राष्ट्रपति रामनाथ कोविंद ह कीहिन कि नवा शिक्षा नीति बछर दू हजार पच्चीस तक प्राथमिक विद्यालय स्तर म सबो लईका मन ल शुरूआती शिक्षा देबर सर्वोच्च प्राथमिकता देथे। राष्ट्रपति आज राष्ट्रीय शिक्षा नीति उपर राज्यपाल मनके सम्मेलन के वीडियो काॅन्फे्रसिंग के माध्यम ले उद्घाटन करत रीहिन। ओमन कीहिन कि सार्वजनिक शिक्षा संस्था मन ल मजबूत करना बहुत जरूरी हे।
राष्ट्रपति ह राज्यपाल मन संग नवा राष्ट्रीय शिक्षा नीति ल लागू करे बर राज्य मन म विषय आधारित आभासी सत्र आयोजित करे बर कीहिन। श्री कोविंद ह राज्य अउ केंद्र शासित प्रदेश मन ले उच्च शिक्षा के स्तर म नवा नीति के प्रभावी कार्यान्वयन बर कुलपति अउ शिक्षक मनके खाली पद मन ल भरे के आग्रह करीन।
प्रधानमंत्री राष्ट्रीय शिक्षा नीति
प्रधानमंत्री नरेेंद्र मोदी ह नवा शिक्षा नीति के बड़ई करत कीहिन कि ये सबो जुन्ना शिक्षा नीति मन ले जादा अच्छा विकल्प होही। श्री मोदी ह आज राष्ट्रीय शिक्षा नीति उपर राज्यपाल मनके सम्मेलन ल वीडियो कॅान्फे्रंिसग के माध्यम ले संबोधित करत रीहिन।
ओमन कीहिन कि नवा शिक्षा नीति भारत के युवा मन ल चुनौती मनके सामना करे बर तियार करही अउ रोजगार के नवा अवसर पैदा करही। श्री मोदी ह कीहिन कि नवा शिक्षा नीति के बारे म देशभर ले मिले लाखों लोगन के सुझाव मन ल ए नीति म शामिल करे गेहे। प्रधानमंत्री ह जोर देत कीहिन कि नवा शिक्षा नीति कंठस्थ करे के बजाय सीखे उपर जोर देथे अउ वो हा पढ़ईया मनके विवेचनात्मक क्षमता ल बढ़ाही।
राज्यपाल शिक्षा नीति सुझााव
राष्ट्रीय शिक्षा नीति उपर आधारित सम्मेलन म छत्तीसगढ़ के राज्यपाल अनुसूइया उइके ह अपन संबोधन म कीहिन कि राष्ट्रीय शिक्षा नीति के मामला म मील के पत्थर साबित होही। ओमन ह राष्ट्रीय शिक्षा नीति ले जुड़े सुझााव घलो दीन।
राज्यपाल ह कीहिन कि जनजाति मनके भाषा जेमा गोंडी घलो शामिल हे। ओला प्राथमिक स्तर के शिक्षा म सामिल करे जाना चाही। एखर ले जनजाति समाज अउ उंखर नवा पीढ़ी अपन भाखा – संस्कृति ल समझही अउ एला संरक्षित कर पाही। ओमन कीहिन कि राज्य मन म जिहंा जनजाति मनके संख्या जादा हे उंहा संबंधित क्षेत्र म स्थानीय स्तर म जानजाति भाखा के शिक्षक मनके नियुक्ति करे अउ नियुक्ति म क्षेत्रीय जनजाति गोंडी भाषा के शिक्षक मन बर पद आरक्षित करे के गोठ करीन। राज्यपाल ह बस्तर अउ सरगुजा जइसे आदिवासी अंचल मन म मल्टी-डिसिप्लीनरी एजुकेशन एंड रिसर्च यूनिवर्सिटी प्राथमिकता के संग शुरू करे के सुझाव दीन।
हमर ग्रामसभा
प्रदेश के कंाकेर, महासमुंद अउ कोरबा म नवा मेडिकल काॅलेज जल्दी शुरू करे जाही। पंचायत अउ स्वास्थ्य मंत्री टी.एस. सिंहदेव ह आकाशवाणी रायपुर ले प्रसारित विशेष कार्यक्रम हमर ग्रामसभा म ए जानकारी दीन। श्री सिंहदेव ह हमर ग्रामसभा म प्रदेश के ग्रामीण अउ शहरी इलाका मन म मौजूद स्वास्थ्य सेवा मनके बारे म विस्तार ले बताइन।
ओमन बताइन कि प्रदेश म अभी के बेरा म छै शासकीय मेडिकल काॅलेज संचालित हे। श्री सिंहदेव ह कीहिन कि मेडिकल काॅलेज मनके संग उप स्वास्थ्य केंद्र, प्राथमिक स्वास्थ्य केंद्र, सामुदायिक स्वास्थ्य केंद्र, सिविल अउ जिला अस्पताल मनके माध्यम ले घलो लोगन मन ल स्वास्थ्य सेवा उपलब्ध कराय जात हे। हरएक ढाई सौ लोगन मनके बीच एक मितानिन के माध्यम ले लोगन मन ल जरूरी दवाई पहुुंचाय जात हे।
स्वास्थ्य मंत्री ह बताइन कि डॅाक्टर खूबचंद बघेल सहायता योजना के माध्यम ले बीपीएल परिवार मन ल सालाना पांच लाख रूपिया तक अउ एपीएल परिवार मन बर पचास हजार रूपिया तक के इलाज के सुविधा दे जात हे। एखरे अंतर्गत मुख्यमंत्री विशेष स्वास्थ्य सहायता योजना के तहत चैदा गंभीर बीमारी मनके ईलाज बर आर्थिक सहायता दे जात हे।
केंद्र विमान टिकट
केंद्र सरकार ह उच्च न्यायालय ल बताइन कि विमान कंपनी मन पूर्णबंदी के दउरान खरीदे गे टिकट मनके पूरा पईसा लहुटाही। ए बछर पच्चीस मार्च अउ तीन मई के बीच खरीदे गे घरेलु अउ अंतर्राष्ट्रीय यात्रा टिकट मन उपर ये नियम लागू होही अउ धनराशि तुरते वापिस करे बर पड़ही।
उच्चतम न्यायालय ह पूर्णबंदी के बेरा खरीदे गे टिकट मनके पूरा वापसी करे ले जुड़े एक जनहित याचिका उपर केंद्र सरकार ले जवाब मंागे रीहिस। सरकार ह यहू कीहिस कि यदि विमान कंपनी मन पूरा पईसा वापिस नइ करही त यात्री इही पईसा ले अवइया बछर म इकतीस मार्च तक टिकट खरीद सकही। कंेद्र ह यहू कीहिस कि यात्री कोनो भी जगा बर टिकट ले सकथे अउ एला दूसर मनखे बर घलो हस्तांतरित करे जा सकथे।
होम आइसोलेशन दिशा निर्देश
प्रदेश म स्वास्थ्य विभाग ह होम आइसोलेशन म कोरोना संक्रमण के इलाज के अनुमति दे देहे। एखर बर पात्रता, शर्त, नियम, जिला प्रशासन के जिम्मेदारी, मरीज मनके स्वास्थ्य के निगरानी अउ मरीज मन डहार ले अपनाय जात सावधानी मन ले जुड़े दिशा निर्देश जारी करे गीस।
विभाग के अपर मुख्य सचिव रेणु पिल्ले ह सबो कलेक्टर मन ल परिपत्र जारी करके दिशा निर्देश मनके कड़ाई ले पालन करे बर केहे हे।
परिपत्र म केहे गेहे कि बिना लक्षण वाले अउ कम लक्षण वाले कोरोना मरीज मनके प्रबंधन बर होम आइसोलेशन के अनुमति दे जा सकथे। होम आइसोलेशन के प्रबंधन अउ एखर इच्छुक मरीज मनके निगरानी अउ समन्वय बर जिला स्तर म चैबीसों घंटा संचालित काॅल सेंटर अउ कंट्रोल रूम के स्थापना करे जाही। जिला कंट्रोल रूम डहार ले मरीज मन ल होम आइसोलेशन के अनुमति देके पहिली उंखर पात्रता के आकलन करे जाही।
साइबर जागरूकता
दुर्ग जिला के भिलाई पुलिस कंट्रोल रूम म पुलिस अधिकारी मन ल साइबर अपराध के रोकथाम अउ एखर ले लोगन मन ल बांचे के उपाय के बारे म पांच दिवसीय प्रशिक्षण दे गीस। आॅनलाईन साइबर क्राइम अवेयरनेस अउ साइबर फारेंसिक- विषय उपर आयोजित ये प्रशिक्षण म राजनंादगंाव, बेमेतरा, बालोद, कबीरधाम अउ दुर्ग जिला के पुलिस अधिकारी शामिल होइन।
उंहें बिलासपुर पुलिस डहारल ले साइबर अपराध ले बांचे बर लोगन मन ल जागरूक करे बर साइबर मितान अभियान चलाये जात हे। ये अभियान ले अब तक करीब छै लाख लोगन मन ल जोड़े जा चुके हे। बिलासपुर पुलिस डहार ले एक सितंबर ले ये अभियान के शुरूआत करे गेहे।
संक्षिप्त समाचार
अउ अब थोरकुन समाचार सार म-
– दाउ वासुदेव चंद्राकर कामधेनु विश्वविद्यालय दुर्ग म बछर दू हजार बीस- इक्कीस म पाठ्यक्रम मन म भर्ती बर पढ़ईया मन अठाईस सितंबर तक आवेदन कर सकथे।
– दक्षिण पूर्व मध्य रेलवे के अंतर्गत अवइया बारा सितंबर ले सिकंदराबाद- दरभंगा -सिकंदराबाद स्पेशल, अहमदाबाद-भुवनेश्वर-अहमदाबाद स्पेशल, भुवनेश्वर – दुर्ग-भुवनेश्वर स्पेशल अउ कोरबा-विशाखापट्टनम-कोरबा स्पेशल ट्रेन शुरू करे जाही।
– कोंडागांव जिला म संचालनालय स्वास्थ्य सेवा डहार ले आने आने सतहत्तर पद मन बर नियुक्ति बर वाॅक इन इंटरव्यू के आखरी मेरिट अउ चयन सूची जारी कर देहे।
– धमतरी जिला के मगरलोड विकासखंड के ग्राम मड़वापथरा के तीर इक्कीस हाथी मनके दल पहुंच गेहे। वनविभाग डहार ले तीर तखार के गांव मन म मुनादी कराके लोगन मन ले सतर्क रेहे के अपील करे जात हे।
अउ
– कबीरधाम जिला म न्यायालय अउ थाना मन म सी.सी.टी.एन.एस. आॅपरेटर के फर्जी नियुक्ति अउ आवेदक मनले चार लाख रूपिया के ठगी करे के मामला म पुलिस ह चार आरोपी मन ल गिरप्तार करे हे।