उहें, मुख्यमंत्री विष्णुदेव साय ह आज स्वामी विवेकानंद के जयंती के मउका म उंखर चित्र म फूल चघाके अपन श्रध्दांजलि दीन। ओमन किहीन कि स्वामी विवेकानंद के जीवन अउ विचार आज घलो भारत के युवा सक्ति बर ऊर्जा अउ आत्मविस्वास के सबले बड़े स्त्रोत हे।
मुख्यमंत्री ह किहीन कि स्वामी विवेकानंद ह युवा मन ल ए विस्वास देवइन कि ओमन ह अपन भविष्य के निर्माता खुद हे अउ किहीन कि छत्तीसगढ़ बर एहा गौरव के बात हे कि स्वामी विवेकानंद के जीवन रईपुर ले घलो जुड़े हे। इंहा के धरती म बिताय उंखर समय प्रदेस के सांस्कृतिक चेतना अउ वैचारिक परंपरा ल खास पहचान देथे।
ओति, बिलासपुर म स्वामी विवेकानंद चेतना महोत्सव के दउरान पंद्रह सौ लइका मन ह स्वामी विवेकानंद के वेशभूषा म एक संग वंदे मातरम के गायन करीन। ए मउका म लइका मन ह नशामुक्ति के सपथ लेके गोल्डन बुक ऑफ वर्ल्ड रिकॉर्ड म अपन नांव दर्ज करइन। कारीकरम म उपमुख्यमंत्री अरूण साव सामिल होइन।
मुख्यमंत्री-संकुल विकास परियोजना
मुख्यमंत्री विष्णुदेव साय ह आज राखे गे सांसद संकुल विकास परियोजना के बइठका म किहीन कि जनजातीय विकास ल ए परियोजना ले गति मिलही। ओमन किहीन कि ए योजना म लोगन ल स्व-रोजगार ले जोड़े बर बड़े पहल करे जात हे। एखर ले जनजातीय क्षेत्र के पलायन म रोक लगही। मुख्यमंत्री ह बतइन कि सांसद संकुल विकास परियोजना म गांव के कलस्टर बनाके विकास के मॉडल विकसित करे जावत हे। स्थानीय संसाधन के उचित उपयोग ले लोगन के कौशल विकास करके ओमन ल स्व-रोजगार के दिसा म आगू लाना ही ए योजना के उद्देस्य हे।
मुख्यमंत्री ह किहीन कि कृषि के संगेच मछली पालन, बकरी पालन, गौ पालन, सुअर पालन ले ग्रामीण मन ल आर्थिक रूप ले मजबूत बनाय जा सकत हे। हमर जनजातीय मनखे मन महुआ, इमली, चिरौंजी आदि वनोपज के उत्पादन करत आवत हे, जेखर मूल्य संवर्धन करके बाजार ले जोड़े जावत हे। मुख्यमंत्री ह बतइन कि सांसद संकुल विकास परियोजना म सुघ्घर काम बर नोडल अधिकारी मनके नियुक्ति करे जाही।
ए बइठका म कृषि मंत्री रामविचार संघरा सांसद विधायक अउ कतकोन बड़े अधिकारी मन मौजूद रिहीन।
एसईसीएल-एमओयू
नवा रईपुर म स्वास्थ्य कौशल विकास केंद्र के स्थापना बर साउथ ईस्टर्न कोलफील्ड्स लिमिटेड-एसईसीएल अउ श्री सत्य साई हेल्थ एंड एजुकेशन ट्रस्ट के बीच समझौता ज्ञापन म हस्ताक्षर करे गीस। ए परियोजना बर कार्पोरेट सामाजिक उत्तरदायित्व-सीएसआर कारीकरम के तहत पैंतीस करोड़ रूपिया ले जादा के वित्तीय सहायता दे जाही। ए केंद्र म शैक्षणिक भवन, छात्रावास, कर्मचारी मन बर आवासीय सुविधा मिलही। एसईसीएल के परिचालन जिला के उम्मीदवार मन ल इंहा प्राथमिकता दे जाही। ए जिला बर वार्षिक प्रवेस के कमती ले कमती बीस प्रतिसत हिस्सा पच्चीस बछर बर आरक्षित रइही, जेला प्रदर्सन के आधार म बढ़ाय जा सकत हे।
अरूण साव-लोकार्पण
उप मुख्यमंत्री अरूण साव ह धमतरी जिला म स्थित कुरूद नगर पालिका परिषद के सुभारंभ करीन। ए मउका म ओमन सत्रह करोड़ पचास लाख रूपिया ले जादा के प्रस्तावित आने-आने विकास काम के लोकार्पण अउ सिलान्यास घलो करीन। संगेसंग स्वामी विवेकानंद मंगल भवन अउ स्वामी विवेकानंद के प्रतिमा के अनावरण करीन।
खाद्य उत्पाद निर्यात विकास प्राधिकरण
रईपुर म इंडिया इंटरनेशनल राइस समिट के दउरान कृषि अउ प्रसंस्कृत खाद्य उत्पाद निर्यात विकास प्राधिकरण के क्षेत्रीय कार्यालय के उद्घाटन करे गीस। ए कार्यालय किसान, उत्पादक समूह, सहकारी संस्था अउ निर्यातक मन ल निर्यात पंजीकरण, परामर्स सेवा, बाजार के जानकारी, प्रमाणन सहायता, निर्यात सुविधा अउ अवसंरचना विकास जइसन सेवा देवाही।
ए मउका म मुख्यमंत्री विष्णुदेव साय ह किहीन कि एपीडा के स्थापना ले छत्तीसगढ़ ह उच्च मूल्य अउ सतत कृषि निर्यात म अग्रणी के राज्य के रूप म उभरही। ओमन ह राज्य सरकार के अनुरोध म छत्तीसगढ़ म एपीडा कार्यालय के मंजूरी देबर केंद्रीय वाणिज्य अउ उद्योग मंत्री पीयूष गोयल के आभार जतइन।
मुख्यमंत्री-गौरा पूजा महोत्सव
मुख्यमंत्री विष्णुदेव साय काली कोरबा जिला के महर्षि वाल्मीकि आश्रम म राखे गे गौरा पूजा महोत्सव अउ बैगा पुजेरी सम्मेलन म सामिल होइन। ए मउका म मुख्यमंत्री ह आईटीआई चौक ले बालको रोड के नांव जनजातीय गौरव पथ राखे के अउ ए रद्दा के सुरूआत म जनजातीय महापुरूष मनके प्रतिमा स्थापित करे के घोसना करीन।
मुख्यमंत्री ह बतइन कि धरती आबा ग्राम उत्कर्ष योजना बर अस्सी हजार करोड़ रूपिया अउ पीएम जनमन योजना बर चौबीस हजार करोड़ रूपिया के प्रावधान करे गेहे, जेखर ले छत्तीसगढ़ के छै हजार ले जादा गांव ल फायदा होवत हे, एखर बर राज्य म प्राधिकरण के गठन करके आदिवासी अउ पिछड़ा क्षेत्र म विकास काम ल गति दे जावत हे।
ईडी-संपत्ति अटैच
कोल लेवी घोटाला मामला म प्रवर्तन निदेशालय-ईडी ह आरोपी सौम्या चौरसिया अउ निखिल चंद्राकर ले जुड़े करीबन दू करोड़ छैंसठ लाख रूपिया के आठ ठन अचल संपत्ति ल अटैच कर देहे। ए संपत्ति म जमीन अउ रिहायसी फ्लैट सामिल हे। ए कार्रवाई के संगेच घोटाला म अभी तक ईडी डहार ले अटैच करे गे संपत्ति के आंकड़ा दू सौ तिहत्तर करोड़ रूपिया तक पहुंच गेहे। ए मामला म ईडी अभी तक ग्यारा झन ल गिरफ्तार करे हे अउ पैंतीस झन आरोपी मनके खिलाफ पांच ठन चालान बिसेस अदालत म पेस करे जा चुके हे।
निलंबन
उच्च शिक्षा विभाग ह वित्तीय अनियमितता के मामला म बड़े कार्रवाई करत नारायणपुर के शासकीय आदर्स महिला महाविद्यालय के छै झन प्राध्यापक मन ल तत्काल प्रभाव ले निलंबित कर दे गेहे। एमा महाविद्यालय के प्राचार्य डॉक्टर योगेन्द्र पटेल, सहायक प्राध्यापक भूषण जय गोयल, किशोर कुमार कोठारी, हरीशचंद बैद अउ नोहर राम के नांव सामिल हे। इंखर मन उपर कार्रवाई पीएम उषा मद ले मिले रासि के दुरूपयोग अउ शासन के निर्धारित वित्तीय नियम के पालन नइ करे के आरोप के बाद करे गेहे। निलंबन अवधि के दउरान इंखर मुख्यालय जगदलपुर के क्षेत्रीय अपर संचालक, कार्यालय निर्धारित करे गेहे अउ ओमन ल नियम के अनुसार भत्ता मिलही।
उच्च शिक्षा विभाग ह स्पष्ट करे हे कि ए मामला के विभागीय जांच करे जाही, जेखर ले दोषी मनके खिलाफ कठोर कार्रवाई करे जा सकय।
स्कूल-समय
प्रदेस म पड़त जाड़ के सेति रायगढ़ जिला के स्कूल के बेरा ल बदले गेहे। स्कूल म पहिली पाली के कक्षा अब बिहनिया साढ़े आठ बजे ले मंझनिया कुन बारह बजे तक अउ दूसर सिफ्ट के कक्षा दोपहर सवा बारह बजे ले संझा चार बजे तक लगही। उहें, एक पाली वाले स्कूल म कक्षा बिहनिया दस बजे ले लगही। ए आदेस सत्रह जनवरी तक लागू रइही।
अउ अब पेस हे मौसम के हाल…
मौसम विभाग के अनुसार फिलहाल प्रदेस म मौसम शुष्क हे। अवइया दिन म न्यूनतम तापमान म गिरावट आय ले ठंड बाढ़े के संभावना हे। उत्तरी छत्तीसगढ़ म कड़ाका के ठंड पड़ही। उहें, कुछेक जघा म घना कोहरा छाय रइही। प्रदेस म सबले कमती तापमान अंबिकापुर म पांच डिग्री सेल्सियस दर्ज करे गेहे।