बिहार म विधानसभा चुनई म राष्ट्रीय जनतांत्रिक गठबंधन एनडीए जीत कोति बाढ़त हे। अब तक मिले रूझान अउ परिणाम के अनुसार एनडीए ल करीबन दू सौ चार सीट म बढ़त मिले हे। एमा भारतीय जनता पार्टी बयानवे, जनता दल यूनाइटेड चौरासी, लोक जनसक्ति पार्टी-रामविलास उन्नीस, हम पांच अउ आरएलएम चार सीट म बढ़त बनाय हुए हे।
बिहार म एनडीए गठबंधन ल मिलत ऐतिहासिक बढ़त म मुख्यमंत्री विष्णुदेव साय समेत भाजपा के वरिष्ठ नेता मन घलो बधई दीन हे। श्री साय ह किहीन कि दुनिया ल लोक तंत्र के शिक्षा दे वाले बिहार के जनादेस, लोकतंत्र अउ सुशासन के जीत हे।
उहें, उपमुख्यमंत्री अरूण साव ह किहीन कि बिहार के चुनाव नतीजा ऐतिहासिक हरय।
उपमुख्यमंत्री विजय शर्मा ह किहीन कि बिहार के जनता ह एक घांव फेर विकास के साथ देहे अउ सुशासन के संग खड़ा होय के फइसला लेहे।
अइसने, भाजपा के प्रदेस अध्यक्ष किरण सिंह देव ह बिहार विधानसभा चुनई म भाजपा एनडीए के सानदार जीत ल बिहार के सुशासन मॉडल बर ऐतिहासिक बतइन।
भाजपा के प्रमुख प्रवक्ता अउ सांसद संतोष पांडेय ह किहीन कि बिहार के जीत आम जनता के एनडीए ल मिले आसिर्वाद हे।
उहें, भाजपा के प्रदेस संगठन महामंत्री पवन साय ह ए जीत ल बिहार के जनता के आकांक्षा के जीत बतइन।
धान खरीदी
प्रदेस म काली ले किसान मनले समर्थन मूल्य म धान खरीदी सुरू होही। एखर बर जम्मो केंद्र म तियारी पूरा कर ले गेहे। मुख्यमंत्री विष्णुदेव साय ह अधिकारी मन ल स्पष्ट निरदसे दीन हे कि किसान मन ल धान बेचे म कोनो भी प्रकार के परेसानी झन होवय, एखर बिसेस धियान राखे जाय। ओमन खरीदी केंद्र म किसान मनके सुविधा बर सबो जरूरी बेवस्था सुनिश्चित करे के निरदेस घलो दीन हे। जम्मों जिला म कलेक्टर के मार्गदर्सन म सहकारिता, मार्कफेड अउ खाद्य विभाग डहार ले धान खरीदी बर इंतेजाम करे गेहे।
उहें, मुख्यमंत्री विजय शर्मा ह किहीन कि प्रदेस म यहू दारी बहुत अच्छा बेवस्था के संग धान खरीदी अभियान पूरा करे जाही।
धान खरीदी बर दू हजार सात सौ उनचालीस उपार्जन केंद्र बनाय गेहे। इही बीच, राज्य म धान के अवैध परिवहन ल रोके बर दूसर राज्य के सीमा म चेकपोस्ट लगाय गेहे।
राज्य सरकार कोति ले किसान मनके सुविधा बर ‘तुहर टोकन मोबाइल ऐप‘ घलो सुरू करे गेहे। ए ऐप के माध्यम ले किसान घर बइठे धान बेचे बर टोकन ले सकत हे, जेखर ले समिति मन म लंबा लाइन ले मुक्ति मिलही। समिति म माइक्रो एटीएम के बेवस्था घलो करे गेहे।
खाद्य अउ नागरिक आपूर्ति विभाग के सचिव रीना बाबा साहेब कंगाले ह बतइन कि किसान मनके समस्या के निदान बर विभाग कोति ले ट्रोल फ्री नंबर घलो जारी करे गेहे।
बातों बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी धान खरीदी उपर केंद्रित रइही। एखर तहत खाद्य अउ नागरिक आपूर्ति विभाग के सचिव रीना बाबा साहेब कंगाले ले लेगे भेंटवार्ता के प्रसारण करे जाही। ए कारीकरम के प्रसारण काली पंद्रह नवंबर के एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
निर्माण काम-निर्देश
लोक निर्माण के सचिव डॉक्टर कमलप्रीत सिंह ह समय-सीमा म काम पूरा नइ करने वाला ठेकेदार मन उपर पेनाल्टी लगाय अउ नोटिस जारी करे के निरदेस दीन हे। सचिव ह रईपुर अउ दुरूग परिक्षेत्र के अभियंता मनके बइठका म ए निरदेस दीन। ओमन जम्मो अभियंता मन ल गुणवत्ता उपर बिसेस रूप ले धियान दे अउ फील्ड म जाके निर्माण कार्य मनके नियमित निगरानी करे बर किहीन। अेमन विभागीय कामकाज म तेजी लाय बर जम्मो कार्यालय मन ल ई-ऑफिस के माध्यम ले काम करे बर किहीन। संघरा ओमन सड़क मरम्मत के जम्मो काम अगल महिना पूरा करे के निरदेस दीन।
भगवान बिरसा मुंडा-जयंती
भगवान बिरसा मुंडा के एक सौ पचासवां जयंती काली प्रदेस के जम्मो जिला म जनजातीय गौरव दिवस के रूप म मनाय जाही। जिला मुख्यालय म आयोजित होवइया जनजातीय गौरव दिवस कारीकरम म मुख्यमंत्री, मंत्री, सांसद अउ विधायक मुख्य अतिथि के रूप म मौजूद रिहीन। जनजातीय गौरव दिवस के मउका म प्रधानमंत्री नरेंद्र मोदी के संबोधन के सीधा प्रसारण अधिकारिक यूट्यूब चैनल अउ डीडी न्यूज के माध्यम ले होही, जेला देखे अउ सुने के बेवस्था घलो कारीकरम स्थल म होही। कारीकरम के दउरान मुख्यमंत्री विष्णुदेव साय के संदेस पत्र के वाचन होही। एखर अलावा कारीकरम म ‘‘पीएम जनमन‘‘, ‘‘आदि कर्मयोगी‘‘, ‘‘धरती आबा‘‘ जइसे योजना उपर आधारित लघु फिलिम घलो प्रदर्सित करे जाही।
मुख्यमंत्री विष्णुदेव साय जगदलपुर म राखे गे कारीकरम म सामिल होही। उहें, दुरूग म उपमुख्यमंत्री विजय शर्मा, बिलासपुर म उपमुख्यमंत्री अरूण साव, रईपुर म केंद्रीय राज्य मंत्री तोखन साहू अउ राजनांदगांव म विधानसभा अध्यक्ष डॉक्टर रमन सिंह कारीकरम म मुख्य अतिथि के रूप म मौजूद रिहीन।
ए कारीकरम म जनजातीय स्वतंत्रता संग्राम सेनानी के परिजन, जनजातीय समुदाय के परमुख अउ प्रतिभासाली विद्यार्थी मन ल सम्मानित करे जाही। जनजातीय संस्कृति, कला, व्यंजन, हस्तसिल्प अउ सरकार के जनकल्याणकारी योजना के प्रदर्सनी घलो लगाय जाही। स्कूल, आश्रम साला अउ अवासीय विद्यालय म घलो ए मउका म आने-आने कारीकरम आयोजित करे जाही।
मंत्रिमंडल-निर्णय
मुख्यमंत्री विष्णुदेव साय के अध्यक्षता म आज रईपुर म कैबिनेट के अहम बइठका होइस, जेमा कई महत्वपूर्ण निर्णय ले गीस। मंत्रिमंडल ह यहू दारी प्रधानमंत्री अन्नदाता आय संरक्षण अभियान के तहत किसान मनले समर्थन मूल्य म खरीफ अउ रबी मौसम म दलहन अउ तिलहन के खरीदी करे के निर्णय लेहे। ए फसल म अरहर, मूंग, उरद, मूंगफल्ली, सोयाबीन, चना, सरसों, मसूर सामिल हे।
उहें, सरकार ह ए साल काली ले सुरू होवइया धान खरीदी अभियान के तहत विपणन संघ ल अतिरिक्त ग्यारा हजार दू सौ करोड़ के रासि देके मंजूरी देहे।
मंत्रिमंडल ह सार्वजनिक उपक्रम विभाग ल वाणिज्य अउ उद्योग विभाग म संघरा बीस सूत्रीय क्रियान्वयन विभाग ल योजना आर्थिक अउ सांख्यिकीय विभाग म सामिल करे के निर्णय लेहे। एखर अलावा मंत्रिपरिषद ह दीनदयाल आवास योजना, अटल आवास योजना, अटल विहार योजना अउ मुख्यमंत्री आवास योजना के नियम म छूट प्रदान करे हे। एखर अलावा तीन घांव विज्ञापन दे के बाद ए भवन मन ल पात्र हितग्राही मनके अलावा कोनो भी आय वर्ग के हितग्राही ल बेचे जा सकत हे, लेकिन अइसे हितग्राही मन ल शासन डहार ले दे जाने वाला अनुदान के पात्रता नइ होही।
उहें, सरकार ह नवा रईपुर के शहीद वीर नारायण सिंह अतंर्राष्ट्रीय क्रिकेट स्टेडियम ल छत्तीसगढ़ राज्य क्रिकेट संघ ल अनुबंध के अनुसार लीज म देके घलो फइसला लेहे।
चिकित्सा शिक्षा-प्रवेश नियम
चिकित्सा शिक्षा विभाग ह चिकित्सा स्नात्तकोत्तर पाठ्यक्रम के प्रवेस नियम म महत्वपूर्ण संसोधन करे हे, जेखर अनुसार अब संपूर्ण काउंसिलिंग प्रक्रिया ऑनलाइन माध्यम ले चार चरण म आयोजित करे जाही। जम्मे चरण म पंजीकरण के सुविधा उपलब्ध रइही।
अब राज्य म पंडित दीन दयाल उपाध्याय स्मृति स्वास्थ्य विज्ञान अउ आयूष विश्वविद्यालय ले उत्तीर्ण विद्यार्थी मन ल प्राथमिकता दे जाही। काउंसिलिंग के पहिली चरण म चुने गे अभ्यर्थी मन ल दूसरइया अउ तीसरइया चरण म सीट अपग्रेडेशन के विकल्प मिलही। ईडब्ल्यूएस श्रेणी म छात्र उपलब्ध नइ होय के स्थिति म बांचे सीट अनारक्षित श्रेणी के छात्र मन ल मिल सकही। दूसरइया अउ अवइया चरण म सीट आंबटन के बाद यदि अभ्यर्थी प्रवेस नइ लेवत हे, त ओमन के जमा पंजीकरण रासि जब्त कर ले जाही।