सपथ ग्रहण समारोह म उपराष्ट्रपति सी.पी.राधाकृष्णन, प्रधानमंत्री नरेंद्र मोदी, लोकसभा अध्यक्ष ओम बिरला अउ केंद्रीय मंत्री अमित शाह, राजनाथ सिंह, जे.पी. नड्डा अउ आने गणमान्य मनखे मन उपस्थित रिहीन।
माओवादी-आत्मसमर्पण
सुकमा जिला म आज पंद्रह माओवादी मन ह पुलिस अधीक्षक अउ केंद्रीय रिजर्व पुलिस बल-सीआरपीएफ अधिकारी मनके आगू आत्मसमर्पण करे हे। आत्मसमर्पित माओवादी मन म पीएलजीए बटालियन नंबर- एक के चार हार्डकोर माओवादी घलो सामिल हे। आने आत्मसमर्पित माओवादी मन म चार पीपीसीएम तीन एसीएम अउ आठ संगठन म सक्रिय सदस्य हे। एमा पांच माईलोगिन घलो सामिल हे। ए सबो माओवादी मन उपर अड़तालीस लाख रूपिया के इनाम घोसित रिहीस।
माओवादी-सरकार पत्र
माओवादी मनके महाराष्ट्र-मध्यप्रदेस-छत्ती
माओवादी संगठन के कथित पत्रकार ह अपन प्रतिक्रिया देवत हुए उपमुख्यमंत्री अउ गृहमंत्री विजय शर्मा ल कहे हे कि माओवादी अपन मांग ल लेके यदि कोनो ठोस प्रस्ताव भेजही, त सरकार ओखर उपर विचार करही।
मुख्यमंत्री-केंद्रीय खाद्य मंत्री-मुलाकात
मुख्यमंत्री विष्णुदेव साय ह आज नई दिल्ली म केंद्रीय खाद्य अउ उपभोक्ता मामला के मंत्री चिराग पासवान ले भेंट करीन। मुख्यमंत्री ह बिसेस रूप ले राज्य म खाद्य सुरक्षा, कृषि आधारित उद्योग अउ फूड प्रोसेसिंग सेक्टर ले जुडे़ जरूरी मुद्दा उपर धियान खिचिन। मुख्यमंत्री ह केंद्रीय मंत्री ले आग्रह करीन कि नेशनल इंस्टीट्यूट ऑफ फूड टेक्नोलॉजी, एंटरप्रेन्योरशिप एंड मैनेजमेंट संस्थान के स्थापना छत्तीसगढ़ म करे जाय, जेखर ले राज्य के युवा मन ल आधुनिक खाद्य तकनीक, उद्यमिता अउ नवा रोजगार ले संबंधित उच्चस्तरीय प्रसिक्षण के लाभ मिल सकय। मुलाकात के दउरान मुख्यमंत्री ह ए अनुरोध घलो करे हे कि वर्ल्ड फूड इंडिया के रीजनल समिट के आयोजन रईपुर म करे जाय।
केंद्रीय मंत्री चिराग पासवान ह किहीन कि ओमन ह ए बिसय म हर संभव सहयोग दिही अउ एमा गंभीरता ले बिचार करही।
नई श्रम संहिता
केंद्र सरकार ह श्रम कानून मन ल सरल अउ कारगर बनाय के उद्देस्य ले चार नवा श्रम संहिता ल लागू कर देहे। ए चारों श्रम संहिता मन के लागू होय ले न्यूनतम वेतन के अधिकार, माईलोगिन मन ल समान वेतन के प्रावधान, फिक्स्ड टर्म कर्मचारी मन ल ग्रेच्युटी, हरेक श्रमिक मन बर सामाजिक सुरक्षा, मुफत स्वास्थ्य जांच के सुविधा अउ जादा समय बर दुगुना वेतन जइसे बेवस्था पूरा देस म सुनिश्चित करे रिहीन।
उपमुख्यमंत्री अरूण साव ह किहीन कि ए कानून के लागू होय ले चालीस करोड़ श्रमिक मनके सुरक्षा सुनिश्चित होही। संगेसंग श्रमिक मनके जीवन स्तर म घलो सुधार आही।
उहें, भिलाई इस्पात मजदूर संघ के उपाध्यक्ष शारदा गुप्ता ह किहीन कि नवा श्रम कानून निश्चित रूप ले श्रमिक मन बर लाभकारी साबित होही।
महिला आयोग-हेल्पलाइन नंबर
राष्ट्रीय महिला आयोग ह हिंसा अउ उत्पीड़न जइसे संकट म झूझत माईलोगन मन बर तुरते अउ जादा अच्छा सहायता सुनिश्चित करे बर एक नवा हेल्पलाइन नंबर-एक चार-चार-नौ सून्य (14490) सुरू करे हे। अपन बात म आयोग ह किहीन हे कि ए टोल फ्री नंबर आयोग के मौजूदा हेल्पलाइन ले जुड़े नवा हेल्पलाइन नंबर हे, जेन हिंसा उत्पीड़न या कोनो भी प्रकार के आयोग के सरलग परयास ल मजबूत करही।
आवास मेला
मुख्यमंत्री विष्णुदेव साय काली रईपुर के शंकर नगर स्थित बीटीआई मैदान म तीन दिवसीय राज्य स्तरीय आवास मेला म छत्तीसगढ़ हाउसिंग बोर्ड के दू हजार साठ करोड़ रूपिया के आवासीय परियोजना के सुभारंभ करीन। ए पचपन परियोजना राज्य के छब्बीस जिला म सुरू होही, जेखर जरिया ले बारह हजार ले जादा किफायती अउ गुणवत्तापूर्ण मकान बनाय जाही। ए बेरा म मुख्यमंत्री ह हाउसिंग बोर्ड के एआई चैट बॉट अउ पोर्टल के घलो सुभारंभ करीन। ए जरिया ले उपभोक्ता मन ल हाउसिंग बोर्ड के आवासीय परियोजना के जानकारी सरलता ले मिल सकही।
ए बेरा म मुख्यमंत्री ह किहीन कि राज्य सरकार ह हाउसिंग बोर्ड के सात सौ नब्बे करोड़ रूपिया के कर्ज ल देके बोर्ड ल कर्जा ले मुक्त कर देहे, जेखर ले बोर्ड अच्छा रणनीति के संग काम करें। ओमन ह किहीन कि प्रधानमंत्री ग्रामीण आवास योजना के तहत दू बछर म राज्य म ए योजना के तहत छब्बीस लाख लोगन मन ल आवास के मंजूरी दे गीस। मुख्यमंत्री ह ए बेरा म आवास बुकिंग के प्रमाण पत्र, हाउसिंग बोर्ड के उपभोक्ता ल आवास के चाबी अउ फ्री होल्ड मकान के प्रमाण पत्र दीन।
ए बेरा म विधानसभा अध्यक्ष डॉ. रमन सिंह, आवास अउ पर्यावरण मंत्री ओ.पी. चौधरी के संग आने जनप्रतिनिधि उपस्थित रिहीन।
धर्मेन्द्र-निधन
जाने माने फिल्म अभिनेता धर्मेन्द्र के आज मुंबई के एक अस्पताल म निधन होगिस। ओमन नवासी बछर के रिहीन। उन्नीस सौ पैंतीस म जनमे धर्मेन्द्र ह फिलिम ‘‘दिल भी तेरा हम भी तेरे‘‘ ले अपन फिल्मी सफर के सुरूआत करीन अउ शोले, सत्यकाम, चुपके-चुपके, मेरा गांव मेरा देश, नौकर बीवी का, आई मिलन की बेला, प्रतिज्ञा, धरमवीर जइसन फिल्म के जरिया ले अपन अच्छा अभिनय के परिचय दीन। छै दसक ले जादा के करियर म ओमन ह तीन सौ ले जादा फिलिम म काम करीन। धर्मेन्द्र ल बछर दू हजार बारह म पद्मभूषण आवार्ड ले सम्मानित करे गे रिहीस।
राष्ट्रपति द्रौपदी मुर्मु, प्रधानमंत्री नरेंद्र मोदी अउ छत्तीसगढ़ के मुख्यमंत्री विष्णुदेव साय ह अभिनेता धर्मेर्न्द्र के निधन म सोक जतइन। एक सोसल मीडिया पोस्ट म प्रधानमंत्री श्री मोदी ह किहीन कि धर्मेन्द्र के निधन भारतीय सिनेमा म एक युग के अंत हे।
उहें, मुख्यमंत्री श्री साय ह किहीन कि धर्मेन्द्र ह अपन सशक्त अभिनय, सिनेमा बर समर्पण अउ विलक्षण प्रतिभा ले करोड़ो दर्सक मनके दिल म जघा बनाइन। उंखर जाना भारतीय कला जगत बर एक बड़का क्षति हे।
प्लांट-आगजनी
दुरूग जिला के नंदिनी थाना क्षेत्र के गांव मुरमुंडा स्थित एक निजी फैक्ट्री म काली रतिहा आगी लग गीस। ए दउरान फैक्ट्री के अंदर राखे केमिकल ड्रम म ब्लास्ट हो गीस। अग्निसमन अउ आपात कालीन सेवा के छै टीम ह तीन घंटा ले जादा परिश्रम करे के बाद आगी म काबू पाइन। दुरूग के अग्निसमन अउ आपाल कालीन सेवा के प्रभारी नागेंद्र कुमार सिंह ह सॉर्ट सर्किट के कारण आगी लगे के संभावना जताय हे। ए मामला म पुलिस ह जांच पड़ताल म जुटे हे।
फुटबॉल प्रतियोगिता
जगदलपुर म होवइया अखिल भारतीय फुटबॉल प्रतियोगिता के फाइनल मुकाबला रामकृष्ण मिसन नारायणपुर के टीम ह जीत ले हे। फाइनल मुकाबला म रामकृष्ण मिसन नारायणपुर के टीम ह पेनाल्टी सूट आउट म चेन्नई पुलिस तमिलनाडु के टीम ल चार-तीन ले हराके खिताब जितिन। दूनां टीम निर्धारित समय तक एक-एक गोल के बराबरी म रिहीस। निर्धारित समय तक कोनो भी टीम डहार ले बढ़त नहीं बनाय म एखर निर्णय पेनाल्टी सूट आउट के जरिया ले करे गीस।