अंतर्राष्ट्रीय साक्षरता दिवस
आज अंतर्राष्ट्रीय साक्षरता दिवस हरय। एसो के थीम हे – ‘‘कोरोना महामारी के दौरान साक्षरता, शिक्षा और पठन-पाठन पर विशेष जोर।‘‘
प्रदेस म घलो अंतर्राष्ट्रीय साक्षरता दिवस के मउका म राज्य स्तरीय वेबिनार के आयोजन करे गीस, जेमा सिक्षा अउ साक्षरता ले जुड़े जम्मों अधिकरी अउ करमचारी मनके संगेसंग बिसय-बिसेसज्ञ मन घलो सामिल होईन। ए मउका म स्कूल सिक्षा मंत्री ह बतईन कि राज्य म एसो पढ़ना-लिखना अभियान के मंजूरी दे गेहे। एखर पहिली, चरण म ढाई लाख लोगन मन ल साक्षर करे के लक्ष्य राखे गेहे।
प्रधानमंत्री-मीडिया सराहना
प्रधानमंत्री नरेन्द्र मोदी ह कोरोना महामारी ले संघर्ष म मीडिया के भूमिका के प्रसंसा करे हे। श्री मोदी ह किहीन कि मीडिया ह कोरोना महामारी के बारे म लोगन मन ल जागरूक करे के संगेसंग सरकार के कामकाज के जानबा अउ ओखर योजना मनके कमी के बारे म बताके लोगन मनके बढ़िया सेवा करे हवय।
प्रधानमंत्री ह वीडियो कान्फ्रेंसिंग के माध्यम ले जयपुर म पत्रिका गेट के उद्घाटन के मउका म किहीन।
कोरोना-मरीज
प्रदेस म कोरोना संक्रमण सरलग बाढ़त हे। प्रदेस कांग्रेस अध्यक्ष मोहन मरकाम के कोरोना जांच रिपोर्ट पाॅजिटिव आय के संगेसंग बलरामपुर जिला के सामरी विधायक घलो कोराना पाॅजिटिव पाय गेहे।
रईपुर के माना स्थित वृद्धाश्रम म नौ झिन सियनहा मनखे मनके कोरोना जांच रिपोर्ट पाॅजिटिव आय हे। ए जम्मो झिन ल माना के कोविड अस्पताल म भर्ती कराय गेहे।
ऐति, जांजगीर-चांपा जिला के पामगढ़ ब्लाॅक म आज कोरोना पाॅजिटिव छह झिन मरीज के पहिचान होय हे, जेमा ले तीन झिन पंचायत सचिव घलो सामिल हे।
त ओति, राजनांदगांव जिला के खैरागढ़ नगर पालिका म पदस्थ एक झिन सब इंजीनियर के संगेसंग ओखर परिवार के पांच झिन सदस्य कोरोना संक्रमित पाय गेहे, जेखर सेती खैरागढ़ नगर पालिका आॅफिस ल सील कर दे गेहे। इही जिला के डोंगरगांव म घलो एक झिन सोना-चांदी के बेपारी के संग सात झिन लोगन मनके कोरोना रिपोर्ट पाॅजिटिव आय हे।
राजनांदगांव जिला के खैरागढ़ म ग्यारह सितंबर ले अट्ठारह सितंबर तक पूर्ण लाॅकडाउन रइही। ए दउरान दवई दुकान, सब्जी अउ पेट्रोल पंप ल छोड़ के जम्मों दुकान बंद रइही।
प्रदेस म काली रतिहा तक दू हजार सत्रह कोरोना मरीज मिले रिहीस। जेमा ले सबले जादा रईपुर जिला के छह सौ चैव्वन मरीज सामिल हे।
कोरोना-खबरें
स्वास्थ्य विभाग ह प्रदेस म कोरोना संक्रमण के इलाज बर अस्पताल अउ कोविड केयर सेंटर मन म खाली बिस्तर के संख्या के जानबा दे बर वेबपोर्टल के सुरूवात करे हे। रईपुर जिला म सुविधा के जानबा के संगेसंग ए पोर्टल ह सुरू होगे हे।
त ओति, रईपुर स्थित मंत्रालय अउ विभाग प्रमुख के आफिस मन म जम्मों अधिकारी अउ करमचारी मनके कोरोना जांच कराय जात हे।
एथेनाॅल-निर्माण इकाई
राज्य म एथेनाॅल बनाय ले जुड़े पांच सौ करोड़ रूपिया ले जादा के चार प्रस्ताव के एम.ओ.यू. उपर दस्तखत करे गीस। ए इकाई के स्थापित होय ले करीबन पांच सौ तिरासी मनखे मन ल रोजगार मिलही। ए इकाई ह मुंगेली, जांजगीर-चांपा के संगेसंग महासमुंद जिला म स्थापित होही।
मुख्यमंत्री भूपेश बघेल के अगुवई म काली रईपुर स्थित निवास कार्यालय म एम.ओ.यू. के प्रस्ताव उपर समझौता होईस। ए इकाई ले हर साल साढ़े सत्रह हजार किलोलीटर एथेनाॅल बनाय के लक्षय राखे गेहे, जेखर बर करीबन साढ़े तीन लाख टन धान के जरूरत पड़ही।
सिटी स्कैन-कोरोना जांच
प्रदेस के स्वास्थ्य विभाग ह सोशल मीडिया म प्रसारित ओ खबर के खंडन करे हे, जेमा केहे गेहे कि कोरोना संक्रमण के बने पहिचान बर सिटी स्कैन कराना बढ़िया उपाय हे। स्वास्थ्य विभाग ह आम लोगन मन ले अपील करे हे कि ओमन वैज्ञानिक रूप ले प्रमाणित टेस्ट ले ही कोरोना संक्रमण के जांच करवाव। विभाग कोति ले जारी बयान म बताय गेहे कि भारत सरकार के आई.सी.एम.आर. डहार ले एंटी किट, आरटीपीसीआर टेस्ट अउ ट्रू नाॅट विधि ले कोरोना संक्रमण के जांच करे जाथे।
स्वास्थ्य विभाग ह केहे हे कि सिटी स्कैन के स्क्रीनिंग म परयोग ले रेडिएशन के खतरा कई गुना बाढ़ जाथे, जेखर गंभीर परिणाम हो सकथे।
शिक्षक-भर्ती
मुख्यमंत्री भूपेश बघेल ह स्कूल शिक्षा विभाग के चैदह हजार पद के भर्ती के संबंध म एक हफ्ता के भीतर रिपोर्ट पेस करे के निरदेस दे हवय। मुख्यमंत्री ह सिक्षा विभाग अधिकारी मन ल किहीन कि भर्ती के काम म लापरवाही बर्दास्त नइ करे जाय।
जानबा के मुताबिक स्कूल सिक्षा विभाग ह प्रदेस म चैदह हजार ले जादा पद म सिक्षक मनके सीधी भर्ती के मेरिट सूची के वैधता ल एक साल बर बढ़ा देहे।
जाति प्रमाण पत्र
मुख्यमंत्री ह जाति प्रमाण पत्र ले जुड़े सिकईत उपर जल्दी कार्रवाई करे के निरदेस दे हवय। संगेसंग जाति प्रमाण पत्र के निरस्त करे के प्रक्रिया ल सरल बनाय बर केहे हे।
मुख्यमंत्री ह वीडियो कान्फ्रेंसिंग के माध्यम ले अनुसूचित जाति अउ अनुसूचित जनजाति अधिनियम के तहत बनाय गे राज्य स्तरीय सतर्कता अउ माॅनिटरिंग समिति के बइठका लीन। ओमन अधिकारी मन ल यहू बात किहीन कि कोनों भी मनखे ह फर्जी प्रमाण पत्र झन बना सकय।
एखर संगेसंग मुख्यमंत्री के अध्यक्षता म राखे गे राज्य जनजाति सलाहकार परिषद के बइठका म जनजाति समुदाय के हित म भू-राजस्व के धारा मन म संसोधन करे बर उप समिति बनाय के फइसला लीन।
बीजापुर-रैली
बीजापुर जिला के गंगालूर थाना क्षेत्र म इहां के आदिवासी मन ह कोरोना संक्रमण के इलाज म लापरवाही अउ स्कूली लइका मनके पढ़ई म आवत परेसानी ल निपटाय के मांग ल लेके रैली निकालीन। ए रैली म आदिवासी समुदाय के लोगन मन ह अपन वेशभूषा म हथियार अउ तीर-बाण जइसन अस्त्र ल लेेके सामिल होईन।
माओवादी-गिरफ्तार/ग्रामीण अगवा
सुकमा जिला के चिंतलनार जघा ले सुरक्षा बल मन ह दू झिन माओवादी मन ल गिरफ्तार करे हे। जिला के पुलिस अधीक्षक ह बतईन कि ए माओवादी मन उपर सुरक्षा बल मन उपर हमला करे अउ विस्फोट के घटना म सामिल रेहे के आरोप हे।
ऐति, धमतरी जिला के घोरागांव म माओवादी मन ह एक झिन गांव के लोगन के अगवा कर लीन। जिला के पुलिस अधीक्षक ह एखर पुष्टि करे हे। त उहें माओवादी मन ह नगरी-मैनपुर रद्दा म रूख काट के गाड़ी के अवई-जवई ल रोके के परयास करीन।
सुपोषण अभियान
सुपोषण अभियान के मदद ले लाॅकडाउन के पहिली तक छह महीना के भीतर राज्य म तेरह प्रतिसत लइका मन ल कुपोषण मुक्त करे गेहे। ए बात मुख्यमंत्री ह राष्ट्रीय पोषण माह के ई-शुभारंभ के दउरान किहीन। मुख्यमंत्री ह बतईन कि प्रदेस म सैंतीस प्रतिसत लइका मन ह कुपोषित हवय। त उहें, सैंतालीस प्रतिसत माईलोगिन मन ह एनीमिया माने खून के कमी ले पीड़ित हे।
गोधन न्याय योजना
गोधन न्याय योजना म प्रदेस के छिहत्तर हजार ले जादा गोबर बेचइया मन ल तीसर किस्त के रूप म छह करोड़ रूपिया ले जादा के भुगतान करे गेहे। एक ठिन कारीकरम म मुख्यमंत्री ह किहीन कि ए योजना ले गौठान मन म गोबर के आवक के मुताबिक जल्दी ले जल्दी वर्मी कम्पोस्ट टाका बनाय जाही। गोबर ले वर्मी कम्पोस्ट खाद बनाय बर स्व-सहायता समूह के माईलोगिन मन ल प्रसिक्षण दे जात हे।
हाथी-आतंक
बलरामपुर जिला के करीबन आठ गांव मन म पाछु पन्द्रह दिन ले जंगली हाथी के एक ठिन दल ह उत्पात मचात हे। ए हाथी मनके दल ह कतकोन एकड़ के फसल ल नकसान पहुंचाय हे। राजपुर वन परिक्षेत्र के प्रतापपुर कोति ले आय हाथी के दल ह ए बेरा सेवारी बीट म घुमत हे।
ओति, कोरिया जिला के बैकुंठपुर के तीर-तखार म पाछु रतिहा हाथी के दल मन ह फसल ल नकसान पहुंचाय हे।
सरगुजा-आईजी
सरगुजा रेंज के पुलिस महानिरीक्षक रतनलाल डांगी डहार ले नौकरी के नाव म ठगी करइया आरोपी मनके खिलाफ कड़ा कार्रवाई के निरदेस उपर कार्रवाई सुरू कर दे गेहे। पाछु चैबीस घंटा के दउरान नौकरी लगाय के नाव म फर्जीवाड़ा करे के सिकईत उपर सरगुजा अउ कोरिया म तीन-तीन, जशपुर म दो अउ सूरजपुर म एक ठिन मामला म एफआईआर दर्ज करे गेहे।