मन की बात
प्रधानमंत्री नरेन्द्र मोदी ह भारत ल हर क्षेत्र म आत्मनिर्भर बनाय बर लोगन ले अपील करे हे। आज आकाशवाणी ले ‘‘मन की बात‘‘ कारीकरम म श्री मोदी ह कहिन कि जम्मों क्षेत्र म वृद्धि दर ल तेज करना अउ देस के विकास आत्मनिर्भर भारत बर आवश्यक हे। ओमन यहू बतईन कि नवा पीढ़ी म नवाचार अउ समाधान के क्षेत्र म बहुत कुछ करे के क्षमता हे अउ हमन ल अवइया सुघ्घर भविष्य बर एखर उपयोग करे ल पड़ही।
श्री मोदी ह देस के युवा प्रतिभा मन ले भारत म इहां के समृद्ध इतिहास म आधारित कम्प्यूटर गेम तैयार करे के अपील करे हे। ओमन आत्मनिर्भर भारत अभियान बर आॅनलाइन गेम अउ खिलौना क्षेत्र ल जबर महत्वपूर्ण बताय हे। संगेसंग स्टार्ट अप कंपनी मन ले मिल के काम करे अउ भारत ल खिलौना उत्पादन म प्रमुख देश के रूप म स्थापित करे के घलो अपील करे हे। प्रधानमंत्री ह बतईन कि राष्ट्रीय शिक्षा नीति म लइका मनके जीवन म खिलौना के प्रभाव उपर काफी ध्यान दे गेहे। एखर बर खेल-खेल म सीखे, खिलौना बनाय ल सीखे अउ खिलौना बनाय के कारखाना के दौरा करे ल पाठ्यक्रम के हिस्सा बनाय गेहे।
प्रधानमंत्री ह सुरक्षा बल के सहयोगी के रूप म असाधारण योगदान देवइया स्वान उपर चर्चा करत किहीन कि हमर सुरक्षा बल के पास अइसन कतकोन बहादुर स्वान हे, जउन देस बर जीथे अउ देस बर अपन बलिदान घलो देथे। ओमन खासतौर ले छत्तीसगढ़ के बीजापुर जिला म केन्द्रीय रिजर्व पुलिस बल के स्वान क्रैकर के घलो जिक्र करीन, जे ह आईईडी विस्फोट म सहीद होगे रिहीस।
अनलाॅक 4/दिशा-निर्देश
केन्द्रीय गृह मंत्रालय ह कंटेमेन्ट जोन के बाहर के क्षेत्र म अब अउ दूसर गतिविधि खोले बर नवा दिसा-निरदेस जारी करे हे। एक सितंबर ले लागू होवइया अनलाॅक चार म अउ जादा गतविधि खोले के प्रक्रिया आगू बढ़ाय गेहे। इक्कीस सितंबर ले सौ झिन मनखे के सीमा के संग सामाजिक, शैक्षणिक, खेल मनारेंजन, सांस्कृतिक, धार्मिक, राजनीतिक कार्य अउ दूसर सभा आयोजित करे के अनुमति दे जाही। इक्कीस सितंबर ले ओपन एयर थियेटर ल घलो खोले के अनुमति होही।
केन्द्रीय गृह मंत्रालय ह केहे हे कि तीस सितंबर तक पढ़ईया अउ नियमित कक्षा मन बर स्कूल-कालेज, सैक्षिक अउ कोचिंग संस्थान बंद रइही। आॅनलाईन अउ दूरस्थ सिक्षा के अनुमति दे जाही अउ एला प्रोत्साहित करे जाही।
मनखे अउ सामान मनके राज्य के अंदर अउ राज्य म अवई-जवई आवागमन म कोनों प्रतिबंध नइ होही। अइसने आय-जाय बर अलग ले अनुमति, स्वीकृति अउ ई-परमिट के अब जरूरत नइ पड़ही।
कोरोना-मरीज
प्रदेस म कोरोना संक्रमित मरीज मिले के सिलसिला लगातार जारी हे। राजधानी रईपुर म मुख्यमंत्री भूपेश बघेल के ओएसडी के कोरोना जांच रिपोर्ट पाॅजिटिव आय हे। संगेसंग मुख्यमंत्री के पीएसओ घलो कोरोना संक्रमित पाय गेहे। मुख्यमंत्री ह अपन ट्वीट संदेस म केहे हे कि वर्तमान म उंखर रिपोर्ट निगेटिव हे। फेर ओमन ऐहतियात के तौर म चार दिन आइसोलेशन म रइही।
जानबा के मुताबिक कुछ दिन पहिली मुख्यमंत्री के सलाहकार राजेश तिवारी अउ उंखर पूरा परिवार के कोरोना जांच रिपोर्ट पाॅजिटिव आय रिहीस।
ऐति, बिलासपुर के सरकंडा थाना के दू झिन पुलिसकर्मी कोरोना संक्रमित मिले हे।
उहें, बेमेतरा विधायक अशीष छाबड़ा घलो कोरोना पाॅजिटिव पाय गेहे।
इही बीच, प्रदेस म कोरोना संक्रमित मरीज के मउत के संख्या म घलो लगातार बढ़ोतरी होवत हे। बिलासपुर जिला के सीपत थाना प्रभारी मानसिंह राठिया के आज रईपुर एम्स म उपचार के बेरा मउत होगे। एखर बाद पुलिस अधीक्षक ह सीपत थाना ल अवइया आदेस तक बंद करे के निरदेस देहे। उहें, बिलासपुर सहर के टिकरापारा इलाका म एक व्यवसायी परिवार के तीन सदस्य के कोरोना संक्रमण के मउत होगे हे।
जेइई/नीट-परीक्षा
राष्ट्रीय स्तर के प्रवेस परीक्षा जेईई अउ नीट म सामिल होवइया परीक्षार्थी मन ल परीक्षा केन्द्र तक ले जाय अउ वापस लाय बर राज्य सरकार ह निःसुल्क परिवहन व्यवस्था करही। ए बेरा परीक्षा म सामिल होवत विद्यार्थी मनके संघरा एक झिन अभिभावक ल घलो निःसुल्क यात्रा के अनुमति होही। वाहन म यात्रा करे बर परीक्षार्थी मन ल अपन प्रवेस पत्र देखाय ल पड़ही। ए संबंध म राज्य सरकार ह दिसा-निरदेस जारी करे हे। निरदेस म जिला कलेक्टर मन ल काली इकतीस अगस्त ले परीक्षार्थी मन बर बस चलाय बर केहे गेहे। संगेसंग यहू बात केहे गेहे कि परीक्षार्थी मनके संख्या कम होय म जीप अउ मिनी वैन जइसे वाहन के व्यवस्था घलो करे जा सकही।
जानबा के मुताबिक संयुक्त इंजीनियरिंग प्रवेस परीक्षा-जेईई एक सितंबर ले सुरू होवत हे। ए परीक्षा म प्रदेस के लगभग साढ़े तेरह हजार परीक्षार्थी सामिल होही। एखर बर राज्य म पांच ठिन परीक्षा केन्द्र बनाय गेहे।
पोषण अभियान
प्रदेस म राष्ट्रीय पोषण अभियान के सुरूवात एक सितंबर ले होही, जउन ह अवइया तीस सितंबर तक चलही। वैश्विक महामारी ल देखत एला डिजिटल आंदोलन के रूप म मनाय जाही। ए बेरा कुपोषण उपर जन-जागरूकता बर सोसल मीडिया के बने उपयोग के संग वर्चुअल कारीकरम आयोजित करे जाही।
बारिश
धमतरी जिला म पानी के आवक सरलग बाढ़े ले गंगरेल बांध के तीन गेट खोल दे गेहे। रेडियल गेट ले आठ हजार तीन सौ क्यूसेक पानी महानदी म अउ दू सौ पचास क्यूसेक पानी भिलाई नहर म छोड़े जावत हे। उहें, माडम सिल्ली बांध के पहिली ले खुल चुके हे। अइसने जिला के दूसर बांध दुधावा अउ सोंढूर म घलो पानी के आवक लगातार बने हवय।
ऐति, जांजगीर-चांपा जिला के शिवरीनारायण म महानदी के पानी शबरी पुल ले नीचे आ गेहे। एखर बाद मार्ग म भारी वाहन ल छोड़ के दूसर गाड़ी के आवागमन बहाल कर दे गेहे। हालांकि अभी शिवरीनारायण क्षेत्र के कई ठिन निचली बस्ती म जलभराव के स्थिति हे। ए बस्ती के प्रभावित लोगन ल राहत सिविर म ठहराय गेहे।
ऐति, बेमेतरा जिला के नांदघाट म शिवनाथ नदी उफान म हे। बारिस के सेती नांदघांट के आसपास के क्षेत्र अउ गांव टापू म बदल गेहे। उहें, करमसेन गांव के संपर्क आसपास के इलाका ले टूट गेहे।
ओति, दुरूग जिला के प्रभारी सचिव सिद्धार्थ कोमल सिंह परदेशी ह आज जिला के जलभराव वाला इलाका के निरीक्षण करीन। ओमन राहत सिविर म घलो पहुंचीन अउ प्रभावित मन ले चर्चा करीन।
इही बीच, बालोद जिला के हल्दी गांव म एक झिन अधेड़ के खरखरा नदी बहे के खबर मिले हे। फिलहाल बचाव दल अधेड़ के तलास करत हे।
उहें, राजनांदगांव जिला के कोहका म शिवनाथ नदी म डूबे ले एक युवक के मउत होगे।माओवादी-संयुक्त बैठक
प्रदेस के सीमावर्ती राज्य मध्यप्रदेश अउ महाराष्ट्र के संघरा छत्तीसगढ़ पुलिस के वरिष्ठ अधिकारी मनके बइठका काली साल्हेवारा म संपन्न होईस। बइठक म माओवादी मनके वर्तमान गतिविधि अउ भविष्य म उंखर खिलाफ संयुक्त अभियान चलाय जाय बर विचार-विमर्स करे गीस। बइठका म प्रदेस के राजनांदगांव अउ कबीरधाम, मध्यप्रदेश के बालाघाट अउ महाराष्ट्र केे सीमा ले लगे जिला के पुलिस अधिकारी मन सामिल होईन।
मोहर्रम
आशुरा-ए-मोहर्रम आज छत्तीसगढ़ के संगसेंग देस म श्रद्धा के संग मनाय जावत हे। ए दिन ल पैगम्बर मोहम्मद के नवासे हजरत इमाम हुसैन अउ उंखर साथी मनके सहादत के याद म मनाय जाथे। प्रधानमंत्री नरेन्द्र मोदी ह ए बेरा म उंखर सत्य, न्याय अउ सहादत ल नमन करीन। कोराना महामारी ल देखत ए दारी ताजिया जुलूस नइ निकाले गीस।
खेल गतिविधि-पटेल
प्रदेस के खेल अउ युवा कल्याण मंत्री उमेश पटेल ह वीडियो कान्फ्रेंसिंग के माध्यम ले राज्य के खिलाड़ी अउ प्रसिक्षक मन ले बात करीन। ए बेरा म ओमन किहीन कि संकट के बेरा म बंद पड़े खेल गतिविधि ल फेर ले सुरू करे जाही। एखर बर खेल विभाग ह रोडमैप तैयार कर डरे हे। श्री पटेल ह किहीन कि नैसर्गिंक प्रतिभा वाले युवा मनके चयन करके ओमन ल प्रसिक्षण देके व्यवस्था सुनिश्चित करे जावत हे। ओमन बतईन कि जशपुर म हाथी खेल ल बढ़ावा दे बर एस्ट्रोटर्फ बिछाय के काम सुरू होगे हे। एखर अलावा पाटन के मर्रा गांव म स्टेडियम के निर्माण करे जावत हे। संगेसंग दुरूग म जूडो एकेडमी के स्थापना घलो करे गेहे। ओमन बतईन कि ग्रामीण क्षेत्र म खेल गतिविधि ल बढ़ावा दे बर ‘‘राजीव युवा मितान क्लब‘‘ के गठन करे जावत हे।
कोरोना-जांच
राज्य सरकार ह प्रदेस के कुछ निजी लैब अउ अस्पताल ल घलो कोरोना संक्रमण के पहिचान बर जांच के अनुमति देहे। स्वास्थ्य विभाग डहार ले रायपुर के छै ठिन निजी लैब ल कोरोना संक्रमण के आरटीपीसीआर जांच बर अनुमति देहे। एमा कोर डायग्नोस्टिक लैब, डाॅक्टर लाल पैथलैब, एसआरएल, पाथ काइंड, मेट्रो पोलीस हेल्थ केयर अउ सब अर्बन लैब सामिल हे।
एखर अलावा नया रायपुर के बालको मेडिकल सेंटर अउ रायगढ़ के ओ.पी. जिंदल अस्पताल ल ट्रू नाॅट टेस्ट के अनुमति दे गेहे। संगेसंग रामकृष्ण केयर, मेडिशाईन, श्री नारायणा अउ वी.केयर अस्पताल, बिलासपुर के अपोलो अउ कोरबा के एडवांस डायग्नोस्टिक सेंटर ल रैपिड एंटीजन किट ले कोरोना जांच के अनुमति दे गेहे। कोन्हों भी मनखे ए निजी लैब अउ अस्पताल म स्वयं के खर्चा म कोराना संक्रमण के जांच करा सकत हे।