राष्ट्र आज सतहत्तरवां गणतंत्र दिवस मनावत हे। राष्ट्रपति द्रौपदी मुर्मु ह नई दिल्ली के कर्तव्य पथ म गणतंत्र दिवस समारोह के नेतृत्व करीन। समारोह के सुभारंभ प्रधानमंत्री नरेंद्र मोदी के राष्ट्रीय समर स्मारक म सहीद मन ल श्रध्दांजलि अर्पित करे के संग होइस।
राष्ट्रपति परेड के मुख्य अतिथि, यूरोपीय संघ के अध्यक्ष एंटोनियो कोस्टा अउ यूरोपीय आयोग के अध्यक्ष उर्सुला फॉन डेर लायन के संग एक औपचारिक बग्गी म कर्तव्य पथ पहुंचिन। राष्ट्रपति के राष्ट्रीय ध्वज फहराय के बाद राष्ट्रगान होइस अउ इकतीस तोप के सलामी दे गीस।
ए बेरा म राष्ट्रपति मुर्मु ह भारतीय वायुसेना के गु्रप कैप्टन शुभांशु शुक्ला ल देस के सर्वोच्च शांतिकालीन वीरता पुरस्कार, अशोक चक्र ले सम्मानित करीन।
प्रधानमंत्री-गणतंत्र दिवस
प्रधानमंत्री नरेंद्र मोदी ह किहीन कि भारत ह बहुत ही उछाह अउ गरब के संग गणतंत्र दिवस मनाइन। सोशल मीडिया पोस्ट म प्रधानमंत्री ह किहीन कि कर्तव्य पथ के भव्य परेड म देस के लोकतंत्र के मजबूती, संस्कृति, समृध्दि अउ राष्ट्र ल एक संग बांधे राखे वाले एकता के प्रदर्सन होइस। ओमन ह किहीन कि परेड म भारत के अभेद्य सुरक्षा तंत्र ल घलो प्रदर्सित करे गीस जेन राष्ट्र के तियारी, प्रौद्योगिक क्षमता अउ अपन नागरिक मनके सुरक्षा के प्रतीक बर अटूट प्रतिबध्दता देखाथे। प्रधानमंत्री ह किहीन कि देस ल यूरोपीय परिषद के अध्यक्ष एंतोनियो कोस्टा अउ यूरोपीय आयोग के अध्यक्ष उर्सुला फॉन डेर लायन के गणतंत्र दिवस समारोह म मेजबानी करे के गौरव मिलिस। ओमन ह किहीन कि ए नेता मन के उपस्थिति भारत-यूरोपीय संघ के मजबूत होवत साझेदारी अउ साझा मूल्य के प्रतीक प्रतिबध्दता के परिचायक हे।
छत्तीसगढ़-झांकी
गणतंत्र दिवस के बेरा म नई दिल्ली के कर्तव्य पथ म प्रस्तुत छत्तीसगढ़ के झांकी ह देस-दुनिया के धियान अपन डहार खिंचिस। ‘‘स्वतंत्रता का मंत्र-वंदे मातरम्‘‘ थीम आधारित ए झांकी के जरिया ले जनजातीय वीर नायक के गौरव गाथा प्रस्तुत करे गीस। झांकी के आगु छत्तीसगढ़ के कलाकार पारंपरिक लोकनृत्य करत हुए चलत रिहीन। झांकी म नवा रईपुर अटल नगर म स्थापित देस के पहिली जनजातीय डिजीटल संग्रहालय के झलक दिखाय गीस। जिंहा छत्तीसगढ़ के संग चौदह प्रमुख जनजातीय स्वतंत्रता आंदोलन ल आधुनिक डिजीटल तकनीके जरिया ले संरक्षित करे गेहे।
राष्ट्रपति द्रौपदी मुर्मु, प्रधानमंत्री नरेंद्र मोदी के संग केंद्रीय मंत्री अउ बिसेस अतिथि मन ह झांकी ल उत्सुकता के संग देखिन अउ ताली बजाके सराहना करीन।
गणतंत्र दिवस-छत्तीसगढ़
छत्तीसगढ़ म घलो गणतंत्र दिवस खुसी के साथ मनाय गीस। राज्यपाल रमेन डेका ह राजधानी रईपुर के पुलिस परेड मैदान म झंडा फहराके परेड के सलामी लीन। परेड निरीक्षण के दउरान मुख्य सचिव विकास सिंह अउ पुलिस महानिदेशक अरूण देव गौतम घलो उपस्थित रिहीन।
अपन संबोधन म राज्यपाल ह लोगन मन ले किहीन कि ओमन विकसित छत्तीसगढ़ के निर्माण म अपन पूरा भागीदारी देके संकल्प ले। राज्यपाल ह किहीन कि छत्तीसगढ़ देस के सबले तेजी ले उभरत हुए राज्य म से एक हे अउ प्रदेस म तेजी ले अधोसंरचना के विस्तार होय हे। ओमन ह बतइन कि नवा औद्योगिक नीति ह सात लाख तिरासी हजार करोड़ रूपिया ले जादा के निवेस प्रस्ताव राज्य ल मिले हे। एखर ले बड़े पैमाना म रोजगार के अवसर बाढ़े हे।
राज्यपाल ह किहीन कि माओवाद हिंसा के खात्मा बर सुनियोजित रणनीति बनाके काम करे जात हे अउ बस्तर ले अवइया मार्च महिना तक माओवाद ल पूरा तरीका ले खतम कर दे जाही। श्री डेका ह बतइन कि प्रदेस म केंद्र सरकार के धरती आबा जनजातीय ग्राम उत्कर्ष अभियान अउ प्रधानमंत्री जनमन जइसन जरूरी योजना के माध्यम ले जनजातीय क्षेत्र म व्यापक विकास काम कराय जात हे।
समारोह म सीमा सुरक्षा बल, केंद्रीय रिजर्व पुलिस बल, भारत तिब्बत सीमा बल, केंद्रीय औद्योगिक सुरक्षा बल, सशस्त्र सीमा बल अउ छत्तीसगढ़ सशस्त्र बल के संग आने प्लाटून के टुकड़ी मन ह मार्च पास्ट म भाग लीन।
ए बेरा म राज्यपाल ह राज्य के पुलिस अधिकारी मन ल पुलिस वीरता पदक प्रदान करीन। उहें, वीर लइका आर्यन खेश, राकेश मिंज, आशु देवांगन, मेहुल देवांगन अउ कुमारी हेमाद्री चौधरी ल राज्य वीरता पुरस्कार प्रदान करे गीस।
गणतंत्र दिवस-छत्तीसगढ़
उहें, मुख्यमंत्री विष्णुदेव साय ह बिलासपुर के पुलिस परेड ग्राउंड म होवइया समारोह म राष्ट्रीय ध्वज फहराइन अउ परेड के सलामी लीन। ए बेरा म मुख्यमंत्री ह शहीद सैनिक अउ पुलिस जवान के परिजन मन ल सम्मानित करीन। ओमन ह छत्तीसगढ़ पुलिस बल ल राज्य स्थापना के पचीसवां वर्षगांठ के पदक देके घोसना घलो करीन। अपन संदेश म मुख्यमंत्री ह राज्य के उपलब्धि, जन कल्याणकारी योजना, नक्सल उन्मूलन के दिसा म होय प्रगति, किसान-श्रमिक-माईलोगिन मनके सशक्तिकरण, शिक्षा-स्वास्थ्य-औद्योगिक विकास अउ सुशासन के बारे म बिस्तार ले जानकारी दीन।
मुख्यमंत्री श्री साय ह बतइन कि जवान मन के अदम्य साहस अउ सतत अभियान के कारण प्रदेस म माओवादी हिंसा अब आखिरी चरण म हे। मुख्यमंत्री ह आत्मसमर्पित नक्सली मनके पुनर्वास, बस्तर कैफे जइसन पहल अउ नियद नेल्लानार योजना के जरिया ले प्रभावी क्षेत्र म करे जात विकास काम के जानकारी दीन।
मुख्यमंत्री ह बतइन कि प्रधानमंत्री आवास योजना के तहत प्रदेस म छब्बीस लाख ले जादा आवास स्वीकृत करे गेहे अउ रोज लगभग दू हजार आवास के निर्माण होवत हे, जेन देस म सबले जादा हे। मुख्यमंत्री ह बतइन कि युक्ति युक्तकरण ले शिक्षक मनके कमी ल दूर करे गेहे। राष्ट्रीय शिक्षा नीति के तहत स्थानीय भाषा म शिक्षा दे के संग नौ हजार स्मार्ट क्लास अउ बाईस हजार कम्प्यूटर के व्यवस्था करे जात हे। मुख्यमंत्री ह बतइन कि नवा रईपुर ल आईटी, एआई, फार्मा अउ मेडिकल हब के रूप म विकसित करे जात हे।
समारोह म आने-आने शासकीय विभाग डहार ले योजना मन उपर आधारित झांकी निकाले गीस।
गणतंत्र दिवस-छत्तीसगढ़
अइसने, उपमुख्यमंत्री अरूण साव ह जगदलपुर म, विजय शर्मा ह अंबिकापुर म, केंद्रीय राज्य मंत्री तोखन साहू ह दुर्ग म अउ विधानसभा अध्यक्ष डॉ. रमन सिंह ह राजनांदगांव म होवइया गणतंत्र दिवस समारोह म सामिल होके झंडा फहराइन। एखर अलावा प्रदेस के आने जिला मुख्यालय मन म घलो राज्य शासन के मंत्री, सांसद अउ विधायक मन ह झंडा फहराइन।
उहें, नवा रईपुर स्थित जनसंपर्क संचालनालय म जनसंपर्क आयुक्त डॉ. रवि मित्तल ह राष्ट्रीय ध्वज फहराइन।
माओवाद-गणतंत्र दिवस
संवेदनसील अउ नक्सल प्रभावित क्षेत्र सुकमा जिला के दुर्गम पहाड़ी इलाका के जेन जघा ल लंबा समय तक माओवादी मन के गढ़ माने जात रिहीस, उंहा आज घलो गणतंत्र दिवस के परब खुसी के संग मनाय गीस। गोगुंदा के पहाड़ी म आजादी के बाद पहिली बार सीआरपीएफ के चौहत्तरवां बटालियन के जवान मन ह झंडा फहराइन। अइसने सीआरपीएफ के एक सौ पचासवां बटालियन के जवान मन ह पालागुड़ा, पूवर्ती अउ टेकलगुड़ा जइसन अतिसंवेदनसील इलाका म घलो राष्ट्रीय ध्वज फहराय गीस। उहें, सीआरपीएफ ह गुंडराजगुड़म म घलो झंडा फहराके स्थानीय लोगन मन संग समन्वय बढ़ाय बर आने-आने कारीकरम आयोजित करे गीस।
जवान-घायल
बीजापुर-तेलंगाना सीमा म स्थित कर्रेगुट्टा पहाड़ी क्षेत्र म माओवादी मन डहार ले लगाय गे आईईडी के चपेट म आय ले सुरक्षा बल मन के दस जवान घायल हो गेहे। फिलहाल सबो जवान मनके हालत खतरा ले बाहिर हे।
जानबा के मुताबिक ए इलाका म माओवादी गतिविधि उपर रोक लगाय बर सुरक्षा बल के जवान लगातार सर्चिंग अभियान चलावत हे। ए दउरान काली कर्रेगुट्टा हिल्स तीर गस्त के दउरान एक के बाद एक कतकोन आईईडी विस्फेट होइस अउ एखर चपेट म आके डिस्ट्रिक्ट रिजर्व गार्ड-डीआरजी के नौ अउ कोबरा बटालियन के एक जवान घायल होगिस। घायल जवान मन ल बेहतर इलाज देर रात सेना के हेलीकाप्टर के जरिया ले रईपुर लाय गेहे। बीजापुर जिला के पुलिस अधीक्षक जितेंद्र यादव ह बतइन कि अस्पताल म घायल जवान मनके इलाज चलत हे।
दुर्घटना
जगदलपुर म राष्ट्रीय राजमार्ग क्रमांक-तीस म कुदालगाव तीर आज तेजी ले अवइया मोटर साइकल अउ कार के बीच भिडंत होगिस। ए टक्कर अतना जादा रिहीस कि मोटर साइकल सवार युवक उछल के सीधा कार के बोनट म जाके गिरीस अउ मउका म ही उंखर मउत होगिस।