उहें, परमालकसा अउ खरसिया रेल परियोजना घलो बहुत बड़े परियोजना हरय। ओमन किहीन कि ए रेल परियोजना के पूरा होय ले राज्य म एक्सप्रेस अउ मेल जइसन यात्री रेलगाड़ी के संख्या बाढ़के दुगुना हो जाही। ओमन बतइन कि ईस्ट-वेस्ट रेल कारिडोर छत्तीसगढ़ ले होके गुजरही।
रईपुर के रेल मंडल प्रबंधक दयानंद ह बतइन कि रेल मंत्री कोति ले बजट म देगे जानकारी ल लेके किहीन कि बजट के फोकस ए बखत आधारभूत संचरना के विकास हवय। कॉरिडोर के सेति पोर्ट ले कनेक्टीविटी के फायदा छत्तीसगढ़ ल घलो मिलही।
माई भारत बजट क्वेस्ट
केंद्रीय युवा कार्य अउ खेल मंत्री मनसुख मांडविया ह आज नई दिल्ली म माई भारत बजट क्वेस्ट- दू हजार छब्बीस के सुभारंभ करीन। एखर उद्देस्य देस के युवा मन ल केंद्रीय बजट के बने समझ देना बजट के प्रावधान ल जादा सरल प्रासंगिक बनाना हे। डॉक्टर मांडविया ह बतइन कि प्रतियोगिता के पहिली चरण माई भारत पोर्टल म पंजीयन होय युवा मन बर सत्रह फरवरी तक खुला रइही। एखर बाद सबले बने प्रदर्सन करइया युवा मन ल सत्रह फरवरी ले तीन मार्च तक चलइया दूसर चरण के प्रतियोगिता म संघरे के मउका मिलही। प्रतियोगिता के योग्यता सूची दस मार्च के घोसित करे जाही अउ जीतइया मन ल प्रधानमंत्री नरेंद्र मोदी संग गोठबात करे के मउका मिलही।
कृषि महानिदेशक-दौरा
भारतीय कृषि अनुसंधान परिषद के महानिदेशक डॉक्टर एम.एल. जाट ह किसान मनके आय म बढ़बार बर कृषि मूल्य संवर्धन ब्रांडिंग अउ व्यवसायीकरण म जोर देहे। रईपुर दउरा के बेरा डॉक्टर जाट ह इंदिरागांधी कृषि
विश्वद्यालय के उत्पाद विक्रय काउंटर के दउरा करके आने-आने कृषि उत्पाद तकनीक अउ कतकोन जिनिस ल देखिन। ओमन कृषि विश्वविद्यालय के ए पहल बर प्रसंसा करीन अउ वैज्ञानिक, कृषि उद्यमी अउ कृषि विज्ञान केंद्र के प्रतिनिधि मनले गोठबात करीन।
कांग्रेस-प्रेसवार्ता
प्रदेश कांग्रेस अध्यक्ष दीपक बैज ह राज्य म समर्थन कीमत म धान बिसाय के समय-सीमा पंद्रह दिन बर बढ़ाय के मांग करे हे। रईपुर म पत्रकार मनले गोठबात करत श्री बैज ह बतइन कि प्रदेस म समर्थन कीमत म धान बेचे बर सत्ताईस लाख किसान मन ह अपन पंजीयन कराय रिहीन, फेर अभी घलो ढाई लाख किसान मन अपन धान नइ बेच पाय हे। ओमन बतइन कि राज्य सरकार ह एक सौ पैंसठ लाख मीट्रिक टन धान बिसाय के लक्ष्य राखे रिहीन, फेर धान खरीदी बर तय तिथि तक एक सौ उनचास लाख पचयासी हजार मीट्रिक टन धान बिसाय गेहे। ओमन आरोप लगइन कि सरकार के गलत नीति के सेति राज्य म किसान हलाकान हे।
बजट-विशेष कार्यक्रम
आकाशवाणी केंद्र रईपुर कोति ले केंद्रीय बजट म बिसेस कारीकरम के प्रसारण आज रतिहा नौ बजके पंद्रह मिनट म करे जाही। ए कारीकरम अपलिंक म उपलब्ध रइही अउ एखर प्रसारण छत्तीसगढ़ स्थित आकाशवाणी के सबो केंद्र ले करे जाही।
उपमुख्यमंत्री-कवर्धा
उपमुख्यमंत्री विजय शर्मा ले सोलहवीं छत्तीसगढ़ राज्य स्तरीय पैरा एथलेटिक्स प्रतियोगिता म बने प्रदर्सन करइया कबीरधाम जिला के खिलाड़ी मन ह भेंट करीन। कवर्धा दउरा के बेरा श्री शर्मा संग खिलाड़ी मन ह अपन खेल प्रदर्सन के जानकारी साझा करीन अउ अनुभव बतइन। खबर के मुताबिक राज्य स्तरीय प्रतियोगिता म कबीरधाम जिला के तेरह पैरा खिलाड़ी मन ह कुल बत्तीस पदक जीत के जिला ल ओवर ऑल चैंपियन बनाइन। उहें, श्री शर्मा ह आज कवर्धा म दू झिन दिव्यांग लाभार्थी मन ल स्कूटी दीन। उपमुख्यमंत्री ह किहीन कि छत्तीसगढ़ सरकार के उद्देस्य दिव्यांगजन मन ल आत्मनिर्भर बनाना अउ उंखर दैनिक जीवन ल सरल करना हे। स्कूटी मिले ले लाभार्थी मन ल अवई-जवई म सुविधा होही अउ ओमन अपन काम खुद ले कर सकही।
उहें, उपमुख्यमंत्री ह कवर्धा के विधायक कार्यालय म द स्टोरिंग ऑफ किंग भोरमदेव ‘‘राजा भोरमदेव की कहानी‘‘ पुस्तक के विमोचन घलो करीन। पुस्तक के रचनाकार रामप्रसाद बघेल ल साहित्यिक काम बर सुभकामना दीन।
मोबाइल-बरामद
दुरूग पुलिस के एंटी क्राइम अउ साइबर यूनिट ह बिसेस अभियान चलाके दू सौ दू नग गंवाय मोबाइल खोजके ओला जिखर मोबाइल हे, ओमन ल लहुटाय के काम सुरू कर देहे। ए मोबाइल के कुल कीमत करीबन साठ लाख रूपिया बताय जात हे। जिला म गंवाय मोबाइल फेन ले जुड़े सिकइत म बिसेस अभियान चलाय गे रिहीस। एखर बाद दुरूग, भिलाई, राजनांदगांव, बालोद, बेमेतरा अउ रईपुर के आने-आने जघा ले मोबाइल फोन खोजे गीस। मोबाइल वितरण कारीकरम म मौजूद वरिष्ठ पुलिस अधीक्षक ह लोगन ले अपील करीन कि ओमन मोबाइल गंवाय या चोरी होय म तीर के थाना म रिपोर्ट दरज करावय अउ भारत सरकार के सीईआईआर पोर्टल म घलो सिकइत करय।
राजिम कुंभ-राज्यपाल
त्रिवेणी संगम राजिम के पबरित तट म काली ले राजिम कुंभ कल्प मेला सुरू हो गेहे। सुभारंभ मउका म राज्यपाल रमेन डेका ह किहीन कि जिंहा पबरित नदिया के संगम होथे, ओ जघा पूण्य अउ ऐतिहासिक महत्ता के माने जाथे। ओमन किहीन कि राजिम म कल्प कुंभ के नांव ले आयोजित ए समारोह राज्य के सांस्कृतिक अउ धार्मिक धरोहर के प्रतीक हवय। राज्यपाल ह किहीन कि प्राचीन मंदिर राजिम के पुरातात्विक, धार्मिक अउ सांस्कृतिक महत्ता हवय। ए मंदिर मन म मूर्तिकला के सुघ्घर इतिहास के दर्सन होथे। सुभारंभ कारीकरम म संस्कृति अउ पर्यटन मंत्री राजेश अग्रवाल ह किहीन कि राजिम कुंभ कल्प परब हमर संस्कृति, उत्सव, परंपरा अउ लोक संस्कृति के जियत-जागत उत्सव हरय।
उहें, रतनपुर म माधी पुन्नी अउ आदिवासी विकास मेला काली ले सुरू होय हे। उप मुख्यमंत्री अरूण साव ह आयोजन के सुभारंभ कारीकरम म ऑडिटोरियम बनाय खातिर दू करोड़ रूपिया अउ नगर पालिका भवन म बाउंड्रीवाल बर बीस लाख रूपिया देके घोसना करीन। ए मउका म उपमुख्यमंत्री ह किहीन कि रतनपुर पबरित अउ पौरानिक नगरी हे। एखर ख्याति दुनिया भर म हवय। ओमन रतनपुर ल कॉरिडोर के रूप म बढ़वार करे के जरूरत बतइन।
ऐति, सिरपुर म तीन दिवसीय सिरपुर महोत्सव काली ले सुरू हो गेहे। एमा सरकारी विभाग डहार ले कतकोन स्टाल अउ प्रदर्सनी लगाय गेहे, जेखर ले लोगन मन ल शासन के योजना अउ जन कल्याणकारी कारीकरम के जानबा दे जाही। सिरपुर महोत्सव म बिसेस आकर्षण के केंद्र हवय। पढ़इया लइका मन डहार ले बनाय गे पेंटिंग जउन सबो के मनमोहत हे।
अउ अब जानन मौसम के हाल…
प्रदेस म जाड़ अब बिहनिया कुन भर जनावत हे। दिन के तापमान म बढ़वार होय के सेति मंझनिया गर्मी लागे लगिस। मौसम विभाग के मुताबिक अवइया पांच दिन तक तापमान म बिसेस फेरबदल होय के संभावना नइ हे। पाछू चौबीस घंटा के दउरान राज्य म सबले जादा तापमान इकतीस दसमलव पांच डिग्री सेल्सियस रईपुर म दरज करे गीस। उहें, सबले कमती न्यूनतम तापमान नौ दसमलव एक डिग्री सेल्सियस अंबिकापुर म रिकॉर्ड करे गेहे।
अउ अब थोरकुन समाचार सार म –
– कांंडागांव के ग्राम पंचायत जोबा म असम राज्य के पंचायत अउ ग्रामीण विकास विभाग के प्रतिनिधि मंडल ह राजमिस्त्री प्रसिक्षण कारीकरम के निरीक्षण करीन।
– चांपा म बिजली के तार ले करेंट लगे ले एक महिला क मउत होगे। खबर के मुताबिक मकान बनाय के काम म लगे महिला मजदूर ग्यारा केबी तार के चपेट म आ गीस। उहें, एक आने मजदूर महिला घलो घायल हो गेहे।