा ले जात हे। इही जिला म आयुर्वेद विभाग कोति ले काली संझा आयुष काढ़ा बांटे गीस।
उहें, राजनांदगांव के डोंगरगढ़ सहरी क्षेत्र ल कंटेनमेन्ट जोन घोषित कर दे गेहे। काली ग्यारह सितंबर के संझा सात बजे ले उन्नीस सितंबर बिहनिया सात बजे तक डोंगरगढ़ के जम्मों व्यापारिक संस्थान बंद रइही।
राजनांदगांव के उद्याचल भवन म लोगन के मदद ले कोविड केयर सेंटर सुरू करे गेहे। इहां मरीज मन ल प्राईवेट अस्पताल जइसन सुभीता दे जात हे। सत्यासी बिस्तर वाले ए सेंटर म आॅक्सीमीटर, थर्मामीटर, बीपी मसीन, गरम पानी के मसीन, मुफत म भोजन के संगेसंग दवई, किट घलो हवय।
दूसर कोति, लोगन के रोग-प्रतिरोधक क्षमता बढ़ाय खातिर राजनांदगांव सहर म आयुर्वेद काढ़ा, यूनानी अउ होम्योपैथी दवई बांटे जात हे।
केन्द्रीय टीम-दौरा
इही बीच, बिलासपुर जिला म कोरोना संक्रमण के सरलग बाढ़त मामला ल देखत केन्द्र के तीन सदस्यीय टीम ह स्वास्थ्य बेवस्था ल देखीन। एमा जिला के कोविड अउ सिम्स अस्पताल के संगेसंग होम क्वारेंटाइन अउ स्वास्थ्य विभाग के कोरोना संक्रमित मरीज मनके इलाज के बेवस्था के जांच कारीन। संगेसंग टीम ह सिम्स प्रबंधन ल एक अलग ले वार्ड खोले के सुझाव दीन, जेखर ले कोरोना मरीज मनके बने इलाज हो सकय।
कोरोना-उपचार
छत्तीसगढ़ म कोरोना संक्रमित मरीज जल्दी स्वस्थ होवत हे। प्रदेस के आने-आने कोविड अस्पताल अउ आइसोलेशन सेंटर ले पाछु एक हफ्ता म पांच हजार सात सौ ले जादा मरीज मन ल ठीक होय के बाद छुट्टी दे दे गेहे। प्रदेस म अब तक चैबीस हजार ले जादा मरीज कोरोना संक्रमण ले ठीक होय हे। उहें, राज्य म कोरोना वायरस ले मउत होय लोगन के दर सून्य दशमलव नौ शून्य प्रतिसत हवय।
इही बीच, राज्य सरकार कोरोना संक्रमण म रोक लगाय खातिर सरलग जांच अउ इलाज के सुभीता बढ़ावत हे। संगेसंग जम्मों जिला म सैंपल लेके सुभीता ल बढ़ाय गेहे।
वर्मी-कम्पोस्ट
मुख्यमंत्री भूपेश बघेल ह गौठान म गोबर ले वर्मी कम्पोस्ट तियार करे बर मनरेगा ले वर्मी टाका बनाय के काम ल मंजूरी देके निरदेस दीन हे। मुख्यमंत्री ह आज अपन निवास कार्यालय म वीडियो कान्फ्रेंसिंग ले छत्तीसगढ़ ग्रामीण रोजगार गारंटी परिषद के राखे गे बइठका म किहीन कि जम्मों धान खरीदी केन्द्र चबूतरा बनाय के काम अउ सेड बनाय के काम झटकिन पूरा करे जाय। श्री बघेल ह वन अधिकार पट्टा मिले हितग्राही मन ल भूईंया म फलदार पौधा लगाय अउ बड़े वृक्ष के बीच हरदी, अदरक अउ तिखुर जइसन फसल लेके बात किहीन।
बैठक म मनरेगा के तहत दू सौ दिन के रोजगार दे संबंधी प्रस्ताव तियार करके केन्द्र सरकार के मंजूरी बर भेजे के फइलसा घलो ले गीस।
रेल मंत्रालय
रेल मंत्रालय ह सनिचर बारह सितंबर ले कुछेक रद्दा म तय समय के मुताबिक चालीस ठिन रेलगाड़ी चलाय के फइलसा करे हे। ए रेलगाड़ी के बुकिंग आज ले सुरू होगे हे। ए ह पूरा आरक्षित रइही। कोरोना संक्रमण के सेती यात्री मनके बीच दूरी बनाय राखे अउ जम्मों जरूरी उपाय करे जाही। यात्री मन ले केहे गेहे कि ओमन भीड़-भाड़ ले बांचे बर आॅनलाईन टिकिट ले सकत हे।
हेमचंद यादव विश्वविद्यालय-परीक्षा
दुरूग के हेमचंद यादव विश्वविद्यालय के आखिरी बछर के परीक्षा चैदह सितंबर ले सुरू होही, जउन उनतीस सितंबर तक चलही। विश्वविद्यालय के कुलपति डाॅक्टर अरूणा पलटा ह बतईन कि आॅनलाइन परीक्षा के समय-सारिणी जल्दी बता दे जाही। ओमन किहीन कि हरेक दिन बिहनिया साढ़े दस बजे विश्वविद्यालय अउ महाविद्यालय के वेबसाइट म प्रश्न-पत्र समय-सारिणी के मुताबिक अपलोड करे जाही। परीक्षा देवइया मन प्रवेस पत्र म दे गे कक्षा अउ बिसय के मुताबिक वेबसाइट ले प्रश्न-पत्र डाउनलोड करके घर म खुद के ए-फोर साईज के कागज म ओ प्रश्न-पत्र ल हल करही। परीक्षा के बाद ई-मेल या फेर एक ठिन लिफाफा म अपन जम्मों प्रश्न-पत्र के उत्तर लिखके स्पीड पोस्ट ले संबंधित परीक्षा केन्द्र म जमा करा सकथे। एखर बर परीक्षार्थी मन ल उनतीस सितंबर के बाद तीन दिन के अउ बेरा दे जाही।
पोषण-जागरूकता
प्रदेस म राष्ट्रीय पोषण महीना मनाय जात हे। एमा पोषण, स्वास्थ्य अउ साफ-सफई राखे बर कतकोन कारीकरम होवत हे। इही संबंध म धमतरी जिला म घर के अंगना अउ चउक-चउराहा म चित्र, स्लोगन अउ रंगोली ले पोषण अउ स्वच्छता के जानकारी दे जावत हे। संगेसंग आंगनबाड़ी कार्यकर्ता, सहायिका मन ह घरो-घर जाके कुपोषित लइका, गर्भवती अउ महतारी मन ल जागरूक करत हे। उहें, घर के अंगना म साग-भाजी, फल वाले पौधा लगा के पोषण वाटिका तियार करे बर बताय जात हे।
लूट
राजनांदगांव जिला के अम्बागढ़ म पाछु महीना होय लूट के मामला म पुलिस ह छह झिन आरोपी ल गिरफ्तार करे हे। एमा तीन झिन उत्तरप्रदेश के हापूड़ जिला के अउ आने तीन डोंगरगांव के रहवइया बताय जात हे।
खबर के मुताबिक पाछु चैबीस अगस्त के सराफा व्यापारी उपर अज्ञात आरोपी मन हमला करके बैग, फटफटी, मोबाइल अउ आने जिनीस लूट के भागे रिहीन। कारोबारी के बैग म बारह किलो चांदी अउ करीबन एक सौ नौ ग्राम सोन के गहना रिहीस।