राष्ट्रपति ह किहीन कि बस्तर जइसन जघा ह पाछू चार दसक ले माओवाद के समस्या ले परेसान रिहीस। एखर सबले जादा नकसान क्षेत्र के आदिवासी, युवा अउ दलित मन ल उठाय बर पड़िस। राष्ट्रपति ह किहीन कि केंद्र सरकार के माओवादी आतंक के खिलाफ कार्रवाई ले बस्तर म भय असुरक्षा अउ अविस्वास के वातावरण खतम होवत हे। ओमन किहीन कि बड़ संख्या म माओवादी मन हिंसा के रद्दा छोड़के समाज के मुख्यधारा म लहुटत हे। राष्ट्रपति ह किहीन कि राज्य सरकार ह आत्मसमर्पण करइया माओवादी मनके पुनर्वास बर कतकोन विकास अउ कल्याणकारी योजना चलावत हे। संगेसंग नियद नेल्लानार योजना ह गांव के लोगन मन बर बड़का भूमिका निभावत हे। केंद्र सरकार डहार ले पीएम जनमन योजना अउ धरती आबा जनजातीय ग्राम उत्कर्ष अभियान जइसन कारीकरम के माध्यम ले सबले पिछड़ा जनजातीय मनके गांव ल विकास ले जोड़े जात हे।
राष्ट्रपति ह किहीन कि बस्तर क्षेत्र म पर्यटन जइसन जघा बने के पूरा क्षमता हे। इंहा के प्राचीन संस्कृति, प्राकृतिक सुंदरता, जलप्रपात अउ गुफा मन ह पर्यटक मन ल सुघ्घर लागथे। राष्ट्रपति ह बस्तर के लोगन मन ल अपील करीन कि ओमन राज्य अउ केंद्र सरकार डहार ले चलाय जात कल्याणकारी अउ विकास योजना मनके फायदा उठावय। उहें, समारोह ल संबोधित करत राज्यपाल रमेन डेका ह किहीन कि बस्तर पंडुम जनजातीय लोकसंस्कृति के उत्सव हरय। त उहें, मुख्यमंत्री विष्णुदेव साय ह किहीन कि बस्तर पंडुम सिरिफ एक ठिन आयोजन नइ हरय, भलुक जनजातीय समाज के जीवन, बोली-भाषा, नृत्य, गीत, पहिरावा, खान-पान मन ल जीवंत बनाथे। मुख्यमंत्री ह किहीन कि बस्तर आज विकास के रद्दा म आगु बाढ़त हे।
जानबा के मुताबिक बस्तर पंडुम महोत्सव के तहत संभाग स्तरीय प्रतियोगिता मनके आयोजन आज ले सुरू हो गेहे जउन ह नौ फरवरी तक चलही। ए दउरान चौरासी दल के सात सौ ले जादा कलाकार मन अपन सांस्कृतिक प्रस्तुति दिही। एमा जनजातीय नृत्य, हस्तसिल्प, पारंपरिक जनजातीय व्यंजन अउ वाद्ययंत्र जइसन प्रस्तुति सामिल होही। कारीकरम म बास्तानार क्षेत्र के आदिवासी युवा मन ह विश्व प्रसिध्द गौर नृत्य पेस करीन।
एखर पहिली, राष्ट्रपति ह जनजातीय परंपरा उपर आधारित प्रदर्सनी ल देखिन ए दउरान ओमन आने-आने स्टाल म जाके उंहा लोगन अउ कारीगर मन ले मिलके उत्पाद मनके जानबा लीन।
प्रधानमंत्री-व्यापार समझौता
प्रधानमंत्री नरेंद्र मोदी ह भारत अउ अमेरिका के बीच अंतरिम व्यापार समझौता ल सुखद खबर बताय हे। ओमन दूनो देस मनके बीच बढ़िया संबंध बने उपर अमेरीका के राष्ट्रपति डोनाल्ड ट्रंप ल धन्यवाद दीन हे। सोशल मीडिया पोस्ट म प्रधानमंत्री ह किहीन कि ए फ्रेमवर्क भारत अमेरीका साझेदारी के गहराई, विस्वास अउ गतिसीलता ल दर्साथे। ओमन किहीन कि एखर ले भारत के मेहनती किसान, उद्यमी, सूक्ष्म लघु अउ मध्यम उद्यम, मछुवारा अउ आने लोगन मन बर मउका खुलके मेक इन इंडिया ल मजबूती दिही। उहें, केंद्रीय वाणिज्य अउ उद्योग मंत्री पीयूष गोयल ह दिल्ली म राखे गे संवाददाता सम्मेलन म किहीन कि ए समझौता ले नवा मउका खुलही अउ आगु दूनों देस के बीच पांच सौ अरब डालर व्यापार के लक्ष्य राखे गेहे। इही बीच, प्रदेस के मुख्यमंत्री ह किहीन कि भारत अउ अमेरीका के बीच अंतरिम व्यापार समझौता होय ले भारत के विश्व म आर्थिक मजबूती के दिसा म एक ठिन ऐतिहासिक पहल हरय। ओमन किहीन कि ए समझौता ले छत्तीसगढ़ के सूक्ष्म, लघु अउ मध्यम उद्यमी मन ल अमेरीका बजार तक नवा पहुंच मिलही।
अमित शाह-छत्तीसगढ़
केंद्रीय गृह अउ सहकारिता मंत्री अमित शाह ह छत्तीसगढ़ के तीन दिन के दउरा म आज रईपुर पहुंचिन। मुख्यमंत्री विष्णुदेव साय अउ उपमुख्यमंत्री विजय शर्मा ह माना विमानतल म श्री शाह के सुवागत करीन। प्रवास के दउरान श्री शाह ह राज्य म आंतरिक सुरक्षा, वामपंथी उग्रवाद के समीक्षा करे के संगेसंग कतकोन कारीकरम मन म भाग लिही।
कारीकरम के मुताबिक आज देर संझा रईपुर म बड़का अधिकारी मनके संग एक ठिन बइठका लिही, जेमा राज्य ले जुड़े प्रशासनिक अउ सुरक्षा बिसय उपर गोठबात करे जाही। काली आठ फरवरी के ओमन वामपंथी उग्रवाद उपर एक ठिन उच्च स्तरीय सुरक्षा बइठका के अगुवई करही। इही दिन केंद्रीय गृह मंत्री ह राष्ट्रीय कॉनक्लेव ‘छत्तीसगढ़ एट द रेट ट्वेंटी फाइव : शिफ्टिंग द लेंस‘ म मुख्य अतिथि के रूप म सामिल होही।
उहें, श्री शाह ह नौ फरवरी के जगदलपुर म चलत बस्तर पंडुम महोत्सव के समापन कारीकरम म सामिल होही।
माओवादी-आत्मसमर्पण
बीजापुर अउ सुकमा जिला म आज इंक्यावन झिन माओवादी मन ह आत्मसमर्पण करे हे। ए माओवादी मन उपर कुल एक करोड़ इकसठ लाख रूपिया के इनाम रिहीस। हमर संवाददाता ले मिले जानबा के मुताबिक बीजापुर जिला म दक्षिण सब जोनल ब्यूरो के बीस झिन माईलोगिन के संगेसंग तीस माओवादी मन ह केंद्रीय पुलिस रिजर्व पुलिस बल सीआरपीएफ के उप पुलिस महानिरीक्षक बी.एस.नेगी अउ जिला के पुलिस अधीक्षक जितेन्द्र कुमार यादव के आगु समाज के मुख्यधारा म सामिल होय के फइसला लीन। एमा एसीएम, डीएकेएमएस अउ केएएमएस के संगेसंग जनताना सरकार के अध्यक्ष सामिल हे। ए माओवादी मन उपर पचासी लाख रूपिया के इनाम घोसित रिहीस।
उहें, सुकमा जिला म छिहत्तर लाख रूपिया के इनामी इक्कीस झिन माओवादी मन ह आत्मसमर्पण करे हे। ए माओवादी मन ह बस्तर रेंज के पुलिस महानिरीक्षक सुंदरराज पी. अउ जिला के पुलिस अधीक्षक किरण चव्हाण, सीआरपीएफ के डीआईजी आनंद सिंह राजपुरोहित के आगु आत्मसमर्पण करीन। ए दउरान माआवादी मन ह एके फोर्टिसेवन, एसएलआर, बैरेल ग्रेनेड लॉन्चर के संगेसंग आने ऑटोमैटिक हथियार घलो सौंपिन।
रेरा-प्रावधान
छत्तीसगढ़ रियल एस्टेट विनियामक प्राधिकरण-रेरा ह राज्य म रियल एस्टेट क्षेत्र म गुणवत्ता अउ वित्तीय अनुशासन के प्रभावी क्रियान्वयन के दिसा म पहल करत चौदह ठिन बैंक मन ल आखिरी पैनल म सामिल करे हे। एखर पहिली, पाछू साल अप्रैल महिना म सत्रह ठिन बैंक मन ल अस्थायी पैनल म सामिल करे गे रिहीस।
रेरा के अध्यक्ष संजय शुक्ला ह बतइन कि रेरा के तहत पंजीकृत परियोजना मन म वित्तीय अनुशासन अउ पारदर्सिता बना के रखना पहिली प्राथमिकता हवय।
जनजातीय गौरव वाटिका-लोकार्पण
उपमुख्यमंत्री विजय शर्मा ह काली बस्तर के कुम्हड़ाकोट म बने जनजातीय गौरव वाटिका के लोकार्पण करीन। करीबन तीन करोड़ रूपिया ले बने ए वाटिका म पर्यावरण ल बने ढंग ले राखे बर सुघ्घर प्रयास करे गेहे। ए मउका म उपमुख्यमंत्री ह वाटिका म लोगन मन बर बनाय गे सत्रह सौ मीटर लंबा वॉकिंग ट्रेल, योगा शेड, योगा जोन अउ ओपन जिम के प्रसंसा करीन। ए मउका म वन मंत्री केदार कश्यप अउ विधायक किरण सिंह देव घलो आय रिहीन।
आई-जीओटी प्रशिक्षण
राज्य म सुशासन, सुघ्घर प्रशासन अउ क्षमता आधारित कार्य संस्कृति ल बढ़िया करे के दिसा म बड़का पहल करत सामान्य प्रशासन विभाग ह आई-जीओटी कर्मयोगी प्रसिक्षण कारीकरम चालू करे के फइसला लेहे। कारीकरम के सुरूआत संभाग अउ जिला स्तर म नौ फरवरी के रईपुर ले सुरू होही। त उहें, बस्तर म बारह, बिलासपुर म अट्ठारा, दुरूग म चौबीस अउ सरगुजा संभाग म छब्बीस फरवरी के प्रसिक्षण कारीकरम राखे जाही।