प्रधानमंत्री नरेंद्र मोदी ह किहीन हे कि सोमनाथ स्वाभिमान परब सिरिफ ऐतिहासिक गौरव के उत्सव नोहे, भलूक अवइया पीढ़ी ल सोमनाथ मंदिर यात्रा ले चिन्हारी कराय के मउका हे। ओमन किहीन कि ए परब अटूट आस्था अउ समर्पण के परब हे। प्रधानमंत्री ह विभाजनकारी तत्व मन ल परास्त करे बर देसवासी मन ल एकजुट रहे के अपील करीन हे। प्रधानमंत्री ह आज गुजरात म प्रभाष पाटन म सोमनाथ स्वाभिमान परब के भव्य सौर्य यात्रा के अगुवई करीन। ओमन किहीन कि सोमनाथ के रक्षा करइया अनगिनत योध्दा मन ह अपन प्राण के आहूति देहे। श्री मोदी ह किहीन कि ए परब सिरिफ ऐतिहासिक वैभव के प्रतीक नोहे भलूक ए सोमनाथ मंदिर के अनंत यात्रा ल भावी पीढ़ी तक अमराय के मउका हे।
परीक्षा पे चर्चा
प्रधानमंत्री के परीक्षा पे चर्चा कारीकरम बर एसो अभी तक चार करोड़ ले जादा पंजीयन हो गेहे। ए आंकड़ा पाछू बछर तीन करोड़ छप्पन लाख के गिनिज वर्ल्ड रिकॉर्डस ल पार कर देहे। केंद्रीय शिक्षा मंत्री धर्मेन्द्र प्रधान ह बतइन कि ए पहल वार्षिक संवाद कारीकरम ले आगू बढ़के विद्यार्थी मन बर परीक्षा के तनाव ल दूरिहा करे के राष्ट्रव्यापी आंदोलन बन गेहे।
राष्ट्रीय युवा दिवस
काली स्वामी विवेकानंद के जयंती हरय, जउन ल राष्ट्रीय युवा दिवस के रूप म मनाय जाथे। ए मउका म उप मुख्यमंत्री अरूण साव ह किहीन कि स्वामी विवेकानंद के जयंती म राज्य म कतकोन कारीकरम राखे गे हे। जेमा जिला के स्कूल, कालेज के विद्यार्थी अउ खिलाड़ी सामिल होही।
कर्मचारी महंगाई-भत्ता
मुख्यमंत्री विष्णुदेव साय ह राज्य के अधिकारी करमचारी मनके महंगाई भत्ता पचपन ले बढ़ाके अंठावन प्रतिसत करे के घोसना करे हे। ओमन किहीन कि अब राज्य के अधिकारी मन ल केंद्र सरकार के करमचारी मनके बरोबर महंगाई भत्ता मिलही। मुख्यमंत्री ह आज राज्य कर्मचारी संघ छत्तीसगढ़ के आठवां प्रदेस अधिवेसन म ए घोसना करीन। ओमन किहीन कि ए फइसला सरकार के कर्मचारी हितैषी प्रतिबध्दता ल देखाथे अउ बाढ़त महंगाई के बीच करमचारी मन ल ए हा राहत दिही।
राष्ट्रपति-आमंत्रण
राष्ट्रपति द्रौपदी मुर्मु ह गणतंत्र दिवस म छब्बीस जनवरी के राष्ट्रपति भवन म राखे गे कारीकरम म देसभर के जउन प्रतिभा मन ल बलाय गेहे, ओमा छत्तीसगढ़ के भिलाई के छात्रा कविता साहू अउ दिव्यांग शिक्षक गौकरण पाटिल सामिल हे। छात्रा कविता साहू के चयन देसभर के चुने गे नवाचार विद्यार्थी मन म होय रिहीस। ओमन अपन स्कूल के अटल टिकरिंग लैब म एक रोबोटिक आइडिया तियार करे रिहीन, जउन ल राष्ट्रीय स्तर के प्रतियोगिता म भेजे गे रिहीस। कविता साहू ह अपन ए आइडिया के सेति कठिन मेहनत के संग देस के टाप टेन लइका मन म अपन जघा बनाय रिहीस। उहें, शिक्षक गौकरण पाटिल के चयन चित्रकला म उंखर अद्भुत दक्षता के सेति करे गेहे। भिलई के रिसाली सेक्टर निवासी गौकरण पाटिल जनम ले ही दूनो हाथ ले ही दिव्यांग हवय। ओमन न बोल सकय, न सुन सकय, फेर अपन पांव अउ मुंह के मदद ले सुघ्घर चित्र बनाके रंग भरथे। गौकरण के भाई नरेंद्र कुमार ह बतइन कि अपन ए अद्भुत प्रतिभा के सेति अभी रईपुर के कोपलवाणी स्कूल म चित्रकला शिक्षक के रूप म अपन सेवा देवत हे। गौकरण पाटिल ह ए साबित करके देखा दीन कि शारीरिक कमी कभू प्रतिभा अउ संकलप के रद्दा म बाधा नइ बन सकय। ओमन ह दीगर दिव्यांग जन मन बर प्रेरणा बन गेहे।
सिरपुर-गाइड प्रशिक्षण
सिरपुर बिसेस क्षेत्र विकास प्राधिकरण कोति ले सत्रह स्थानीय गाइड मन ल महिना भरके प्रसिक्षण खातिर ग्वालियर के भारतीय पर्यटन अउ यात्रा प्रबंधन संस्थान भेजे गेहे। ए प्रसिक्षण विरासत पर्यटन, गाइडिंग कौशल, आगन्तुक प्रबंधन, स्टोरी टेलिंग, सांस्कृतिक व्याख्या अउ जिम्मेदार पर्यटन जइसन बिसय म केंद्रित हवय। प्रसिक्षण पूरा होय के बाद गाइड अपन क्षेत्र म लहुट के पर्यटक मन ल बने जानकारी अउ अनुभव दे सकही। सिरपुर विसेस क्षेत्र विकास प्राधिकरण के मुख्य कार्यपालन अधिकारी धम्मसील गणवीर ह बतइन कि सिरपुर ल राष्ट्रीय अउ अंतर्राष्ट्रीय पर्यटन मानचित्र म स्थापित करे के दिसा म सरलग परयास करे जात हे।
बालोद-जंबूरी
बालोद जिला के दुधली म चलत भारत स्काउट्स अउ गाइड्स के राष्ट्रीय रोवर-रेंजर जंबूरी के तीसर दिन आज युवा संसद के आयोजन करे गीस। एमा रोवर-रेंजर मन ह सांसद के भूमिका निभाइन। संगेसंग लोकसभा के वास्तविक कार्रवाई के प्रत्यक्ष अउ व्यवहारिक अनुभव होइस। ए बेरा म लोकहित के मुद्दा म गोठबात करे गीस। विधानसभा अध्यक्ष डॉक्टर रमन सिंह ह युवा संसद म अध्यक्ष के भूमिका निभाइन। डॉक्टर सिंह ह युवा संसद के प्रसंसा करत किहीन कि अइसन आयोजन ले युवा मन म लोकतांत्रिक मूल्य, संसदीय परंपरा अउ जिम्मेदार नागरिक के मजबूत नींव पड़थे। जंबूरी म आज तीसर दिन प्रतिभागी मन बर कतकोन कारीकरम होइस।
ऑनलाइन ट्रेडिंग-ठगी
ऑनलाइन ट्रेडिंग अउ आईपीओ म भारी मुनाफा के लालच देके साइबर ठग कोति ले भिलाई स्टील प्लांट के सेवानिवृत्त एक अधिकारी ले अट्ठाईस लाख पचास हजार रूपिया के ठगी के मामला आगू आय हे। भिलाई नगर पुलिस ह बतइन कि ऑनलाइन ट्रेडिंग के नांव म पीड़ित ल एक व्हाट्सअप ग्रुप म जोड़े गीस, ग्रुप ले आने-आने कंपनी के सेयर म ऑनलाइन ट्रेडिंग कराय गीस। सुरू म पीड़ित ल फायदा मिलीस, एखर बाद आरोपी मन ह आईपीओ म निवेस करके जादा मुनाफा के लालच दीन। एखर बर पीड़ित के एक ऐप म अकाउंट बनाय गीस, फेर जब ओहा ऐप ले रकम निकाले के परयास करीस, तब ओला ठगी के पता चलिस। पुलिस कोति ले संदिग्ध बैंक खाता, मोबाइल नंबर, ऐप अउ डिजीटल ट्रांजेक्सन के जांच करे जात हे।
धान खरीदी
प्रदेस म किसान मन ले धान बिसाय जात हे। अभी तक करीबन सत्रह लाख पंजीयन होय किसान मनले तिरानवे लाख मीट्रिक टन ले जादा धान बिसाय गेहे। किसान मन ल धान बिसाय के बदला बीस हजार सात सौ तिरपन करोड़ रूपिया के भुगतान सोज्झे किसान मनके खाता म करे गेहे। किसान मनके सुविधा ल धियान म राखत राज्य सरकार ह टोकन व्यवस्था ल अउ जादा सरल बनाय हे। खाद्य विभाग कोति ले मिले जानकारी के मुताबिक अब टोकन सहकारी समिति ले जारी करे जात हे।
कांग्रेस प्रदर्शन
कांग्रेस पार्टी कोति ले चलाय जात मनरेगा बचाओ संग्राम अभियान म आज राजधानी रईपुर समेत प्रदेस के जिला मुख्यालय मन म कांग्रेस पदाधिकारी अउ कार्यकर्ता मन ह एक दिन उपवास राखिन। रईपुर के गांधी मैदान के कांग्रेस भवन म पूर्व मंत्री ताम्रध्वज साहू ह पत्रकारवार्ता राखिन। ओमन मनरेगा ले महात्मा गांधी के नांव हटाय जाय ल साजिस बतइन। उहें, कांग्रेस के प्रदेस अध्यक्ष दीपक बैज ह जगदलपुर म मां दंतेश्वरी मंदिर के आगू उपवास राखिन। ए दउरान ओमन जी-राम-जी योजना के नांव ल बदलके फेर ले पहिली जइसन मनरेगा करे जाय के मांग करीन।
कांग्रेस प्रवक्ता-निष्कासन
प्रदेस कांग्रेस कमेटी ह प्रवक्ता विकास तिवारी ल पार्टी के प्राथमिक सदस्यता ले छै बछर बर निष्कासित कर देहे। पार्टी के प्रदेस महामंत्री मलकीत सिंह गैदू कोति ले जारी निष्कासन आदेस म केहे गेहे कि पाछू दिन विकास तिवारी ह झीरम घाटी मामला म गठित न्यायिक जांच आयोग ल प्रदेस कांग्रेस के बड़का नेता मन ल नार्को टेस्ट कराय जाय बर अर्जी दे गे रिहीस। एखर बाद पार्टी ह ओमन ल कारण बताओ नोटिस जारी करीस, जेखर संतोषजनक जवाब नइ मिले म ए कार्रवाई करे गीस।