राष्ट्रपति द्रौपदी मुर्मु ह किहीन हे कि माईलोगिन मन ह मउका अउ सहयोग मिले म हर जघा म अच्छा प्रदर्सन कर सकत हे। अंतर्राष्ट्रीय महिला दिवस के मउका म नई दिल्ली म होय एक ठिन कारीकरम म राष्ट्रपति ह किहीन कि उद्यमिता होवय या फेर कार्पोरेट जगत माईलोगिन मन ह हर जघा म आगू बाढ़त हे। ओमन ह किहीन कि भारत देस ह माईलोगिन मन के नेतृत्व वाला विकास के दिसा म तेजी ले आगू बाढ़त हे।
उहें, केंद्रीय महिला अउ बाल विकास मंत्री अन्नपूर्णा देवी ह किहीन कि केंद्र सरकार माईलोगिन मन ल सशक्त बनाय बर समग्र दृष्टिकोण के संग आगू बाढ़त हे।
प्रधानमंत्री अंतर्राष्ट्रीय महिला दिवस
प्रधानमंत्री नरेंद्र मोदी ह आज नई दिल्ली म लगभग तैंतीस हजार पांच सौ करोड़ रूपिया के कतकोन विकास परियोजना के उद्घाटन अउ सिलान्यास करीन। ए मउका म श्री मोदी ह किहीन कि राष्ट्रीय राजधानी म सुविधा अउ बुनियादी ढांचा ल सरलग मजबूत अउ विस्तारित करे जावत हे।
प्रधानमंत्री ह किहीन कि भारत, महिला सशक्तिकरण म एक नवा अध्याय लिखत हे अउ माईलोगिन देस के विकास म महत्वपूर्ण भूमिका निभावत हे। श्री मोदी ह किहीन कि भारत के महिला शक्ति ह हर जघा म नवा ऊर्जा के संग आगु बाढ़त हे अउ राष्ट्र निर्माण म जरूरी योगदान देवत हे।
अगर माईलोगिन मन ल मउका दे जाय, त कइसनो करके नवा-नवा सिध्दी हासिल कर सकत हे। मोला आज बड़ खुसी हवय कि देसभर म तीन करोड़ माईलोगिन मन ल लखपति दीदी बनाय के जउन संकल्प ले गे रिहीस ओहा पूरा हो चुके हे।
छत्तीसगढ़-अंतर्राष्ट्रीय महिला दिवस
अंतर्राष्ट्रीय महिला दिवस म छत्तीसगढ़ के कतकोन जिला म आने-आने कारीकरम के आयोजन करे गीस। बस्तर जिला म होय महतारी वंदन सम्मेलन म मुख्यमंत्री विष्णुदेव साय ह मुख्य अतिथि के रूप म सामिल होइन। ए बेरा म ओमन ह महतारी वंदन योजना के पच्चीसवां किस्त के रूप म छै सौ इकतालीस करोड़ रूपिया ले जादा के रासि माईलोगिन मनके खाता म अंतरित करीन। मुख्यमंत्री ह किहीन कि महतारी वंदन योजना प्रदेस के मातृ शक्ति के जीवन म सुरक्षा सम्मान अउ आत्म विश्वास के नवा रौसनी ले के आवत हे।
उहें, रईपुर के लोकभवन म महिला सम्मान समारोह कारीकरम म माईलोगिन मन ह फूल के होली खेलिन। ए बेरा म राज्यपाल रमेन डेका ह शिक्षा, स्वास्थ्य, पोषण, स्वच्छता अउ आदिवासी विकास के क्षेत्र म काम करइया प्रदेस के कतकोन माईलोगिन मन ल सम्मानित करीन। राज्यपाल ह किहीन कि नारी सक्ति ह ए देस के विकास के धूरी हवय अउ सरकार ह अंतिम पंक्ति के माईलोगिन मन तक विकास ल पहुंचाय बर काम करत हे। ओमन ह किहीन कि छत्तीसगढ़ सरकार ह घलो माईलोगिन मनके उत्थान अउ सशक्तिकरण बर आने-आने योजना अउ नीति विकसित करे हे।
ओति, भिलाई इस्पात संयंत्र म अंतर्राष्ट्रीय महिला दिवस म ‘‘शक्ति दू हजार छब्बीस‘‘ के आयोजन करे गीस। ए बेरा म माईलोगिन मन बर व्याख्यान अउ प्रश्नोत्तरी जइसे प्रतियोगिता के आयोजन होइस। कारीकरम म भारतीय अंतरिक्ष अनुसंधान संगठन-इसरो के वैज्ञानिक डॉक्टर आभा छाबड़ा ह विशिष्ट वक्ता के रूप म सामिल होइन।
ओति, बीजापुर जिला के कोतवाली थाना परिसर म अंतर्राष्ट्रीय महिला दिवस म होय कारीकरम म आत्मसमर्पित महिला माओवादी मन ह हिस्सा लीन।
विधानसभा सत्र
छत्तीसगढ़ विधानसभा के बजट सत्र छुट्टी के बाद काली ले फेर सुरू होवइया हे। काली ले सदन म विभागवार अनुदान मांग म चर्चा होना हे, जउन कि सत्रह मार्च तक होही। ए सत्र चलत सत्रह मार्च के छत्तीसगढ़ विनियोग विधेयक पेस करे जाही। जबकि अट्ठारा मार्च के एखर उपर चर्चा अउ पारित करे के तिथि तय करे गेहे।
‘‘अस्मिता लीग‘‘
अंतर्राष्ट्रीय महिला दिवस के मउका म आज महाराष्ट्र के छत्रपति संभाजी नगर म युवा कार्य अउ खेल राज्य मंत्री रक्षा खडसे ह ‘‘अस्मिता लीग‘‘ के सुभारंभ करीन। ए कारीकरम के चलत देसभर के दू सौ पचास ठिन जघा म एथलेटिक्स लीग के आयोजन होइस। ए आयोजन ह खेलो इंडिया के लैंगिक समानता के मिसन के हिस्सा हरय। जेखर उद्देस्य लीग अउ प्रतियोगिता के माध्यम ले माईलोगिन मन म खेल ल बढ़ावा देना हे।
ऐति, छत्तीसगढ़ के रईपुर, दुरूग, जशपुर महासमुंद अउ राजनांदगांव जिला म घलो अस्मिता लीग के आयोजन करे गीस।
रईपुर के कोटा स्थित विवेकानंद स्टेडियम म एथलेटिक्स प्रतियोगिता होइस, जेमा कतकोन आयु वर्ग म सौ मीटर, दू सौ मीटर अउ चार सौ मीटर के दउड़ होइस। जेमा पांच सौ ले जादा छात्रा अउ माईलोगिन मन ह अपन प्रतिभा देखाइन। कारीकरम के मुख्य अतिथि महापौर मीनल चौबे ह विजेता खिलाड़ी मन ल सम्मानित करीन।
माय भारत छत्तीसगढ़ के राज्य निदेसक अर्पित तिवारी ह किहीन कि माई भारत मंच के माध्यम ले हमन ह हरेक युवा ल अपन पूरा क्षमता ल पहिचाने के मउका देवत हन। खेल सिरिफ शारीरिक फिटनेस बर नो हरय, ओहा नेतृत्व लचीलापन अउ राष्ट्रीय गौरव के भावना ल विकसित करे के एक सशक्त माध्यम हरय।
उहें, दुरूग जिला के मर्रा गांव के खेलो इंडिया लघु केंद्र म घलो माईलोगिन मन बर अस्मिता लीग के आयोजन करे गीस। माई भारत के उपनिदेसक नितिन कुमार शर्मा ह बतइन कि माईलोगिन मन बर दउड़ अउ रस्साकसी जइसे कतकोन आयोजन होइस अउ ओखर मनके सम्मान घलो करे गीस।
अइसने, महासमुंद जिला के एकलव्य विद्यालय भोरिंग परिसर म अस्मिता लीग के आयोजन होइस। जिला युवा अधिकारी वसुंधरा साहू ह बतइन कि ए कारीकरम के उद्देस्य माईलोगिन मन म स्वास्थ्य, फिटनेस अउ खेल के प्रति जागरूकता बढ़ाना हे। कारीकरम के चलत तीन आयु वर्ग म दउड़ के आयोजन करे गीस।
एखर अलावा जशपुर के रणजीता स्टेडियम म होय अस्मिता लीग म डेढ़ सौ माईलोगिन अउ नोनी मन ह भाग लेत हुए अपन खेल प्रतिभा के प्रदर्सन करीन। जिला युवा अधिकारी सुमेधा पवार ह बतइन कि देसभर के चयनित दू सौ पचास जिला म जशपुर जिला ल घलो सामिल करे गे रिहीस।
पूर्व डीजीपी-निधन
छत्तीसगढ़ के पूर्व पुलिस महानिदेशक विश्वरंजन के पाछू रतिहा निधन होगे। ओमन ह पटना म एक ठिन निजी अस्पताल म आखिरी सांस लीन। ओमन ह पाछू कूछू बेरा ले बीमार चलत रिहीन।
जानबा के अनुसार विश्वरंजन ह छत्तीसगढ़ के छठवां डीजीपी रहे हे। बछर दू हजार सात म राज्य सरकार ह ओमन ल छत्तीसगढ़ पुलिस के प्रमुख बनाय रिहीन। ओमन ह लगभग चार बछर तक डीजीपी के पद म रिहीन।
कोरिया-जल महोत्सव
कोरिया जिला के बैकुंठपुर विकासखंड के जमजीरा गांव म आज ले जल महोत्सव के सुभारंभ करे गीस। कारीकरम के उद्देस्य ग्राम पंचायत मन ल जल आपूर्ति संपत्ति के औपचारिक हस्तांतरण, जल गुणवत्ता परीक्षण अउ निगरानी ल मजबूत करे के संगेच सामुदायिक भागीदारी के माध्यम ले सुरक्षित पेयजल सुनिश्चित करना हे।
कार्यपालन अभियंता मनोज ठाकुर ह बतइन कि केंद्रीय जल शक्ति मंत्रालय ेकोति ले बाईस मार्च तक चलइया ए जल महोत्सव म आम लोगन मन अपन भागीदारी निभाही। सुभारंभ कारीकरम के दउरान जल अर्पण दिवस मनात हुए जागरूकता रैली घलो निकाले गीस। संगेसंग ग्रामीण मन ल जल संरक्षण अउ साफ पिये के पानी के महत्व के बारे म जानकारी दे गीस।
संक्षिप्त समाचार
– मुख्यमंत्री विष्णुदेव साय ह पूर्व लोकसभा सांसद स्वर्गीय दिलीप िंसंह जुदेव के जयंती के मउका म ओमन ल श्रध्दांजलि दीन।
– बस्तर जिला के कलचा गांव म होय मड़ई म पाछू रतिहा दू झिन जवान लइका मनके हत्या होगे। ए मामला म पुलिस ह दू झिन युवक मन ल गिरफ्तार करे हे।
– मोहला-मानपुर जिला क बागडोंगरी म एक बघवा के गांव म आय ले लोगन म दहसत हे। वन विभाग ह सबो मन ल सतर्क रहे बर कहे हे।