श्री कश्यप ह किहीन कि प्रदेस के कुल भौगोलिक क्षेत्र के करीब चवालीस प्रतिशत क्षेत्र वन ले आच्छादित हरय। भारतीय वन सर्वेक्षण संस्थान कोति ले दिसंबर दू हजार चौबीस म प्रकासित प्रतिवेदन के अनुसार छत्तीसगढ़ डहार ले वन अउ वृक्ष आवरण म सकल वृद्धि लगभग छह सौ तिरासी वर्ग किलोमीटर दरज करे गेहे। ‘एक पेड़ मां के नाम‘‘ अभियान के तहत पाछु दू बछर म छत्तीसगढ़ म सात करोड़ ले जादा पौधा लगाय गेहे। वन मंत्री ह यहू बतईन कि प्रदेस म वन्यजीव के संरक्षण बर हर तरह के प्रयास करे जात हे। राज्य म बाघ के संख्या बाढ़के पैंतीस हो गेहे। राजकीय पशु वन भैंसा अउ राजकीय पक्षी पहाड़ी मैना के संरक्षण बर काम करे जात हे।
श्री कश्यप ह परिवहन विभाग ले जुड़े योजना के जानकारी देवत बतईन कि मुख्यमंत्री ग्रामीण बस योजना के तहत अब तक उनहत्तर चयनित रद्दा म बस के संचालन करे जात हे। एखर ले चार सौ पचास नवा गांव तक पहिली घांव यात्री बस सुविधा पहुंचत हे। अवइया बछर म दू सौ नवा बस संचालित करे के योजना हे।
औद्योगिक संबंध संहिता संशोधन विधेयक
लोकसभा ह आज औद्योगिक संबंध संहिता संशोधन विधेयक दू हजार छब्बीस पारित कर देहे। ए विधेयक औद्योगिक संबंध संहिता दू हजार बीस म संसोधन करथे।
चर्चा के उत्तर देत केन्द्रीय श्रम अउ रोजगार मंत्री मनसुख मांडविया ह किहीन कि सत्रह राष्ट्रीय श्रम संगठन ह कहे हे श्रम संहिता श्रमिक मनके हित म लागू करे गेहे। ओमन किहीन कि कुछेक स्ांगठन मन ह ए कानून के विरोध करे हे। श्री मांडविया ह किहीन कि श्रम संहिता वैधानिक समर्थन के साथ न्यूनतम मजदूरी लागू करथे अउ कोनो भी राज्य ल निर्धारित न्यूनतम मजदूरी ले क मजदूरी तय करे के अनुमति नइ होही। श्री मांडविया ह किहीन कि संहिता पुरूष अउ महिला मन बर समान वेतन के गारंटी देथे अउ श्रमिक मन ल समय उपर वेतन भुगतान सुनिश्चित करथे। ओमन किहीन कि श्रम संहिता के अंतर्गत चालीस साल ले जादा आयु के जम्मों श्रमिक मन ल साल म एक बार अनिवार्य स्वास्थ्य जांच कराना होही। एक सर्वेक्षण के हवाला देवत श्री मांडविया ह किहीन कि श्रम कानून तृतीय अउ चतुर्थ श्रेणी के सहर मन म रोजगार के अवसर पैदा करे म सहायक होही।
विश्व रेडियो दिवस-कार्यक्रम
काली विश्व रेडियो दिवस हरय। ए मउका म प्रसार भारती अउ यूनेस्को के संयुक्त तत्वावधान म काली रईपुर म एक ठिन विशेष कार्यक्रम के आयोजन करे जाही। कार्यक्रम म मुख्य अतिथि के रूप म छत्तीसगढ़ के मुख्यमंत्री विष्णुदेव साय सामिल होही। उहें, यूनेस्को के प्रतिनिधि, प्रसार भारती अउ आकाशवाणी के वरिष्ठ अधिकारी अउ आने-आने क्षेत्र के विशेषज्ञ घलो कार्यक्रम म हिस्सा लीहीं।
ए बछर विश्व रेडियो दिवस के थीम ‘‘रेडियो और कृत्रिम बुद्धिमत्ता‘‘ राखे गेहे। ए थीम के अंतर्गत रेडियो प्रसारण बर कृत्रिम बुद्धिमत्ता के नवाचारपूर्ण उपयोग, सामग्री निर्माण म एआई के भूमिका श्रोता मन तक प्रभावी पहुंच अउ तकनीकी संगेसंग नैतिक चुनौती उपर चर्चा करे जाही। कार्यक्रम म ऑडियो विजुअल प्रस्तुतीकरण, परिचर्चा सत्र, विशेषज्ञ पैनल चर्चा आदि ल सामिल करे गेहे, जेखर उद्देश्य रेडियो माध्यम ल तकनीकी रूप ले सशक्त, समावेशी अउ भविष्य उन्मुख बनाना हे। ए कार्यक्रम सूचना अउ प्रसारण मंत्रालय, प्रसार भारती अउ आकाशवाणी महानिदेशालय के सहयोग ले आकाशवाणी रायपुर डहार ले आयोजित करे जाही।
मैनपाट महोत्सव
सरगुजा जिला के मैनपाट म काली ले तीन दिन के मैनपाट महोत्सव के आयोजन करे जाही। ए महोत्सव के शुभारंभ मुख्यमंत्री विष्णुदेव साय करही। उहें, कार्यक्रम के अध्यक्षता पर्यटन मंत्री राजेश अग्रवाल करही। पन्द्रह फरवरी तक चलइया ए महोत्सव के दौरान लोकगीत अउ संगीत के अद्भूत संगम देखे बर मिलही।
महोत्सव के पहिली दिन काली भोजपुरी अभिनेता मनोज तिवारी प्रस्तुति दीहीं। उहें, छत्तीसगढ़ी गायक सुनील सोनी के अलावा ओड़िशा के प्रसिद्ध छऊ नृत्य के घलो प्रस्तुति होही। चौदह फरवरी के छत्तीसगढ़ के लोक गायिका अलका चंद्राकर अउ इंडियन आयडल फेम वैशाली रायकवार अपन कार्यक्रम पेश करही। महोत्सव के तीसरा अउ आखिरी दिन पन्द्रह फरवरी के बॉलीबुड गायिका कनिका कपूर अउ रायगढ़ घराना के कत्थक नृत्यांगना ज्योतिश्री वैष्णव के संघरा गायक आयुष नामदेव अपन प्रस्तुति दीही।
माओवादी-स्मारक ध्वस्त
बीजापुर जिला म आज सुरक्षा बल ह राज्य मार्ग तिरसठ म सड़क के नीचे माओवादी कोति ले लगाय गे तीस किलो वजनी आईईडी बरामद करे हे। केंद्रीय रिजर्व पुलिस बल के बम निरोधी दस्ता ह ए आईईडी ल निष्क्रिय कर दीस।
उहें, सुकमा जिला म माओवादी डहार ले बनाय गे दू स्मारक ल आज सुरक्षा बल ह ध्वस्त कर देहे। केंद्रीय रिजर्व पुलिस बल-सीआरपीएफ के जवान मन ल माओवादी विरोधी अभियान के दउरान डब्बाकोंटा इलाका के पिड़मेल म माओवादी मनके स्मारक होय के जानकारी मिले रिहीस। एखर बाद सुरक्षा बल ह बुलडोजर के मदद ले ए स्मारक ल धरासायी कर दीस।
केंद्रीय जेल-आईएसओ सर्टिफिकेट
छत्तीसगढ़ के चार केंद्रीय जेल-रईपुर, दुरूग, बिलासपुर अउ अंबिकापुर ल अंतरर्राष्ट्रीय स्तर के आईएसओ सर्टिफिकेट मिले हे। केंद्रीय जेल म राष्ट्रीय अउ अंतरर्राष्ट्रीय मानक के अनुरूप गुणवत्ता अउ कार्यप्रणाली सुनिश्चित करे के उद्देस्य ले आईएसओ सर्टिफिकेट के प्रक्रिया सुरू करे गे रिहीस। एखर तहत आईएसओ सर्टिफिकेट प्रदान करइया संस्था ह केंद्रीय जेल रईपुर, दुर्ग, बिलासपुर अउ अंबिकापुर, के गहन निरीक्षण करीन। निरीक्षण म चारों जेल प्रबंधन जम्मों निर्धारित मानक उपर खरा उतरीन। एखर बाद ग्यारा फरवरी के प्रमाणन संस्था ह केंद्रीय जेल रईपुर, दुर्ग, बिलासपुर अउ अंबिकापुर के जेल अधीक्षक मन ल आईएसओ सर्टिफिकेट दे गीस।
मुख्यमंत्री-पत्रकार मुलाकात
मुख्यमंत्री विष्णुदेव साय ह आज रईपुर म सिक्किम राज्य ले अध्ययन भ्रमण बर पहुंचे पत्रकार मन के दल ले भेंटकरके गोठबात करीन अउ उनला छत्तीसगढ़ के बिसेषता के बारे म बतइन। मुख्यमंत्री ह पत्रकार दल के सदस्य दल मन ल राजकीय गमछा भेंट करके ओमन के सुवागत करीन। ए बेरा म मुख्यमंत्री ह किहीन कि छत्तीसगढ़ प्राकृतिक संसाधन ले भरपूर प्रदेस हे अउ एला समृध्द सुरक्षित अउ विकसित बनाय बर राज्य सरकार काम करत हे।
आयकर विभाग-छापा
आयकर विभाग के टीम ह आज बिलासपुर अउ चांपा म कोयला व्यापारी के ठिकाना म छापा के कार्रवाई करीस। टीम ह बिलासपुर म श्रीकांत वर्मा मार्ग स्थित व्यापारी के दफ्तर अउ रामा वर्ल्ड स्थित घर म छापा मारीस। उहें, एक दूसर टीम ह चांपा म चाम्पा-बिर्रा ओवरब्रिज करा स्थित फर्म म घलो पहुंच के जांच-पड़ताल करीस। ए दउरान टीम ह कई अहम दस्तावेज जब्ती करीस।
अउ अब थोरकुन समाचार सार म –
– उपमुख्यमंत्री विजय शर्मा ह आज कवर्धा म सड़क अउ सामुदायिक भवन समेत आने-आने निर्मान काम के भूमिपूजन करीन।
अउ
– जांजगीर-चांपा जिला म पुलिस ह नसीला दवई के संग दू झिन आरोपी मन ल गिरफ्तार करे हे। इंखर तीर ले करीबन साढ़े तीन हजार नसीला कैप्सूल जब्त करे गेहे।