खाद-पेट्रोल-प्रेसवार्ता
पश्चिम एशिया म चलत युध्द संकट अउ अंतरराष्ट्रीय अस्थिरता के बावजूद छत्तीसगढ़ म कृषि उर्वरक अउ पेट्रोलियम पदार्थ के निर्बाध आपूर्ति करे जात हे। ए संबंध म कृषि विभाग के प्रमुख सचिव शहला निगार, इंडियन ऑयल कार्पोरेसन लिमिटेड के मध्य प्रदेस राज्य कार्यालय के मुख्य विपणन महाप्रबंधक अजय कुमार श्रीवास्तव अउ खाद्य अउ नागरिक आपूर्ति विभाग के संचालक डॉक्टर फरिहा आलम सिद्दीकी ह आज रईपुर म राखे गे संयुक्त प्रेसवार्ता म किहीन कि प्रदेस म उर्वरक अउ पट्रोलियम पदार्थ के आपूर्ति पर्याप्त मात्रा म करे जात हे। तेल कंपनी के मुख्य विपणन महाप्रबंधक अजय कुमार श्रीवास्तव ह बतइन कि इंडियन ऑयल, भारत पेट्रोलियम अउ हिंदुस्तान पेट्रोलियम ह छत्तीसगढ़ म एलपीजी अउ ऑटोमेटिक ईंधन के पर्याप्त आपूर्ति बनाय राखे हे। अेमन बतइन कि तेल कंपनी ह रसोई गैस आपूर्ति ल प्राथमिकता देहे अउ एहा सामान्य रूप ले जारी हे। ए समय तेल कंपनी प्रदेस म हर दिन लगभग छप्पन सौ किलो लीटर पेट्रोल अउ अंठानवे सौ किलो लीटर डीजल के आपूर्ति करत हे। ओमन बतइन कि वर्तमान म प्रदेस के जम्मो पेट्रोल पंप म पर्याप्त मात्रा म इंर्धन मौजूद हे।
उहें, खाद्य अउ नागरिक आपूर्ति विभाग के संचालक डॉ. फरिहा आलम सीद्दीकी ह बतइन कि छत्तीसगढ़ म चार सौ अट्ठारा जघा म छापा मारे गेहे। ए दउरान लगभग चार हजार सिलेंडर ल जब्त करे गेहे।
कृषि विभाग के प्रमुख सचिव शहला निगार ह किहीन कि प्रदेस म उर्वरक पर्याप्त मात्रा म मौजूद हे। ओमन बतइन कि छत्तीसगढ़ म पंद्रह लाख मीट्रिक टन खाद के जरूरत हे। एखर एवज म करीबन नौ लाख मीट्रिक टन खाद प्रदेस के गोदाम म उपलब्ध हे।
सुप्रीम कोर्ट-दिशा-निर्देश
सर्वोच्च न्यायालय ह देस म सड़क सुरक्षा बढ़ाय बर महत्वपूर्ण दिसा-निरदेस जारी करे हे। न्यायामूर्ति जे.के. माहेश्वरी अउ ए.एस. चंदुरकर के पीठ ह केहे हे कि एक्सप्रेसवे प्रशासनिक चूक या बुनियादी ढांचा के कमी के सेति खतरा के कारण नइ बनना चाही। न्यायालय ह बतइन कि कुल सड़क नेटवर्क म राष्ट्रीय राजमार्ग के हिस्सेदारी कम हे, लेकिन दुर्घटना म मउत के प्रतिसत जादा हे। न्यायालय ह निरदेस देहे कि भारी वाहन केवल निर्धारित जघा म ही खड़ा करे जाय। राजमार्ग के किनारा मन म नवा ढाबा अउ व्यावसायिक निर्माण उपर रोक लगाय गेहे। संबंधित एजेंसी मन ल सुरक्षा सुधार बर तुरते कदम उठाय बर केहे गेहे।
प्लांट हादसा-सुनवाई
सक्ति जिला के डभरा विकासखंड म संचालित वेदांता पावर प्लांट म पाछू हफ्ता बायलर फटे ले चौतीस श्रमिक प्रभावित होय रिहीन। एमा ले चौबीस श्रमिक के मउत हो गे रिहीस। ए गंभीर घटना के वास्तविक कारण के पता लगाय बर बिलासपुर के संभागायुक्त ह जांच अधिकारी मनके टीम गठित करे हे। जांच संबंधी कार्रवाही के पारदर्सिता अउ निष्पक्षता सुनिश्चित करे बर आम लोगन के अलावा प्रत्यक्षदर्सी अउ संबंधित पक्ष ल घटना के संबंध म साक्ष्य या दस्तावेज प्रस्तुत करे के अवसर दे जाही। एखर बर अवइया उनतीस अप्रैल के बिलासपुर के संभागयुक्त कार्यालय म बिहनिया दस बजे ले मंझनिया दू बजे तक सुनवाई रखे गेहे।
अमित जोगी-सुप्रीम कोर्ट
एनसीपी नेता रामावतार जग्गी हत्या मामला म सर्वोच्च न्यायालय ह आरोपी अमित जोगी ल ए मामला म तत्काल राहत दे ले साफ इंकार कर देहे। एखरे संघरा अदालत ह ए प्रकरण ले जुड़े दू अहम मामला के संयुक्त सुनवाई अवइया तेईस अप्रैल के तय करे हे। अमित जोगी कोति ले सुप्रीम कोर्ट म दू अलग-अलग आदेस ल चुनौती दे गे रिहीस। जेखर उपर अदालत ह एक साथ सुनवाई करे के फइसला करे हे। पहिली मामला केंद्रीय जांच ब्यूरो-सीबीआई ल अपील करे के अनुमति दे ले जुड़े हे। उहें, दूसर मामला छत्तीसगढ़ हाई कोर्ट डहार ले अमित जोगी ल हत्या के दोषी मानत उम्र कैद के सजा सुनाय ले जुड़े हे।
जनगणना-2027
प्रदेस म जनगणना -दू हजार सत्ताईस के तहत डिजीटल स्व-गणना के प्रक्रिया जारी हे। ताजा आंकड़ा के अनुसार अब तक राज्य म करीबन उन्नीस हजार नागरिक मन स्व-गणना पूरा कर लेहे। जबकि छब्बीस हजार ले जादा नागरिक मन स्व-गणना पोर्टल म अपन पंजीकरण कर लेहे। स्व-गणना के काम तीस अप्रैल तक चलही। एखर तहत नागरिक मन ल पोर्टल म अपन मोबाइल नंबर दरज करके ओटीपी के माध्यम ले प्रमाणीकरण करना होथे। एखर बाद परिवार के मुख्य डहार ले संबंधित जानकारी दरज करे जाथे। प्रक्रिया पूरा होय म एक डिजीटल संदर्भ संख्या मिलथे, जेला भविष्य म सत्यापन के बेरा प्रगणक ल प्रस्तुत करना होही, जेखर ले डेटा मिलान के काम त्वरित अउ त्रुटि रहित तरीका ले करे जा सकय। स्व-गणना के बाद एक ले तीस मई तक मकान के गणना अउ सूचीकरण के काम करे जाही।
राज्य के जम्मो तैंतीस जिला अउ उन्नीस ले जादा ग्राम म ए महा अभियान ल सफल बनाय बर व्यापक प्रशासनिक तियारी करे गेहे। राज्य सरकार डहार ले बासठ हजार ले जादा अधिकारी अउ कर्मचारी मनके टीम तैनात करे गेहे। नागरिक मनके सहायता बर टोल फ्री हेल्पलाइन-एक-आठ-पांच-पांच घलो दे गेहे। जिंहा कोनो भी प्रकार के समस्या या संका के समाधान करे जात हे।
अक्ति तिहार
रईपुर स्थित इंदिरा गांधी कृषि विश्वविद्यालय म अक्षय तृतीया के मउका म आज ‘अक्ति तिहार‘ के आयोजन करे गीस। ए राज्य स्तरीय समारोह म कृषि मंत्री रामविचार नेताम मुख्य अतिथि के रूप म सामिल होइन। ए मउका म मिट्टी अउ बीज के पूजा कर प्रतीकात्मक बोआई करे गीस। संगेसंग किसान मन ल कृषि जिनिस बांटे गीस अउ उंखर बर कृषि के नवा तकनीक के प्रदर्सन करे गीस। किसान मन ल रासायनिक खाद के विकल्प के बिसय म घलो प्रसिक्षण दे गीस। अक्षत तृतीया म अइसने ही आयोजन राज्य के सबो कृषि विज्ञान केंद्र म घलो होइस।
माओवादी-आत्मसमर्पण
कांकेर जिला म आज परतापुर एरिया कमिटी म सक्रिय रहे एक माओवादी ह आत्मसमर्पण् करे देहे। ए माओवादी मन ह आमाबेड़ा थाना म पहुंचके अपन हथियार के संग समर्पण करीन। पुलिस अधीक्षक निखिल राखेचा ह बतइन कि समर्पण करइया माओवादी मन ल राज्य सरकार के पुनर्वास नीति के तहत पच्चीस हजार रूपिया के सहायता रासि आने सुविधा उपलब्ध कराय जावत हे।
युवक-शव बरामद
दुरूग म काली शिवनाथ नदिया म नहाय गे पांच दोस्त मन ले दू झन के डूबे ले मउत होगे। जबकि तीन कोनो तरह ले बाहिर निकल आईन। बताय जात हे कि जम्मो दोस्त साथ म नदी म नहाय बर उतरे रिहीन, लेकिन कोनो ल तउरे बर नइ आत रिहीस। ए घटना के कोतवाली थाना क्षेत्र के छातागढ़ पिकनिक स्पॉट के हे। जानकारी के अनुसार नहाय के दउरान अचानक दू युवक नदी के गहरा हिस्सा म चल दीन अउ डूब गीन। एसडीआरएफ के टीम ह मारे गे दूनो युवक के सव बरामद कर ले गेहे। ए दूनो युवक कैलाश नगर दुरूग के निवासी रिहीन।
गांजा-आरोपी गिरफ्तार
महासमुंद पुलिस ह ओडिसा ले आवत एक टरक के तलासी के दउरान एमा गुप्त रूप ले लुकाय गे करीबन चौबीस लाख रूपिया मूल्य के सैंतालीस किलो अवैध गांजा बरामद करे हे। पुलिस ह बतइस कि ओडिसा के कालाहांडी ले प्रदेस के मुंगेली जिला म ए गांजा लाय जात रिहीस। ए मामला म चार आरोपी मन ल गिरफ्तार करे गेहे।
ट्रेन परिचालन
गर्मी के छुट्टी के दउरान रेलगाड़ी मन म यात्री मन के अतिरिक्त भीड़ ल धियान राखत दक्षिण पूर्व मध्य रेलवे के नागपुर मंडल ह खड़गपुर अउ पुणे के बीच आज ले एक फेरा के सप्ताहिक ट्रेन के परिचालन सुरू करे हे। अइसने खड़गपुर अउ छत्रपति शिवाजी टर्मिनस के बीच घलो आज ले ही एक फेरा बर सप्ताहिक स्पेसल ट्रेन सुरू करे गेहे। आज ले ही पुणे-हावड़ा स्पेसल ट्रेन घलो चलाय जात हे। उहें, ईतवारी अउ शालीमार के बीच सप्ताहिक स्पेशल ट्रेन सत्ताईस अउ अट्ठाईस अप्रैल के चलाय जाही।