छत्तीसगढ़ धर्म स्वातंत्र्य विधेयक उपर राज्यपाल रमेन डेका ह काली दस्तखत कर दीन। अब एखर राजपत्र म प्रकासन होही, जेखर बाद कानून बन जही। ए विधेयक ल विधानसभा के पाछु सत्र म पारित करे गे रिहीस, जेमा धर्मांतरण रोके बर कड़ा नियम राखे गेहे। ए विधेयक के मुताबिक छत्तीसगढ़ म गलत तरीका ले धर्मांतरण कराय के मामला म दोसी पाय जाय उपर सात ले दस साल तक कैद अउ पांच लाख रूपिया जुर्माना के प्रावधान तय करे गेहे। एखर अलावा कोनों पीड़ित नाबालिग, माईलोगिन, अनुसूचित जाति-जनजाति, अन्य पिछड़ा वर्ग या आदिवासी वर्ग ले होही त सजा बाढ़के दस ले बीस साल अउ दस लाख रूपिया के जुर्माना लगाय जाही। त उहें, सामूहिक धर्मांतरण के मामला म सजा दस साल ले लेके आजीवन कारावास तक अउ पच्चीस लाख रूपिया के जुर्माना लगाय जाही।
चावल उत्सव
प्रदेस के ग्राम पंचायत मन म काली चावल उत्सव के संग रोजगार दिवस अउ आवास दिवस के आयोजन करे गीस। पंचायत अउ ग्रामीण विकास विभाग के ‘‘मोर गांव-मोर पानी-मोर तरिया‘‘ अभियान के तहत पानी बचाय के काम बर जघा के चिन्हारी करे गीस। युवा अउ माईलोगिन मन ह एमा बने भागीदारी निभईन। उहें, प्रधानमंत्री आवास योजना-ग्रामीण के तहत नब्बे दिन म घर ल बनाय के योजना उपर गोठबात होइस।
पोषण पखवाड़ा
केन्द्रीय महिला अउ बाल विकास मंत्रालय ह काली ले देसभर म पोषण पखवाड़ा के आठवां संस्करण के आयोजन करही। एसो पोषण पखवाड़ा के विषय हे – ‘‘जीवन के पहले छह वर्ष में मस्तिष्क का अधिकतम विकास‘‘। प्रधानमंत्री नरेन्द्र मोदी ह पोषण के महत्व उपर जोर देवत किहीन कि स्वस्थ लइका ही मजबूत राष्ट्र के नींव हरय।
ऐति, छत्तीसगढ़ म घलो कुपोषण के खिलाफ जन-जागरूकता बढ़ाय बर काली ले तेईस अप्रैल तक आठवां पोषण पखवाड़ा मनाय जाही। ए अभियान मिशन पोषण टू प्वाइंट ओ के तहत चलाय जात हे। ए दउरान आंगनबाड़ी केन्द्र मन म स्वास्थ्य जांच, पोषण परामर्श, अन्नप्राशन अउ गोदभराई जइसन कार्यक्रम होही। उहें, स्थानीय स्तर म उपलब्ध खाद्य पदार्थ मनके उपयोग ल बढ़ावा देवत पोषण व्यवहार म सकारात्मक बदलाव लाय उपर विशेष ध्यान दे जाही।
विपश्यना ध्यान शिविर
छत्तीसगढ़ म अधिकारी अउ कर्मचारी मन बर मानसिक तनाव कम करे अउ कार्यक्षमता ल बढ़ाय के उद्देश्य ले राज्य सासन ह विशेष छुट्टी के बेवस्था करे हे। सामान्य प्रशासन विभाग के मुताबिक अब अधिकारी-कर्मचारी मन ल विपश्यना के दस दिवसीय आवासीय ध्यान शिविर म भाग ले बर विशेष छुट्टी मिलही।
अखिल भारतीय सेवा के संगेसंग राज्य सेवा के कर्मचारी मन ल पूरा सेवाकाल म जादा ले जादा छह बार ए छुट्टी मिलही। हरेक सिविर बर यात्रा बेरा के संगेसंग जादा ले जादा बारह दिन के छुट्टी मंजूर होही, जेमा ड्यूटी अवधि माने जाही अउ पूरा तनखा मिलही। अरजी के संग प्रवेश पत्र अउ शिविर पूरा होय उपर प्रमाण-पत्र जमा करना जरूरी होही।
अफ्रीकन स्वाइन फीवर
दुरूग जिला के मुडपार-नारधा गांव स्थित एक ठिन सूअर पालन केन्द्र म अफ्रीकन स्वाइन फीवर के पुष्टि होय के बाद जम्मों संक्रमित सुअर मन ल खतम कर दे गेहे। ए बीमारी ले अब तक कतकोन सूअर के मउत हो चुके हे। पशुपालन विभाग ह ए बीमारी के जांच बर सैंपल ल भोपाल भेजे रिहीन, जिहां ले रिपोर्ट पॉजिटिव अइस। अधिकारी मनके मुताबिक ए ह एक ठिन वायरल बीमारी हरय, जउन ह सिरिफ सूअर म फइलथे अउ एखर कोनों इलाज नइ हे।
बारहवीं-हिन्दी परीक्षा
छत्तीसगढ़ माध्यमिक शिक्षा मंडल डहार ले निरस्त करे गे कक्षा बारहवीं के हिन्दी विशिष्ट विषय के परीक्षा दस अप्रैल के एक घांव फेर होही। हिन्दी विषय के परीक्षा पाछु तेईस मार्च के होय रिहीस। प्रश्न पत्र ह लीक होय के बाद ए परीक्षा ल निरस्त कर दे गे रिहीस। मंडल ह केहे हे कि छात्र मनके रोल नंबर अउ परीक्षा केन्द्र म कोनों प्रकार के बदलाव नइ करे गेहे। जम्मों छात्र मन पहिली वाले परीक्षा केन्द्र म ही परीक्षा दे सकही।
मंत्रिमंडल-निर्णय
केन्द्र सरकार ह चालू खरीफ सीजन बर फॉस्फेटिक अउ पोटेशियम युक्त खातू उपर सब्सिडी दर ल मंजूरी दे देहे। नई दिल्ली म आज सूचना अउ प्रसारण मंत्री अश्विनी वैष्णव ह बतईन कि एखर उपर करीबन इकचालीस हजार पांच सौ चौंतीस करोड़ रूपिया के लागत आही।
कृषि मंत्री-बैठक
प्रदेस म रासायनिक खातू के कालाबाजारी करइया मनके खिलाफ कड़ा कार्रवाई करे जाही। कृषि मंत्री रामविचार नेताम ह किहीन हे कि खातू के जमाखोरी या जादा भाव बेचइया मन ल जेल भेजे जाही। ओमन बतईन कि प्रदेस म खातू के कमी नइ हे अउ सरकार ह किसान मनके हित ल ध्यान म राखत हे। रईपुर म अधिकारी मनके बइठका म अवइया खरीफ फसल के तैयारी के समीक्षा करे गीस। इही कड़ी म पांच ले बीस मई तक ‘‘विकसित भारत संकल्प अभियान‘‘ चलाय जाही, जेमा किसान मन ल आधुनिक खेती अउ वैकल्पिक खातू के जानबा दे जाही।
मुख्य सचिव-आई गॉट ट्रेनिंग कार्यक्रम
प्रदेस के मुख्य सचिव विकासशील ह जम्मों विभाग मनके प्रमुख अधिकारी मन ले मिशन कर्मयोगी के तहत आई-गॉट ट्रेनिंग कार्यक्रम ले अपन विभाग ल जोड़े के निरदेस देहे। ओमन अधिकारी-कर्मचारी मन ल घलो अपन मोबाइल के माध्यम ले ट्रेनिंग कार्यक्रम ले जुड़े बर किहीन। आई-गॉट प्रशिक्षण कार्यक्रम के तहत साधना सप्ताह के मउका म जम्मों विभाग के अधिकारी-कर्मचारी मन ल प्रशिक्षण दे बर कार्यशाला के आयोजन करे गीस।
आरटीई-सीट आवंटन
राज्य म शिक्षा के अधिकार अधिनियम-आरटीई के तहत बछर दू हजार छब्बीस सत्ताईस के प्रवेश राखे गे बेरा म समय-सारिणी के मुताबिक जारी कर दे गेहे। आरटीई के तहत पहिली चरण म तेरह ले सत्रह अप्रैल के बीच लॉटरी ले सीट के आवंटन करे जाही। अब तक अड़तीस हजार ले जादा आरजी मिले हे, जेमा ले जादा ले जादा के सत्यापन हो चुके हे। लोक शिक्षण संचालनालय ह जम्मां लंबित आवेदन के जांच जल्दी पूरा करे के निरदेस देहे। चुने गे छात्र मनके प्रवेश एक मई ले तीस मई के बीच होही।
फोरलेन-सड़क राशि
लोक निर्माण विभाग ह पन्द्रह ठिन फोरलेन सड़क बनाय बर सात सौ आठ करोड़ रूपिया ले जादा के पइसा मंजूर करे हे। ए राशि ले दुरूग, रायगढ़, रईपुर, अंबिकापुर, बिलासपुर, जशपुर अउ कबीरधाम जिला म कतकोन रद्दा उपर करीबन नब्बे किलोमीटर फोरलेन सड़क बनाय जाही।
रेलवे-विशेष ट्रेन
रेलवे ह गरमी म यात्री मनके सुविधा बर विशेष रेलगाड़ी चलाय के घोसना करे हे। पटना-चर्लपल्ली-पटना के बीच पन्द्रह-पन्द्रह फेरा बर स्पेशल रेलगाड़ी चलाय जात हे, जेमा यात्री मन ल कंफर्म बर्थ के सुविधा मिलही। एखर अलावा तिरूपति-रक्सौल-तिरूपति रद्दा म घलो सात फेरा बर समर स्पेशल ट्रेन चलाय जाही। ए रेलगाड़ी बिलासपुर, रईपुर, दुरूग अउ गोंदिया के संगेसंग कतकोन स्टेशन म रूकही।
ऐति, दक्षिण पूर्व मध्य रेलवे के बिलासपुर मंडल के अकलतरा स्टेसन म चौथा लाइन बने के सेती कोनों-कोनों रेलगाड़ी मन ल निस्तर करे गे रिहीस, ओला एक घांव फेर बहाल करे जात हे। रेलवे प्रशासन ह यात्री सुविधा ल ध्यान म राखत रायगढ़-बिलासपुर, रईपुर-कोरबा अउ गेवरा रोड के संगेसंग आने-आने रद्दा के मेमू अउ पैसेंजर ट्रेन के चलई ल आज ले दस अप्रैल के बीच फेर एक घांव सुरू करे के फइसला लेहे।
अमिता श्रीवास-माउंट एवरेस्ट
जांजगीर-चांपा जिला के युवा पर्वतारोही अमिता श्रीवास ह काली नौ अप्रैल के माउंट एवरेस्ट अभियान बर काठमांडू रवाना होही। मुख्यमंत्री ह ओमन ल सुभकामना दे हवय।
जानबा के मुताबिक अमिता श्रीवास ह विश्व के सबले ऊंचा चोटी उपर तिरंगा फहराय के संकलप लेहे। ओमन किहीन कि ए अभियान के माध्यम ले लोगन मन ल साफ-सफाई के संदेस घलो दीहीं। अमिता श्रीवास ह बछर दू हजार इक्कीस म अफ्रीका के सबले ऊंचा चोटी किलिमंजारो म चढ़े म सफलता पा चुके हे।
अउ अब पेस हे मौसम के हाल…
प्रदेस म काली एक-दू जघा म गरज-चमक के संग हल्का बरसा होय के संभावना बताय गेहे। उहें, कोनों-कोनों जघा म हवा-गरेर के संग गाज गिरे के चेतावनी दे गेहे।
मौसम विभाग के मुताबिक एक ठिन उपरी हवा के चक्रीय चक्रवाती घेरा छत्तीसगढ़ अउ ओखर तीर-तखार म बने हे। उहें, एक ठिन द्रोणिका छत्तीसगढ़ ले मन्नार के खाड़ी तक बने हे। एखर प्रभाव ले प्रदेस के मौसम म बदलाव देखे जात हे।