सुशासन तिहार के तहत आज मुख्यमंत्री विष्णुदेव साय के कबीरधाम जिला के दउरा के दूसर दिन रिहीस। ओमन ह पंडरिया के लोखान पंचायत के बैगा बहुल गांव कमारखोल म चौपाल लगाके ग्रामीण मनके समस्या सुनीन। संगेसंग पीएम जन-मन योजना म होय काम के निरीक्षण घलो करीन। ग्रामीण मनके मांग म मुख्यमंत्री ह कमारखोल म सामुदायिक भवन, देवसरा तक छह किलोमीटर सड़क निर्माण, मुक्तिधाम शेड अउ महतारी सदन बनाय के घोषणा करीन।
सुशासन तिहार के तहत धमतरी जिला के कुकरेल गांव म समाधान सिविर के आयोजन करे गीस, जेमा मिले तीन सौ चौदह आवेदन म दू सौ पचास ले जादा आवेदन के मउकाच म निपटारा करे गीस।
राज्यपाल-कोंडागांव
राज्यपाल रमेन डेका ह आज कोंडगांव म जिला अउ विकासखंड स्तर के अधिकारी मनके बइठका लीन। बइठका म ओमन ह जल अउ पर्यावरण संरक्षण म विशेष जोर दीन। संगेसंग अधिकारी मन ल आम लोगन के समस्या के गंभीरता ले समाधान करे के निरदेस दीन। बइठका म राज्यपाल ह प्रधानमंत्री आवास योजना म बनइया मकान मन म रेन हार्वेस्टिंग संरचना ल सामिल करे बर किहीन।
इनोवेशन महाकुंभ
जगदलपुर के शहीद महेन्द्र कर्मा विश्वविद्यालय म चलत दू दिवसीय इनोवेशन महाकुंभ के आज संझा समापन होही। कार्यक्रम के दूसर दिन आज प्रदेस के वित्त मंत्री ओपी चौधरी एमा सामिल होइन। ए मउका म ओमन किहीन कि बस्तर क्षेत्र के समग्र विकास बर केन्द्र अउ राज्य सरकार सरलग प्रयास करत हे। ओमन बतईन कि राज्य सरकार ह बजट म बस्तर के विकास बर कतकोन जरूरी प्रावधान करे हे, जेखर ले युवा मन ल रोजगार के नवा मउका मिलही।
केन्द्रीय अतिरिक्त सचिव-दौरा
केन्द्रीय अतिरिक्त सचिव अउ जल जीवन मिशन के संचालक कमल किशोर सोन ह सुकमा अउ दंतेवाड़ा जिला के दउरा करके जल जीवन मिशन के कामकाज के जानकारी लीन। ओमन ह सुकमा जिला के डोडपाल अउ फायदागुड़ा अउ दंतेवाड़ा जिला के भूसारास पहुंच के हरेक घर के नल ले पानी के आपूर्ति ल देखीन। ओमन ग्रामीण मन ले गोठबात करके पीये के पानी के बारे म घलो जानकारी लीन।
एखर पहिली, श्री सोन ह सुकमा म वीडियो कॉन्फ्रेंसिंग के माध्यम ले प्रदेस के सबो जिला के कलेक्टर मनके बइठका लेके जल जीवन मिशन के काम के समीक्षा करीन। ओमन किहीन कि गांव मन म हर घर म साफ पीये के पानी पहुंचाना जल जीवन मिशन के पहिली लक्ष्य हे।
जनगणना-कर्मचारी सुरक्षा
जनगणना काम म लगे प्रगणक अउ सुपरवाईजर के सुरक्षा बर जिला जनगणना अधिकारी ह पुलिस कमिश्नर रईपुर अउ पुलिस अधीक्षक ग्रामीण ल चिट्ठी लिखीन हे। जेमा प्रगणक अउ सुपरवाईजर मन बर पुलिस सुरक्षा के मांग करे गेहे। खबर के मुताबिक जनगणना के पहिली चरण के तहत प्रदेस म एक मई ले मकान सूचीकरण अउ गणना के काम चलत हे। ए दउरान प्रगणक मन संग कुछेक जघा म मारपीट के घटना होय हे। पाछु दिन एक झिन कर्मचारी संग होय मारपीट के बाद सिक्षक मनके संगठन ह सिकायत करके कार्रवाई करे के मांग करे रिहीन, जेखर आधार म आरोपी के खिलाफ संबंधित थाना म एफआईआर दर्ज करे गेहे।
पुलिस-ऑपरेशन तलाश
छत्तीसगढ़ पुलिस ह गुमशुदा लोगन के पता लगाय बर एक ले तीस अप्रैल तक ‘‘ऑपरेशन तलाश‘‘ चलईस। ए अभियान म पुलिस ह चार हजार ले जादा घूमे मनखे मन ल खोज डरे हे। एमा पांच सौ पैंतालीस लइका मन घलो सामिल हे। ऑपरेशन तलाश के दउरान विशेष रूप ले बने पुलिस टीम डहार ले संभावित जघा म तलाशी अभियान चलाय गीस। ए अभियान म एक सौ बयासी गुमशुदा लोगन ल महाराष्ट्र, उत्तरप्रदेश, तेलंगाना, बिहार, मध्यप्रदेश, गुजरात, राजस्थान, झारखंड, तमिलनाडु अउ हिमाचल प्रदेस ले खोज के वापिस लाय गीस। उहें, बिलासपुर अउ रईपुर ले पन्द्रह सौ ले जादा लोगन के पता लगाय गे हवय।
सी.एस.एम.सी.एल.-घोटाला
छत्तीसगढ़ स्टेट मार्केटिंग कॉपोर्रेशन लिमिटेड यानी सी.एस.एम.सी.एल. ओवरटाइम घोटाला म आर्थिक अपराध अन्वेषण ब्यूरो-ईओडब्ल्यू ह कार्रवाई करे हे। ए मामला म मैनपावर एजेंसी के सात झन संचालक अउ प्रतिनिधि मन ल गिरफ्तार करे गेहे। जांच एजेंसी ह आरोपी मन ल बिसेस अदालत म पेस करीस, जिहां ले सात दिन के रिमांड मंजूर करे गेहे। आरोप हे कि ओवरटाइम भुगतान म अनियमितता करके सरकारी राशि के दुरूपयोग करे गीस। जांच एजेंसी ह अब आरोपी मन ले पूछताछ करके मामला ले जुड़े दूसर जानकारी जुटावत हे।
फुलबासन बाई-अपहरण
पद्मश्री फुलबासन बाई यादव के अपहरण के प्रयास के मामला म राजनांदगांव पुलिस ह दू झिन माईलोगिन संघरा तीन झन ल गिरफ्तार करे हे। मिले जानकारी के अनुसार आज बिहनिया करीबन दस बजे बेमेतरा के खुशबू साहू नाव के माईलोगिन अउ ओखर दू झिन साथी मन ह फुलबासन बाई ल कोनो बहाना ले घर के बाहिर बुलाके कार म बइठा लीन। एखर बाद ओमन ह फुलबासन बाई ल जबरन अपन संग ले जाय के प्रयास करीन। बताय जात हवय कि कार म बइठे ए मन जइसनेच खैरागढ़ रद्दा म चिखली पुलिस चौकी के आगू पहुंचीन, त उहां पहिलीच ले गाड़ी मनके जांच करत पुलिस के टीम ह कार रूकवईस। अतके बखत पुलिस ह फुलबासन बाई ल चिन लीस अउ सक होय म आरोपी मन ल हिरासत म ले ले गीस।
जंगली सूअर-हमला
राजनांदगांव जिला के हालेकोसा गांव म आज तेंदूपत्ता तोड़े बर गे ग्रामीण मन उपर जंगली सूअर ह हमला कर दीस। ए घटना म आठ झन घायल होगे हे, जेमा ले एक झन माईलोगिन के हालत गंभीर बताय जावत हे। बने इलाज बर घायल मन ल मेडिकल कॉलेज अस्पताल संघरा छुरिया अउ पाथरी के स्वास्थ्य केन्द्र म भर्ती कराय गेहे। घटना के सूचना मिलते साथ वनमंडल अधिकारी आयुष जैन ह अस्पताल पहुंचीन अउ घायल मनके हालचाल जानीन। वन विभाग ह लोगन ल जंगल कोति जाय के बेरा सावधानी बरते के अपील करीन हे।
सक्ती-फर्जी बैंक शाखा
सक्ती जिला के छपोरा गांव म भारतीय स्टेट बैंक-एसबीआई के फर्जी साखा खोलके धोखाधड़ी के मामला म मालखरौदा पुलिस ह एक झिन दूसर आरोपी ल गिरफ्तार करे हे। ए मामला म पहिलीच ले बैंक मैनेजर संघरा छह झिन गिरफ्तारी होगे हवय। आरोपी मन ह बैंक म नौकरी लगाय के नांव म लोगन ल फर्जी नियुक्ति प्रमाण पत्र दे रिहीन। ए दउरान उंखर मन तीर ले तीस-तीस हजार रूपिया घलो ले रिहीन। पुलिस ह आरोपी मन तीर ले कम्प्यूटर, प्रिंटर संघरा दूसर कागज अउ सामान जब्त करे रिहीन।
मौसम
संक्षिप्त समाचार
– अंबिकापुर के पीजी कॉलेज ऑडिटोरियम म आज जिला स्तरीय श्रमिक सम्मेलन के आयोजन करे गीस। ए कार्यक्रम म मुख्य अतिथि के रूप म सांसद चिंतामणि महाराज सामिल होइन।
– कृषि यंत्र अउ सिंचाई पंप म अनुदान बर किसान मन ह ‘‘चेम्प्स‘‘ पोर्टल के माध्यम ले ऑनलाइन आवेदन कर सकत हे। आवेदन के प्रक्रिया सात मई ले सुरू होही। एखर बर किसान मन तीर आधार कार्ड, बैंक पासबुक, जाति प्रमाण पत्र अउ जमीन के कागज होना जरूरी हे।
अउ
– धमतरी म रेत के अवैध परिवहन अउ अनियमितता के सेती अछोटा गांव के ग्रामीण मन ह आज नगरी-धमतरी रद्दा म चक्काजाम करीन।