राष्ट्र आज पूर्व प्रधानमंत्री अटल बिहारी वाजपेयी के एक सौ एकवीं जयंती म श्रध्दांजलि देवत हे। राष्ट्रपति द्रौपदी मुर्मू, उपराष्ट्रपति सी.पी.राधाकृष्णन अउ प्रधानमंत्री नरेंद्र मोदी ह आज राष्ट्रीय राजधानी म सदैव अटल म उंखर समाधि म फूलमाला चढ़ाइन। ऐति, छत्तीसगढ़ म पूर्व प्रधानमंत्री अटल बिहारी वाजपेयी के जयंती ल सुशासन दिवस के रूप म मनाय जावत हे। ए मउका म परिचर्चा, संगोष्ठी, छायाचित्र प्रदर्सनी के संगेसंग कतकोन कारीकरम होवत हे।
राज्यपाल रमेन डेका ह लोकभवन म राखे गे कारीकरम म स्वर्गीय वाजपेयी जी के छायाचित्र म फूल चढ़ाके ओमन ल नमन करीन। मुख्यमंत्री विष्णुदेव साय ह रईपुर स्थित अपन निवास कार्यालय म स्वर्गीय वाजपेयी के प्रतिमा म माल्यअर्पन कर श्रध्दांजलि दीन। श्री साय ह किहीन कि अटल जी के पूरा जीवन राष्ट्रहित बर समर्पित रिहीस। उपमुख्यमंत्री विजय शर्मा ह कवर्धा के भाजपा कार्यालय म स्वर्गीय वाजपेयी के जीवन म आधारित छायाचित्र प्रदर्सनी के सुभारंभ करीन। ए बेरा म ओमन प्रदर्सनी ल देखत अटल जी के जीवन विचार अउ राष्ट्र निर्माण म उंखर योगदान ल सुरता करीन।
इही बीच, नवा रईपुर के छत्तीसगढ़ विधानसभा म पूर्व प्रधानमंत्री अटल बिहारी वाजपेयी के प्रतिमा म विधानसभा सचिवालय के बड़का अधिकारी अउ करमचारी मन ह फूलमाला चढ़ाके श्रध्दांजलि दीन।
अटल परिसर-लोकार्पण
पूर्व प्रधानमंत्री अटल बिहारी वाजपेयी के जयंती के मउका म आज मुख्यमंत्री विष्णुदेव साय ह रईपुर ले प्रदेस के नगरीय निकाय म नवा बने एक सौ पंद्रह अटल परिसर के वर्चुअल लोकार्पण करीन। एमा दस नगर पालिक निगम उनतीस नगर पालिका परिषद अउ छिहत्तर नगर पंचायत समेत एक सौ पंद्रह नगरीय निकाय सामिल हे।
कारीकरम म रईपुर नगर निगम ल आने-आने विकास काम बर एक सौ सत्यासी करोड़ रूपिया के मंजूरी दे गीस। ए बेरा म सांसद बृजमोहन अग्रवाल समेत रईपुर के विधायक अउ महापौर मौजूद रिहीन।
सांसद खेल-महोत्सव
प्रधानमंत्री नरेंद्र मोदी ह किहीन हे कि सांसद खेल महोत्सव ले देसभर म हजारों प्रतिभासाली खिलाड़ी आगू आवत हे। आज सांसद खेल महोत्सव के समापन मउका म वर्चुअल माध्यम ले श्री मोदी ह किहीन कि एखर दायरा अउ परभाव दूनों बहुत बड़ गेहे। प्रधानमंत्री ह किहीन कि अइसन खेल आयोजन युवा मन म हारजीत ले परे खेल भावना के विकास ल बढ़ावत हे।
ऐति, राजधानी रईपुर म राखेगे तीन दिवसीय सांसद खेल महोत्सव फिट युवा विकसित भारत आज सिरागे ए मउका म मुख्यमंत्री ह किहीन कि ए कीसम के आयोजन ले युवा पीढ़ी म खेल संस्कृति ल खेल संस्कृति ह मजबूत बनथे अउ प्रतिभासाली खिलाड़ी मन ल आगू बढ़े बर एक मंच मिलथे। श्री साय ह किहीन कि खिलाड़ी मन के सपना ल पंख देबर सरकार प्रतिबध्द हवय। अइसन आयोजन ले खेल प्रतिभा ल आगू बढ़े के सुनहरा मउका मिलत हे। ओमन भरोसा जतइन कि ए महोत्सव ले कतकोन खिलाड़ी उभर के आगू आही जउन राष्ट्रीय अउ अंतर्राष्ट्रीय स्तर म छत्तीसगढ़ अउ देस के नाव रोसन करही।
उहें, रईपुर सांसद बृजमोहन अग्रवाल ह किहीन कि ए आयोजन रईपुर लोकसभा क्षेत्र के छत्तीस ठिन जघा म सफलता ले पूरा होइस। उनतीस अगस्त ले सुरू होय ए महोत्सव म पांच सौ बयालिस गांव के पचासी हजार ले जादा खिलाड़ी मन ह भाग लीन जउन देसभर म रिकार्ड हवय।
समापन समारोह म जीतइया खिलाड़ी मन ल इनाम दे गीस। समूह खेल म अव्वल जघा बनाय टीम ल ग्यारा हजार, दूसर स्थान म आय टीम ल पांच हजार रूपिया अइसने एकल खेल म अव्वल आय खिलाड़ी ल इक्कीस सौ रूपिया अउ दूसर स्थान म रहइया खिलाड़ी ल एक हजार रूपिया के प्रोत्साहन रकम के संग पदक प्रमाण पत्र अउ टी-शर्ट दे गीस।
वीर बाल दिवस-राष्ट्रीय बाल पुरस्कार
राष्ट्रपति द्रौपदी मुर्मु काली नई दिल्ली म वीर बाल दिवस के मउका म प्रधानमंत्री राष्ट्रीय बाल पुरस्कार दिही। केंद्रीय महिला अउ बाल विकास मंत्रालय ह बताय हे कि एसो अट्ठारा ठिन राज्य अउ केंद्र शासित प्रदेस के बीस झिन लइका ल इनाम बर चुने गेहे। कारीकरम म प्रधानमंत्री नरेंद्र मोदी मौजूद रिहीन।
खबर के मुताबिक ए पुरस्कार वीरता कला अउ संस्कृति, पर्यावरण, सामाजिक सेवा, विज्ञान अउ प्रौद्योगिकी, खेल के क्षेत्र म दे जात हे।
माओवादी-मुठभेड़
ओडिसा के कंधमाल जिला म आज सुरक्षाबल संग होय मुठभेड़ म एक करोड़ रूपिया ले जादा के इनामी माओवादी नेता गणेश उइके समेत छै झिन माओवादी मारे गेहे। एमा दू महिला माओवादी घलो सामिल हे। घटना के जघा ले ए सबो के शव ल बरामद कर ले गेहे।
खबर के मुताबिक ओडिसा के स्पेसल फोर्स एसओजी अउ केंद्रीय रिजर्व पुलिस बल सीआरपीएफ के संयुक्त टीम तलासी अभियान म निकले रिहीस। इही बेरा कंधमाल जिला ले लगे राम्पा के जंगल म पहिली ले घात लगाके बइठे माओवादी मन ह सुरक्षाबल उपर गोलीबारी सुरू कर दीन। जवान मन कोति ले करे गे जवाबी कार्रवाई म छै झिन माओवादी मारे गीन। एमा ले दू झिन माओवादी के पहिचान एसीएम बारी उर्फ राकेश रायगढ़ा सुकमा अउ दूसर माओवादी प्लाटून सदस्य अमृत बीजापुर छत्तीसगढ़ के रूप म करे गेहे। घटना के जघा ले रिवाल्वर, रायफल अउ वॉकी-टॉकी समेत आने माओवादी जिनिस बरामद करे गेहे।
मुख्यमंत्री उत्कृष्टता-पुरस्कार
मुख्यमंत्री विष्णुदेव साय ह आज जिला अउ विभाग ले दस ठिन नवाचार ल चुनके मुख्यमंत्री उत्कृष्टता पुरस्कार बर देहे। ए पुरस्कार राज्य के आने-आने जिला अउ विभाग कोति ले लागू करे गे नवाचार ल सम्मानित करे बर दे जाही। जउन मन शासन-प्रशासन ल जादा प्रभावी पारदर्सी अउ नागरिक मन बर बनाय खातिर महत्ता के भूमिका निभाय हे। ए पुरस्कार बर आने-आने जिला अउ विभाग ले तीन सौ बारह नवाचार मिले हे, जेमा दू सौ पचहत्तर जिला ले अउ सत्ताईस ठिन राज्य स्तरीय विभाग ले हवय।
जिला श्रेणी म दंतेवाड़ा, जशपुर, मोहला-मानपुर, अंबागढ़-चौकी, गरियाबंद अउ नारायणपुर ल चुने गेहे। उहें, विभागीय श्रेणी म शिक्षा, वाणिज्य, उद्योग, वाणिज्य कर आबकारी, वन अउ जलवायु परिवर्तन अउ पंचायत ग्रामीण विकास विभाग ल मुख्यमंत्री उत्कृष्टता पुरस्कार ले सम्मानित करे जाही।
मुख्यमंत्री ह किहीन कि शासन म नवाचार कोनो कीसम के विकल्प नोहय भलूक समय के जरूरत अउ प्रशासन के जिम्मेवारी हे। ओमन किहीन कि जउन नवाचार के सम्मान के आज घोसना करे गेहे ओ सिरिफ व्यक्तिगत उपलब्धि नोहय भलुक भविष्य उन्मुख शासन बर अनुकरणीय हवय।
खबर के मुताबिक ए पुरस्कार बर दू स्तरीय चयन म पहिली पारी म पचपन ठिन नवाचार ल चुने गे रिहीस। ओमा ले तेरह ठिन नवाचार ल चुने गीस। आखिर म दस विजेता नवाचार ल चुने गीस। एमा जिला विभागीय श्रेणी ले समान संख्या म प्रविष्टी सामिल रिहीस।
सीबीआई-कार्रवाई
सीबीआई के टीम ह बीजापुर जिला मुख्यालय के एक होटल म पाछू रतिहा दबिस देके डाक विभाग ले जुडे़ चार झिन करमचारी मन ल रिस्वत लेत गिरफ्तार करे हे। आरोपी मनके तीर ले चालीस हजार रूपिया नगदी बरामद करे गेहे। गिरफ्तार करे गे आरोपी म पोस्ट आफिस सब डिवीजन इंस्पेक्टर शास्त्री कुमार पैकरा समेत मलोत सोभन अंबेडकर सिंह अउ संतोष एंड्रीफ सामिल हे।
अरावली पर्वतमाला विशेष बातचीत
आकाशवाणी केंद्र रईपुर कोति ले अरावली पर्वतमाला ल लेके केंद्रीय पर्यावरण वन अउ जलवायु परिवर्तन मंत्री भूपेन्द्र यादव ले बिसेस गोठबात करे गेहे। ए कारीकरम के प्रसारण रतिहा आठ बजे ले आठ बजके पंद्रह मिनट तक करे जाही। एला छत्तीसगढ़ स्थित सबो आकाशवाणी केंद्र एक संघरा रिले करही।
क्रिसमस
क्रिसमस के तिहार आज छत्तीसगढ़ समेत देसभर म उछाह के संग मनाय जात हे। ए मउका म राष्ट्रपति द्रौपदी मुर्मु, उपराष्ट्रपति सी.पी.राधाकृष्णन, प्रधानमंत्री नरेंद्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह लोगन ल बधई अउ सुभकामना दीन हे। राजधानी रईपुर समेत प्रदेसभर म क्रिसमस के परब के उछाह देखे जात हे। आज राजधानी के बैरन बाजार समेत प्रदेस के आने गिरजा घर म बिसेस प्रार्थनासभा राखे गीस अउ लोगन एक-दूसर ल क्रिसमस के बधई दीन। ए बेरा म गिरजा घर ल बिसेस रूप ले सजाय गेहे।