राज्य सरकार ह निजी अस्पताल मन म कोरोना संक्रमित मरीज मनके इलाज बर रेट तय कर देहे। प्राईवेट अस्पताल मन म सुपर स्पेशयलिटी सहुलियत के आधार म एला तीन वर्ग म बांटे गेहे, जेमा ए कैटेगिरी म रईपुर, दुरूग, राजनांदगांव, बिलासपुर, कोरबा अउ रायगढ़ जिला के अस्पताल ल राखे गेहे। उहें, बी श्रेणी म सरगुजा, महासमुंद, धमतरी, कांकेर, जांजगीर-चांपा, बलौदाबाजार-भाटापारा, कबीरधाम अउ बस्तर जिला के अस्पताल आही। उहें, बांचे जिला के अस्पताल सी श्रेणी के रइही। फेर प्राईवेट अस्पताल म कोरोना संक्रमण के इलाज म खरचा होवइया पइसा ल मरीजे ह दीही। ए जम्मों अस्पताल डायग्नोसिस बर आयुष्मान भारत अउ डाॅक्टर खूबचंद बघेल स्वास्थ्य सहायता योजना के चलत निर्धारित रेट ही लीहीं।
टेली परामर्श वीडियो काॅल-सलाह
उहें, प्रदेस म बिना लक्षण अउ हल्का लक्षण वाले कोरोना संक्रमित मरीज मन बर होम आइसोलेशन म रेहे के बेरा डाॅक्टरी सलाह बर फीस तय कर दे गेहे। अइसन मरीज मन ल दिन पाछु ढाई सौ रूपिया के हिसाब ले दस दिन बर ढाई हजार रूपिया म दूरिहा ले सलाह-टेली परामर्स या वीडियो काॅल ले डाॅक्टरी सलाह दे जाही। एखर बर प्राईवेट डाॅक्टर मन कोरोना संक्रमित मरीज मन ल सलाह देके रेट उपर अपन सहमति दे दे हवय।
स्वास्थ्य विभाग के अधिकारी मन बतईन कि राज्य म कोरोना संक्रमित मरीज मनके संख्या ह सरलग बाढ़त हे, ते पाय के होम आइसोलेशन म इलाज कराय के इच्छुक बिना लक्षण वाले मन बर ए निर्णय ले गेहे।
कोरोना-मरीज
प्रदेस म कोरोना संक्रमण सरलग बाढ़ते जात हे। दुर्ग जिला म आज संझा तक एक सौ तेरह कोरोना संक्रमित नवा मरीज के पुष्टि होय हे।
ओति, महासमुंद जिला म आज समाचार लिखे जाय तक पन्द्रह झिन कोरोना पाॅजिटिव मरीज मिले हे, जेमा ले बारह मामला महासमुंदे के आय।
जांजगीर-चांपा जिला के एडिशनल एसपी कोरोना संक्रमित पाय गेहे।
ओति, कोंडगांव जिला के कोरोना संक्रमित एक झिन सियनहीन के रईपुर एम्स म इलाज के बेरा मउत होगे। उहें, कोंडगांव जिलाच म आज सोलह झिन नवा मरीज मिले हे।
ऐति, कांकेर जिला म घलो कोरोना संक्रमण ले एक झिन ग्रामीण कृषि विस्तार अधिकारी के मउत होगे हे। जिला म संक्रमण ले ए पांचवां मउत हे। उहें काली रतिहा बेरा तक इहां उन्नीस झिन मरीज के चिन्हारी होय रिहीस।
कोरोना-खबर
राजनांदगांव के निगम कार्यालय म कोरोना संक्रमित एक झिन मरीज मिले के बाद निगम कार्यालय म आम मनखे मन ल बारह सितंबर तक आय उपर रोक लगा देहे।
ओति, बिलासपुर स्थित छत्तीसगढ़ उच्च न्यायालय म पदस्थ तीन झिन कर्मी कोरोना पाॅजिटिव पाय गेहे, जेखर बाद हाईकोर्ट ल नौ सितंबर तक बंद कर दे गेहे।
उहें, महासमुंद जिला के पटेवा म कोरोना संक्रमित मरीज मनके संख्या बाढ़े बाद उहां के सेलून दुकानदार मन खुदे सेलून दुकान ल एक हफ्ता बर बंद राखे के निर्णय लेहे।
आंगनबाड़ी-निर्देश
कोरोना संक्रमण के सेती करीबन छह महीना ले बंद प्रदेस के सबो आंगनबाड़ी केन्द्र काली ले खुल जही। फेर, कंटेमेन्ट क्षेत्र म अवइया अउ जउन क्षेत्र ल जिला प्रसासन डहार ले बंद राखे के निरनय ले गेहे उहां के आंगनबाड़ी केन्द्र ल नइ खोले जाही।
राज्य सरकार डहार ले जारी आदेस मुताबिक आंगनबाड़ी केन्द्र मन ल खोले ले पहिली एला सैनिटाईज करे जात हे। संगे कोरोना संक्रमण ले बचाव संबंधी दिसा-निरदेस के पालन करे बर सुपरवाईजर, आंगनबाड़ी कार्यकर्ता अउ सहायिका मन ल प्रसिक्षण देके बेवस्था घलो करे गेहे। ए आंगनबाड़ी केन्द्र मन ल थोरिके देर बाद खोले जाही अउ ए दउरान नान्हें लइका अउ गर्भवती माईलोगिन मन ल गरम अउ तुरते पके खाना दे जाही। एखरे संगे पोषण दिवस के दउरान नान्हें लइका अउ माईलोगिन मनके मेडिकल जांच घलो करे जाही। जिला कलेक्टर डहार ले जउन आंगनबाड़ी केन्द्र मन म गरम भोजन ल बांटे बर रोक लगाय जाही, उहां आगू जइसे ही हितग्राही मन ल एक हफ्ता बर रेडी-टू ईट वितरण करे जाही।
यूनिसेफ के राज्य प्रमुख जाॅब जकारिया ह आंगनबाड़ी केन्द्र खोले के निर्णय ल सहरावत किहीन कि एखर ले कुपोषण उपर रोक लगाय म मदद मिलही।
राष्ट्रपति/प्रधानमंत्री-वीडियो कान्फ्रेंसिंग
राष्ट्रपति रामनाथ कोविंद अउ प्रधानमंत्री नरेन्द्र मोदी काली वीडियो कान्फ्रेसिंग के जरिया ले राष्ट्रीय शिक्षा नीति उपर राज्यपाल सम्मेलन के उद्घाटन सत्र ल संबोधित करही। शिक्षा मंत्रालय डहार ले होवत ए सम्मेलन के बिसय हरय ‘‘उच्च शिक्षा में परिवर्तन-राष्ट्रीय शिक्षा नीति की भूमिका‘‘। ए कारीकरम ह बिहनिया दस बजे ले संझा पांच बजे तक होही।
पोषण माह-शुभारंभ
मुख्यमंत्री भूपेश बघेल ह फेसबुक लाइव के माध्यम ले काली संझा छह बजे राष्ट्रीय पोषण माह के सुभारंभ करही। ए मउका म महिला अउ बाल विकास मंत्री अनिला भेड़िया अउ संसदीय सचिव रश्मि आशीष सिंह घलो मौजूद रइही। सुभारंभ कारीकरम म मुख्यमंत्री के संगे आने जनप्रतिनिधि अउ पोषण अभियान म सक्रिय भूमिका निभावत अधिकारी-करमचारी, स्वयंसेवी संस्था मनके प्रतिनिधि के संगेसंग आंगनबाड़ी कार्यकर्ता मन घलो भाग लीहीं।
पढ़ई तुहंर पारा-वेबिनार
कोरोना संकट बेरा स्कूल बंद होय के सेती लइका मनके पढ़ई जारी राखे खातिर चलत ‘‘पढ़ई तुंहर पारा‘‘ कारीकरम के सुचारू संचालन बर काली राज्य स्तरीय वेबिनार राखे गेहे। ए कारीकरम के चलत जउन लइका मन तीर आॅनलाइन पढ़ई बर संसाधन नइ हे, उंखर मन बर ‘‘पढ़ई तुंहर पारा‘‘ नाव ले समुदाय के सहयोग ले मोहल्ला स्कूल चलाय जात हे। ए वेबिनार म ए सामुदायिक स्कूल मन म सुघ्घर ढंग ले लइका मनके पढ़ई चालू राखे के प्रयास उपर चरचा करे जाही।
उहें, ‘‘पढ़ई तुंहर दुआर‘‘ कारीकरम के चलत राजनांदगांव विकासखंड के धीरी गांव म घलो जवान अउ किशोर लइका मन सिक्षा सारथी के रूप म पहिली ले आठवीं कक्षा तक के स्कूली लइका ल पढ़ावत हे। शिक्षा विभाग के प्रमुख सचिव डाॅक्टर आलोक शुक्ला ह आज तीन ठिन सिक्षा केन्द्र जाके अवलोकन करीन, जिहां ओमन ए जवान लइका मनके ए काम के बड़ई मारीन। फेर अतके नहीं उहां जब ओमन नान्हें लइका मन ले पढ़ई -लिखई वाले सवाल करीन त सबो लइका सही-सही जवाब घलो दीन।
यात्री बस सेवा
दुर्ग, धमधा, बेमेतरा, गंडई अउ कवर्धा रद्दा म काली ले यात्री बस सेवा सुरू हो जही। कोरोना संक्रमण पाय के अब्बड़ दिन ले यात्री बस सेवा बंद रिहीस। फेर अब सबो जिला म यात्री बस के अवई-जवई सुरू करे जात हे।
छत्तीसगढ़ यातायात महासंघ के प्रमुख विधिक सलाहकार शिवेश सिंह ह बतईन कि बस के अवई-जवई बेरा सबो यात्री मनके नाम-पता लिखे जाही। उहें, बस ल पूरा तरह ले सैनिटाईज करे के संगे यात्री मन ल घलो फेस मास्क लगाना जरूरी होही।
ईज आॅफ डुईंग बिजनेस
ईज आॅफ डुईंग बिजनेस म छत्तीसगढ़ ह देस म छठवां स्थान पाय हे। भारत सरकार के वित्त, वाणिज्य अउ उद्योग मंत्रालय ह संघरा रूप ले ईज आॅफ डुईंग बिजनेस म राज्य मन बर रैंकिंग निकाल देहे। ए रैंकिंग म आॅनलाइन लेनदेन समय-सीमा भीतरी काम पूरा करे अउ औद्योगिकी विवाद मनके निपटारा वाले बिन्दु सामिल करे गेहे।
शोभा सोनी-श्रद्धांजलि,
राजनांदगांव के पूर्व महापौर अउ राज्य समाज कल्याण मंडल के पूर्व अध्यक्ष शोभा सोनी ल श्रद्धांजलि दे बर आज राजनांदगांव म एक ठिन वर्चुअल सोक सभा राखे गीस, जेमा पूर्व मुख्यमंत्री डाॅक्टर रमन सिंह ह श्रीमती सोनी के योगदान के सुरता करत किहीन कि ओमन अपन हर दायित्व के पूरा तरह ले पालन करीन। ए कारीकरम म भाजपा के आने बड़का नेता मन घलो स्वर्गीय शोभा सोनी ल अपन श्रद्धांजलि दीन।
इहां ए बतादन कि बीते दो सितंबर के श्रीमती सोनी के कोरोना संक्रमण ले निधन होगीस।
ग्रामोद्योग-ऑनलाइन बाजार,
कोरोना संक्रमण ल देखत ई-काॅमर्स बर लोगन मनके बाढ़त रूझान ल देखत राज्य म ग्रामोद्योग जिनीस के घलो आॅनलाईन बेचई सुरू करे गीस, जेखर चलत पाछु थोरकहे दिन म पचहत्तर हजार रूपिया ले जादा के बिक्री होय हे।
ग्रामोद्योग मंत्री गुरू रूद्र कुमार ह एला सहरावत किहीन कि अब बहुते जल्दी रेडीमेड कपड़ा तुम्बाशिल्प के प्रोडक्ट अउ मैनपाट के कालीन घलो आॅनलाईन बेचे जाही।