आज दिनभर के खबर ल अपन गुरतुर छत्तीसगढ़ी भाखा म पढ़व

मुख्यमंत्री केंद्रीय मंत्री पत्र
राज्य सरकार ह माओवाद उन्मूलन कार्ययोजना के बने क्रियान्वयन बर केंद्र सरकार के सहयोग मंागे हे। ए संबंध म केंद्रीय गृहमंत्री अमित शाह ल मुख्यमंत्री भूपेश बघेल ह चिट्ठी लिखे हे। श्री बघेल ह पूर्व म प्रदेश ल आबंटित सीआरपीएफ के सात अतिरिक्त बटालियन ल जल्दी ले उपलब्ध कराय के मांग करीन। एखरे संग ओमन बस्तर के युवा मन बर विशेष भर्ती रैली अउ एक अतिरिक्त बस्तर बटालियन के गठन के आग्रह घलो करे हे। चिट्ठी म श्री बघेल ह केहे हे कि माओवाद प्रभावित जिला मन म दूरसंचार सुविधा ल बढ़ाय बर एक हजार अठाईस जगा म जल्दी मोबाईल टावर लगाय के मंाग करे गेहे।
मुख्यमंत्री ह बस्तर संभाग म प्री-फेब्रिकेटेड तकनीक ले पुल-पुलिया अउ उन्नत तकनीक ले सड़क निर्माण उपर विचार करे बर अनुरोध करे हे। ओमन यहू कीहिन कि केंद्र सरकार ले सहयोग मिले ले छत्तीसगढ़ राज्य ल माओवाद समस्या ले मुक्त करे के दिशा म निर्णायक बढ़त मिलही।

पीएससी मुख्य परीक्षा
छत्तीसगढ़ लोक सेवा आयोग ह राज्य सेवा मुख्य परीक्षा के तिथि घोषित कर देहे। जानबा के मुताबिक मुख्य परीक्षा अवइया अठारा अक्टूबर ले शुरू होके इक्कीस अक्टूबर तक चलही। ये परीक्षा दू पाली म बीहनिया नौ ले बारा बजे, अउ मंझनिया दू ले संझा पांच बजे तक आयोजित करे जाही। परीक्षा बर पांच ठिन जिला म केंद्र बनाय गेहे। एमा राजधानी रायपुर के अलावा अंबिकापुर, बिलासपुर, दुर्ग, भिलाई अउ जगदलपुर सामिल हे।
खबर के मुताबिक दू सौ बंयालिस पद बर होवइया ये परीक्षा पहिली सतरा जून ले बीस जून तक होवइया रीहिस हे। जेला कोरोना संक्रमण के सेती रद्द कर दे गे रीहिस।

सुप्रीम कोर्ट परीक्षा
सुप्रीम कोर्ट ह नीट अउ जेईई परीक्षा ल लेके दाखिल पुनर्विचार याचिका ल खारिज कर देहे। छै ठिन राज्य डहार ले नीट अउ जेईई परीक्षा के तिथि ल आगे बढ़ाय बर पुनर्विचार याचिका दाखिल करे गे रीहिस।
ये याचिका के माध्यम ले सर्वोच्च न्यायालय डहार ले सतरा अगस्त के दे आदेश उपर पुनर्विचार करे के मांग करे गे रीहिस। जेला अदालत ह खारिज कर देहे।
जानबा के मुताबिक एक ले छै सितंबर तक जेईई मुख्य परीक्षा के आयोजन करे जावत हे। उंहें तेरा सितंबर के नीट परीक्षा के आयोजन होही। एति उच्चतम न्यायालय ह केहे हे कि स्नातक अउ स्नातकोत्तर के पहिली अउ दूसर बछर के   परीक्षा आयोजित करे म रोक नइ लगाय जाही।
ए बारे म परीक्षा आयोजित करे के विरोध म दायर याचिका उपर सुनवाई करत केहे हे कि विश्वविद्यालय स्नातक अउ स्नातकोत्तर पाठ्यक्रम के पहिली अउ दूसर बछर के पढ़इया मन ल आगू े के कक्षा म प्रमोट करे ल लेके परीक्षा कराये बर स्वतंत्र हे। न्यायमूर्ति अशोक भूषण, आर. सुभाष रेड्डी अउ एम.आर. शाह के पीठ ह केहे हे कि विश्वविद्यालय अनुदान आयोग ह ए परीक्षा आयोजित करे के फैसला विश्वविद्यालय के विवेक म छोड़े हे।

कोरोना मरीज
देश म अब तक कोरोना संक्रमण ले तीस लाख ले जादा लोगन ह ठीक हो चुके हे। पाछू चैबीस घंटा म ए संक्रमण ले ठीक होवइया के संख्या छैसठ हजार ले जादा हे। केंद्रीय स्वास्थ्य मंत्रालय ह केहे हे कि ठीक होवइया के दर म लगातार सुधार होवत हे।
इही बीच प्रदेश म कोरोना संक्रमित मरीज के संख्या सरलग बाढ़त हे। कोंडागांव कलेेक्टर पुष्पेंद्र सिंह मीणा के कोरोना संक्रमित होय के पुष्टि होय हे । दुर्ग जिला म आज संझा तक एक सौ उन्नीस नवा संक्रमित मरीज के पहिचान करे गेहे। एमा कसारडीह क्षेत्र ले एके परिवार के बारा झिन सदस्य सामिल हे।
एति कोरबा जिला के कटघोरा पौड़ी म दू गर्भवती महिला के संघरा सात नवा कोरोना पाॅजीटिव मरीज मिले हे।
ओति राजनंादगंाव जिला के खैरागढ़ म आज छै झिन नवा कोरोना संक्रमित मरीज के पहिचान होय हे।
उंहें कांकेर जिला म छब्बीस झिन नवा कोराना पाॅजीटिव मरीज मिले हे। एला मिलाके जिला म कोरोना संक्रमित के आंकड़ा सात सौ ल पार कर चुके हे।
एति प्रदेश म पाछू रतिहा तक कोरोना संक्रमण के बाईस सौ ले जादा नवा मामला सामने आय हे। राजनंादगांव मेडिकल कालेज के टीम डॅाक्टर रेणुका गहने घलो संक्रमित पाय गेहे। ए बेरा सोला लोगन मनके मउत हो चुके हे। एमा  राजधानी रायपुर ले दस लोगन के मउत होय हे। एला मिलाके रायपुर म अब तक एक सौ पैंसठ लोगन के मउत हो चुके हे। प्रदेश म मरीज मनके संख्या अड़तीस हजार के करीब पहुंुच गेहे। एमा अठारा हजार सात सौ ले जादा सक्रिय मरीज हे अउ करीबन उन्नीस हजार मरीज स्वस्थ हो चुके हे।

स्वास्थ्य मंत्री बयान
प्रदेश के स्वास्थ्य मंत्री टी.एस. सिंहदेव ह केहे हे कि राज्य म कोरोना के जांच के दायरा बाढ़े के सेती संक्रमित मरीज के संख्या घलो बाढ़त हे। ओमन केहे हे कि एखर ले घबराय के जरूरत नइ हे।
श्री सिंहदेव ह मीडिया ले बातचीत म केहे हे कि मौजूदा समय म दस ले बारा हजार टेस्ट रोज होवत हे। ओमन बताइन कि एक हप्ता के भीतर टेस्ट के आंकड़ा बीस हजार प्रतिदिन हो जाही। संगेसंग सितंबर के आखरी तक तीस हजार टेस्ट रोज करे के लक्ष्य राखे गेहे।  राज्य सरकार ह कोरोना संक्रमित मरीज के उपचार के बेवस्था बर हरसंभव प्रयास करत हे। ओमन लोगन ले सावधानी अउ सतर्कता बरते के आग्रह करे हे।

राजभवन कोरोना कार्यशाला
राजभवन म आज कोरोना संक्रमण ले बचाव के सबंध म एक ठिन कार्यशाला के आयोजन करे गीस। एमा विशेषज्ञ चिकित्सक डब्लू.एच.ओ. के प्रतिनिधि, स्वास्थ्य अउ परिवार कल्याण प्रशिक्षण संस्थान के संचालक ह कोरोना संक्रमण ले बचाव अउ रोकथाम के जानकारी दीन। डब्लूएचओ के प्रतिनिधि डॅाक्टर प्रनीत फटाले ह कार्यशाला म बताइन कि ए बीमारी ले घबराय के बजाय आत्मबल बनाके जागरूक होके जरूरी दिशा निर्देश के पालन करत कोरोना के सामना करयं।
उंहें डॅाक्टर अमर सिंह ठाकुर ह लोगन ल कोरोना पाॅजीटिव होय के बाद  आइसोलेट होके सुरक्षा उपाय अपनाय के संगरा बीमारी ले बचे बर स्वास्थ्य कर्मी के सहयोग करंे के अपील करीन।

  शिक्षक दिवस
काली शिक्षक दिवस हे। ए बेरा म राज्यपाल अनुसूइया उइके ह प्रदेश के जम्मों शिक्षक मन ल बधाई देहे। अपन शुभकामना संदेश म ओमन केहे हे कि शिक्षक मन देश अउ समाज के भविष्य निर्माण म महत्वपूर्ण भूमिका निभाथे।
उंहें स्कूल शिक्षामंत्री डॅाक्टर पे्रमसाय सिंह टेकाम ह घलो शिक्षक मन ल   बधाई अउ शुभकामना देहे। ओमन केहे हे कि समय के संगरा शिक्षा के क्षेत्र म आय नवा चुनौती के सेती शिक्षक मनके जिम्मेदारी बाढ़ गेहे। अइसन बेरा म समर्पित शिक्षक मन ल सम्मानित करे जाही।

जावड़ेकर आॅटोमोबाइल मैन्यूफैक्र्चर्स
केंद्रीय सूचना अउ प्रसारण मंत्री प्रकाश जावड़ेकर ह आज सोसायटी आॅटोमोबाइल मैन्यूफैक्र्चर्स के साठवंा वार्षिक अधिवेशन ल वीडियो कॅान्फे्रंिसग के माध्यम ले संबोधित करीन।
ओमन आॅटोमोबाइल सेक्टर म मंाग म वृद्धि ल फेर ले पटरी म लाये के जरूरत उपर जोर दीन। सरकार ह ए संबंध म जम्मों पक्ष के संघरा मिलके काम करत हे। ओमन बहुत जल्दी स्क्रैपेज नीति लाये के संभावना अउ चैंपियन एक्सपोर्ट स्कीम उपर घलो गौर करे जाय के बारे म जानकारी दीन।

आरबीआई पीएसएल दिशानिर्देश
भारतीय रिजर्व बैंक ह जम्मों पक्ष के संग विचार विमर्श के बाद प्राथमिकता वाले क्षेत्र पीएसएल ल ऋण दे जाय के दिशा निर्देश के समीक्षा करे हे।
संशोधित पीएसएल दिशा निर्देश म लघु, अउ सीमंात किसान, कमजोर वर्ग, नवीकरणीय उर्जा अउ बुनियादी स्वास्थ्य क्षेत्र ल घलो ऋण उपलब्ध हो सकही।  संगेसंग पचास करोड़ रूपिया के पूंजी वाले स्टार्टअप ल बैंक ह ए सुविधा दीही।