सोसल मीडिया म जारी अपन संदेस म केंंद्रीय गृह मंत्री ह किहीन कि सिक्यूरिटी सेंट्रिक स्ट्रेटजी, इंफ्रास्ट्रक्चर, नक्सल फाइनेंशियल नेटवर्क म प्रहार अउ आत्मसमर्पण नीति के सकारात्मक परिणाम आगु आय हे। श्री शाह ह दोहराइन कि ए बछर एकतीस मार्च ले पहिली नक्सलवाद पूरा तरह ले समाप्त होवत हे।
श्री शाह ह सोशल मीडिया म पठोय एक ठिन आने संदेस म किहीन कि जउन छत्तीसगढ़ ह कभू नक्सली हिंसा के गढ़ रिहीस। ओ हा भाजपा के डबल इंजन सरकार म विकास के पूरक बन गेहे। इंहा के जवान लइका स्पोर्ट्स, फोरेंसिक अउ टेक्नीकल एजुकेसन ल गति देवत अपन संस्कृति अउ परंपरा ल घलो सहेजत हे। ए बइठका म छत्तीसगढ़ के मुख्यमंत्री विष्णुदेव साय, उपमुख्यमंत्री विजय शर्मा के संगे पुलिस प्रशासन अउ केंद्रीय सुरक्षा एजेंसी के बड़का अधिकारी मन सामिल होइन।
उहें, मुख्यमंत्री विष्णुदेव साय ह किहीन कि केंद्रीय गृह मंत्री के पगरइती म होय सुरक्षा समीक्षा बइठका ह नक्सलवाद के विरूध्द निर्णायक प्रगति के सशक्त संकेत हे। ओमन किहीन कि सटिक सुरक्षा-केंद्रीय रणनीति, मजबूत, आधारभूत संरचना, नक्सल फाइनेंशियल नेटवर्क उपर कड़ा प्रभाव अउ प्रभावी आत्मसमर्पण नीति के सकारात्मक परिणाम आज छत्तीसगढ़ समेत नक्सल दंस ले पीड़ित सबो प्रदेस मन म स्पष्ट रूप ले दिखाई देवत हे।
केंद्रीय गृहमंत्री-माओवाद बैठक
मुख्यमंत्री ह किहीन कि एकतीस मार्च तक छत्तीसगढ़ ल नक्सल मुक्त बनाय गे अपन संकल्प ल सिध्द करे खातिर सरकार ह पूरा कमिटमेंट के संग सरलग अग्रसर हे।
श्री शाह ह आज रईपुर म राष्ट्रीय कॉन्क्लेव ‘‘छत्तीसगढ़ एट द रेट ट्वेंटी फाइव : सिफ्टिंग द लेंस म माई पहुना के रूप म सामिल होवत हे।
केंद्रीय गृह मंत्री काली नौ फरवरी के जगदलपुर म होवत बस्तर पंडुम महोत्सव के समापन कारीकरम म सामिल होही।
केंद्रीय मंत्री-पत्रकारवार्ता
केंद्रीय विद्युत मंत्री मनोहरलाल खट्टर ह केंद्रीय बजट संहरावत किहीन कि ए बजट ह विकसित भारत दू हजार सैंतालीस के दीर्घकालिक विजन ल साकार करइया एक ठिन सशक्त दस्तावेज हे। आज रईपुर म होय पत्रकारवार्ता म श्री खट्टर ह किहीन कि ए बजट म अवइया पचीस बछर बर देस के आर्थिक, सामाजिक, बुनियादी ढांचा के विकास खातिर स्पष्ट दिसा निर्धारित करे गेहे। ओमन बतइन कि ए बजट ह पहिली बार कर्तव्य भवन म तियार करे गेहे। जउन ह शासन व्यवस्था म सकारात्मक बदलाव के चिन्हारी हे। ए बजट म सोलहवां वित्त आयोग के रिपोर्ट ल घलो राखे गेहे। जेखर ले अवइया बछर म राज्य के विकास ल नवा गति मिलही। श्री खट्टर ह विस्वास जतइन कि बजट प्रावधान के प्रभावी रूप ले लागू करे ले बिजली, आवास, सहरी विकास अउ अधोसंरचना क्षेत्र मन म देखे के लइक प्रगति होही। ओमन यहू किहीन कि केंद्र सरकार ह छत्तीसगढ़ के चारों मुड़ा ले विकास खातिर पूरा तरह ले संवेदनसील अउ प्रतिबध्दह हे।
केंद्रीय मंत्री ह किहीन कि ए बछर केंद्रीय बजट म छत्तीसगढ़ ल रेलवे विकास बर सात हजार चार सौ सत्तर करोड़ रूपिया के आवंटन मिले हे, जउन ह राज्य के रेल कनेक्टिविटी अउ केपिसिटी ल बढ़ाही। ओमन किहीन कि बछर दू हजार चौदह के बाद ले छत्तीसगढ़ म नेशनल हाइवे के विकास ल प्राथमिकता दे गेहे। जेखर चलत तीन हजार चार सौ किलोमीटर ले जादा के रद्दा बनाय गेहे। भारतमाला प्रोजेक्ट के तहत राज्य म कनेक्टिविटी सुधारे बर पांच सौ एकहत्तर ले जादा के नेशनल हाइवे कॉरिडोर ल मंजूरी दे गेहे। श्री खट्टर ह किहीन कि छत्तीसगढ़ म हवई कनेक्टिविटी ल बढ़ावा देबर उड़ान योजना के चलत जगदलपुर, बिलासपुर अउ अंबिकापुर ले हवाई यात्रा सुरू करे गेहे। एखर संगेसंग रईपुर के स्वामी विवेकानंद एरोड्रम ल कृषि उड़ान योजना म घलो सामिल करे गेहे।
अरपा महोत्सव
गौरेला-पेण्ड्रा-मरवाही जिला म दस फरवरी ले अरपा महोत्सव होही। सुभारंभ कारीकरम म मुख्यमंत्री विष्णुदेव साय माई-पहुना रइही। ए महोत्सव तियारी बारे म जिला के कलेक्टर लीना कमलेश मंडावी ह अधिकारी मनके बइठका लीन। कलेक्टर ह बतइन कि महोत्सव बेरा मुख्यमंत्री कन्या विवाह योजना के तहत तीन सौ जोड़ा मनके सामूहिक विवाह कराय जाही। संगे कई ठिन विकास काम के भूमिपूजन अउ लोकार्पण के संगे हितग्राही मन ल जिनिस अउ सहायता रासि के चेक बांटे जाही।
उहें, टीबी बीमारी ले मुक्त इंक्यावन ठिन पंचायत बाल विवाह ले मुक्त इकहत्तर ठिन पंचायत अउ गौरेला-पेण्ड्रा के दू नगरीय निकाय मन ल प्रमाण पत्र दे जाही। महोत्सव के दउरान कई झिन कलाकार मन डहार ले नाच गाना प्रस्तुत करे जाही।
दुर्घटना
जांजगीर-चांपा जिला के कोटगढ़ गांव तीर आज तीन ठिन ट्रेलर गाड़ी बीच टक्कर होय बाद ओ तीनों गाड़ी म आगी लग गे। एमा ले एक ठिन गाड़ी के ड्राइवर के मउत ए हादसा म जरे ले होगे। उहें, दू झिन मनखे गंभीर रूप ले घायल होगे, जेमन ल अस्पताल म भर्ती कराय गेहे। सूचना मिलतेसाठ अकलतरा पुलिस अउ फायर ब्रिगेड के टीम ह मउका म पहुंचके तीन घंटा के मसक्कत बाद आगी उपर काबू पाइस।
अउ अब थोरकुन समाचार सार म –
– एंटी करप्शन ब्यूरो एसीबी के टीम ह कांडागांव म पदस्थ शिक्षा विभाग के एक झिन कर्मचारी ल चालीस हजार रूपिया के लूजपत लेवत रंगेहाथ गिरफ्तार करे हे।
– यात्री मनके सहूलियत ल धियान म राखत दक्षिण पूर्व मध्य रेलवे डहार ले अवइया होली तिहार के मउका म गोंदिया ले छपरा जंक्शन बर स्पेसल ट्रेन चलाय जावत हे।
– रईपुर के तेलीबांधा स्थित आबकारी कार्यालय के चौथा मंजिल म आज आगी लगे ले कई ठिन फाइल जले के आसंका हे। फेर आगी लगे के कारण बारे म अभी तक पता नइ चले हे।
अउ
– विश्व व्यापार संगठन के वैश्विक शासन के तीन दसक पूरा होय उपर नवा रईपुर स्थित हिदायतुल्ला नेशनल लॉ यूर्निवर्सिटी म अंतर्राष्ट्रीय सेमिनार राखे गीस। जेमा वाणिज्य मंत्रालय के प्रमुख बिसेसज्ञ अउ अंतर्राष्ट्रीय नीति विश्लेषक मन हिस्सा लीन।