छत्तीसगढ़ के दू सीट समेत दस राज्य के सैंतीस राज्यसभा सीट बर नामांकन पत्र दाखिल करे के आज आखिरी दिन रिहीस। भारतीय जनता पार्टी के प्रत्यासी लक्ष्मी वर्मा ह विधानसभा परिसर म नामांकन दाखिल करीन। ए दउरान मुख्यमंत्री विष्णुदेव साय, भाजपा अध्यक्ष किरण सिंहदेव अउ वरिष्ठ विधायक धरमलाल कौशिक प्रस्तावक बनिन। नामांकन दाखिल करे बर विधानसभा पहुंचे म लक्ष्मी वर्मा के मुख्यमंत्री विष्णुदेव साय, भाजपा अध्यक्ष किरण िंसंहदेव, केंद्रीय राज्यमंत्री तोखन साहू, उपमुख्यमंत्री विजय शर्मा, सांसद बृजमोहन अग्रवाल समेत कैबिनेट मंत्री अउ विधायक ह सुवागत करीन।
उहें, कांग्रेस उम्मीदवार फूलोदेवी नेताम ह घलो आज विधानसभा परिसर म नामांकन दाखिल करीन। ए दउरान नेता प्रतिपक्ष डॉक्टर चरणदास महंत, कांग्रेस के प्रदेस अध्यक्ष दीपक बैज अउ विधायक उमेश पटेल समेत कांग्रेस के कतकोन विधायक अउ नेता मौजूद रिहीन।
ओति, बिहार के मुख्यमंत्री अउ जनता दल यूनाइटेड अध्यक्ष नीतिश कुमार ह आज राज्यसभा चुनाव बर नामांकन पत्र दाखिल करीन हे। नामांकन पत्र के जांच काली छै मार्च के होही। प्रत्यासी नौ मार्च तक अपन नांव वापिस ले सकत हे। वोट सोलह मार्च के डारे जाही अउ इही दिन नतीजा घलो घोसित होही।
प्रधानमंत्री-रायसीना डायलॉग
प्रधानमंत्री नरेंद्र मोदी आज नई दिल्ली म रायसीना डायलॉग के ग्यारहवां संस्करण के उद्घाटन करही। फिनलैंड के राष्ट्रपति डॉक्टर अलेक्जेंडर स्टब उद्घाटन सत्र म माई पहुना के रूप म सामिल होही अउ गोठबात करही। रायसीना डायलॉग भू राजनीति अउ भू अर्थशास्त्र म भारत के प्रमुख सम्मेलन हे जउन अंतरराष्ट्रीय समुदाय के आगु अवइया सबले चुनौतीपूर्ण समस्या के समाधान बर प्रतिबध्द हवय। तीन दिवसीय ए सम्मेलन म एक सौ दस देस के प्रतिनिधि भाग लिही, जेमा मंत्री, पूर्व राष्ट्राध्यक्ष अउ सरकार प्रमुख, संसद सदस्य, सैन्य कमांडर अउ उद्योग जगत के लोगन सामिल हे। एसो के बिसय संस्कार-दृढ़ता सामांजस्य, उन्नति हरय। ए सम्मेलन डिजीटल प्लेटफार्म म देखे जा सकत हे।
गृहमंत्री-जनगणना
केंद्रीय गृहमंत्री अमित शाह आज नई दिल्ली म चार डिजीटल उपकरण के सुभारंभ करीन। ए उपकरण म हाउसलिस्टिंग ब्लाक क्रिएटक वैब एप्लीकेशन, एचएलओ मोबाइल एप्लीकेशन, स्व-गणना पोर्टल अ जनगणना प्रबंधन निगरानी प्रणाली पोर्टल सामिल हे। गृह मंत्रालय ह केहे हे कि उन्नत कम्प्यूटिंग विकास केंद्र ह देसभर म गणना काम ल सरल बनाय बर ए उन्नत डिजीटल प्लेटफार्म बनाय हे। श्री शाह ह ए मउका म बछर दू हजार सत्ताईस के जनगणना खातिर महिला अउ पुरूष के प्रतीक सुभंकर-प्रगति और विकास के घलो अनावरण करीन।
मुख्यमंत्री-नीति आयोग अध्यक्ष पदभार
मुख्यमंत्री विष्णुदेव साय आज नवा रईपुर के नीति भवन म छत्तीसगढ़ राज्य नीति आयोग के नवा बने उपाध्यक्ष गणेश शंकर मिश्रा ह पदभार ग्रहण समारोह म संघरीन। ए मउका म मुख्यमंत्री ह किहीन कि राज्यनीति आयोग प्रदेस के दीर्घकालिक विकास विजन, साक्ष्य आधारित नीति निर्माण अउ आने-आने विभाग के मेलजोल ले छत्तीसगढ़ के विकास ल नवा दिसा अउ गति देवइया एक महत्वपूर्ण संस्थान हवय। ओमन किहीन कि भविष्य के जरूरत अउ चुनौती ल धियान म राखत विकास के योजना अउ रणनीति तियार करे म आयोग के महत्ता के भूमिका होही। श्री साय ह किहीन कि नीति आयोग कोति ले चलाय जात आकांक्षी जिला के कारीकरम देस के पिछड़ा क्षेत्र के विकास म महत्वपूर्ण भूमिका निभावत हे। जेखर बने परभाव छत्तीसगढ़ के आकांक्षी जिला मन म देखे बर मिलत हे। मुख्यमंत्री ह किहीन कि आयोग कोति ले मिले सुझाव ल राज्य सरकार प्रभावी ढंग ले लागू करे के परयास करही।
माओवादी मुठभेड़
दंतेवाड़ा-बीजापुर सीमा क्षेत्र के जंगल म पुलिस अउ माओवादी मनके बीच होय मुठभेड़ म एक सशस्त्र माओवादी मारे गेहे। मारे गे माओवादी के चिन्हारी भैरमगढ़ एरिया कमेटी के एसीएम राजेश पुनेम के रूप म करे गेहे, जेखर उपर पांच लाख रूपिया के इनाम घोसित रिहीस। पुलिस के मुताबिक गीदम थाना क्षेत्र के गांव गुमलनार गिरसापारा अउ नेलगोड़ा के बीच जंगल म माओवादी मन कोति ले लुकाय गे हथियार के सूचना मिले रिहीस। एमा डिस्ट्रिक्ट रिजर्व गार्ड-डीआरजी अउ बस्तर फाइटर्स के जवान मन ल रवाना करे गीस। इही दउरान माओवादी मन ह सुरक्षाबल उपर फायरिंग सुरू कर दीन। जवान मन ह जवाबी कार्रवाई करीन, जेमा एक माओवादी मारे गेहे। घटना के जघा ले मारे गे माओवादी के शव के संगेसंग बड़ मात्रा म नक्सली जिनिस बरामद करे गेहे, जेमा एक एसएलआर रायफल, एक इंसास रायफल, एक पिस्टल वॉकीटॉकी सेट, एसएलआर अउ इंसास के मैग्जीन, जिंदा कारतूस अउ आने जिनिस सामिल हे।
गांजा तस्करी-आरक्षक गिरफ्तार
जशपुर पुलिस ह करीबन चौबीस किलो गांजा संग दू झिन तस्कर अउ दू पुलिस आरक्षक ल गिरफ्तार करे हे। पुलिस के मुताबिक मुखबिर ले मिले सूचना म विवेकानंद कालोनी म रहइया रवि विश्वकर्मा के घर म छापा मारे गीस। तलासी के दउरान खोली म रखाय एक पेटी ले चौबीस पैकेट गांजा बरामद करे गीस। पूछताछ म रवि विश्वकर्मा ह पुलिस ल बतइन कि गांजा ओला सुनील भगत ह पइसा के बदला अपन घर म राखे बर दे रिहीस। एखर बाद पुलिस ह मुख्य आरोपी सुनील भगत ल गिरफ्तार कर लीस। मुख्य आरोपी ह पूछताछ के दउरान पुलिस ल बतइन कि गांजा तस्करी म दू झन आरक्षक घलो सामिल हे। ए आरक्षक तपकरा थाना म पदस्थ धीरेन्द्र मधुकर अउ आरक्षक अमित त्रिपाठी हे। वरिष्ठ पुलिस अधीक्षक डॉक्टर लाल उमेंद सिंह ह बतइन कि तस्करी म दूनों आरक्षक ल गिरफ्तार करके न्यायिक रिमांड म जेल भेज दे गेहे।
राज्यपाल-बैगा जनजाति मुलाकात
राज्यपाल रमेन डेका ह आज अपन बिलासपुर दउरा के दउरान कोटा विकासखंड के शिवतराई पहुंचके बैगा अउ बिरहोर जनजाति के लोगन ले भेंट करत उंखर जीवनसैली, पारंपरिक संस्कृति अउ शासन के योजना ले मिलत फायदा के जानकारी लीन। ए बेरा म राज्यपाल ह तीरंदाजी खिलाड़ी मन ल प्रोत्साहित करत हरेक खिलाड़ी मन ल पांच-पांच हजार रूपिया देके घोसना करीन। राज्यपाल ह करका के लखपति दीदी प्रमिला बैगा ले गोठबात करीन। ओह बताइस कि ओमन गोंदा स्व-सहायता समूह ले जुड़े हे। समूह के सदस्य रश्मि मरावी ह बतइन कि उंखर समूह कोति ले सिलाई मसीन के काम आचार, पापड़ बनाय समेत आने कतकोन काम करे जावत हे। बैगा महिला मन कोति ले बांस ले बने कतकोन उपयोगी जिनिस तियार करे जावत हे। राज्यपाल ह आयुषमान कार्ड, महतारी वंदन योजना, प्रधानमंत्री आवास योजना, रासन पीएम जनमन योजना समेत आने योजना ल चलाय के जानकारी लीन। औरापानी के मंगली ह बतइन कि ओमन ल प्रधानमंत्री आवास योजना के फायदा मिले हे। राज्यपाल ह किहीन कि बैगा अउ बिरहोर समाज के समृध्द संस्कृति अउ परंपरा उंखर चिन्हारी हे। ओमन लोगन ले अपन संस्कृति ल सहेज के राखे के बात किहीन।
हाथी हमला-मंडी प्रभारी मौत
कोरबा जिला के कुदमुरा उपार्जन केंद्र म रतिहा कुन एक हाथी के हमला म मंडी प्रभारी के मउत होगे। उहें, मृतक के पत्नि ह भाग के अपन जान बचाइस। खबर के मुताबिक रतिहा एक हाथी उपार्जन केंद्र परिसर म खुसर गे अउ झोपड़ी ले नकसान पहुंचात भीतरी सुते राजेश कुमार उपर हमला कर दीस। हमला म ओखर मउकच म मउत होगे। मउत होय मनखे रजगामार क्षेत्र के रहवइया बताय जात हे। घटना के सूचना मिलतेच वन विभाग के टीम मउका म पहुंच के जांच सुरू कर देहे।
अउ अब जानन मौसम के हाल…
प्रदेस म गर्मी जनावत हे। पाछू कुछ दिन ले सरलग तापमान म बढ़वार होवत हे। मौसम विभाग के मुताबिक प्रदेस म अवइया तीन दिन म अधिकतम तापमान म करीबन दू ले तीन डिग्री सेल्सियस बढ़वार होय के संभावना हरय।
अउ अब थोरकुन समाचार सार म –
– मुख्यमंत्री विष्णुदेव साय ह जशपुर के वरिष्ठ सामाजिक कार्यकर्ता अउ लोकतंत्र सेनानी महावीर प्रसाद जैन के निधन म दुख जतइन हे।
– राज्यपाल रमेन डेका ले कुशाभाऊ ठाकरे पत्रकारिता अउ जनसंचार विश्वविद्यालय के कुलपति प्रोफेसर डॉक्टर मनोज दयाल ह सौजन्य भेंट करीन।
अउ
– प्रधानमंत्री भारतीय जन औषधि परियोजना के मउका म होवइया बिसेस कारीकरम म काली बिहनिया रईपुर के फूल चौक ले पदयात्रा निकाले जाही। उहें, सात मार्च के रईपुर के कोटा म जन औषधि दिवस के आयोजन करे जाही।