नवा रायपुर के भारतीय प्रबंधन संस्थान म काली ले तीस नवंबर तक पुलिस महानिदेशक-महानिरीक्षक मनके साठवां अखिल भारतीय सम्मेलन कराय जाही। ए सम्मेलन के दूसर अउ तीसर दिन प्रधानमंत्री नरेन्द्र मोदी घलो सामिल होही। श्री मोदी विशिष्ट सेवा बर राष्ट्रपति पुलिस पदक दीहीं। ए सम्मेलन म केन्द्रीय गृहमंत्री अमित शाह, राष्ट्रीय सुरक्षा सलाहकार अजीत डोभाल, केन्द्रीय गृह राज्यमंत्री, राज्य अउ केन्द्रसासित प्रदेस के पुलिस महानिदेशक अउ केन्द्रीय पुलिस संगठन के प्रमुख मन भाग लीहीं। उहें, गृह विभाग के प्रमुख अउ डीआईजी अउ पुलिस अधीक्षक स्तर के कोनों-कोनों पुलिस अधिकारी मन ह ए सम्मेलन म भाग लीहीं।
‘विकसित भारत सुरक्षा आयाम‘ विषय उपर होवइया ए सम्मेलन के उद्देश्य अभी तक प्रमुख पुलिस चुनौती ले निपटे म होय प्रगति के समीक्षा करना अउ विकसित भारत के राष्ट्रीय दृष्टिकोण के अनुसार ‘सुरक्षित भारत‘ बनाय बर रोडमैप तैयार करना हे। सम्मेलन म वामपंथी उग्रवाद, आतंकवाद के मुकाबला, आपदा प्रबंधन म, महिला सुरक्षा अउ पुलिसिंग म फोरेंसिक विज्ञान अउ एआई के उपयोग जइसन मुद्दा उपर चर्चा करे जाही। ए सम्मेलन देसभर के बड़े पुलिस अधिकारी अउ सुरक्षा प्रशासक मन ल राष्ट्रीय सुरक्षा के मुद्दा उपर विचार-विमर्श बर मंच प्रदान करही। ए पुलिस बल बर अपराध ले निपटे के, कानून-व्यवस्था बनाय के अउ आतंरिक सुरक्षा खतरा ले निपटे बर रद्दा देखाही।
नवा रायपुर के भारतीय प्रबंधन संस्थान-आईआईएम म काली ले होवइया पुलिस महानिदेसक-महानिरीक्षक मनके अखिल भारतीय सम्मेलन के तैयारी लगभग पूरा होगे हवय। सम्मेलन के सबो तैयारी के कमान इंटेलीजेंस ब्यूरो ह संभाले हे। उहें, स्पेशल प्रोटेक्शन ग्रुप-एसपीजी ह कार्यक्रम स्थल के निरीक्षण करीस। रायपुर वितानतल ले नवा रायपुर के आईआईएम तक कड़ा सुरक्षा व्यवस्था करे गेहे।
प्रधानमंत्री अउ वीवीआईपी के सुरक्षा ल देखत जिला प्रशासन ह आदेस जारी करत भारी अउ मध्यम गाड़ी मनके आय-जाय म अस्थाई रूप म रोक लगाय हे। कलेक्टर डहार ले जारी आदेस के अनुसार अट्ठाईस ले तीस नवंबर तक हर दिन बिहनिया पांच बजे ले रतिहा बारह बजे तक नवा रईपुर क्षेत्र के सबो रद्दा म भारी अउ मध्यम गाड़ी मनके अवई-जवई म रोक रइही। ए सम्मेलन म पुलिस के आधुनिकीकरण, सुरक्षा तंत्र के मजबूती अउ नवा तकनीक के उपयोग उपर प्रस्तुतिकरण होही।
मुख्यमंत्री विष्णुदेव साय ह किहीन हे कि छत्तीसगढ़ पहिली घांव ए आयोजन के मेजबानी करत हे, जउन ह राज्य बर बड़े उपलब्धि हरय।
जशपुर-किसान महतारी सम्मेलन
जशपुर जिला के नारायणपुर म आज किसान-महतारी सम्मेलन के आयोजन करे गीस। ए सम्मेलन म मुख्यमंत्री विष्णुदेव साय सामिल होइन अउ ओमन ह किसान अउ माईलोगिन मन ले गोठबात बात करीन। ए मउका म श्री साय ह अस्सी करोड़ रूपिया ले जादा के विकास काम के लोकार्पण अउ भूमिपूजन करीन। कार्यक्रम म मुख्यमंत्री ह किहीन कि राज्य सरकार ह किसान अउ माईलोगिन मन ल आगू बढ़ाय बर काम करत हे।
राज्य युवा आयोग-वेबसाइट
उपमुख्यमंत्री अउ खेल तथा युवा कल्याण मंत्री अरूण साव ह आज राज्य युवा आयोग के वेबसाइट ल लांच करीन। ए मउका म ओमन किहीन कि ए वेबसाइट ले युवा मन ल युवा आयोग के काम अउ रोजगार ले जुड़े महत्वपूर्ण जानकारी मिल सकही। ए वेबसाइट म युवा मन अपन सुझाव घलो दे सकही।
श्रम संहिता
केन्द्र सरकार डहार ले लागू चार ठन नवा श्रम संहिता के आने-आने संगठन मन ह स्वागत करीन हे। बालको बेरोजगार संघ के महासचिव सुशील निर्मलकर ह किहीन कि नवा श्रम कानून ले मजदूर मनके भलई होही। संगेसंग असंगठित क्षेत्र के मजदूर मन घलो एखर दायर म आही।
कबड्डी-संजू देवी
बांग्लादेश के ढाका म सत्रह ले चौबीस नवंबर तक राखे गे महिला कबड्डी विश्व कप प्रतियोगिता म भारतीय टीम म सामिल छत्तीसगढ़ के कोरबा जिला के संजू देवी ल मोस्ट वैल्यूएबल प्लेयर के खिताब मिले हे। फाइनल मुकाबला म भारतीय टीम म कुल पैंतीस नंबर मिलीस, जेमा ले सोलह नंबर ल अकेल्ला संजू देवी ह देवाय हे।
रईपुर म मुख्यमंत्री विष्णुदेव साय ले उंखर निवास म संजू देवी ह भेंट करीन। ए दउरान मुख्यमंत्री ह विश्व कप म सुघ्घर प्रदर्सन बर संजू देवी ल अपन सुभकामना दीन अउ किहीन कि उंखर उपलब्धि अवइया पीढ़ी ल खेल के क्षेत्र म आगू बाढ़े बर प्रेरित करही।
आज नवा रईपुर म पत्रकार मन ले चर्चा करत उपमुख्यमंत्री अरूण साव ह बतईन कि संजू देवी ह महिला कबड्डी विश्व कप म भारत ल ऐतिहासिक जीत दिलाय म बड़े भूमिका निभाय हे।
रेलवे-स्वच्छता
रायपुर रेलमंडल म स्वच्छता अउ कचरा प्रबंधन उपर विशेष स्वच्छता अभियान चलाय जावत हे। ए अभियान म सबो प्रमुख स्टेसन ले जाने वाला गाड़ी मन म ओबीएचएस स्टाफ अउ पैंट्रीकार कर्मचारी मन ल स्वास्थ्य निरीक्षक मन डहार ले गार्बेज डिस्पोजल मैनेजमेंट के संबंध म प्रसिक्षण दे जावत हे। उहें, कर्मचारी मन ल नियमित अउ सुरक्षित कचरा निपटान बर घलो प्रेरित करे जावत हे। पाछु पच्चीस नवंबर के सहायक वाणिज्य प्रबंधक शेष मणि पांडे अउ वाणिज्य विभाग के टीम ह आजाद हिन्द एक्सप्रेस ट्रेन के स्टाफ ल सुरक्षित कचरा निपटान बर समझाईस दीन।
दूषित पानी-मौत/बीमार
खैरागढ़-छुईखदान-गंडई जिला के नया करेला गांव म दूषित पानी पीये ले एक झन मनखे के मउत होगीस। उहें, करीबन पचास झिन ग्रामीण मन बीमार बताय जावत हे। खैरागढ़ विकासखंड के चिकित्सा अधिकारी डॉक्टर विवेक सेन ह बतईन कि उल्टी-दस्त ले पीड़ित मरीज मनके संख्या बाढ़े के बाद स्वास्थ्य विभाग के टीम डहार गांव म स्वास्थ्य सिविर लगाके ग्रामीण मनके जांच करे जावत हे।
आईईडी विस्फोट-महिला आरक्षक घायल
सुकमा जिला म आईईडी विस्फोट के चपेट म आय ले जिला पुलिस बल के महिला आरक्षक घायल होगे हे।
मिले जानकारी के अनुसार आज मंझनिया जिला के फूलबगड़ी थाना क्षेत्र के गोगुंडा ले जिला पुलिस बल के टीम ह सर्चिंग अभियान म निकले रिहीस। ए दउरान होय आईईडी विस्फोट म महिला आरक्षक के गोड़ म गंभीर चोट आगीस। घायल महिला आरक्षक ल प्राथमिक उपचार के बाद हेलीकॉप्टर ले रायपुर लाय गेहे। इलाका म सर्चिंग अभियान चलत हे।
रेलवे-पावरलिफ्टिंग प्रतियोगिता
बीस ले चौबीस नवंबर के बीच देहरादून म राखे गे अखिल भारतीय रेलवे पावरलिफ्ंिटग प्रतियोगिता म दक्षिण पूर्व मध्य रेलवे खेल संघ के महिला टीम ह रनर-अप बनीस। टीम के खिलाड़ी मन ह अपन-अपन भार वर्ग म सुघ्घर प्रदर्सन करत एक ठन स्वर्ण, दू रजत अउ दू ठन कांस्य पदक जीतीन। संतावन किलोग्राम वर्ग म जे. रामलक्ष्मी ह स्वर्ण अउ ममता रजक ह रजत पदक जीतीन। उहें, तिरसठ किलोग्राम वर्ग म संतोषी मांझी ह कांस्य अउ चौरासी किलोग्राम वर्ग म प्रीति ह रजत अउ जानवी जगदीश ह कांस्य पदक ल अपन नाव म करीन।
जीतइया खिलाड़ी मन ह दक्षिण पूर्व मध्य रेलवे महाप्रबंधक कार्यालय जाके महाप्रबंधक तरूण प्रकाश ले भेंट करीन। ए दउरान ओमन ह खिलाड़ी मन ल सुभकामना दीन।
शीतकालीन स्पेशल ट्रेन
शीतकालीन अवकाश के दउरान यात्री मनके सुविधा ल देखत रेलवे डहार ले बिलासपुर-यलहंका-बिलासपुर के बीच पांच-पांच फेरा बर साप्ताहिक शीतकालीन स्पेशल ट्रेन चलाय जाही, जेखर परिचालन दू दिसंबर ले तीस दिसंबर तक बिलासपुर ले हर मंगलवार के करे जाही। उहें, तीन दिसंबर ले इकतीस दिसंबर तक ए ट्रेन यलहंका ले हर बुधवार के चलही। ए गाड़ी ल दक्षिण पूर्व मध्य रेलवे के बिलासपुर, भाटापारा, रायपुर, दुरूग, राजनांदगांव, डोंगरगढ़ अउ गोंदिया म स्टॉपेज दे जाही।
इफ्फी
गोवा के पणजी म राखे गे छप्पनवां भारतीय अंतर्राष्ट्रीय फिल्म महोत्सव म गोवा के मुख्यमंत्री प्रमोद सावंत ह आज लिजेंडरी सिनेमैटोग्राफर अउ फिल्म निर्माता के. वैकुंठ के सम्मान म एक ठन स्मारक डाक टिकट जारी करीन। समारोह म ओमन किहीन कि के. वैकुंठ ह भारतीय सिनेमा म अपन अमिट छाप छोड़े हे।
ए मउका म श्री वैकुंठ के बछर उन्नीस सौ सतहत्तर के डॉक्यूमेंट्री ‘‘गोवा मार्चेस ऑन‘‘ के प्रदर्सन करे गीस।