केंद्रीय मंत्रिमंडल ह जनगणना दू हजार सत्ताईस बर ग्यारा हजार सात सौ अट्ठारा करोड़ रूपिया के बजट ल मंजूरी देहे। सूचना अउ प्रसारण मंत्री अश्विनी वैष्णव ह आज नई दिल्ली म संवाददाता मनले किहीन कि जनगणना दू हजार सत्ताईस दू चरण म कराय जाही। ए देस के सोलहवां अउ आजादी के बाद ले आठवां जनगणना होही।
श्री वैष्णव ह किहीन कि भारत के जनगणना विश्व के सबले बड़का प्रशासनिक अउ अउ सांख्यिकीय प्रक्रिया हरय। एखर तहत जातिगत गणना घलो कराय जाही। श्री वैष्णव ह किहीन कि ए पहिली डिजीटल जनगणना होही। एंड्रॉइड अउ आई ओ एस दूनों मोबाइल एप्लीकेसन के माध्यम ले डेटा संग्रह करे जाही। श्री वैष्णव ह किहीन कि जनगणना कार्य म तीस लाख कर्मी मन ल लगाय जाही।
अमित शाह बस्तर ओलंपिक
बस्तर ओलंपिक के काली होवइया समापन समारोह म केंद्रीय गृह अउ सहकारिता मंत्री अमित शाह के मुख्यअतिथि के रूप म सामिल होना प्रस्तावित हरय।
बतादन कि बस्तर ओलंपिक के तहत संभाग स्तरीय प्रतियोगिता काली ग्यारा दिसंबर ले सुरू होय हे, एखर सुभारंभ काली मुख्यमंत्री विष्णुदेव साय ह जगदलपुर म करे रिहीन।
संभाग स्तरीय प्रतियोगिता म कुल आठ टीम म भाग लेवत हे, जेमा बस्तर संभाग के जम्मो सात जिला के अलावा आत्मसमर्पित नक्सली अउ नक्सली पीड़ित के एक टीम घलो सामिल हे।
बस्तर ओलंपिक के तहत कुल ग्यारा खेल के प्रतिस्पर्धा होवत हे। अब एमा एथलेटिक्स, तीरांदाजी, हॉकी, कबड्डी, फुटबाल, खो-खो, बॉलीबॉल, बैडमिंटन, कराते, रस्साकसी अउ वेटलिफ्टिंग सामिल हे। ए प्रतिस्पर्धा म करीबन साढ़े तीन हजार खिलाड़ी हिस्सा लेवत हे।
शिक्षा मंत्री-समीक्षा बैठक
स्कूल शिक्षा मंत्री गजेन्द्र यादव ह अधिकारी मन ल निरदेसित करीन ए जम्मो शिक्षक अउ कर्मचारी मन बर ऑनलाइन बायोमैट्रिक उपस्थिति अनिवार्य करे जाय। अेामन बइतन कि समय म उपस्थिति सुनिश्चित कराय बर विभाग कोति ले कड़ा निगरानी रखे जात हे।
श्री यादव ह स्कूल शिक्षा विभाग के संभाग स्तरीय बइठका लीन। ए मउका म ओमन स्कूल के निरीक्षण बर तियार ऐप ल लॉन्च करीन। मंत्री श्री यादव ह शिक्षा के गुणवत्ता म सुधार बर स्कूल मनके सरलग निरीक्षण करे के निरदेस दीन। ओमन जम्मो जिला मन ल अवइया तीन साल बर एक ठिन समग्र कार्य योजना तियार करे बर किहीन।
इही बीच, स्कूल शिक्षा मंत्री श्री यादव ह काली दुरूग म अग्निवीर भर्ती के ऑनलाइन लिखित परीक्षा म उत्तीर्ण उनतीस झन अभ्यर्थी मन ल सम्मानित करीन। एमा उन्नीस अभ्यर्थी अग्निवीर के रूप म भारतीय थल सेना म चयनित होइन, जबकि एक-एक अभ्यर्थी भारतीय नौसेना अउ भारतीय वायुसेना म सफल होइन। एखर अलावा आठ झिन दूसर अभ्यर्थी छत्तीसगढ़ पुलिस म चयनित होय हे।
सांसद कला संगीत विश्वविद्यालय
राजनांदगांव लोकसभा क्षेत्र के सांसद संतोष पांडेय ह लोकसभा म खैरागढ़ स्थित इंदिराकला संगीत विश्व विद्यालय ल केंद्रीय विश्वविद्यालय के दर्जा दे जाय के मांग रखे हे। सांसद ह किहीन कि इंदिराकला संगीत विश्वविद्यालय भारतीय शास्त्रीय संगीत, ललित कला, नृत्य, संस्कृति अउ शोध के प्राचीन अउ प्रतिष्ठित केंद्र हरय। ओमन किहीन कि विश्व विद्यालय के ऐतिहासित महत्व, अकादमिक उत्कृष्टता अउ कला संरक्षण म एखर योगदान ल देखत एला केंद्रीय विश्वविद्यालय के दर्जा दे जाना जरूरी हे। ए कदम क्षेत्र के कलाकार, शोधकर्ता, विद्यार्थी अउ संपूर्ण सांस्कृतिक विरासत बर महत्वपूर्ण साबित होही।
मुख्यमंत्री-विमोचन
मुख्यमंत्री विष्णुदेव साय ले राजधानी रईपुर स्थित उंखर निवास म अंतर्राष्ट्रीय संस्था इंटरनेशनल इंस्टीट्यूट ऑफ सस्टेनेबल डेवलपमेंट अउ स्वनिति इनिशिएटिव के शोधकर्ता मन सौजन्य भेंट करीन। ए दउरान मुख्यमंत्री ह शोधकर्ता मन संग राज्य म नवीकरणीय ऊर्जा के प्रसारा, ऊर्जा सुरक्षा अउ सतत विकास के दिसा म छत्तीसगढ़ सरकार के रणनीति उपर बिस्तार पूर्वक चर्चा करीन।
माओवादी-आत्मसमर्पण
सुकमा जिला म आज दस माओवादी मन आत्मसमर्पण करे हे। एमा छै महिला माओवादी घलो सामिल हे। ए जम्मो माओवादी मन उपर कुल तैंतीस लाख रूपिया के इनाम घोसित रिहीस। बस्तर रेंज के पुलिस महानिरीक्षक सुंदरराज पी. ह बतइन कि ए माओवादी मन एके फोर्टि सेवन, दू एसएलआर रायफल, एक स्टेन गन, एक बीजीएल लॉन्चर के संग आत्मसमर्पण करे हे। आत्मसमर्पित माओवादी मन ल शासन के पुर्नवास नीति के तहत पचास-पचास हजार रूपिया के प्रोत्साहन रासि दे जाही।
एसआईआर
भारत निर्वाचन आयोग ह छत्तीसगढ़ म गणना फारम भरे के आखिरी तारीख ल बढ़ाके अट्ठारा दिसंबर तक कर देहे। अइसने, छत्तीसगढ़ म अब लोगन मन अपन गणना प्रपत्र अट्ठारा दिसंबर तक भरके बीएलओ करा जमा कर सकत हे।
इही बीच, दुरूग के जिला कलेक्टर अभिजीत सिंह ह बतइन कि दुरूग जिला म गणना प्रपत्र के संग्रहण अउ ओखर डिजीटलीकरण के काम सतप्रतिसत कर ले गेहे। संशोधित कारीकरम के अनुसार एक हफ्ता के अतिरिक्त समय के उपयोग अनुपस्थित पाय गे, स्थानांतरित हो चुके या जेखर मृत्यु हो चुके हे, अइसे मतदाता मनले जुड़े दस्तावेज ल अपडेट करे म करे जाही। मतदाता सूची ल त्रुटि रहित बनाय बर राजनीतिक दल के बूथ लेवल अधिकारी बीएलओ के मदद घलो ले जात हे।
स्वच्छता दीदी-ई-रिक्शा
उद्योग मंत्री लखनलाल देवांगन ह कोरबा म राखे गे कारीकरम म अस्सी झन स्वच्छता दीदी मन ल ई-रिक्शा के वितरण करीन। ए मउका म श्री देवांगन ह किहीन कि सहर के सफाई म हमर स्वच्छता दीदी मनके भूमिका अत्यंत महत्वपूर्ण हरय। ओमन किहीन कि ए ई-रिक्शा के उपयोग ले डोर-टू-डोर अपसिष्ट संग्रहण के कार्य म स्वच्छता दीदी मनके मेहनत अउ समय के बचत होही।
बातों बातों-में
रायपुर साहित्य उत्सव
अवइया तेईस जनवरी ले नवा रईपुर म होवइया रईपुर साहित्य उत्सव बर राज्यशासन ह सलाहकार समिति के गठन कर देहे। ए समिति म नौ सदस्य बनाय गेहे।
बतादन कि रईपुर साहित्य उत्सव के आयोजन नवा रईपुर म तेईस ले पच्चीस जनवरी तक होही, जेमा देसभर ले सौ ले जादा प्रतिष्ठित साहित्यकार सामिल होही। ए उत्सव म कुल ग्यारा सत्र सामिल होही, जेमा साहित्यकार अउ प्रतिभागी मनके बीच सीधा संवाद अउ बिचार विमर्स होही।
सिटीजन साइंस बर्ड सर्वे
बारनवापारा वन्यजीव अभ्यरण्य म सोलह ले अट्ठारा जनवरी दू हजार छब्बीस तक सिटीजन साइंट बर्ड सर्वे के आयोजन करे जाही। वन मंडलाधिकारी धम्मशील गणवीर ह बतइन कि ए सर्वे के उद्देस्य छत्तीसगढ़ के समृध्द पक्षी विविधता के वैज्ञानिक दस्तावेजीकरण करना, नागरिक अउ वैज्ञानिक मनके भागीदारी बढ़ाय के संघरा दीर्घकालिक संरक्षण कार्य ल मजबूत बनाना हे। ओमन बतइन कि अब तक कुल एक सौ पैंतीस आवेदन प्राप्त होय हे, जेमा छत्तीसगढ़ समेत देस के बारह राज्य के प्रतिभागी मन पंजीकरण कराय हे। सर्वे बर पंजीकरण के आखिरी तारीख पंद्रह दिसंबर निर्धारित करे गेहे।
पर्यटन बोर्ड-स्लोगन प्रतियोगिता
छत्तीसगढ़ पर्यटन बोर्ड डहार ले राज्य स्थापना के रजत जयंती बछर के मउका म पंद्रह दिसंबर तक ऑनलाइन स्लोगन प्रतियोगिता के आयोजन करे जात हे। प्रतियोगिता के उद्देस्य छत्तीसगढ़ के प्राकृतिक सौंदर्य, सांस्कृतिक विरासत अउ पर्यटन स्थल ल नवा रूप म आगू लाना हे। प्रतिभागी मन ल छत्तीसगढ़ के पर्यटन, संस्कृति, सौंदर्य विरासत उपर स्लोगन लिखना होही। प्रतियोगिता म सोलह बछर या ओखर ले जादा आयु के प्रतिभागी ऑनलाइन माध्यम ले अपन प्रविष्टि भेज सकही। विजेता मनके घोसना उन्नीस दिसंबर के करे जाही। विजेता मन ल पुरस्कार अउ प्रमाण पत्र दे जाही।