प्रधानमंत्री नरेंद्र मोदी ह आज पश्चिम बंगाल के मालदा रेलवे स्टेसन ले हावड़ा अउ गुवाहाटी के बीच चलइया भारत के पहिली वंदेभारत स्लीपर ट्रेन ल हरियर झंडी दिखाके रवाना करीन। श्री मोदी ह इही रद्दा के दूसर दिसा वाले गुवाहाटी-हावड़ा वंदेभारत स्लीपर ट्रेन ल घलो वर्चुअल रूप ले झंडी दिखाइस।
ए पूरा एसी वंदेभारत स्लीपर ट्रेन ह यात्री मन ल कम किराया म हवाई यात्रा जइसन अनुभव देवाही। एखर ले लंबा दूरी के सफर तेज, सुरक्षित अउ जादा सुविधा जनक बनही। सोलह ठन कोच वाले ए ट्रेन के कुल क्षमता आठ सौ तेईस यात्री के हे। ए ट्रेन सेवा ह आम यात्री, पढ़इया, पेसेवर, प्रवासी मजदूर, व्यापारी अउ तीर्थयात्री मन बर बिसेस रूप ले लाभदायक होही।
मुख्यमंत्री-भ्रमण दल
राष्ट्रीय ग्राम स्वराज अभियान के तहत मुख्यमंत्री विष्णुदेव साय ह आज रईपुर ले बस्तर संभाग के आने-आने जिला पंचायत के चुने गे प्रतिनिधि दल ल प्रसिक्षण अउ अध्ययन भ्रमण बर मुंबई रवाना करीन। ए मउका म श्री साय ह किहीन कि ए भ्रमण के माध्यम ले पंचायत प्रतिनिधि मन ल आने राज्य के बेहतर कामकाज के जानकारी मिलही। जेखर सीधा फायदा छत्तीसगढ़ के ग्रामीण विकास म होही।
माओवादी मुठभेड़
बीजापुर जिला म आज सुरक्षाबल के संग होय मुठभेड़ म दू माओवादी मारे गेहे। एमा नेशनल पार्क एरिया कमेटी के डीवीसीएम दिलीप बेडजा ह घलो सामिल हे। घटना जघा ले दूनों माओवादी के शव के संग एके-सैंतालीस जइसन ग्रेडेड स्वचालित हथियार घलो बरामद होय हे।
जिला पुलिस अधीक्षक डॉक्टर जितेन्द्र यादव ह बतइन कि उत्तर-पश्चिम क्षेत्र के पहाड़ी इलाका म माओवादी मनके होय के सूचना म डिस्ट्रिक्ट रिजर्व गार्ड-यानी डीआरजी, कोबरा अउ स्पेसल टास्क फोर्स यानी एसटीएफ के संघरा टीम ह तलासी अभियान म निकले रिहीस। इही बीच पहिली ले घात लगाय माओवादी मन फायरिंग सुरू कर दीस। जवाबी कार्रवाई म सुरक्षाबल ह दू माओवादी मन ल मार गिराइस। समाचार लिखे जाय तक दूनों कोति ले थिरा-थिराके गोलीबारी चलत हे।
मोरध्वज आरंग महोत्सव
मुख्यमीं विष्णुदेव साय ह मोरध्वज आरंग महोत्सव के समापन समारोह म भाग लीन। ए मउका म श्री साय ह किहीन कि राजा मोरध्वज के जीवन ह छत्तीसगढ़ के सांस्कृतिक चेतना अउ नैतिक मूल्य के अमर प्रतीक हवय। जेन ह आज घलो समाज ल सत्य अउ कर्तव्य के रद्दा म चले के प्रेरणा देथे।
समारोह म मुख्यमंत्री ह क्षेत्र के विकास बर अब्बड़ अकन जरूरी घोसना घलो करीन। ओमन समोदा उप तहसील ल पूर्ण तहसील के दरजा देवाय अउ उंहा स्थायी तहसीलदार के पदस्थापना करे के घोसना करीन। श्री साय ह मोरध्वज महोत्सव बर दे जाने वाले शासकीय अनुदान के पइसा ल पांच लाख रूपिया ले बढ़ाके दस लाख रूपिया करे के ऐलान करीन। संगेसंग ओमन क्षेत्र म बनने वाला खेल परिसर सहित अब्बड़ अकन अधोसंरचना विकास काम ल झटकन पूरा करे के आस्वासन घलो दीन।
मैनपाट-आवासीय परिसर
राज्य सरकार ह पर्यटन सुविधा अउ आवासीय विकास ल बढ़ावा देबर सरगुजा जिला के मैनपाट म बारह एकड़ भुंईया ल अटल विहार योजना बर आवंटित करे हे। छत्तीसगढ़ गृह निर्माण मंडल के अध्यक्ष अनुराग सिंहदेव ह बतइन कि ए भूमि उपर नवा आधुनिक अउ बहुउपयोगी पर्यटन आवासीय परिसर के निर्माण करे जाही। प्राकृतिक परिवेस म विकसित होवइया ए परियोजना मैनपाट आने वाले घूमइया मन ल सुघ्घर, सुरक्षित अउ कम पइसा म रूके के जघा देवाही।
ओमन बतइन कि ए परियोजना के तहत केरल माडल उपर आधारित वेलनेस सेंंटर, प्राकृतिक पंचकर्म चिकित्सा, हर्बल स्पा अउ आयुष सेवाएं प्रस्तावित हे। संगेसंग क्लब हाउस, मिलेट्स कैफे, जिम, स्वीमिंग पुल, किड्स प्ले एरिया, स्टीम बाथ अउ एंटरटेनमेंट जोन बनाय जाही। श्री सिंहदेव ह बतइन कि पर्यावरण अनुकूल बिकास ल धियान म राखत हुए ट्री हाउस, कॉटेज के संगेसंग स्थानीय जीवन अउ संस्कृति के अनुभव कराने वाला सांस्कृतिक जघा घलो विकसित होही।
बस्तर-पंडुम
बस्तर अंचल के आदिवासी संस्कृति, पारंपरिक छत्तीसगढ़ी खान-पान अउ रीति रिवाज ल दुनिया के आगू लाय के उद्देस्य ले बस्तर जिला के आने-आने विकासखंड म बस्तर पंडुम के आयोजन करे जावत हे। एमा बस्तर जिला के छिंदावाड़ा, बड़े किलेपाल अउ छोटे आरापुर म होय बस्तर पंडुम म पारंपरिक आदिवासी नाच, संस्कृति अउ खई-खजेना के प्रदर्सन करे गीस। संगेसंग बस्तर के जंगल म होवइया दुर्लभ कंदमूल के एक बड़का श्रृंखला घलो देखाय गीस। एखर अलावा जुन्ना इलाज के पध्दति ल खास जघा दे गीस।
कारीकरम ल संबोधित करत हुए बस्तर सांसद महेश कश्यप ह किहीन कि बस्तर के संस्कृति अउ परंपरा ल बनाय बर अब्बड़ अकन पीढ़ी लगे हे। ओमन बस रीति-रिवाज ल नही फेर प्राकृतिक संसाधन ल घलो बचाके राखे हे।
उहें, चित्रकोट विधायक विनायक गोयल ह किहीन कि बस्तर पंडुम के माध्यम ले आदिवासी खाई-खजेना अउ रीति-रिवाज दुनिया के आगू आवत हे। केंद्र अउ राज्य सरकार ह एक अइसन मंच देहे, जेखर ले बस्तर के पहिचान ल देस अउ विदेस तक सम्मान मिलत हे।
जगदलपुर विधायक किरण सिंहदेव ह घलो कारीकरम ल संबोधित करीन।
एनआईटी-स्टार्टअप दिवस
कारीकरम ल संबोधित करत हुए एनआईटी के निदेशक एन.वी. रमना राव ह स्टार्टअप इंडिया पहल के पाछू एक दसक के उपलब्धि ल बतइन। उहें, कुल सचिव डॉक्टर एन.डी.लोड़हे ह एनआईटी के स्थापना ले लेके अभी के अनुसंधान अउ नवाचार आधारित समय तक के बिकास यात्रा के बारे म गोठियाइन।
चित्रोत्पला फिल्म सिटी
मुख्यमंत्री विष्णुदेव साय ह इक्कीस जनवरी के नवा रईपुर के माना-तूता जघा म बनइया चित्रोत्पला फिल्मसिटी एंड कन्वेंशन सेंटर के भूमिपूजन करही। ए फिल्मसिटी के निर्माण बर छत्तीसगढ़ पर्यटन बोर्ड अउ मुंबई के ईगल स्टूडियोज एंटरटेनमेंट लिमिटेड के बीच अनुबंध करे गेहे।
होटल मैनेजमेंट-प्रवेश परीक्षा
नवा रईपुर स्थित स्टेट इंस्टीटयूट ऑफ होटल मैनेजमेंट के अवइया सत्र म प्रवेस बर ऑनलाइन आवेदन के प्रक्रिया सुरू हो गेहे। आवेदक मन ल आधिकारिक वेबसाइट म पंजीयन करना होही। परीक्षा ह कम्प्यूटर आधारित होही कोनो भी बिसय म बारहवीं पास या अभी पढ़त हुए विद्यार्थी मन घलो आवेदन कर सकत हे। आवेदन करे के आखिरी तारीख पच्चीस जनवरी राखे गेहे।
जिले की चिट्ठी
आकाशवाणी रईपुर के प्रादेशिक समाचार एकांश, कोति ले प्रस्तुत कारीकरम ‘‘जिले की चिट्ठी‘‘ के परसारण काली संझा छै बजके पांच मिनट ले छै बजके दस मिनट ले करे जाही। ए कारीकरम ल छत्तीसगढ़ के सबो आकाशवाणी केंद्र एके संग रिले करही। ए दारी के अंक म ‘बीजापुर‘ जिला के गतिविधि के बारे म जानकारी दे जाही।
अउ अब सुनव मौसम के हाल…
मौसम विभाग ह अवइया चौबीस घंटा के दउरान उत्तर छत्तीसगढ़ समेत मध्य छत्तीसगढ़ के एक-दू जघा म सीतलहर चले के चेतावनी देहे। अवइया चौबीस घंटा के बाद प्रदेस के न्यूनतम तापमान ह धीरे-धीरे बाढ़ही। फेर अभी लोगन ल जाड़ ले राहत मिले के संभावना नइ हे।