राष्ट्रपति-शिक्षक सम्मान
आज शिक्षक दिवस के मउका म राष्ट्रपति रामनाथ कोविंद ह देस के सर्वश्रेेष्ठ सैंतालीस झन सिक्षक मन ल उंखर योगदान बर राष्ट्रीय पुरस्कार प्रदान करीन। एमा छत्तीसगढ़ के दुरूग जिला के सासकीय उच्चतर माध्यमिक विद्यालय जेवरा-सिरसा के व्याख्याता सपना सोनी घलो सामिल हे।
राष्ट्रपति ह वीडियो कान्फ्रेंसिंग के माध्यम ले पुरस्कार देके बाद किहीन कि सिक्षक वास्तविक राष्ट्र निर्माता हे। जउन मन ह लइका मनके चरित्र के निर्माण के आधार तैयार करथे, जेखर ले लइका मन देस के जागरूक नागरिक बन सकय।
ऐति, छत्तीसगढ़ ले राष्ट्रीय सिक्षक सम्मान लेवइया जेवरा-सिरसा के व्याख्याता सपना सोनी ह राज्य ले एकमात्र सिक्षिका हवय। उंखर चयन विज्ञान के क्षेत्र म अध्ययन अउ अध्यापन काम म सरलग करे गे नवाचार के सेती होय हे। ओमन ह सिक्षा ल परंपरागत प्रणाली ले हट के गतिविधि म आधारित, प्रयोगात्मक अउ व्यवहारिक बनाईन हे।
राष्ट्रपति-वीडियो कान्फ्रेंसिंग
राष्ट्रपति रामनाथ कोविंद ह ‘‘नई शिक्षा नीति‘‘ बिसय उपर सबो राज्य के राज्यपाल मन संग अवइया सात सितंबर के वीडियो कान्फ्रेंसिंग के माध्यम ले गोठबात करही। ए कारीकरम बिहनिया दस बजे ले संझा पांच बजे तक चलही, जेमा प्रधानमंत्री नरेन्द्र मोदी अउ केन्द्रीय सिक्षा मंत्री रमेश पोखरियाल निशंक घलो मौजूद रइही। वीडियो कान्फ्रेंसिंग म छत्तीसगढ़ के राज्यपाल अनुसुईया उइके के अलावा सबो राज्य के राज्यपाल, उप राज्यपाल अउ कतकोन विश्वविद्यालय के कुलपति मन सामिल होही।
हादसा-मौत
राजधानी रईपुर तीर आज होय एक ठिन सड़क दुर्घटना म सात झिन मजदूर मनके मउत होगे। उहें, सात झिन दूसर मजदूर मन गंभीर रूप ले घायल होगे हवय, जउन मन ल मेडिकल कालेज अस्पताल रईपुर म भर्ती कराय गे हवय।
मिले जानकारी के अनुसार मजदूर मन ले भरे एक ठिन बस ह ओड़िशा के गंजाम जिला ले गुजरात के सूरत सहर जावत रिहीन। इही दउरान ए बस ह रईपुर के मंदिर हसौद तीर आगू ले आवत एक ठिन टरक ले टकरा गे। ए हादसा म छह झिन मजदूर मनके मउकाच म मउत होगे। उहें, एक झिन दूसर मजदूर ह अस्पताल ले जावत खानी रस्ता म खतम होगे। बस म करीबन सत्तर झिन मजदूर बइठे रिहीन।
राज्यपाल अनुसुईया उइके अउ मुख्यमंत्री भूपेश बघेल ह सड़क हादसा म मजदूर मनके मउत उपर गहरा दुख जताईन हे अउ घायल मनके जल्दी स्वस्थ होय के कामना करे के संग मुख्यमंत्री ह घायल मन ल बने उपचार अउ मदद देवाय के निरदेस अधिकारी मन ल दीन हे।
ओति, बस्तर जिला म होय सड़क दुर्घटना म दू झिन सिक्षक मनके मउत होगे मिले जानकारी के अनुसार ए दूनों सिक्षक मन एक ठिन मोटर साइकिल ले कोंडागांव जावत रिहीन। इही दउरान भानपुरी के तीर आगू ले आवत एक ठिन टरक ह ए मन ल अपन चपेट म ले लीस। ए हादसा म दूनों सिक्षक मनके मउकाच म मउत होगे। घटना के बाद टरक चालक ह फरार होगे। भानपुरी पुलिस ह टरक ले जब्त करके जांच म जुट गे हवय।
कोरोना-मरीज
प्रदेस म कोरोना संक्रमित मरीज मनके संख्या बाढ़े के सिलसिला सरलग जारी हे। दुरूग जिला म आज संझा तक एक सौ दो नवा कोरोन संक्रमित मरीज मनके पुष्टि होय हे। एमा दुरूग के महावीर कालोनी ले एके परिवार के चार अउ तकियापारा ले एके परिवार के तीन झिन सदस्य संक्रमित पाय गेहे।
ओति, महासमुंद जिला म बसना अउ पटेवा थाना के पुलिस अधिकारी अउ कमरचारी मन कोरोना पाॅजिटिव पाय गेहे, जेखर सेती थाना मन ल सील कर दे गे हवय। अब बसना थाना के संचालन सरायपाली अउ पटेवा थाना के संचालन पिथौरा थाना ले करे जाही। पुलिस अधीक्षक प्रफुल्ल ठाकुर ह बतईन कि बसना थाना के तीस एसआई, दू एएसआई, चार प्रधान आरक्षक अउ पन्द्रह झन आरक्षक मन ल होम आइसोलेट करे गे हवय। अइसने, पटेवा थाना के छह झिन पुलिसकर्मी मन कोरोना पाॅजिटिव पाय गे हवय।
इही जिला के सरायपाली के सेंट्रल बैंक के एक झिन करमचारी के कोरोना संक्रमित पाय जाय के सेती बैंक ल अवइया चार दिन बर बंद कर दे गे हवय। जरूरी कामकाज, बलौदा अउ तोरेसिन्हा साखा ले करे जा सकत हे।
ओति, राजनांदगांव म नगर निगम के आॅडिटोरियम ल कोरोना मरीज मनके जांच बर नवा केन्द्र बनाय गे हवय। अब सहर म कोरोना के जांच बर दू ठिन केन्द्र बन गे हवय। उहें, जिला के खैरागढ़ क्षेत्र म पाछु तीन दिन म पच्चीस झन नवा कोरोना संक्रमित मरीज मनके पहिचान करे गे हवय।
राज्यपाल-स्वस्थ
राज्यपाल अनुसुईया उइके ह पूर्ण रूप ले स्वस्थ हवय। उंखर कोराना जांच रिपोर्ट ह निगेटिव आय हे। ओमन ह राजभवन के कोनों-कोनों कर्मचारी मन के कोरोना संक्रमित होय के पुष्टि के बाद सावधानी के तौर म खुद ल क्वारेंटाइन करे हे।
आईसीएमआर-परामर्श
भारतीय आयुर्विज्ञान अनुसंधान परिषद-आईसीएमआर ह कोविड-नाइंटीन जांच के बारे म नवा सलाह जारी करे हे, जेमा लोगन के मांग म जांच के सुविधा दे जाय के बात केहे गे हवय। परिषद ह आने-आने देस या भारत के आने-आने राज्य के यात्रा करइया लोगन के मांग म जांच करे के सलाह दीन हे, जेखर ले प्रवेश बिन्दु म निगेटिव कोविड परीक्षण जरूरी बनाय जा सकय। एमा केहे गे हवय कि राज्य सरकार मन ह मांग होय म परीक्षण के सुविधा दे जाय के तरीका ल सरल बना सकत हे। भारत म कोरोना संक्रमण बर बने कार्यनीति ले जुड़े परामर्स म केहे गे हवय कि राज्य मनके स्वास्थ्य विभाग ह एमा जरूरत के मुताबिक संसोधन कर सकत हे।
परिषद म सुझाव दे गे हवय कि कोविड निषिद्ध क्षेत्र म सत-प्रतिसत लोगन के एंटीजन परीक्षण करे जाना चाही।
माओवादी-ग्रामीण हत्या
बीजापुर जिला म माओवादी मन ह चार झिन ग्रामीण मनके हत्या कर दीन हे। बस्तर आई.जी. सुंदरराज पी. ह घटना के पुष्टि करत बतईन कि गंगालूर थाना क्षेत्र ले दू दिन पहिली माओवादी मन ह मेटापाल अउ पुसनार ले बीस ले जादा ग्रामीण मनके अपहरण कर ले रिहीन। एमा ले चार झिन ग्रामीण मनके पाछु रतिहा जन अदालत लगा के धारदार हथियार ले हत्या कर दे गीस अउ करीबन सोलह झन ग्रामीण मन ल चेतावनी देके रिहा कर दे गीस। जिला के पुलिस अधीक्षक कमलोचन कश्यप ह बतईन कि गंगालूर थाना म पुसनार निवासी दू झिन ग्रामीण मनके हत्या के रिपोर्ट दर्ज करे गे हवय।
इही बीच, आईजी सुंदरराज पी. ह एक ठिन प्रेस विज्ञप्ति म किहीन हे कि माओवादी मन डहार ले मुखबिर के सक म निरदोस ग्रामीण मन ल मारना उंखर कमजोरी के संकेत हे। आई.जी. ह किहीन कि पाछु कुछेक महीना ले बस्तर संभाग म माओवादी मनके खिलाफ चलाय जावत अभियान के दउरान सुरक्षा बल ह माओवादी मनके कतकोन कैम्प ल ध्वस्त करीन हे अउ मुठभेड़ कतकोन माओवादी मन ह मारे गेहे। एखर अलावा, कतकोन माओवादी मन ह आत्मसमर्पण कर के समाज के मुख्यधारा म सामिल घलो होईन हे।
ओमन किहीन कि बस्तर क्षेत्र म कोरोना संक्रमण अउ बाढ़ के स्थिति म घलो सड़क, पुल-पुलिया अउ दूसर जरूरी सुविधा ग्रामीण मन ल देवाय जात हे, जेखर ले सासन-प्रसासन अउ सुरक्षा बल के प्रति ग्रामीण मनके विश्वास बाढ़े हे।
स्पेशल गाड़ी-परिचालन
दक्षिण पूर्व मध्य रेलवे डहार ले मेडिकल, इंजीनियरिंग अउ प्रतियोगी परीक्षा संघरा दूसर जरूरी काम बर यात्रा करइया यात्री मनके सुविधा ल देखत तीन ठन बिसेस गाड़ी चलाय जावत हे। एमा ले दू गाड़ी दुरूग-अंबिकापुर-दुरूग अउ रईपुर-कोरबा-रईपुर ह मंडल के आने-आने स्टेसन ले होके निकलही। ए दूनों गाड़ी मन ह आरक्षित हे। जनरल कोच बर घलो सेकेंड सीटिंग के आरक्षण करे जावत हे।
सबो स्टेसन म यात्री मनके टिकिट चेकिंग के बाद प्रवेस पत्र के संग प्रवेस दे जाही। एखर अलावा, थर्मल स्क्रीनिंग अउ दूसर मेडिकल जांच करे के बाद यात्री मन ल यात्रा के अनुमति दे जाही।
मुख्यमंत्री-बैठक
मुख्यमंत्री भूपेश बघेल के अगुवई म छत्तीसगढ़ जनजातीय सलाहकार परिषद के बइठका अवइया सात सितंबर के मुख्यमंत्री निवास कार्यालय म वीडियो कान्फ्रेंसिंग के माध्यम ले होही।
अइसने, अनुसूचित जाति, अनुसूचित जनजाति अधिनियम म बनाय गे राज्य स्तरीय सतर्कता अउ माॅनिटरिंग समिति के बइठका घलो मुख्यमंत्री के अगुवई म सात सितंबर के वीडिया कान्फ्रेंसिंग के माध्यम ले होही।
मौसम
मौसम विभाग ह अवइया चैबीस घंटा के दउरान प्रदेस म एक-दू जघा म भारी बरसा होय के अउ आकाशीय बिजली गिरे के चेतावनी दीन हे। मौसम विभाग के मुताबिक एक ठिन मानसून द्रोणिका अमृतसर के पूर्व दिशा कोति असम ले होवत अरूणाचल प्रदेस तक बने हे। उहें, एक ठिन चक्रवाती घेरा दक्षिण-पश्चिम उत्तरप्रदेश अउ ओखर तीर-तखार के डेढ़ किलोमीटर के उंचाई म बने हे। एखर असर ले प्रदेस म बरसा के स्थिति बन गे हवय। अवइया दू दिन के दउरान दुरूग, रईपुर, अउ बस्तर संभाग म कोनों-कोनो जघा भारी बरसा हो सकत हे।
इही बीच, आज राजधानी रईपुर, दुरूग अउ बस्तर संभाग के कतकोन जिला म बरसा होय हे। खासकर दंतेवाड़ा, बीजापुर, बस्तर अउ राजनांदगांव जिला म तेज बरसा होय के खबर हे।