पोषण अभियान
प्रदेस म राष्ट्रीय पोषण माह अभियान काली ले सुरू हो जही। वैश्विक महामारी कोरोना ल देखत एसो राष्ट्रीय पोषण माह ल डिजिटल जन आंदोलन के रूप म मनाय जाही। ए दउरान कुपोषण ल दुरिहा भगाय के उद्देश्य ले जन-जागरूकता बर वर्चुअल कारीकरम राखे जाही। संगेसंग सोशल मीडिया के घलो प्रयोग करे जाही। ए अभियान तीस सितंबर तक चलही।
जानबा के मुताबिक कुपोषण के स्तर म कमी लाय के उद्देश्य ले बछर दू हजार अट्ठारह ले पूरा देस म पोषण अभियान चलाय जात हे।
कोरोना-मरीज
प्रदेस म कोरोना संक्रमित मरीज मनके संख्या आज घलो बाढ़े हे। गृह मंत्री ताम्रध्वज साहू के सुरक्षा कर्मी अउ गाड़ी चलइया के कोरोना पाॅजिटिव पाय जाय के बाद गृहमंत्री ह सात दिन बर आइसोलेशन म हवय। उहें, कृषि मंत्री रविन्द्र चैबे ह घलो आइसोलेट हवय। विधायक अउ प्रदेश कांग्रेस कमेटी के अध्यक्ष मोहन मरकाम के निज सचिव के घलो कोरोना जांच रिपोर्ट पाॅजिटिव आय हे।
ऐति, जनसंपर्क आयुक्त तारण प्रकाश सिन्हा के कोरोना जांच रिपोर्ट घलो पाॅजिटिव आय हे।
त दुरूग जिला म आज चैबीस झिन नवा कोरोना संक्रमित मरीज के पुष्टि होय हे। मुख्य चिकित्सा अउ स्वास्थ्य अधिकारी ह बतईन कि कोरोना संक्रमित मन म युवा मनके संख्या बाढ़त हे। त उहें, खुर्सीपार थाना के छह झिन पुलिसकर्मी मन ह कोरोना संक्रमित होय हे। थाना प्रभारी सुरेश धु्रव ह बतईन कि थाना परिसर ल सैनिटाईज करे के बाद सील कर दे गेहे। अस्थायी रूप ले थाना परिसर म ही टेंट लगाके थाना के कामकाज करे जात हे।
उहें, बस्तर जिला म आज बीस झिन नवा कोरोना पाॅजिटिव मरीज के पहिचान करे गेहे। जेमा ले अट्ठारह झिन जगदलपुर सहर ले हवय।
ओति, जांजगीर-चांपा जिला के राहौद म पांच झिन नवा कोराना मरीज मिले हे। त बलौदा थाना के आरक्षक अउ ओखर परिवार के तीन झिन सदस्य मनके कोरोना जांच रिपोर्ट पाॅजिटिव आय के बाद थाना ल सील कर दे गेहे। इही जिला म कोरोना संक्रमण ले एक झिन माईलोगिन के मउत घलो होगे हे।
आप-आॅक्सोमीटर वितरण
आम आदमी पार्टी ह कोरोना काल म आॅक्सोमीटर के माध्यम ले लोगन मनके आॅक्सीजन लेवल के जांच करे के फइसला लेहे।
राजनांदगांव म काली पार्टी के प्रदेश अध्यक्ष ह एक ठिन कारीकरम म कार्यकर्ता मन ल आॅक्सोमीटर बांटीन। कार्यकर्ता मन ह गांव मन म जाके आॅक्सोमीटर के माध्यम ले लोगन मनके आॅक्सीजन लेवल के जांच करही।
रेस्क्यू आॅपरेशन
मुंगेली जिला के मदकूद्वीप क्षेत्र म पानी के बाढ़े ले बाढ़ म फंसे करीबन अस्सी लोगन मन ल एसडीआरएफ के टीम ह बाहिर निकाल लेहे।
जानबा के मुताबिक मदकूद्वीप के पुजारी के संग उंखर परिवार के छै झिन सदस्य मनके संगेसंग तीर-तखार के लइका अउ माईलोगिन मन संग करीबन अस्सी झिन लोगन मन बाढ़ म फंस गे रिहीन, जउन मन ल जिला प्रसासन अउ एसडीआरएफ बिलासपुर के टीम डहार ले अभियान चला के सुरक्षित जघा म पहुंचाय गीस।
ओति, जांजगीर-चांपा जिला के कुटीघाट पुलिया म अवई-जवई सुरू होगे ेहे। बाढ़ के सेती पुलिया के रेलिंग ह टूट गे रिहीस। ए पुलिया जांजगीर-चांपा जिला के मुलमुला क्षेत्र म हवय।
भगत-मुआवजा
प्रदेस म बरसा अउ बाढ़ के सेती गौठान मन ल होय क्षति अउ हितग्राही मन के गोबर के नकसान के आंकलन करके राज्य सरकार ह प्रभावित मन ल मुआवजा दीहीं। खाद्य मंत्री ह आज रईपुर म पत्रकार मन ले गोठबात करत किहीन कि राज्य सरकार ह जादा बरसा ले होय नुकसान के जांच करे के निरदेस दे हवय।
मनरेगा-पंचायत मंत्री
पंचायत अउ ग्रामीण विकास मंत्री टी.एस. सिंहदेव ह किहीन हे कि महात्मा गांधी राष्ट्रीय ग्रामीण रोजगार गारंटी योजना-मनरेगा ह कोरोना काल म गांव के अर्थव्यवस्था ल ठीक-ठाक राखे म बड़का भूमिका निभाय हे।
पंचायत मंत्री ह काली संझा आकाशवाणी रायपुर ले प्रसारित बिसेस कारीकरम ‘‘हमर ग्राम सभा‘‘ म प्रदेस म मनरेगा के तहत करे जात कामकाज के बारे म जानबा दीन। ओमन बतईन कि राष्ट्रव्यापी लाॅकडाउन के दउरान दूसर जघा ले अपन गांव आय मजूर मन ल घलो गांव म ही रोजगार देवा के ए योजना के माध्यम ले बढ़िया काम करे गीस।
माओवादी-मुठभेड़
धमतरी जिला म पाछु रतिहा सुरक्षा बल मनके संग होय मुठभेड़ म एक झिन माओवादी मारे गीस। मउका ले हथियार घलो बरामद करे गेहे।
हमर संवाददाता के मुताबिक पाछु रतिहा नगरी थाना क्षेत्र ले डिस्ट्रिक्ट रिजर्व गार्ड-डीआरजी के टीम ह तलाशी अभियान म निकले रिहीन। इही दउरान गरियाबंद जिला के सीमा ले लगे घोरागांव के जंगल म घात लगाय माओवादी मन ह फायरिंग शुरू कर दीन। जवान मन डहार ले करे गे जवाबी कार्रवाई म एक झिन माओवादी मारे गीस।
एएसआई-हत्या
बीजापुर जिला के कुटरू थाना म पदस्थ एएसआई के अपहरण के बाद हत्या कर दे गेहे। अपहरण के करीबन दस घंटा बाद एएसआई के सव ह कुटरू-बीजापुर रद्दा के केतुलनार के तीर सड़क म मिले हे।
जानबा के मुताबिक ए थाना प्रभारी ह काली मंझनिया छुट्टी लेके अपन घर जावत रिहीन। इही दउरान बीच रद्दा ले ओमन गायब होगे। तलासी के बाद ए संसो जताय जात हे कि ए थाना प्रभारी के अपहरण करे गे रिहीस।
आईजी सुंदरराज पी. ह घटना के पुष्टि करत बतईन कि काली ले गायब एएसआई के सव ह बरामद होय हे। पुलिस मामला के जांच करत हे।
सैनिक-सम्मेलन
सीमा सुरक्षा बल-बीएसएफ ह छत्तीसगढ़ म आज अपन ग्यारहवां स्थापना दिवस मनावत हे। ए मउका म भिलाई म एक ठिन सैनिक सम्मेलन कारीकरम राखे गीस, जेमा बढ़िया काम करइया अधिकारी अउ जवान मन ल सम्मानित करे गीस।
कारीकरम के बाद पत्रकार मन ले गोठबात करत बीएसएफ के महानिरीक्षक ह किहीन कि बीएसएफ ल छत्तीसगढ़ के कांकेर जिला म तैनात करे गेहे। अब तक बीएसएफ ह कांकेर जिला म सक्रिय करीबन सौ झिन माओवादी मन ल आत्मसमर्पित कराय हे। बीएसएफ ह गांव मन ल गोद ले, गांव मन म मुफत म इलाज कराय, बेरोजगार युवा मन ल स्कील डेव्लपमेंट कारीकरम के तहत रोजगार प्रसिक्षण दे जइसन काम करत हे।
वर्चुअल कान्फ्रेंस
पंजाब अउ गुजरात के पूर्व पुलिस महानिदेशक जुलियो रिबैरो ह कोरोना संक्रमण के दउरान छत्तीसगढ़ पुलिस के कामकाज के प्रसंसा करे हे। ओमन किहीन कि प्रदेस के पुलिस ह कोनों प्रकार के बल प्रयोग करे बिना लाॅकडाउन ल सफल बनाय हे, जउन ह ए बताथे कि छत्तीसगढ़ म पुलिस अउ लोगन मनके बीच विश्वास बने हवय।
श्री रिबैरो ह एक ठिन वेबीनार म ‘‘लीडरशिप ड्यूरिंग क्राइसिस‘‘ बिसय उपर वर्चुअल कान्फ्रेंस ल संबोधित करत रिहीन। वेबीनार म छत्तीसगढ़ के डीजीपी डी.एम. अवस्थी ह किहीन कि लाॅकडाउन के दउरान हमर जवान मन ह बढ़िया काम करे हे। एक डहार माओवादी मोर्चा म जवान मन ह तैनात रिहीन, त दूसर कोति लाॅकडाउन के पालन करवावत रिहीन।
बस्तर-दशहरा
पचहत्तर दिन तक चलइया विश्व प्रसिद्ध बस्तर दशहरा के दूसर रसम ‘‘डेरी गड़ाई‘‘ आज होईस। ए मउका म दंतेश्वरी मंदिर के प्रमुख पुजारी ह बेरिंग पाल ले आय मांझी चालकी डहार ले लाय गे डोडेरी के पूजापाठ करे के बाद स्तंभ रोहण करे गीस। ए मउका म बस्तर दशहरा कमेटी के अध्यक्ष सांसद दीपक बैज के संगेसंग जम्मों सदस्य चालक-चालकी अउ मांझी मुखिया मन आय रिहीन।
संक्षिप्त समाचार
अउ अब थोरकुन समाचार सार म-
– महासमुंद के पुलिस अधीक्षक ह छै झिन थाना प्रभारी के तबादला आदेस जारी करे हे, जेमा महासमुंद के संगेसंग बागबाहरा, पिथौरा, बसना, सरायपाली अउ पटेवा के थानेदार सामिल हे।
– अचानकमार टाईगर रिजर्व के कोर क्षेत्र म स्थित गांव सुरही म चीतल के अवैध सिकार करइया दू झिन आरोपी मन ल गिरफ्तार करे हे।
अउ
– महासमुंद जिला म पुलिस ह हीरा तस्करी के मामला म एक झिन मनखे ल गिरफ्तार करे हे। उंखर तीर ले तेरह नग हीरा बरामद करे गेहे।