प्रधानमंत्री ह किहीन कि ए संघर्ष तीन हफ्ता ले जादा बेरा ले चलत हे अउ एखर प्रभाव पूरा दुनिया म पड़त हे। ओमन किहीन कि अभी के स्थिति ल देखत पूरा दुनिया ह ए लड़ई ल रोके बर बिनती करत हे। प्रधानमंत्री ह किहीन की ए गंभीर स्थिति म देस अउ विदेस म रहइया भारतीय मनके सुरक्षा सरकार के पहिली प्राथमिकता हरय। श्री मोदी ह किहीन कि लड़ई के सुरूआत ले अब तक तीन लाख पचहत्तर हजार ले जादा भारतीय मन ह देस लहुट चुके हे।
टीबी मुक्त भारत अभियान
विश्व टीबी दिवस के मउका म काली उत्तर प्रदेस के ग्रेटर नोएडा म राखे गे राष्ट्रीय कारीकरम ले केंद्रीय स्वास्थ्य मंत्री जगत प्रकाश नड्डा ह सौ दिन के-टीबी मुक्त भारत अभियान के सुरूआत करीन। श्री नड्डा ह टीबी मुक्त भारत ऐप अउ टीबी मुक्त सहरी वार्ड पहल के घलो सुभारंभ करीन। ए कारीकरम के उद्देस्य टीबी के मामला के तेजी ले पता लगाना, इलाज अउ सेवा मन म सुधार करना हे।
स्वास्थ्य अउ परिवार कल्याण मंत्रालय ह किहीन कि ए प्रयास विश्व टीबी दिवस दू हजार छब्बीस के बिसय-हां! हम टीबी को खत्म कर सकते हैं! के मुताबिक हवय।
शहीद दिवस
आज राष्ट्र ह महान स्वतंत्रता सेनानी भगत सिंह, राजगुरू अउ सुखदेव ल उंखर शहीदी दिवस उपर श्रध्दांजलि देवत हे। एमन ल बछर उन्नीस सौ इकतीस म आजे के दिन लाहौर के केंद्रीय जेल म फांसी दे दे गे रिहीस।
ए मउका म माय भारत कोति ले मेरा भारत-मेरी जिम्मेदारी थीम उपर राजधानी रईपुर के संगेसंग प्रदेस के कतकोन जघा म पदयात्रा निकाले गीस। माय भारत के राज्य निदेशक अर्पित तिवारी ह आकाशवाणी समाचार ल बतइन कि राजधानी म ए पदयात्रा तेलीबांधा स्थित मरीन ड्राइव ले शहीद भगत सिंह चौक पहुंचिस, जिंहा शहीद मन श्रध्दांजलि दे गीस।
विश्व वानिकी दिवस-कार्यशाला
विश्व वानिकी दिवस के मउका म राजधानी रईपुर म राखे गे कार्यशाला म वन अउ जलवायु परिवर्तन मंत्री केदार कश्यप ह किहीन कि प्रदेस के लोगन मनके जिनगी प्रकृति उपर आधारित हे अउ वन ल संजो के राखे के सरलग परयास करे जात हे। ओमन वन क्षेत्र म बढ़ोत्तरी, वन्य जीव के संख्या मन म बढ़ेत्तरी के संगेसंग राज्य के पहिली रामसर साइट के उपलब्धि के प्रसंसा करीन। संगेसंग विभागीय योजना मन ल चरणबध्द तरीका ले लागू करे उपर जोर दीन। कारीकरम म टीईआरआई नई दिल्ली डहार ले वन पारिस्थितिकी तंत्र सेवा के मूल्यांकन, जलवायु परिवर्तन अउ पारंपरिक ज्ञान ले जुड़े पुस्तक मन के विमोचन करे गीस।
भूमिहीन कृषि मजदूर
दीनदयाल उपाध्याय भूमिहीन कृषि मजदूर कल्याण योजना के तहत एसो प्रदेस के करीबन पांच लाख भूमिहीन हितग्राही मनके खाता म सोज्झे दस हजार रूपिया के हरेक हितग्राही मन ल दे जाही। पच्चीस मार्च के मुख्यमंत्री विष्णुदेव साय ह बलौदाबाजार म राखे गे एक ठिन कारीकरम के दउरान ए पइसा ऑनलाइन खाता म डालही। एखर बर राज्य सरकार कोति ले करीबन चार सौ छियानबे करोड़ रूपिया के प्रावधान राखे गेहे। ए सूची म बाईस हजार ले जादा बैगा अउ गुनिया परिवार घलो सामिल हे। ए योजना म अइसन गांव के परिवार मन ल सामिल करे गेहे। जिंखर मन के आय मजूरी ले होथे।
दुर्घटना
बालोद जिला के मंगचुआ थाना क्षेत्र के भंवरमरा गांव तीर पाछू रतिहा एक ठिन गाड़ी के अंतेतंते होके पलटे ले एमा बइठे दू झिन माईलोगिन के मउत होगे। उहें, अटठारा झिन मनखे घायल होगे, जेमा ले बारह झिन के हालत गंभीर बने हे। घायल मन म दू झिन लइका घलो सामिल हे। मिले जानबा के मुताबिक एक ठिन कारीकरम म सामिल होय के बाद पददेटोला गांव के बीस झिन लोगन मन लहुटत रिहीन। इही बीच ए गाड़ी ह टोला मोड़ के तीर पलट गे।
मुख्यमंत्री विष्णुदेव साय ह दुर्घटना उपर दुख जतावत मृतक के परिजन मन उपर संवेदना जताय हे। घायल मनखे मनके इलाज बर पूरा सहायता करे के निरदेस देहे।
श्रमिक-सम्मेलन
बिलासपुर म राखे गे श्रमिक सम्मेलन म हितग्राही मन के खाता म सरकार के आने-आने योजना के तहत एक करोड़ छत्तीस लाख रूपिया ले जादा के पइसा डीबीटी के माध्यम ले दे गेहे। कारीकरम म मुख्य अतिथि विधायक अमर अग्रवाल ह हितग्राही मन ल आने-आने योजना के तहत प्रतिकात्मक चेक अउ ई-रिक्सा के चाबी दीन। ओमन शासन के कल्याणकारी योजना मनके फायदा लेबर मजूर मनके पंजीयन करे उपर जोर दीन।
सुरक्षा बल-ग्रामीण संवाद
नारायणपुर जिला के कुमनार थाना क्षेत्र म भारत तिब्बत सीमा पुलिस बल-आईटीबीपी के उनतीसवां बटालियन अउ जिला पुलिस नारायणपुर कोति ले पुलिस जन संवाद अउ जनकल्याणकारी कारीकरम राखे गीस। ए कारीकरम के उद्देस्य इंहा के लोगन अउ आदिवासी समुदाय के संग बिस्वास अउ सहयोग ल बढ़िया बनाना अउ सुरक्षा के प्रति लोगन मन ल जागरूक करना हे। कारीकरम के दउरान इंहा के लोगन मन बर मुफत म स्वास्थ्य जांच अउ इलाज बर सिविर लगाय गीस। संगेसंग पुलिस अउ आईटीबीपी के अधिकारी मन ह गांव के लोगन मन ले गोठबात करके ओखर मनके समस्या ल जानिन। संगेसंग गांव के स्कूली लइका मन ल बैग, कापी अउ स्टेशनरी के संगेसंग आने जिनिस बांटे गीस।
गंगरेल-नौकायान उत्सव
धमतरी जिला के गंगरेल बांध म पहिली घांव नौकायान उत्सव के तहत महानदी रिवर बोट चैंपियनशिप के आयोजन करे गीस। मचान हाट प्वाइंट ले गंगरेल ब्लू एडवेंचर स्पोर्ट्स पाइंट तक एक हजार मीटर के दूरी म राखे गे ए प्रतियोगिता म सुघ्घर ढंग ले टीम वर्क के प्रदर्सन करे गीस। ए प्रतियोगिता म धमतरी, कांकेर अउ बालोद जिला के कुल बावन टीम मन भाग लीन। आयोजन के खास बात गांव-गंवई के महिला प्रतिभागी मनके भागीदारी रिहीस। तिर्रा गांव के चयन बाई, सुमन अउ दिनेश्वरी निधार ह पारंपरिक लकड़ी के नांव के संग प्रतियोगिता म सामिल होइन। प्रतियोगिता म पहिली स्थान म रोमार निषाद तिरी अउ जीतु निषाद दूसर स्थान म अपन जघा बनाइन। विजेता टीम मन ल समापन के मउका म पुरस्कार दे गीस। कारीकरम के सुभारंभ विधायक ओमकार साहू अउ महापौर रामू रोहरा ह करीन।
अफीम खेती
प्रदेस म अफीम के अवैध रूप ले खेती करे के मामला सरलग आगु आवत हे। रायगढ़ जिला के लैलूंगा क्षेत्र के घटगांव म घलो अफीम के खेती करत मनखे ल पकड़े गेहे। सूचना मिले के बाद पुलिस के टीम ह मउका म पहुंचके जांच करीन अउ दू झिन आरोपी मन ल गिरफ्तार करे हे। अफीम ल घटगांव म सब्जी के बाड़ी के बीच उगाय गे रिहीस। सत्रह दिन के भीतर प्रदेस म अफीम के अवैध रूप ले खेती करे के एहा पांचवां मामला हरय।
जेल-नवरात्र पर्व
आज चइत नवरात्रि के पंचमी के मउका म जम्मों देवी माता के मंदिर मन म बिसेस पूजापाठ करे जात हे। माता सेवा के संगेसंग चढ़ावा के रसम करे जात हे। उहें, प्रदेस के जम्मो जेल मन म घलो नवरात्रि के परब श्रध्दा अउ भक्तिभाव के संग मनाय जात हे।
ए मउका म कैदी मन बर बिसेस बेवस्था करे गेहे। जेल मन म करीबन दू हजार चार सौ कैदी मन ह नवरात्रि परब के उपास राखे हवय। जेमा ले दू हजार एक सौ पच्चीस पुरूष अउ दू सौ बहत्तर माईलोगिन कैदी मन सामिल हे। इंखर मन बर जेल प्रशासन कोति ले पूजापाठ के संगेसंग फलाहार के बेवस्था घलो करे गेहे।