देस आज ऑपरेशन सिंदूर के पहिली वर्षगांठ मनावत हे। पाछु बछर सात मई के भारत डहार ले ऑपरेशन सिंदूर करे गे रिहीस, जेमा पाकिस्तान अउ पाकिस्तान अधिकृत कश्मीर म आतंकवादी मनके नौ ठिन ठिकाना म हवाई हमला करे गे रिहीस, जेमा कमती ले कमती सौ आतंकी मन मारे गे रिहीन। ए कार्रवाई पाछु बछर बाईस अप्रैल के पहलगाम म पर्यटक मन उपर होय पाकिस्तान के आतंकी हमला के भारत डहार ले करारा जवाब रिहीस।
प्रधानमंत्री नरेन्द्र मोदी हा ऑपरेशन सिंदूर के पहिली वर्षगांठ म सशस्त्र बल के शौर्य ल नमन करीन हे। ओमन ह आतंकवाद अउ एला बढ़ावा देवइया तंत्र ल नष्ट करे के राष्ट्र के प्रतिबद्धता ल दोहरईन। सोशल मीडिया पोस्ट एक्स म श्री मोदी ह किहीन कि भारतीय सशस्त्र बल ह ऑपरेशन सिंदूर के दौरान अद्वितीय साहस, सटीकता अउ दृढ़ संकल्प के प्रदर्सन करीन।
उहें, छत्तीसगढ़ के मुख्यमंत्री विष्णुदेव साय ह किहीन कि ‘‘ऑपरेशन सिंदूर‘‘ सिरिफ एक सैन्य कार्रवाई नइ, फेर नवा भारत के अटूट इच्छाशक्ति, निर्भीक संकल्प अउ निर्णायक शक्ति के प्रतीक हे।
वंदे मातरम-वैधानिक संरक्षण
केन्द्रीय मंत्रिमंडल ह राष्ट्रगीत ‘वंदे मातरम्‘ ल राष्ट्रगान जइसनेच वैधानिक संरक्षण दे जाय बर राष्ट्रीय गौरव अपमान निवारण अधिनियम म संशोधन प्रस्ताव ल मंजूरी दे देहे। एमा संविधान, राष्ट्रीय ध्वज, राष्ट्रगान अउ राष्ट्रगीत के अपमान करे जाय म तीन बछर के सजा, जुर्माना या दूनों के प्रावधान हे।
मुख्यमंत्री विष्णुदेव साय ह ए फइसला के स्वागत करत किहीन कि ए देस के सांस्कृतिक चेतना, स्वतंत्रता संग्राम के गौरवशाली विरासत अउ राष्ट्रभक्ति के भावना ल सम्मान देने वाला कदम बताय हे। ओमन किहीन कि वंदे मातरम् भारत के आत्मा, स्वतंत्रता आंदोलन के प्रेरणा अउ करोड़ों देसवासी मनके राष्ट्रभक्ति के प्रतीक रेहे हे। मुख्यमंत्री ह प्रदेसवासी मन ल राष्ट्रगीत ‘वंदे मातरम्‘ अउ राष्ट्रीय प्रतीक मनके सम्मान अउ गरिमा ल बनाय राखे के आह्वान करीन।
वार्षिक स्वास्थ्य जांच पहल-शुभारंभ
केन्द्रीय श्रम अउ रोजगार मंत्री डॉक्टर मनसुख मांडविया ह नवा श्रम संहिता के तहत चालीस बछर अउ ओखर ले जादा उमर के श्रमिक मन बर आज राष्ट्रव्यापी वार्षिक स्वास्थ्य जांच के सुरूआत करीन। नई दिल्ली के कर्मचारी राज्य बीमा निगम-ई.एस.आई.सी. मेडिकल कॉलेज अउ अस्पताल के उद्घाटन करत डॉक्टर मांडविया ह किहीन कि प्रधानमंत्री नरेन्द्र मोदी के अगुवई म पाछु बारह बछर ले देस के कार्यबल अउ युवा शक्ति बर सम्मान म बढ़ोतरी होय हे।
स्वास्थ्य मंत्रालय-जननी प्लेटफॉर्म
केन्द्रीय स्वास्थ्य अउ परिवार कल्याण मंत्रालय ह प्रसव के पहिली अउ बाद म अउ नवजात शिशु एकीकृत देखभाल बर ‘‘जननी‘‘ के सुरूआत करे हे। जननी एक डिजिटल प्लेटाफॉर्म हे, जेला माईलोगिन मनके गर्भधारण के पहिली अउ बाद तक उंखर स्वास्थ्य रिकॉर्ड के निगरानी अउ रखरखाव बर बनाय गेहे। बताय गे हवय कि अभी तक एक करोड़ चौंतीस लाख लाभार्थी मन ह ए पोर्टल म पंजीकरण कराय हे।
पंजीयन शुल्क-छूट
राज्य सरकार ह माईलोगिन के नाम म होवइया भूमि रजिस्ट्रेशन पंजीयन शुल्क म पचास प्रतिशत के छूट दे जाय के फइसला करे हे। एखर अधिसूचना राजपत्र म प्रकाशित कर दे गेहे। ए प्रावधान तत्काल प्रभाव ले लागू माने जाही। एखर अलावा सरकार ह सेवारत सैनिक, भूतपूर्व सैनिक अउ उंखर विधवा मनके कल्याण ल देखत पच्चीस लाख तक के सपंत्ति के रजिस्ट्री म स्टाम्प शुल्क म पच्चीस प्रतिशत के छूट दे जाय के फइसला लेहे।
चावल महोत्सव/आवास दिवस
प्रदेस के सबो ग्राम पंचायत म आज चावल महोत्सव, रोजगार दिवस अउ आवास दिवस के आयोजन करे गीस। रोजगार दिवस म ग्राम पंचायत म मनरेगा के काम के समीक्षा के संग रोजगार के नवा अवसर के कार्ययोजना बनाय गीस। उहें, प्रधानमंत्री आवास योजना के तहत लंबित मामला के प्राथमिकता के संग निपटारा करे गीस। एखर अलावा जल संरक्षण बर ‘‘मोर गांव-मोर पानी-मोर तरिया‘‘ अभियान के तहत ‘‘नवा तरिया आय के जरिया‘‘ थीम म बिसेस चर्चा होइस।
राष्ट्रीय लोक अदालत
देसभर संघरा छत्तीसगढ़ म अवइया नौ मई के राष्ट्रीय लोक अदालत के आयोजन करे जाही। ए दउरान न्यायालय म लंबित मामला के आपसी सहमति ले निपटारा करे जाही। उहें, इक्कीस ले तेईस अगस्त के बीच सर्वोच्च न्यायालय परिसर म विशेष लोक अदालत के लंबित मामला मनके घलो सुनवाई होही। पक्षकार मन ल अपन लंबित मामला ल बिसेस लोक अदालत म सामिल करे बर जानकारी सर्वोच्च न्यायालय के वेबसाइट म इकतीस मई तक गुगल फार्म म दे बर पड़ही। जादा जानकारी बर बार रूम के वन स्टाप सेंटर या जिला विधिक सेवा प्राधिकरण रईपुर ले संपर्क करे जा सकत हे।
सरगुजा/हैंडपंप/बोरवेल
सरगुजा जिला के पहाड़ी कोरवा आबादी म पेयजल संकट के स्थायी समाधान बर एक सौ तेरह हैंडपंप अउ बोरवेल लगाय जाही। जिला के कलेक्टर अजीत वसंत ह जनपद पंचायत के सीईओ संघरा संबंधित विभाग मनले एक महीना के भीतर ए काम ल पूरा करे बर किहीन हे। कलेक्टर ह बतईन कि लुण्ड्रा म चौंतीस, बतौली म छह, लखनपुर म बाईस, अंबिकापुर म ग्यारह, सीतापुर म सोलह, मैनपाट म बीस अउ उदयपुर म चार हैंडपंप अउ बोरवेल के खनन डीएमएफ के मद ले करे जाही।
गांजा-बरामद
महासमुंद पुलिस ह एक करोड़ रूपिया ले जादा के करीब दू क्विंटल गांजा बरामद करे हे। ए मामला म दू झन अंतर्राज्यीय तस्कर मन ल गिरफ्तार करे गेहे। दूनों आरोपी मनके खिलाफ एनडीपीएस एक्ट के तहत कार्रवाई करे जावत हे।
मुखबिर ले मिले सूचना के आधार म आरोपी मन ह एक ठिन मालवाहक गाड़ी म गांजा लेके ओड़िशा ले महाराष्ट्र कोति जावत रिहीन। इही दउरान पुलिस ह सिंघोड़ा तीर घेराबंदी करके गाड़ी के तलाशी लीन, तभे ए मामला के खुलासा होइस।
मौसम
अवइया चौबीस घंटा के दउरान प्रदेस म कुछेक जघा म हल्का ले मध्यम बरसा होय के या गरज-चमक के संग छींटा पड़े के संभावना हे। उहें, एक-दू जघा म अंधड़ चले अउ आकाशीय बिजली गिरे के चेतावनी दे गेहे।
मौसम विभाग के अनुसार ऊपरी हवा के एक ठन चक्रीय चक्रवाती घेरा ओड़िशा अउ ओखर ले लगे छत्तीसगढ़ के उपर बने हे। उहें, एक ठिन द्रोणिका दक्षिण मध्यप्रदेश ले छत्तीसगढ़ होवत झारखंड तक बढ़े हे। एखर प्रभाव ले प्रदेस के मौसम म बदलाव देखे जात हे।
आईपीएल मैच-तैयारी
नवा रईपुर के शहीद वीरनारायण सिंह अंतर्राष्ट्रीय क्रिकेट स्टेडियम म अवइया दस अउ तेरह मई के आईपीएल टी-ट्वेंटी क्रिकेट मैच खेले जाही। आईपीएल के तियारी बर मुख्य सचिव विकासशील ह काली मंत्रालय म उच्च अधिकारी मन संग समीक्षा बइठका करीन। बइठका म ओमन ह आयोजन ले जुड़े व्यवस्था बर सबो झन ल चौकस रेहे के निरदेस दीन। मुख्य सचिव ह किहीन कि स्टेडियम म अवइया दर्सक मनके सुरक्षा अउ सुघ्घर यातायात प्रसासन के पहिली प्राथमिकता हवय। ऑनलाइन बुकिंग के बाद रईपुर अवइया दर्सक मनके भीड़ ल संभाले बर पुलिस कमिश्नर रईपुर ल बिसेस योजना बनाय के निरदेस दीन।
संक्षिप्त समाचार
– केन्द्रीय माध्यमिक शिक्षा परिषद डहार ले कक्षा दसवीं के दूसर बोर्ड परीक्षा पन्द्रह मई ले आयोजित करे जाही। परीक्षा बर प्रवेश पत्र जारी कर दे गेहे।
– बीजापुर जिला के मारूड़बाका गांव म पुलिस डहार ले सिविक एक्शन कार्यक्रम अउ चलित थाना के आयोजन करे गीस, जिहां पुलिस अधिकारी मन ह ग्रामीण मन ले उंखर समस्या सुनीन अउ युवा मन ल खेल सामग्री अउ ड्रेस के संगेसंग ग्रामीण मन ल उंखर उपयोग के सामान बांटे गीस।
– पेंड्रा के द्वितीय अतिरिक्त सत्र न्यायाधीश ज्योति अग्रवाल ह दू झिन माईलोगिन संघरा तीन झन लोगन उपर जानलेवा हमला करे के मामला म आरोपी ल दस साल के सश्रम कारावास के सजा सुनाय हे।
– रईपुर के कुम्हारी पुलिस ह अवैध हथियार के तस्करी करइया युवक ल गिरफ्तार करे हे। पुलिस ह आरोपी के तीर ले हथियार अउ नगदी बरामद करे हे अउ ओखर खिलाफ आर्म्स एक्ट के तहत अपराध दर्ज कर लेहे।
अउ
– जिला रोजगार अउ स्वरोजगार मार्गदर्शन केन्द्र रईपुर डहार ले बारह मई के जोरा के लाइवलीहुड कॉलेज म जिला स्तरीय रोजगार मेला के आयोजन करे जाही।